Revelation 17
The Book of Revelation
܀ ܓܠܝܢܐ ܕܝܘܚܢܢ ܝܙ ܀
1- ܘܶܐܬܳܐ ܚܰܕ ܡܶܢ ܗܳܢܽܘܢ ܫܰܒܥܳܐ ܡ̈ܰܠܰܐܟܶܐ܆ ܗܳܠܶܝܢ ܕܺܐܝܬ ܠܗܽܘܢ ܫܒܰܥ ܦܺܝܳܐܠܺܝ̈ܢ܆ ܘܡܰܠܶܠ ܥܰܡܝ ܟܰܕ ܐܳܡܰܪ. ܬܳܐ ܐܶܚܰܘܶܐ ܠܳܟ ܠܕܺܝܢܳܐ ܕܙܳܢܺܝܬܳܐ ܗܳܝ ܕܝܳܬܒܳܐ. ܥܰܠ ܡܰܝ̈ܳܐ ܣܰܓܺܝ̈ܶܐܐ.
2- ܥܰܡ ܗܳܝ ܕܙܰܢܺܝܘ ܡ̈ܰܠܟܶܐ ܕܰܐܪܥܳܐ܇ ܘܰܪܘܺܝܘ ܗܳܠܶܝܢ ܕܥܳܡܪܺܝܢ ܒܰܐܪܥܳܐ ܡܶܢ ܚܰܡܪܳܐ ܕܙܳܢܝܽܘܬܳܐ ܕܺܝܠܳܗ̇.
3- ܘܰܐܘܒܠܰܢܝ ܠܡܰܕܒܪܳܐ ܒܪܽܘܚܳܐ. ܘܰܚܙܺܝܬ ܠܰܐܢ̱ܬܬܳܐ ܟܰܕ ܝܳܬܒܳܐ ܥܰܠ ܚܰܝܘܰܬ ܫܶܢܳܐ ܣܽܘܡܳܩܳܐ܆ ܕܰܡܠܶܐ ܫܡܳܗ̈ܶܐ ܕܓܽܘܕܳܦܳܐ. ܕܺܐܝܬ ܠܶܗ ܪ̈ܺܝܫܶܐ ܫܰܒܥܳܐ܆ ܩܰܪ̈ܢܶܐ ܥܣܰܪ.
4- ܘܗܺܝ ܐܰܢ̱ܬܬܳܐ ܐܺܝܬܶܝܗ̇ ܗ̱ܘܳܬ ܕܰܡܥܰܛܦܳܐ ܐܰܪܓܘܳܢܳܐ ܘܰܙܚܽܘܪܺܝܬܳܐ ܕܰܡܕܰܗܒܳܐ ܒܕܰܗܒܳܐ܇ ܘܰܒܟܺܐܦ̈ܶܐ ܝܰܩܺܝܪ̈ܳܬܳܐ ܘܡܰܪ̈ܓܳܢܝܳܬܳܐ. ܕܺܐܝܬ ܠܳܗ̇ ܟܳܣܳܐ ܕܕܰܗܒܳܐ ܒܺܐܝܕܳܐ ܕܺܝܠܳܗ̇܆ ܕܰܡܠܶܐ ܡܶܢ ܛܰܡܽܐܘܬܳܐ. ܘܠܳܐ ܕܰܟܝܽܘܬܳܐ. ܕܙܳܢܝܽܘܬܳܐ ܕܺܝܠܳܗ̇ ܘܕܰܐܪܥܳܐ.
5- ܘܥܰܠ ܒܶܝܬ ܥܰܝ̈ܢܶܐ ܕܺܝܠܳܗ̇ ܫܡܳܐ ܕܰܟܬܺܝܒ܆ ܐ̱ܪ̈ܳܙܶܐ ܕܒܳܒܶܝܠ ܗܳܝ ܪܰܒܬܳܐ ܗܳܝ ܐܶܡܳܐ ܕܙܳܢ̈ܝܳܬܳܐ ܘܰܕܣܽܘ̈ܝܳܒܶܐ ܕܰܐܪܥܳܐ.
6- ܘܰܚܙܺܝܬ ܠܰܐܢ̱ܬܬܳܐ ܕܪܰܘܝܳܐ ܡܶܢ ܕܡܳܐ ܕܩܰܕܺܝ̈ܫܶܐ܆ ܘܡܶܢ ܕܡܳܐ ܕܣܳܗ̈ܕܰܘܗ̱ܝ ܕܝܶܫܽܘܥ. ܘܶܐܬܕܰܡܪܶܬ ܟܰܕ ܚܙܺܝܬܳܗ̇ ܕܽܘܡܳܪܳܐ ܪܰܒܳܐ܀
7- ܘܶܐܡܰܪ ܠܺܝ ܗܰܘ ܡܰܠܰܐܟܳܐ. ܡܶܛܽܠ ܡܳܢܳܐ ܐܶܬܕܰܡܰܪܬ؟ ܐܶܢܳܐ ܐܳܡܰܪ ܐ̱ܢܳܐ ܠܳܟ ܠܐܪܳܙܳܐ ܕܰܐܢ̱ܬܬܳܐ ܘܰܕܚܰܝܘܰܬ ܫܶܢܳܐ ܗܰܘ ܕܰܛܥܺܝܢ ܠܳܗ̇܇ ܗܰܘ ܕܺܐܝܬ ܠܶܗ ܗܳܠܶܝܢ ܫܰܒܥܳܐ ܪ̈ܺܝܫܶܐ܇ ܘܗܳܢܶܝܢ ܥܣܰܪ ܩܰܪ̈ܢܶܐ.
8- ܚܰܝܘܰܬ ܫܶܢܳܐ ܗܰܘ ܕܰܚܙܰܝܬ܆ ܐܺܝܬܰܘܗ̱ܝ ܗ̱ܘܳܐ ܘܠܳܐ ܐܺܝܬܰܘܗ̱ܝ. ܘܰܥܬܺܝܕ ܠܡܶܣܰܩ ܡܶܢ ܬܗܽܘܡܳܐ ܘܠܰܐܒܕܳܢܳܐ ܠܡܺܐܙܰܠ. ܘܢܶܬܕܰܡܪܽܘܢ ܗܳܢܽܘܢ ܕܥܳܡܪܺܝܢ ܥܰܠ ܐܰܪܥܳܐ܇ ܕܗܳܢܽܘܢ ܕܠܳܐ ܟܬܺܝܒ ܫܡܳܐ ܕܺܝܠܗܽܘܢ ܥܰܠ ܟܬܳܒܳܐ ܕܚܰܝ̈ܶܐ܆ ܡܶܢ ܬܰܪ̈ܡܝܳܬܶܗ ܕܥܳܠܡܳܐ܇ ܟܰܕ ܚܳܙܶܝܢ ܠܗܰܘ ܚܰܝܘܰܬ ܫܶܢܳܐ ܕܺܐܝܬܰܘܗ̱ܝ ܗ̱ܘܳܐ ܘܠܳܐ ܐܺܝܬܰܘܗ̱ܝ ܘܩܰܪܺܝܒ.
9- ܗܳܪܟܳܐ ܗܰܘܢܳܐ ܠܗܰܘ ܕܺܐܝܬ ܠܶܗ ܚܶܟܡܬܳܐ. ܗܳܠܶܝܢ ܫܰܒܥܳܐ ܪ̈ܺܝܫܶܐ܆ ܫܰܒܥܳܐ ܛܽܘܪ̈ܶܐ ܐܺܝܬܰܝܗܽܘܢ܇ ܐܰܝܟܳܐ ܕܗܺܝ ܐܰܢ̱ܬܬܳܐ ܝܳܬܒܳܐ ܥܠܰܝܗܽܘܢ܆
10- ܘܡ̈ܰܠܟܶܐ ܐܺܝܬܰܝܗܽܘܢ ܫܰܒܥܳܐ ܐܺܝܬܰܝܗܽܘܢ. ܗܳܢܽܘܢ ܚܰܡܫܳܐ ܢܦܰܠܘ. ܘܗܰܘ ܚܰܕ ܐܺܝܬܰܘܗ̱ܝ. ܘܗܰܘ ܐ̱ܚܪܺܢܳܐ ܠܳܐ ܥܕܰܟܺܝܠ ܐܶܬܳܐ. ܘܡܳܐ ܕܳܐܬܶܐ܆ ܩܰܠܺܝܠ ܙܳܕܶܩ ܠܶܗ ܠܰܡܟܰܬܳܪܽܘ.
11- ܘܚܰܝܘܰܬ ܫܶܢܳܐ ܗܰܘ ܕܺܐܝܬܰܘܗ̱ܝ ܗܘܳܐ ܘܠܳܐ ܐܺܝܬܰܘܗ̱ܝ: ܘܗܳܢܳܐ ܬܡܺܝܢܳܝܳܐ ܐܺܝܬܰܘܗ̱ܝ܆ ܘܡܶܢ ܫܰܒܥܳܐ ܐܺܝܬܰܘܗ̱ܝ܆ ܘܠܰܐܒܕܳܢܳܐ ܐܳܙܶܠ.
12- ܘܰܥܣܰܪ ܩܰܪ̈ܢܶܐ ܗܳܠܶܝܢ ܕܰܚܙܰܝܬ܆ ܥܶܣܪܳܐ ܡ̈ܰܠܟܶܐ ܐܺܝܬܰܝܗܽܘܢ. ܗܳܢܽܘܢ ܐ̱ܢܳܫܺܝ̈ܢ ܕܡܰܠܟܽܘܬܳܐ ܠܳܐ ܥܕܰܟܺܝܠ ܢܣܰܒܘ. ܐܶܠܳܐ ܫܽܘܠܛܳܢܳܐ ܐܺܝܬ ܠܗܽܘܢ ܐܰܝܟ ܡ̈ܰܠܟܶܐ܆ ܚܕܳܐ ܫܳܥܬܳܐ ܢܳܣܒܺܝܢ ܡܶܢ ܗܰܘ ܚܰܝܘܰܬ ܫܶܢܳܐ.
13- ܗܳܢܽܘܢ ܚܰܕ ܨܶܒܝܳܢܳܐ ܐܺܝܬ ܠܗܽܘܢ. ܘܚܰܝܠܳܐ ܘܫܽܘܠܛܳܢܳܐ ܕܺܝܠܗܽܘܢ܆ ܠܗܰܘ ܚܰܝܘܰܬ ܫܶܢܳܐ ܝܳܗܒܺܝܢ.
14- ܗܳܢܽܘܢ ܥܰܡ ܗܰܘ ܐܶܡܪܳܐ ܢܰܩܪܒܽܘܢ. ܘܗܰܘ ܐܶܡܪܳܐ ܢܶܙܟܶܐ ܐܶܢܽܘܢ. ܡܶܛܽܠ ܕܡܳܪܝܳܐ ܕܡܳܪ̈ܰܘܳܬܳܐ ܐܺܝܬܰܘܗ̱ܝ܆ ܘܡܰܠܟܳܐ ܕܡ̈ܰܠܟܶܐ. ܘܗܳܠܶܝܢ ܕܥܰܡܶܗ܆ ܩܪ̈ܰܝܳܐ ܘܰܓܒܰܝ̈ܳܐ ܘܰܡܗܰܝܡ̈ܢܶܐ܀
15- ܘܶܐܡܰܪ ܠܺܝ. ܡܰܝ̈ܳܐ ܗܳܠܶܝܢ ܕܰܚܙܰܝܬ܆ ܐܰܝܟܳܐ ܕܗܳܝ ܙܳܢܺܝܬܳܐ ܝܳܬܒܳܐ܆ ܥܰܡ̱̈ܡܶܐ ܘܟܶܢ̈ܫܶܐ ܐܺܝܬܰܝܗܽܘܢ ܘܠܶܫܳܢ̈ܶܐ ܘܶܐܡ̈ܘܳܬܳܐ.
16- ܘܰܥܣܰܪ ܩܰܪ̈ܢܶܐ ܗܳܠܶܝܢ ܕܰܚܙܰܝܬ ܘܗܰܘ ܚܰܝܘܰܬ ܫܶܢܳܐ܆ ܗܳܢܽܘܢ ܢܶܣܢܽܘܢ ܠܗܳܝ ܙܳܢܺܝܬܳܐ. ܘܚܰܪ̈ܒܳܬܳܐ ܢܶܥܒܕܽܘܢܳܗ̇. ܘܥܰܪܛܶܠܳܝܬܳܐ. ܘܒܶܣܪܳܐ ܕܺܝܠܶܗ ܢܶܐܟܠܽܘܢ. ܘܠܳܗ̇ ܢܰܘܩܕܽܘܢ ܒܢܽܘܪܳܐ.
17- ܐܰܠܳܗܳܐ ܓܶܝܪ ܝܳܗܶܒ ܒܠܶܒܰܘ̈ܳܬܳܐ ܕܺܝܠܗܽܘܢ ܠܡܶܥܒܰܕ ܨܶܒܝܳܢܳܐ ܕܺܝܠܶܗ܆ ܘܰܠܡܶܥܒܰܕ ܚܰܕ ܨܶܒܝܳܢܳܐ܇ ܘܰܠܡܶܬܰܠ ܡܰܠܟܽܘܬܳܐ ܕܺܝܠܗܽܘܢ ܠܗܰܘ ܚܰܝܘܰܬ ܫܶܢܳܐ܇ ܥܕܰܡܳܐ ܕܢܶܫܬܰܡ̈ܠܝܳܢ ܡ̈ܶܠܶܐ ܕܰܐܠܳܗܳܐ.
18- ܘܰܐܢ̱ܬܬܳܐ ܗܳܝ ܕܰܚܙܰܝܬ ܐܺܝܬܶܝܗ̇܆ ܡܕܺܝܢ̱ܬܳܐ ܗܳܝ ܪܰܒܬܳܐ܇ ܗܳܝ ܕܺܐܝܬ ܠܳܗ̇ ܡܰܠܟܽܘܬܳܐ ܥܰܠ ܡ̈ܰܠܟܶܐ ܕܰܐܪܥܳܐ܀