Revelation 13
The Book of Revelation
܀ ܓܠܝܢܐ ܕܝܘܚܢܢ ܝܓ ܀
1- ܘܰܚܙܺܝܬ ܕܣܳܠܶܩ ܚܰܝܘܰܬ ܫܶܢܳܐ ܡܶܢ ܝܰܡܳܐ܆ ܕܺܐܝܬ ܠܶܗ ܩܰܪ̈ܢܶܐ ܥܣܰܪ ܘܪ̈ܺܝܫܶܐ ܫܰܒܥܳܐ. ܘܥܰܠ ܩܰܪ̈ܢܶܐ ܕܺܝܠܶܗ ܥܶܣܪܳܐ ܬܳܐܓ̈ܶܐ. ܘܥܰܠ ܪ̈ܺܝܫܶܐ ܕܺܝܠܶܗ ܫܡܳܗ̈ܶܐ ܕܓܽܘܕܳܦܳܐ.
2- ܘܚܰܝܘܰܬ ܫܶܢܳܐ ܗܰܘ ܕܰܚܙܺܝܬ܆ ܐܺܝܬܰܘܗ̱ܝ ܗ̱ܘܳܐ ܕܕܳܡܶܐ ܠܢܶܡܪܳܐ. ܘܪ̈ܶܓܠܶܐ ܕܺܝܠܶܗ ܐܰܝܟ ܕܕܶܒܳܐ. ܘܦܽܘܡܳܐ ܕܺܝܠܶܗ ܐܰܝܟ ܦܽܘܡܳܐ ܕܰܐܪ̈ܝܰܘܳܬܳܐ. ܘܝܰܗ̱ܒ ܠܶܗ ܗܰܘ ܬܰܢܺܝܢܳܐ ܚܰܝܠܳܐ ܕܺܝܠܶܗ ܘܠܰܬܪܽܘܢܽܘܣ ܕܺܝܠܶܗ ܘܫܽܘܠܛܳܢܳܐ ܪܰܒܳܐ.
3- ܘܚܰܕ ܡܶܢ ܪ̈ܺܝܫܶܐ ܕܺܝܠܶܗ ܐܰܝܟ ܢܟܺܝܣ ܠܡܰܘܬܳܐ. ܘܰܡܚܽܘܬܳܐ ܕܡܰܘܬܳܐ ܕܺܝܠܶܗ ܐܶܬܰܐܣܝܰܬ. ܘܶܐܬܕܰܡܪܰܬ ܟܽܠܳܗ̇ ܐܰܪܥܳܐ ܒܶܣܬܰܪ ܗܰܘ ܚܰܝܘܰܬ ܫܶܢܳܐ.
4- ܘܰܣܓܶܕܘ ܠܬܰܢܺܝܢܳܐ܆ ܡܶܛܽܠ ܕܝܰܗ̱ܒ ܫܽܘܠܛܳܢܳܐ ܠܗܰܘ ܚܰܝܘܰܬ ܫܶܢܳܐ. ܘܰܣܓܶܕܘ ܠܗܰܘ ܚܰܝܘܰܬ ܫܶܢܳܐ ܟܰܕ ܐܳܡܪܺܝܢ. ܡܰܢܽܘ ܕܕܳܡܶܐ ܠܗܰܘ ܚܰܝܘܰܬ ܫܶܢܳܐ ܗܳܢܳܐ؟ ܘܡܰܢܽܘ ܡܨܶܐ ܠܡܰܩܪܳܒܽܘ ܥܰܡܶܗ؟
5- ܘܶܐܬܺܝܗܶܒ ܠܶܗ ܦܽܘܡܳܐ ܕܰܡܡܰܠܶܠ ܪܰܘܪ̈ܒܳܬܳܐ ܘܓܽܘܕܳܦܳܐ. ܘܶܐܬܺܝܗܶܒ ܠܶܗ ܫܽܘܠܛܳܢܳܐ ܠܡܶܥܒܰܕ ܝܰܪ̈ܚܶܐ ܐܰܪܒܥܺܝܢ ܘܰܬܪܶܝܢ.
6- ܘܰܦܬܰܚ ܦܽܘܡܳܐ ܕܺܝܠܶܗ ܠܘܳܬ ܐܰܠܳܗܳܐ܇ ܠܰܡܓܰܕܳܦܽܘ ܠܰܫܡܳܐ ܕܺܝܠܶܗ ܘܰܠܡܰܫܟܢܶܗ܇ ܠܗܳܠܶܝܢ ܕܒܰܫܡܰܝܳܐ ܫܪܶܝܢ.
7- ܘܶܐܬܺܝܗܶܒ ܠܶܗ ܫܽܘܠܛܳܢܳܐ ܥܰܠ ܟܽܠ ܫܰܪܒܬܳܐ ܘܥܰܡܳܐ ܘܠܶܫܳܢܳܐ ܘܽܐܘܡܬܳܐ. ܘܶܐܬܺܝܗܶܒ ܠܶܗ ܠܡܶܥܒܰܕ ܩܪܳܒܳܐ ܥܰܡ ܩܰܕܺܝ̈ܫܶܐ ܘܰܠܡܶܙܟܳܐ ܐܶܢܽܘܢ.
8- ܘܢܶܣܓܕܽܘܢ ܠܶܗ ܟܽܠܗܽܘܢ ܗܳܠܶܝܢ ܕܥܳܡܪܺܝܢ ܥܰܠ ܐܰܪܥܳܐ܇ ܗܳܢܽܘܢ ܕܠܳܐ ܟܬܺܝܒ ܫܡܳܐ ܕܺܝܠܗܽܘܢ ܒܰܟܬܳܒܳܐ ܕܚܰܝ̈ܶܐ܇ ܕܶܐܡܪܳܐ ܗܰܘ ܢܟܺܝܣܳܐ܇ ܡܶܢ ܬܰܪܡܺܝܬܶܗ ܕܥܳܠܡܳܐ.
9- ܐܶܢ ܐ̱ܢܳܫ ܐܺܝܬ ܠܶܗ ܐܶܕ̈ܢܶܐ ܢܶܫܡܰܥ.
10- ܐܶܢ ܐ̱ܢܳܫ ܡܰܘܒܶܠ ܒܫܶܒܝܳܐ܆ ܒܫܶܒܝܳܐ ܐܳܙܶܠ. ܐܶܢ ܐ̱ܢܳܫ ܒܣܰܝܦܳܐ ܩܛܰܠ܆ ܙܳܕܶܩ ܠܶܗ ܕܰܒܣܰܝܦܳܐ ܢܶܬܩܛܶܠ. ܗܳܪܟܳܐ ܐܺܝܬܶܝܗ̇ ܡܣܰܝܒܪܳܢܽܘܬܳܐ ܘܗܰܝܡܳܢܽܘܬܳܐ ܕܩܰܕܺܝ̈ܫܶܐ܀
11- ܘܰܚܙܺܝܬ ܐ̱ܚܪܺܢܳܐ ܚܰܝܘܰܬ ܫܶܢܳܐ ܕܣܳܠܶܩ ܡܶܢ ܐܰܪܥܳܐ܆ ܘܺܐܝܬ ܠܶܗ ܩܰܪ̈ܢܶܐ ܬܰܪܬܶܝܢ ܕܕܳܡ̈ܝܳܢ ܠܕܶܐܡܪܳܐ. ܘܰܡܡܰܠܶܠ ܗ̱ܘܳܐ ܐܰܝܟ ܬܰܢܺܝܢܳܐ.
12- ܘܰܠܫܽܘܠܛܳܢܳܐ ܟܽܠܶܗ ܕܗܰܘ ܚܰܝܘܰܬ ܫܶܢܳܐ ܗܰܘ ܩܰܕܡܳܝܳܐ܆ ܥܳܒܶܕ ܗ̱ܘܳܐ ܩܕܳܡܰܘܗ̱ܝ. ܘܥܳܒܶܕ ܗ̱ܘܳܐ ܠܰܐܪܥܳܐ ܘܰܠܗܳܢܽܘܢ ܕܒܳܗ̇ ܥܳܡܪܺܝܢ܆ ܐܰܝܟܰܢܳܐ ܕܢܶܣܓܕܽܘܢ ܠܚܰܝܘܰܬ ܫܶܢܳܐ ܗܰܘ ܩܰܕܡܳܝܳܐ ܗܰܘ ܕܶܐܬܚܰܠܡܰܬ ܡܚܽܘܬܳܐ ܕܡܰܘܬܳܐ ܕܺܝܠܶܗ.
13- ܘܥܳܒܶܕ ܐܳܬܘ̈ܳܬܳܐ ܪܰܘܪ̈ܒܳܬܳܐ܆ ܐܰܝܟܰܢܳܐ ܕܳܐܦ ܢܽܘܪܳܐ ܢܶܥܒܶܕ ܠܡܶܚܰܬ ܡܶܢ ܫܡܰܝܳܐ ܥܰܠ ܐܰܪܥܳܐ ܩܕܳܡ ܒܢܰܝ̈ܢܳܫܳܐ.
14- ܘܢܰܛܥܶܐ ܠܗܳܢܽܘܢ ܕܥܳܡܪܺܝܢ ܥܰܠ ܐܰܪܥܳܐ܇ ܡܶܛܽܠ ܐܳܬܘ̈ܳܬܳܐ ܗܳܠܶܝܢ ܕܶܐܬܺܝܗܶܒ̈ܝ ܠܳܗ̇ ܠܡܶܥܒܰܕ ܩܕܳܡ ܗܰܘ ܚܰܝܘܰܬ ܫܶܢܳܐ. ܟܰܕ ܐܳܡܰܪ ܠܗܳܢܽܘܢ ܕܥܳܡܪܺܝܢ ܥܰܠ ܐܰܪܥܳܐ܆ ܠܡܶܥܒܰܕ ܨܰܠܡܳܐ ܠܗܰܘ ܚܰܝܘܰܬ ܫܶܢܳܐ܇ ܗܰܘ ܕܺܐܝܬ ܗ̱ܘܳܐ ܠܶܗ ܡܚܽܘܬܳܐ ܕܣܰܝܦܳܐ ܘܰܚܝܳܐ.
15- ܘܶܐܬܺܝܗܶܒ ܠܶܗ ܠܡܶܬܰܠ ܪܽܘܚܳܐ ܠܨܰܠܡܳܐ ܕܗܰܘ ܚܰܝܘܰܬ ܫܶܢܳܐ܆ ܐܰܝܟܰܢܳܐ ܕܳܐܦ ܢܡܰܠܶܠ ܨܰܠܡܳܐ ܕܗܰܘ ܚܰܝܘܰܬ ܫܶܢܳܐ܆ ܘܥܳܒܶܕ ܕܟܽܠܗܽܘܢ ܗܳܢܽܘܢ ܕܶܐܢ ܠܳܐ ܢܶܣܓܕܽܘܢ ܠܶܗ ܠܨܰܠܡܳܐ ܕܗܰܘ ܚܰܝܘܰܬ ܫܶܢܳܐ. ܢܶܬܩܰܛܠܽܘܢ.
16- ܘܢܶܥܒܶܕ ܠܟܽܠܗܽܘܢ ܠܰܙܥܽܘܪ̈ܶܐ ܘܰܠܪܰܘܪ̈ܒܶܐ: ܘܰܠܥܰܬܺܝܪ̈ܶܐ ܘܰܠܡܶܣ̈ܟܺܢܶܐ: ܘܠܰܒܢ̈ܰܝ ܚܺܐܪ̈ܶܐ ܘܰܠܥܰܒ̈ܕܶܐ܆ ܐܰܝܟܰܢܳܐ ܕܢܶܬܺܝܗܶܒ ܠܗܽܘܢ ܪܽܘܫܡܳܐ ܥܰܠ ܐܺܝ̈ܕܰܝܳܐ ܕܺܝܠܗܽܘܢ ܕܝܰܡܺܝܢܳܐ. ܐܰܘ ܥܰܠ ܒܶܝܬ ܥܰܝ̈ܢܶܐ ܕܺܝܠܗܽܘܢ܆
17- ܐܰܝܟܰܢܳܐ ܕܠܳܐ ܐ̱ܢܳܫ ܢܶܬܡܨܶܐ ܕܢܶܙܒܶܢ ܐܰܘ ܢܙܰܒܶܢ܆ ܐܶܠܳܐ ܗܰܘ ܕܺܐܝܬ ܠܶܗ ܪܽܘܫܡܳܐ ܕܰܫܡܳܐ ܕܗܰܘ ܚܰܝܘܰܬ ܫܶܢܳܐ܇ ܐܰܘ ܡܶܢܝܳܢܳܐ ܕܰܫܡܳܐ ܕܺܝܠܶܗ.
18- ܗܳܪܟܳܐ ܚܶܟܡܬܳܐ ܐܺܝܬܶܝܗ̇. ܗܰܘ ܕܺܐܝܬ ܠܶܗ ܗܰܘܢܳܐ܆ ܢܚܰܫܶܒ ܠܡܶܢܝܳܢܳܐ ܕܗܰܘ ܚܰܝܘܰܬ ܫܶܢܳܐ. ܡܶܢܝܳܢܳܐ ܓܶܝܪ ܕܒܰܪܢܳܫܳܐ ܐܺܝܬܰܘܗ̱ܝ. ܘܡܶܢܝܳܢܳܐ ܕܺܝܠܶܗ ܐܺܝܬܰܘܗ̱ܝ܆ ܫܶܬܡܳܐܐ ܘܶܫܬܺܝܢ ܘܫܶܬ܀