Revelation 9
The Book of Revelation
܀ ܓܠܝܢܐ ܕܝܘܚܢܢ ܛ ܀
1- ܘܗܰܘ ܚܡܺܝܫܳܝܳܐ ܡܰܠܰܐܟܳܐ ܝܰܒܶܒ܆ ܘܰܚܙܺܝܬ ܟܰܘܟܒܳܐ ܕܰܢܦܰܠ ܡܶܢ ܫܡܰܝܳܐ ܥܰܠ ܐܰܪܥܳܐ܆ ܘܶܐܬܺܝܗܶܒ ܠܶܗ ܩܠܺܝܕܳܐ ܕܒܺܐܪܳܐ ܕܰܬܗܽܘܡܳܐ.
2- ܘܰܦܬܰܚ ܠܒܺܐܪܳܐ ܕܰܬܗܽܘܡܳܐ ܪܰܒܳܐ܆ ܘܰܣܠܶܩ ܬܶܢܳܢܳܐ ܡܶܢ ܒܺܐܪܳܐ܆ ܐܰܝܟ ܬܶܢܳܢܳܐ ܕܰܐܬܽܘܢܳܐ ܪܰܒܳܐ ܕܡܶܫܬܓܰܪ. ܘܰܚܫܶܟ ܫܶܡܫܳܐ ܘܳܐܐܰܪ ܡܶܢ ܬܶܢܳܢܳܐ ܕܒܺܐܪܳܐ.
3- ܘܡܶܢ ܬܶܢܳܢܳܐ ܢܦܰܩܘ ܩܰܡ̈ܨܶܐ ܠܰܐܪܥܳܐ܆ ܘܶܐܬܺܝܗܶܒ ܠܗܽܘܢ ܫܽܘܠܛܳܢܳܐ ܐܰܝܟ ܕܺܐܝܬ ܠܗܶܝܢ ܫܽܘܠܛܳܢܳܐ ܠܥܶܩܰܪ̈ܒܶܐ ܥܰܠ ܐܰܪܥܳܐ.
4- ܘܶܐܬܶܐܡܰܪ ܠܗܽܘܢ ܕܠܳܐ ܢܰܗܪܽܘܢ ܠܰܥܡܺܝܪܳܐ ܕܰܐܪܥܳܐ. ܘܠܳܐ ܠܟܽܠ ܝܽܘܪܳܩ ܐܳܦܠܳܐ ܠܟܽܠ ܐܺܝܠܳܢܳܐ. ܐܶܠܳܐ ܐܶܢ ܠܰܒܢܰܝ̈ܢܳܫܳܐ܇ ܗܳܢܽܘܢ ܐܰܝܠܶܝܢ ܕܠܰܝܬ ܠܗܽܘܢ ܚܳܬܡܳܐ ܕܰܐܠܳܗܳܐ ܥܰܠ ܒܶܝܬ ܥܰܝ̈ܢܶܐ ܕܺܝܠܗܽܘܢ.
5- ܘܶܐܬܺܝܗܶܒ ܠܗܽܘܢ ܐܰܝܟܰܢܳܐ ܕܠܳܐ ܢܶܩܛܠܽܘܢ ܐܶܢܽܘܢ. ܐܶܠܳܐ ܕܢܶܫܬܰܢܩܽܘܢ ܝܰܪ̈ܚܶܐ ܚܰܡܫܳܐ. ܘܬܰܫܢܺܝܩܳܐ ܕܺܝܠܗܽܘܢ ܐܰܝܟ ܬܰܫܢܺܝܩܳܐ ܕܥܶܩܰܪܒܳܐ ܐܶܡܰܬܝ ܕܬܶܡܚܶܐ ܠܐ̱ܢܳܫ.
6- ܘܰܒܝܰܘ̈ܡܳܬܳܐ ܗܳܢܽܘܢ ܢܶܒܥܽܘܢ ܒܢܰܝ̈ܢܳܫܳܐ ܠܡܰܘܬܳܐ ܘܠܳܐ ܢܶܫܬܟܰܚ ܠܗܽܘܢ. ܘܢܶܬܪܰܓܪܓܽܘܢ ܠܰܡܡܳܬ܆ ܘܢܶܥܪܽܘܩ ܡܰܘܬܳܐ ܡܶܢܗܽܘܢ.
7- ܘܕܽܘ̈ܡܝܶܐ ܕܗܳܢܽܘܢ ܩܰܡ̈ܨܶܐ܆ ܕܳܡܶܝܢ ܐܰܝܟ ܕܡܽܘܬܳܐ ܕܪ̈ܰܟܫܳܐ ܕܰܡܛܰܝܒܺܝܢ ܠܰܩܪܳܒܳܐ. ܘܥܰܠ ܪ̈ܺܝܫܶܐ ܕܺܝܠܗܽܘܢ܆ ܐܰܝܟ ܟܠܺܝܠܳܐ ܕܰܕܡܽܘܬܳܐ ܕܕܰܗܒܳܐ. ܘܦܰܪ̈ܨܽܘܦܶܐ ܕܺܝܠܗܽܘܢ ܐܰܝܟ ܦܰܪ̈ܨܽܘܦܶܐ ܕܒܢܰܝ̈ܢܳܫܳܐ.
8- ܘܺܐܝܬ ܗ̱ܘܳܐ ܠܗܽܘܢ ܣܰܥܪܳܐ ܐܰܝܟ ܣܰܥܪܳܐ ܕܢܶܫ̈ܶܐ. ܘܫܶܢ̈ܶܐ ܕܺܝܠܗܽܘܢ ܐܰܝܟ ܕܰܐܪ̈ܝܰܘܳܬܳܐ ܐܺܝܬܰܝܗܶܝܢ ܗ̱ܘ̈ܰܝ.
9- ܘܺܐܝܬ ܗ̱ܘܳܐ ܠܗܽܘܢ ܫܶܪ̈ܝܳܢܶܐ ܐܰܝܟ ܫܶܪ̈ܝܳܢܶܐ ܕܦܰܪܙܠܳܐ. ܘܩܳܠܳܐ ܕܓܶܦ̈ܶܐ ܕܺܝܠܗܽܘܢ ܐܰܝܟ ܩܳܠܳܐ ܕܡܰܪ̈ܟܒܳܬܳܐ ܕܪ̈ܰܟܫܳܐ ܣܰܓܺܝ̈ܶܐܐ ܕܪܳܗܛܺܝܢ ܠܰܩܪܳܒܳܐ.
10- ܘܺܐܝܬ ܗ̱ܘܳܐ ܠܗܽܘܢ ܕܽܘ̈ܢܒܝܳܬܳܐ ܐܰܝܟ ܕܕܳܡ̈ܝܳܢ ܠܰܕܥܶܩܰܪ̈ܒܶܐ. ܘܥܽܘܩ̈ܣܶܐ ܘܰܒܕܽܘ̈ܢܒܝܳܬܳܐ ܕܺܝܠܗܽܘܢ. ܐܺܝܬ ܠܗܽܘܢ ܫܽܘܠܛܳܢܳܐ ܠܡܰܗܳܪܽܘ ܠܰܒܢܰܝ̈ܢܳܫܳܐ ܝܰܪ̈ܚܶܐ ܚܰܡܫܳܐ.
11- ܘܺܐܝܬ ܠܗܽܘܢ ܡܰܠܟܳܐ ܥܠܰܝܗܽܘܢ܆ ܠܡܰܠܰܐܟܳܐ ܕܰܬܗܽܘܡܳܐ. ܕܰܫܡܳܐ ܠܶܗ ܥܶܒܪܳܐܺܝܬ ܥܰܒܰܕܽܘ. ܒܝܰܘܢܳܝܳܐ ܕܶܝܢ ܫܡܳܐ ܐܺܝܬ ܠܶܗ ܐܰܦܳܠܽܘܢ.
12- ܗܰܘ ܚܰܕ ܘܳܝܳܐ ܐܶܙܰܠ܆ ܗܳܐ ܐܳܬܶܝܢ ܬܽܘܒ ܬܪܶܝܢ ܘܳܝ̈ܶܐ ܒܳܬܰܪ ܗܳܠܶܝܢ܀
13- ܘܗܰܘ ܫܬܺܝܬܳܝܳܐ ܡܰܠܰܐܟܳܐ ܝܰܒܶܒ. ܘܫܶܡܥܶܬ ܩܳܠܳܐ ܚܰܕ܆ ܡܶܢ ܩܰܪ̈ܢܳܬܶܗ ܕܡܰܕܒܚܳܐ ܕܕܰܗܒܳܐ ܗܰܘ ܕܰܩܕܳܡ ܐܰܠܳܗܳܐ.
14- ܕܳܐܡܰܪ ܠܡܰܠܰܐܟܳܐ ܫܬܺܝܬܳܝܳܐ ܗܰܘ ܕܺܐܝܬ ܠܶܗ ܫܺܝܦܽܘܪܳܐ܆ ܫܪܺܝ ܠܗܳܢܽܘܢ ܐܰܪܒܥܳܐ ܡ̈ܰܠܰܐܟܶܐ ܗܳܢܽܘܢ ܕܰܐܣܺܝܪܺܝܢ ܥܰܠ ܢܰܗܪܳܐ ܪܰܒܳܐ ܦܪܳܬ.
15- ܘܶܐܫܬܰܕܰܪܘ ܗܳܢܽܘܢ ܐܰܪܒܥܳܐ ܡ̈ܰܠܰܐܟܶܐ܇ ܗܳܢܽܘܢ ܕܰܡܛܰܝܒܺܝܢ ܠܫܳܥܬܳܐ ܘܰܠܝܰܘܡܳܐ ܘܰܠܝܰܪܚܳܐ. ܘܰܠܫܰܢ̱ܬܳܐ܇ ܐܰܝܟܰܢܳܐ ܕܢܶܩܛܠܽܘܢ ܠܬܽܘܠܬܳܐ ܕܰܒܢܰܝ̈ܢܳܫܳܐ.
16- ܘܡܶܢܝܳܢܳܐ ܕܦܳܠܚ̈ܶܐ ܕܦܰܪܳܫܽܘܬܳܐ܆ ܬܰܪܬܶܝܢ ܪܶܒܽܘ ܪ̈ܶܒܘܳܢ ܫܶܡܥܶܬ ܡܶܢܝܳܢܳܐ ܕܺܝܠܗܽܘܢ.
17- ܘܟܰܕ ܚܙܺܝܬ ܠܗܳܠܶܝܢ ܪ̈ܰܟܫܳܐ ܒܚܶܙܘܳܐ. ܘܰܠܗܳܢܽܘܢ ܕܝܳܬܒܺܝܢ ܥܠܰܝܗܽܘܢ ܕܺܐܝܬ ܠܗܽܘܢ ܫܶܪܝܳܢܳܐ ܢܽܘܪܳܢܳܝܳܐ. ܘܝܽܘ̈ܩܰܢܬܳܝܶܐ ܘܟܶܒܪ̈ܺܝܬܳܢܶܐ. ܘܪ̈ܺܝܫܰܝܗܽܘܢ ܕܪ̈ܰܟܫܳܐ܆ ܐܰܝܟ ܪ̈ܺܝܫܶܐ ܕܰܐܪ̈ܝܰܘܳܬܳܐ. ܘܡܶܢ ܦܽܘ̈ܡܶܐ ܕܺܝܠܗܽܘܢ ܢܳܦܩܳܐ ܢܽܘܪܳܐ ܘܬܶܢܳܢܳܐ. ܘܟܶܒܪܺܝܬܳܐ.
18- ܘܡܶܢ ܗܳܠܶܝܢ ܬܠܳܬ ܡܰܚ̈ܘܳܬܳܐ ܐܶܬܩܰܛܰܠܘ ܬܽܘܠܬܳܐ ܕܰܒܢܰܝ̈ܢܳܫܳܐ. ܘܡܶܢ ܢܽܘܪܳܐ ܘܡܶܢ ܬܶܢܳܢܳܐ ܘܡܶܢ ܟܶܒܪܺܝܬܳܐ ܗܳܠܶܝܢ ܕܢܳܦܩܺܝܢ ܡܶܢ ܦܽܘ̈ܡܶܐ ܕܺܝܠܗܽܘܢ.
19- ܗܽܘ ܓܶܝܪ ܫܽܘܠܛܳܢܗܽܘܢ ܕܪ̈ܰܟܫܳܐ ܒܦܽܘܡܳܐ ܕܺܝܠܗܽܘܢ ܐܺܝܬܰܘܗ̱ܝ܆ ܘܰܒܕܽܘ̈ܢܒܝܳܬܗܽܘܢ ܐܺܝܬܰܘܗ̱ܝ. ܗܳܢܶܝܢ ܓܶܝܪ ܕܽܘ̈ܢܒܝܳܬܳܐ ܕܺܝܠܗܽܘܢ ܕܳܡ̈ܝܳܢ ܠܰܚܘܰܘ̈ܳܬܳܐ܇ ܕܺܐܝܬ ܠܗܽܘܢ ܪ̈ܺܝܫܶܐ ܘܰܒܗܽܘܢ ܡܳܠܟܺܝܢ܀
20- ܘܫܰܪܟܳܐ ܕܰܒܢܰܝ̈ܢܳܫܳܐ ܗܳܢܽܘܢ ܕܠܳܐ ܐܶܬܩܰܛܰܠܘ ܒܡܰܚ̈ܘܳܬܳܐ ܗܳܠܶܝܢ܆ ܘܠܳܐ ܬܳܒܘ ܡܶܢ ܥ̈ܒܳܕܶܐ ܕܺܐܝ̈ܕܰܝܳܐ ܕܺܝܠܗܽܘܢ: ܐܰܝܟܰܢܳܐ ܕܠܳܐ ܢܶܣܓܕܽܘܢ ܠܕܰܝ̈ܘܶܐ܆ ܘܠܰܦܬܰܟܪ̈ܶܐ ܕܕܰܗܒܳܐ ܘܠܰܕܣܺܐܡܳܐ ܘܰܠܕܰܢܚܳܫܳܐ ܘܠܰܕܟܺܐܦܳܐ ܘܠܰܕܩܰܝܣܳܐ: ܗܳܠܶܝܢ ܘܠܳܐ ܠܡܶܚܙܳܐ ܡܨܶܝܢ܆ ܘܠܳܐ ܠܡܶܫܡܰܥ. ܘܠܳܐ ܠܰܡܗܰܠܳܟܽܘ.
21- ܘܠܳܐ ܬܳܒܘ ܡܶܢ ܩ̈ܶܛܠܶܐ ܕܺܝܠܗܽܘܢ ܘܠܳܐ ܡܶܢ ܚܰܪ̈ܫܰܝܗܽܘܢ ܘܠܳܐ ܡܶܢ ܙܳܢܝܽܘܬܗܽܘܢ܇ ܘܠܳܐ ܡܶܢ ܓܽܘ̈ܢܳܒܶܐ ܕܺܝܠܗܽܘܢ܀