Revelation 7
The Book of Revelation
܀ ܓܠܝܢܐ ܕܝܘܚܢܢ ܙ ܀
1- ܘܒܳܬܰܪ ܗܳܠܶܝܢ ܚܙܺܝܬ܆ ܐܰܪܒܥܳܐ ܡ̈ܰܠܰܐܟܶܐ ܕܩܳܝܡܺܝܢ ܥܰܠ ܓܽܘ̈ܢܰܘܳܬܳܗ̇ ܕܰܐܪܥܳܐ. ܘܰܐܚܺܝܕܺܝܢ ܠܰܐܪܒܰܥ ܪ̈ܽܘܚܶܐ ܕܰܐܪܥܳܐ. ܐܰܝܟܰܢܳܐ ܕܠܳܐ ܢܶܫܰܒ ܪܽܘܚܳܐ ܥܰܠ ܐܰܪܥܳܐ ܘܠܳܐ ܥܰܠ ܝܰܡܳܐ܆ ܘܠܳܐ ܥܰܠ ܟܽܠ ܐܺܝܠܳܢ̈ܶܐ.
2- ܘܰܚܙܺܝܬ ܐ̱ܚܪܺܢܳܐ ܡܰܠܰܐܟܳܐ ܕܣܳܠܶܩ ܡܶܢ ܡܰܕܢܚܳܐ ܕܫܶܡܫܳܐ܆ ܕܺܐܝܬ ܠܶܗ ܛܰܒܥܳܐ ܕܰܐܠܳܗܳܐ ܚܰܝܳܐ. ܘܩܳܥܶܐ ܒܩܳܠܳܐ ܠܰܐܪܒܥܳܐ ܡ̈ܰܠܰܐܟܶܐ ܗܳܢܽܘܢ ܕܶܐܬܺܝܗܶܒ ܠܗܽܘܢ ܕܢܰܗܪܽܘܢ ܠܰܐܪܥܳܐ ܘܰܠܝܰܡܳܐ
3- ܟܰܕ ܐܳܡܰܪ܆ ܕܠܳܐ ܬܰܗܪܽܘܢ ܠܰܐܪܥܳܐ ܘܠܳܐ ܠܝܰܡܳܐ ܘܠܳܐ ܠܺܐܝܠܳܢ̈ܶܐ܇ ܥܕܰܡܳܐ ܕܢܶܚܬܽܘܡ ܠܥܰܒ̈ܕܰܘܗ̱ܝ ܕܰܐܠܳܗܳܐ ܕܺܝܠܰܢ ܥܰܠ ܒܶܝܬ ܥܰܝ̈ܢܰܝܗܽܘܢ܀
4- ܘܫܶܡܥܶܬ ܡܶܢܝܳܢܳܐ ܕܗܳܢܽܘܢ ܕܶܐܬܚܬܶܡܘ܆ ܡܳܐܐ ܘܰܐܪܒܥܺܝܢ ܘܰܐܪܒܥܳܐ ܐܰܠܦܰܝ̈ܳܐ ܚܬܺܝܡܳܐ܇ ܡܶܢ ܟܽܠ ܫܰܪܒܬܳܐ ܕܺܐܝܣܰܪ̈ܠܳܝܶܐ܀
5- ܡܶܢ ܫܰܪܒܬܳܐ ܕܺܝܗܽܘܕܳܐ. ܬܪܶܥܣܰܪ ܐܰܠܦܰܝ̈ܳܐ ܚܬܺܝ̈ܡܶܐ. ܡܶܢ ܫܰܪܒܬܳܐ ܕܪܽܘܒܶܝܠ. ܬܪܶܥܣܰܪ ܐܰܠܦܰܝ̈ܳܐ. ܘܡܶܢ ܫܰܪܒܬܳܐ ܕܓܳܕ. ܬܪܶܥܣܰܪ ܐܰܠܦܰܝ̈ܳܐ.
6- ܘܡܶܢ ܫܰܪܒܬܳܐ ܕܳܐܫܺܝܪ. ܬܪܶܥܣܰܪ ܐܰܠܦܰܝ̈ܳܐ. ܡܶܢ ܫܰܪܒܬܳܐ ܕܢܰܦܬܳܠܺܝ ܬܪܶܥܣܰܪ ܐܰܠܦܰܝ̈ܳܐ. ܘܡܶܢ ܫܰܪܒܬܳܐ ܕܰܡܢܰܫܶܐ. ܬܪܶܥܣܰܪ ܐܰܠܦܰܝ̈ܳܐ.
7- ܡܶܢ ܫܰܪܒܬܳܐ ܕܫܶܡܥܽܘܢ. ܬܪܶܥܣܰܪ ܐܰܠܦܰܝ̈ܳܐ. ܡܶܢ ܫܰܪܒܬܳܐ ܕܠܶܘܺܝ. ܬܪܶܥܣܰܪ ܐܰܠܦܰܝ̈ܳܐ. ܡܶܢ ܫܰܪܒܬܳܐ ܕܺܐܝܣܳܟܳܪ. ܬܪܶܥܣܰܪ ܐܰܠܦܰܝ̈ܳܐ.
8- ܡܶܢ ܫܰܪܒܬܳܐ ܕܰܙܒܳܘܠܽܘܢ. ܬܪܶܥܣܰܪ ܐܰܠܦܰܝ̈ܳܐ. ܡܶܢ ܫܰܪܒܬܳܐ ܕܝܰܘܣܶܦ. ܬܪܶܥܣܰܪ ܐܰܠܦܰܝ̈ܳܐ. ܡܶܢ ܫܰܪܒܬܳܐ ܕܒܶܢܝܳܡܶܝܢ. ܬܪܶܥܣܰܪ ܐܰܠܦܰܝ̈ܳܐ ܚܬܺܝ̈ܡܶܐ܀
9- ܘܒܳܬܰܪ ܗܳܠܶܝܢ ܚܙܺܝܬ ܘܗܳܐ ܟܶܢܫܳܐ ܣܰܓܺܝܳܐܐ ܗܰܘ ܐܰܝܢܳܐ ܕܰܠܡܶܡܢܝܶܗ ܠܳܐ ܐ̱ܢܳܫ ܡܨܶܐ ܗ̱ܘܳܐ. ܡܶܢ ܟܽܠ ܥܰܡܳܐ ܘܫܰܪ̈ܒܳܬܳܐ ܘܥܰܡ̱̈ܡܶܐ ܕܰܐܪܥܳܐ ܘܠܶܫܳܢ̈ܶܐ܆ ܕܩܳܝܡܺܝܢ ܩܕܳܡ ܬܪܽܘܢܽܘܣ ܘܰܩܕܳܡܰܘܗ̱ܝ ܕܶܐܡܪܳܐ܆ ܟܰܕ ܡܥܰܛܦܺܝܢ ܐܶܣ̈ܛܠܶܐ ܚܶܘܳܪ̈ܳܬܳܐ. ܘܕܶܩ̈ܠܶܐ ܒܺܐܝ̈ܕܰܝܳܐ ܕܺܝܠܗܽܘܢ.
10- ܘܩܳܥܶܝܢ ܒܩܳܠܳܐ ܪܰܒܳܐ ܟܰܕ ܐܳܡܪܺܝܢ. ܦܽܘܪܩܳܢܳܐ ܠܰܐܠܳܗܳܐ ܕܺܝܠܰܢ ܠܗܰܘ ܕܝܳܬܶܒ ܥܰܠ ܬܪܽܘܢܽܘܣ ܘܠܶܐܡܪܳܐ.
11- ܘܟܽܠܗܽܘܢ ܗܳܢܽܘܢ ܡ̈ܰܠܰܐܟܶܐ܆ ܩܳܝܡܺܝܢ ܗ̱ܘܰܘ ܚܕܳܪ̈ܰܘܗ̱ܝ ܕܰܬܪܽܘܢܽܘܣ ܘܰܕܗܳܢܽܘܢ ܩܰܫܺܝ̈ܫܶܐ ܘܰܕܗܳܠܶܝܢ ܐܰܪܒܰܥ ܚܰܝ̈ܘܳܬܳܐ. ܘܰܢܦܰܠܘ ܩܕܳܡ ܬܪܽܘܢܽܘܣ ܕܺܝܠܶܗ ܥܰܠ ܦܰܪ̈ܨܽܘܦܶܐ ܕܺܝܠܗܽܘܢ ܘܰܣܓܶܕܘ ܠܰܐܠܳܗܳܐ
12- ܟܰܕ ܐܳܡܪܺܝܢ ܐܰܡܺܝܢ. ܒܽܘܪܟܬܳܐ ܘܬܶܫܒܽܘܚܬܳܐ ܘܚܶܟܡܬܳܐ ܘܩܽܘܒܳܠ ܛܰܝܒܽܘܬܳܐ ܘܺܐܝܩܳܪܳܐ ܘܚܰܝܠܳܐ ܘܥܽܘܫܢܳܐ ܠܰܐܠܳܗܳܐ ܕܺܝܠܰܢ܆ ܠܥܳܠܡ̈ܶܐ ܕܥܳܠܡ̈ܶܐ ܐܰܡܺܝܢ܀
13- ܘܦܰܢܺܝ ܚܰܕ ܡܶܢ ܩܰܫܺܝ̈ܫܶܐ ܘܶܐܡܰܪ ܠܺܝ. ܗܳܠܶܝܢ ܕܰܡܥܰܛܦܺܝܢ ܐܶܣ̈ܛܠܶܐ ܗܳܢܶܝܢ ܚܶܘܳܪ̈ܳܬܳܐ܆ ܡܰܢܽܘ ܐܺܝܬܰܝܗܽܘܢ؟ ܘܡܶܢ ܐܰܝܟܳܐ ܐܶܬܰܘ؟
14- ܘܶܐܡܪܶܬ ܠܶܗ. ܡܳܪܳܐ ܕܺܝܠܝ ܐܰܢ̱ܬ ܝܳܕܰܥ ܐܰܢ̱ܬ. ܘܶܐܡܰܪ ܠܺܝ. ܗܳܢܽܘܢ ܐܺܝܬܰܝܗܽܘܢ܆ ܗܳܢܽܘܢ ܕܳܐܬܶܝܢ ܡܶܢ ܐܽܘܠܨܳܢܳܐ ܪܰܒܳܐ. ܘܰܐܫܺܝܓܘ ܐܶܣ̈ܛܠܶܐ ܕܺܝܠܗܽܘܢ ܘܚܰܘܰܪܘ ܐܶܢܶܝܢ ܒܰܕܡܶܗ ܕܶܐܡܪܳܐ.
15- ܡܶܛܽܠ ܗܳܕܶܐ ܐܺܝܬܰܝܗܽܘܢ ܩܕܳܡ ܬܪܽܘܢܽܘܣ ܕܰܐܠܳܗܳܐ܆ ܘܰܡܫܰܡܫܺܝܢ ܠܶܗ ܐܺܝܡܳܡܳܐ ܘܠܺܠܝܳܐ ܒܗܰܝܟܠܳܐ ܕܺܝܠܶܗ. ܘܗܰܘ ܕܝܳܬܶܒ ܥܰܠ ܬܪܽܘܢܽܘܣ ܢܰܓܶܢ ܥܠܰܝܗܽܘܢ.
16- ܠܳܐ ܢܶܟܦܢܽܘܢ ܬܽܘܒ ܘܠܳܐ ܢܶܨܗܽܘܢ ܬܽܘܒ. ܘܠܳܐ ܢܶܦܶܠ ܥܠܰܝܗܽܘܢ ܫܶܡܫܳܐ ܘܠܳܐ ܟܽܠ ܚܽܘܡܳܐ.
17- ܡܶܛܽܠ ܕܶܐܡܪܳܐ ܗܰܘ ܕܝܳܬܶܒ ܒܰܡܨܰܥܬܶܗ ܕܰܬܪܽܘܢܽܘܣ ܢܶܪܥܶܐ ܐܶܢܽܘܢ. ܘܰܢܗܰܕܶܐ ܐܶܢܽܘܢ ܥܰܠ ܡܥܺܝܢܳܐ ܕܡܰܝ̈ܳܐ ܚܰܝ̈ܶܐ. ܘܢܶܠܚܶܐ ܐܰܠܳܗܳܐ ܟܽܠ ܕܶܡܥܬܳܐ ܡܶܢ ܥܰܝ̈ܢܰܝܗܽܘܢ܀