Revelation 4
The Book of Revelation
܀ ܓܠܝܢܐ ܕܝܘܚܢܢ ܕ ܀
1- ܒܳܬܰܪ ܗܳܠܶܝܢ ܚܙܺܝܬ܆ ܘܗܳܐ ܬܰܪܥܳܐ ܦܬܺܝܚܳܐ ܒܰܫܡܰܝܳܐ. ܘܩܳܠܳܐ ܩܰܕܡܳܝܳܐ ܗܰܘ ܕܫܶܡܥܶܬ ܐܰܝܟ ܫܺܝܦܽܘܪܳܐ ܕܰܡܡܰܠܶܠ ܥܰܡܝ ܐܳܡܰܪ ܗ̱ܘܳܐ܆ ܣܰܩ ܠܗܳܪܟܳܐ ܘܶܐܚܰܘܶܐ ܠܳܟ ܗܳܢܶܝܢ ܕܙܳܕ̈ܩܳܢ ܠܡܶܗܘܳܐ ܒܳܬܰܪ ܗܳܠܶܝܢ܀
2- ܘܡܶܚܕܳܐ ܗܘܺܝܬ ܒܪܽܘܚܳܐ. ܘܗܳܐ ܟܽܘܪܣܝܳܐ ܣܺܝܡ ܗ̱ܘܳܐ ܒܰܫܡܰܝܳܐ. ܘܥܰܠ ܟܽܘܪܣܝܳܐ ܝܳܬܶܒ ܗ̱ܘܳܐ.
3- ܘܗܰܘ ܕܝܳܬܶܒ. ܕܳܡܶܐ ܠܰܚܙܳܬܳܐ ܕܟܺܐܦܳܐ ܕܝܰܣܦܺܝܢ ܘܰܕܣܰܪܕܝܽܘܢ. ܘܰܕܩܶܫܬܳܐ ܕܰܥܢܳܢܳܐ ܡܶܢ ܚܕܳܪ̈ܰܘܗ̱ܝ ܕܟܽܘܪܣܝܳܐ ܒܳܗ̇ ܒܰܕܡܽܘܬܳܐ܆ ܠܰܚܙܳܬܳܐ ܕܰܙܡܰܪܰܓܕܳܐ.
4- ܘܡܶܢ ܚܕܳܪ̈ܰܘܗ̱ܝ ܕܰܬܪܽܘܢܽܘܣ܆ ܟܽܘܪ̈ܣܰܘܳܬܳܐ ܥܶܣܪܺܝܢ ܘܰܐܪܒܥܳܐ܆ ܘܰܥܠܰܝܗܽܘܢ ܕܟܽܘܪ̈ܣܰܘܳܬܳܐ ܗܳܢܽܘܢ ܥܶܣܪܺܝܢ ܘܰܐܪܒܥܳܐ ܩܰܫܺܝ̈ܫܶܐ ܕܝܳܬܒܺܝܢ. ܘܰܡܥܰܛܦܺܝܢ ܒܰܠܒܽܘ̈ܫܶܐ ܚܶܘܳܪ̈ܶܐ. ܘܥܰܠ ܪ̈ܺܝܫܶܐ ܕܺܝܠܗܽܘܢ ܟܠܺܝ̈ܠܶܐ ܕܕܰܗܒܳܐ.
5- ܘܡܶܢ ܬܪܽܘܢܽܘܣ ܢܳܦܩܺܝܢ ܒܰܪ̈ܩܶܐ ܘܩ̈ܳܠܶܐ ܘܪ̈ܰܥܡܶܐ. ܘܫܰܒܥܳܐ ܠܰܡܦܺܝ̈ܕܶܐ ܕܢܽܘܪܳܐ ܕܝܳܩܕܺܝܢ ܩܕܳܡܰܘܗ̱ܝ ܕܬܪܽܘܢܽܘܣ ܕܺܝܠܶܗ܁ ܗܳܠܶܝܢ ܕܺܐܝܬܰܝܗܶܝܢ ܫܒܰܥ ܪ̈ܽܘܚܶܐ ܕܰܐܠܳܗܳܐ.
6- ܘܰܩܕܳܡܰܘܗ̱ܝ ܕܰܬܪܽܘܢܽܘܣ܆ ܐܰܝܟ ܝܰܡܳܐ ܕܰܙܓܽܘܓܺܝܬܳܐ ܕܕܳܡܶܐ ܠܰܩܪܽܘܣܛܶܠܳܘܣ. ܘܒܰܡܨܰܥܬܳܐ ܕܰܬܪܽܘܢܽܘܣ ܘܰܚܕܳܪ̈ܰܘܗ̱ܝ ܘܰܩܕܳܡܰܘܗ̱ܝ ܕܰܬܪܽܘܢܽܘܣ܆ ܐܰܪܒܰܥ ܚܰܝ̈ܘܳܬܳܐ ܕܡܰܠ̈ܝܳܢ ܡܶܢ ܥܰܝ̈ܢܶܐ܇ ܡܶܢ ܩܕܳܡܰܝܗܶܝܢ ܘܡܶܢ ܒܶܣܬܰܪܗܶܝܢ.
7- ܘܚܰܝܽܘܬܳܐ ܗܳܝ ܩܰܕܡܳܝܬܳܐ ܕܳܡܝܳܐ ܠܰܐܪܝܳܐ. ܘܚܰܝܽܘܬܳܐ ܗܳܝ ܬܪܰܝܳܢܺܝܬܳܐ ܕܳܡܝܳܐ ܠܥܶܓܠܳܐ. ܘܗܳܝ ܚܰܝܽܘܬܳܐ ܬܠܺܝܬܳܝܬܳܐ ܐܺܝܬ ܠܳܗ̇ ܦܰܪܨܽܘܦܳܐ ܐܰܝܟ ܒܰܪܢܳܫܳܐ. ܘܗܳܝ ܚܰܝܽܘܬܳܐ ܪܒܺܝܥܳܝܬܳܐ ܕܳܡܝܳܐ ܠܢܶܫܪܳܐ ܕܦܳܪܰܚ.
8- ܘܰܐܪ̈ܒܥܳܬܰܝܗܶܝܢ ܚܰܝ̈ܘܳܬܳܐ ܟܽܠ ܚܕܳܐ ܚܕܳܐ ܡܶܢܗܶܝܢ ܐܺܝܬ ܠܳܗ̇ ܡܶܢ ܫܬܳܐ ܓܶܦ̈ܶܐ ܠܚܽܘܕܪܳܐ. ܘܡܶܢ ܠܓܰܘ ܡܰܠ̈ܝܳܢ ܡܶܢ ܥܰܝ̈ܢܶܐ. ܘܰܢܝܳܚܳܐ ܠܰܝܬ ܠܗܶܝܢ ܐܺܝܡܳܡܳܐ ܘܠܺܠܝܳܐ ܡܶܢ ܕܳܐܡܪ̈ܳܢ. ܩܰܕܺܝܫ ܩܰܕܺܝܫ ܩܰܕܺܝܫ܇ ܡܳܪܝܳܐ ܐܰܠܳܗܳܐ ܗܰܘ ܐܰܚܺܝܕ ܟܽܠ܇ ܗܰܘ ܕܺܐܝܬܰܘܗ̱ܝ ܗ̱ܘܳܐ ܘܺܐܝܬܰܘܗ̱ܝ܇ ܘܗܰܘ ܕܳܐܬܶܐ܀
9- ܘܶܐܡܰܬܝ ܕܢܶܬܠܳܢ ܗܳܢܶܝܢ ܚܰܝ̈ܘܳܬܳܐ: ܬܶܫܒܽܘܚܬܳܐ ܘܺܐܝܩܳܪܳܐ ܘܩܽܘܒܳܠ ܛܰܝܒܽܘܬܳܐ ܠܗܰܘ ܕܝܳܬܶܒ ܥܰܠ ܬܪܽܘܢܽܘܣ: ܠܗܰܘ ܕܚܰܝ ܠܥܳܠܡ̈ܶܐ ܕܥܳܠܡ̈ܶܐ܆
10- ܢܶܦܠܽܘܢ ܗܳܢܽܘܢ ܥܶܣܪܺܝܢ ܘܰܐܪܒܥܳܐ ܩܰܫܺܝ̈ܫܶܐ ܩܕܳܡ ܗܰܘ ܕܝܳܬܶܒ ܠܥܶܠ ܡܶܢ ܬܪܽܘܢܽܘܣ܆ ܘܢܶܣܓܕܽܘܢ ܠܗܰܘ ܕܚܰܝ ܠܥܳܠܡ̈ܶܐ ܕܥܳܠܡܺܝܢ. ܘܢܰܪܡܽܘܢ ܟܠܺܝ̈ܠܶܐ ܕܺܝܠܗܽܘܢ ܩܕܳܡ ܬܪܽܘܢܽܘܣ ܟܰܕ ܐܳܡܪܺܝܢ܆
11- ܕܫܳܘܶܐ ܐܺܝܬܰܝܟ ܡܳܪܝܳܐ ܘܰܐܠܳܗܳܐ ܕܺܝܠܰܢ ܗܰܘ ܩܰܕܺܝܫܳܐ܇ ܠܡܶܣܰܒ ܬܶܫܒܽܘܚܬܳܐ ܘܺܐܝܩܳܪܳܐ ܘܚܰܝܠܳܐ. ܡܶܛܽܠ ܕܰܐܢ̱ܬ ܒܪܰܝܬ ܠܟܽܠ. ܘܰܒܝܰܕ ܕܺܝܠܳܟ ܐܺܝܬܰܝܗܽܘܢ. ܘܡܶܛܽܠ ܨܶܒܝܳܢܳܟ ܐܺܝܬܰܝܗܽܘܢ ܗ̱ܘܰܘ ܘܶܐܬܒܪܺܝܘ܀