Revelation 12
The Book of Revelation
܀ ܓܠܝܢܐ ܕܝܘܚܢܢ ܝܒ ܀
1- ܘܳܐܬܳܐ ܪܰܒܬܳܐ ܐܶܬܚܰܙܝܰܬ ܒܰܫܡܰܝܳܐ. ܐܰܢ̱ܬܬܳܐ ܕܰܡܥܰܛܦܳܐ ܫܶܡܫܳܐ ܘܣܰܗܪܳܐ ܬܚܶܝܬ ܪ̈ܶܓܠܶܐ ܕܺܝܠܳܗ̇. ܘܥܰܠ ܪܺܝܫܳܗ̇ ܟܠܺܝܠܳܐ ܕܟܰܘ̈ܟܒܶܐ ܬܪܶܥܣܰܪ.
2- ܘܟܰܕ ܒܟܰܪܣܳܐ ܐܺܝܬ ܠܳܗ̇. ܩܳܥܝܳܐ ܗ̱ܘܳܬ ܘܚܳܒܠܳܐ ܘܡܶܫܬܰܢܩܳܐ ܠܡܺܐܠܰܕ.
3- ܘܶܐܬܚܰܙܝܰܬ ܐ̱ܚܪܺܬܳܐ ܐܳܬܳܐ ܒܰܫܡܰܝܳܐ. ܘܗܳܐ ܬܰܢܺܝܢܳܐ ܕܢܽܘܪܳܐ ܪܰܒܳܐ. ܕܺܐܝܬ ܠܶܗ ܪ̈ܺܝܫܶܐ ܫܰܒܥܳܐ ܘܩܰܪ̈ܢܳܬܳܐ ܥܣܰܪ. ܘܥܰܠ ܪܺܝܫܳܐ ܕܺܝܠܶܗ ܫܰܒܥܳܐ ܬܰܐܓ̈ܶܐ.
4- ܘܕܽܘܢܒܳܐ ܕܺܝܠܶܗ ܓܳܪܶܐ ܠܬܽܘܠܬܳܐ ܕܟܰܘ̈ܟܒܶܐ ܕܰܫܡܰܝܳܐ. ܘܰܐܪܡܺܝ ܐܶܢܽܘܢ ܒܰܐܪܥܳܐ. ܘܗܳܐ ܬܰܢܺܝܢܳܐ ܩܳܐܶܡ ܗ̱ܘܳܐ ܩܕܳܡ ܗܳܝ ܐܰܢ̱ܬܬܳܐ ܕܰܥܬܺܝܕܳܐ ܠܡܺܐܠܰܕ. ܐܰܝܟܰܢܳܐ ܕܶܐܡܰܬܝ ܕܬܺܐܠܰܕ ܢܶܐܟܠܺܝܘܗ̱ܝ ܠܰܒܪܳܐ ܕܺܝܠܳܗ̇.
5- ܘܝܶܠܕܰܬ ܒܪܳܐ ܕܶܟܪܳܐ ܗܰܘ ܕܰܥܬܺܝܕ ܠܡܶܪܥܳܐ ܠܟܽܠܗܽܘܢ ܥܰܡ̱̈ܡܶܐ ܒܚܽܘܛܪܳܐ ܗܰܘ ܕܦܰܪܙܠܳܐ. ܘܶܐܬܚܛܶܦ ܒܪܳܐ ܕܺܝܠܳܗ̇ ܠܘܳܬ ܐܰܠܳܗܳܐ ܘܰܠܘܳܬ ܬܪܽܘܢܽܘܣ ܕܺܝܠܶܗ.
6- ܘܗܺܝ ܐܰܢ̱ܬܬܳܐ ܥܶܪܩܰܬ ܠܡܰܕܒܪܳܐ܆ ܐܰܝܟܳܐ ܕܺܐܝܬ ܗ̱ܘܳܐ ܠܳܗ̇ ܬܰܡܳܢ ܕܽܘܟܬܳܐ ܕܰܡܛܰܝܒܳܐ ܡܶܢ ܐܰܠܳܗܳܐ܇ ܐܰܝܟܰܢܳܐ ܕܬܰܡܳܢ ܢܬܰܪܣܽܘܢܳܗ̇ ܝܰܘ̈ܡܳܬܳܐ ܐܰܠܦܳܐ ܘܡܰܐܬܶܝܢ ܘܶܫܬܺܝܢ܀
7- ܘܰܗܘܳܐ ܩܪܳܒܳܐ ܒܰܫܡܰܝܳܐ܆ ܕܡܺܝܟܳܐܶܝܠ ܘܰܕܡ̈ܰܠܰܐܟܶܐ ܕܺܝܠܶܗ ܠܡܰܩܪܳܒܽܘ ܥܰܡ ܬܰܢܺܝܢܳܐ܆ ܘܬܰܢܺܝܢܳܐ ܘܡ̈ܰܠܰܐܟܶܐ ܕܺܝܠܶܗ ܐܰܩܪܶܒܘ
8- ܘܠܳܐ ܐܶܬܡܨܺܝܘ. ܘܠܳܐ ܕܽܘܟܬܳܐ ܕܺܝܠܗܽܘܢ ܬܽܘܒ ܐܶܫܬܰܟܚܰܬ ܒܰܫܡܰܝܳܐ.
9- ܘܶܐܬܬܰܪܡܺܝ ܗܰܘ ܬܰܢܺܝܢܳܐ ܪܰܒܳܐ܆ ܘܗܰܘ ܚܶܘܝܳܐ ܥܰܬܺܝܩܳܐ: ܗܰܘ ܕܡܶܬܩܪܶܐ ܡܪܰܡܝܳܢܳܐ ܘܣܳܛܳܢܳܐ. ܗܰܘ ܕܡܰܛܥܶܐ ܠܡܶܬܥܰܡܪܳܢܺܝܬܳܐ ܟܽܠܳܗ̇. ܐܶܬܬܰܪܡܺܝ ܥܰܠ ܐܰܪܥܳܐ܆ ܘܡ̈ܰܠܰܐܟܶܐ ܕܺܝܠܶܗ ܥܰܡܶܗ ܐܶܬܬܰܪܡܺܝܘ.
10- ܘܫܶܡܥܶܬ ܩܳܠܳܐ ܪܰܒܳܐ ܒܰܫܡܰܝܳܐ ܕܳܐܡܰܪ. ܗܳܫܳܐ ܗܘܳܐ ܦܽܘܪܩܳܢܳܐ ܘܚܰܝܠܳܐ ܘܡܰܠܟܽܘܬܳܐ ܕܰܐܠܳܗܳܐ ܕܺܝܠܰܢ. ܘܫܽܘܠܛܳܢܳܐ ܕܰܡܫܺܝܚܳܐ ܕܺܝܠܶܗ. ܡܶܛܽܠ ܕܶܐܬܬܰܪܡܺܝ ܗܰܘ ܡܩܰܛܪܓܳܢܳܐ ܕܰܐܚ̈ܶܐ ܕܺܝܠܰܢ܇ ܗܰܘ ܕܰܡܩܰܛܪܶܓ ܗܘܳܐ ܠܗܽܘܢ ܩܕܳܡ ܐܰܠܳܗܳܐ ܕܺܝܠܰܢ ܐܺܝܡܳܡܳܐ ܘܠܺܠܝܳܐ.
11- ܘܗܳܢܽܘܢ ܙܟܰܐܘܽܗ̱ܝ ܡܶܛܽܠ ܕܡܶܗ ܕܶܐܡܪܳܐ܆ ܡܶܛܽܠ ܡܶܠܬܳܐ ܕܣܳܗܕܽܘܬܳܐ ܕܺܝܠܗܽܘܢ. ܘܠܳܐ ܐܰܚܶܒܘ ܢܰܦܫܳܐ ܕܺܝܠܗܽܘܢ ܥܕܰܡܳܐ ܠܡܰܘܬܳܐ.
12- ܘܡܶܛܽܠ ܗܳܕܶܐ ܐܶܬܒܰܣܰܡܘ ܫܡܰܝ̈ܳܐ܆ ܘܗܳܢܽܘܢ ܕܰܒܗܽܘܢ ܫܪܶܝܢ. ܘܳܝ ܠܰܐܪܥܳܐ ܘܰܠܝܰܡܳܐ܇ ܡܶܛܽܠ ܕܰܢܚܶܬ ܡܪܰܡܝܳܢܳܐ ܠܘܳܬܟܽܘܢ܇ ܕܺܐܝܬ ܠܶܗ ܚܶܡܬܳܐ ܪܰܒܬܳܐ: ܟܰܕ ܝܳܕܰܥ ܕܩܰܠܺܝܠ ܙܰܒܢܳܐ ܐܺܝܬ ܠܶܗ܀
13- ܘܟܰܕ ܚܳܙܶܐ ܗ̱ܘܺܝܬ ܠܬܰܢܺܝܢܳܐ ܕܶܐܬܬܰܪܡܺܝ ܥܰܠ ܐܰܪܥܳܐ܆ ܪܕܰܦ ܠܰܐܢ̱ܬܬܳܐ ܗܳܝ ܐܰܝܕܳܐ ܕܝܶܠܕܰܬ ܠܕܶܟܪܳܐ.
14- ܘܶܐܬܺܝܗܶܒܘ ܠܰܐܢ̱ܬܬܳܐ ܗܳܢܽܘܢ ܬܪܶܝܢ ܓܶܦ̈ܶܐ ܕܢܶܫܪܳܐ ܗܰܘ ܪܰܒܳܐ. ܐܰܝܟܰܢܳܐ ܕܬܶܦܪܰܚ ܠܡܰܕܒܪܳܐ ܠܕܽܘܟܬܳܐ ܕܺܝܠܳܗ̇܇ ܐܰܝܟܳܐ ܕܡܶܬܬܰܪܣܝܳܐ ܬܰܡܳܢ ܥܶܕܳܢܳܐ ܥܶܕܳܢ̈ܶܐ ܘܦܶܠܓܽܘܬ ܥܶܕܳܢܳܐ܇ ܡܶܢ ܦܰܪܨܽܘܦܳܐ ܕܚܶܘܝܳܐ.
15- ܘܰܐܪܡܺܝ ܗܰܘ ܚܶܘܝܳܐ ܡܶܢ ܦܽܘܡܳܐ ܕܺܝܠܶܗ. ܒܶܣܬܰܪ ܐܰܢ̱ܬܬܳܐ ܡܰܝ̈ܳܐ ܐܰܝܟ ܢܰܗܪܳܐ܆ ܐܰܝܟܰܢܳܐ ܕܠܳܗ̇ ܫܩܺܝܠܰܬ ܡܶܢ ܢܰܗܪܳܐ ܢܶܥܒܶܕ.
16- ܘܥܰܕܪܰܬ ܐܰܪܥܳܐ ܠܰܐܢ̱ܬܬܳܐ܆ ܘܦܶܬܚܰܬ ܐܰܪܥܳܐ ܦܽܘܡܳܐ ܕܺܝܠܳܗ̇ ܘܰܒܠܰܥܬܶܗ ܠܢܰܗܪܳܐ ܗܰܘ ܕܰܐܪܡܺܝ ܗܰܘ ܬܰܢܺܝܢܳܐ ܡܶܢ ܦܽܘܡܳܐ ܕܺܝܠܶܗ.
17- ܘܰܪܓܶܙ ܗܰܘ ܬܰܢܺܝܢܳܐ ܥܰܠ ܐܰܢ̱ܬܬܳܐ܆ ܘܶܐܙܰܠ ܠܡܶܥܒܰܕ ܩܪܳܒܳܐ ܥܰܡ ܗܳܠܶܝܢ ܕܫܰܪܟܳܐ ܕܙܰܪܥܳܐ ܕܺܝܠܳܗ̇܆ ܗܳܠܶܝܢ ܕܢܳܛܪܺܝܢ ܠܦܽܘܩ̈ܕܳܢܰܘܗ̱ܝ ܕܰܐܠܳܗܳܐ܇ ܘܺܐܝܬ ܠܗܽܘܢ ܣܳܗܕܽܘܬܳܐ ܕܝܶܫܽܘܥ܇ ܘܩܳܡ ܥܰܠ ܚܳܠܳܐ ܕܝܰܡܳܐ܀