Revelation 2
The Book of Revelation
܀ ܓܠܝܢܐ ܕܝܘܚܢܢ ܒ ܀
1- ܘܰܠܡܰܠܰܐܟܳܐ ܕܥܺܕܬܳܐ ܕܒܶܐܦܶܣܳܘܣ ܟܬܽܘܒ܆ ܗܳܟܰܢܳܐ ܐܳܡܰܪ ܗܰܘ ܕܰܐܚܺܝܕ ܫܰܒܥܳܐ ܟܰܘ̈ܟܒܺܝܢ ܒܝܰܡܺܝܢܳܐ ܕܺܝܠܶܗ. ܗܰܘ ܕܰܡܗܰܠܶܟ ܒܰܡܨܰܥܬܳܐ ܕܗܳܢܶܝܢ ܫܒܰܥ ܡܢܳܪ̈ܳܬܳܐ ܕܕܰܗܒܳܐ.
2- ܝܳܕܰܥ ܐ̱ܢܳܐ ܠܰܥ̈ܒܳܕܶܐ ܕܺܝܠܳܟ܆ ܘܰܠܥܰܡܠܳܐ ܘܠܰܡܣܰܝܒܪܳܢܽܘܬܳܐ ܕܺܝܠܳܟ. ܘܰܕܠܳܐ ܡܨܶܐ ܐܰܢ̱ܬ ܠܡܶܛܥܰܢ ܠܒܺܝ̈ܫܶܐ. ܘܢܰܣܺܝܬ ܠܰܐܝܠܶܝܢ ܕܳܐܡܪܺܝܢ ܗܶܢܽܘܢ ܠܗܽܘܢ ܕܰܫܠܺܝ̈ܚܶܐ ܐܺܝܬܰܝܗܽܘܢ ܘܠܳܐ ܐܺܝܬܰܝܗܽܘܢ. ܘܶܐܫܟܚܶܬ ܐܶܢܽܘܢ ܕܰܓ̈ܳܠܶܐ.
3- ܘܰܡܣܰܝܒܪܳܢܽܘܬܳܐ ܐܺܝܬ ܠܳܟ. ܘܰܛܥܶܢܬ ܡܶܛܽܠ ܫܡܳܐ ܕܺܝܠܝ. ܘܠܳܐ ܠܺܐܝܬ.
4- ܐܶܠܳܐ ܐܺܝܬ ܠܺܝ ܥܠܰܝܟ܆ ܡܶܛܽܠ ܕܚܽܘܒܳܐ ܕܺܝܠܳܟ ܗܰܘ ܩܰܕܡܳܝܳܐ ܫܒܰܩܬ.
5- ܐܶܬܕܰܟِܪ ܗܳܟܺܝܠ ܡܶܢ ܐܰܝܟܳܐ ܢܦܰܠܬ ܘܶܐܬܬܘܳܐ. ܘܠܰܥ̈ܒܳܕܶܐ ܩܰܕ̈ܡܳܝܶܐ ܥܒܶܕ. ܘܶܐܢ ܕܶܝܢ ܠܳܐ܆ ܐܳܬܶܐ ܐ̱ܢܳܐ ܠܳܟ ܥܓܰܠ܆ ܘܰܡܙܺܝܥ ܐ̱ܢܳܐ ܡܢܳܪܬܳܐ ܕܺܝܠܳܟ ܡܶܢ ܕܽܘܟܬܳܗ̇܇ ܐܶܢ ܠܳܐ ܬܬܽܘܒ.
6- ܐܶܠܳܐ ܗܳܕܶܐ ܐܺܝܬ ܠܳܟ܆ ܕܣܳܢܶܐ ܐܰܢ̱ܬ ܠܰܥ̈ܒܳܕܶܐ ܕܢܺܐܩܽܘ̈ܠܺܝܛܶܐ. ܠܗܳܠܶܝܢ ܕܳܐܦ ܐܶܢܳܐ ܣܳܢܶܐ ܐ̱ܢܳܐ.
7- ܗܰܘ ܕܺܐܝܬ ܠܶܗ ܐܶܕ̈ܢܶܐ܆ ܢܶܫܡܰܥ ܡܳܢܳܐ ܪܽܘܚܳܐ ܐܳܡܰܪ ܠܥ̈ܺܕܳܬܳܐ. ܠܗܰܘ ܕܙܳܟܶܐ ܐܶܬܶܠ ܠܶܗ ܠܡܶܐܟܰܠ ܡܶܢ ܩܰܝܣܳܐ ܕܚܰܝ̈ܶܐ܇ ܗܰܘ ܕܺܐܝܬܰܘܗ̱ܝ ܒܦܰܪܕܰܝܣܶܗ ܕܰܐܠܳܗܳܐ ܕܺܝܠܝ܀
8- ܘܰܠܡܰܠܰܐܟܳܐ ܕܥܺܕܬܳܐ ܗܳܝ ܕܰܒܣܰܡܽܘܪܢܰܐ ܟܬܽܘܒ܆ ܗܳܠܶܝܢ ܐܳܡܰܪ ܗܰܘ ܩܰܕܡܳܝܳܐ ܘܗܰܘ ܐ̱ܚܪܳܝܳܐ܇ ܗܰܘ ܕܰܗܘܳܐ ܡܺܝܬܳܐ ܘܰܚܝܳܐ.
9- ܝܳܕܰܥ ܐ̱ܢܳܐ ܠܰܥ̈ܒܳܕܶܐ ܕܺܝܠܳܟ ܘܠܽܐܘ̈ܠܨܳܢܶܐ ܘܳܐܦ ܠܡܶܣܟܺܢܽܘܬܳܐ܇ ܐܶܠܳܐ ܥܰܬܺܝܪܳܐ ܐܺܝܬܰܝܟ. ܘܰܠܓܽܘܕܳܦܳܐ ܕܡܶܢ ܗܳܠܶܝܢ ܕܳܐܡܪܺܝܢ ܗܶܢܽܘܢ ܠܗܽܘܢ ܕܺܝܗܽܘ̈ܕܳܝܶܐ ܐܺܝܬܰܝܗܽܘܢ. ܘܠܳܐ ܐܺܝܬܰܝܗܽܘܢ. ܐܶܠܳܐ ܟܢܽܘܫܬܳܐ ܕܣܳܛܳܢܳܐ܆
10- ܠܳܐ ܡܶܕܶܡ ܬܶܕܚܰܠ ܡܶܢ ܗܳܠܶܝܢ ܕܰܥܬܺܝܕ ܐܰܢ̱ܬ ܠܡܶܚܰܫ. ܗܳܐ ܕܶܝܢ ܥܬܺܝܕ ܐܳܟܶܠܩܰܪܨܳܐ ܠܡܰܪܡܳܝܽܘ ܡܶܢܟܽܘܢ ܒܒܶܝܬ ܢܛܽܘܪܬܳܐ ܐܰܝܟܰܢܳܐ ܕܬܶܬܢܰܣܽܘܢ. ܘܢܶܗܘܶܐ ܠܟܽܘܢ ܐܽܘܠܨܳܢܳܐ ܝܰܘ̈ܡܶܐ ܥܶܣܪܳܐ. ܗܘܺܝ ܡܗܰܝܡܢܳܐ ܥܕܰܡܳܐ ܠܡܰܘܬܳܐ ܘܶܐܬܶܠ ܠܳܟ ܟܠܺܝܠܳܐ ܕܚܰܝ̈ܶܐ܀
11- ܗܰܘ ܕܺܐܝܬ ܠܶܗ ܐܶܕ̈ܢܶܐ܆ ܢܶܫܡܰܥ ܡܳܢܳܐ ܐܳܡܰܪ ܪܽܘܚܳܐ ܠܥ̈ܺܕܳܬܳܐ. ܠܗܰܘ ܕܙܳܟܶܐ ܠܳܐ ܢܶܬܥܰܘܰܠ ܡܶܢ ܡܰܘܬܳܐ ܗܰܘ ܬܶܢܝܳܢܳܐ܀
12- ܘܰܠܡܰܠܰܐܟܳܐ ܗܰܘ ܕܥܺܕܬܳܐ ܗܳܝ ܕܦܶܪܓܰܡܰܐ ܟܬܽܘܒ܆ ܗܳܠܶܝܢ ܐܳܡܰܪ ܗܰܘ ܕܺܐܝܬ ܠܶܗ ܣܰܝܦܳܐ ܗܰܘ ܚܰܪܺܝܦܳܐ ܕܰܬܪܶܝܢ ܦܽܘ̈ܡܰܘܗ̱ܝ.
13- ܝܳܕܰܥ ܐ̱ܢܳܐ ܠܰܥܒܳܕܳܐ ܕܺܝܠܳܟ ܘܰܐܝܟܳܐ ܥܳܡܰܪ ܐܰܢ̱ܬ. ܐܰܝܟܳܐ ܕܟܽܘܪܣܝܶܗ ܕܣܳܛܳܢܳܐ. ܘܰܐܚܺܝܕ ܐܰܢ̱ܬ ܒܰܫܡܳܐ ܕܺܝܠܝ. ܘܠܳܐ ܟܦܰܪܬ ܒܗܰܝܡܳܢܽܘܬܳܐ ܕܺܝܠܝ. ܒܝܰܘ̈ܡܳܬܳܐ ܗܳܠܶܝܢ ܕܶܐܬܚܪܺܝܬ ܗܰܘ ܣܳܗܕܳܐ ܕܺܝܠܝ. ܗܰܘ ܡܗܰܝܡܢܳܐ ܕܺܝܠܝ. ܗܰܘ ܕܶܐܬܩܛܶܠ ܠܘܳܬܟܽܘܢ. ܐܰܝܟܳܐ ܕܥܳܡܰܪ ܣܳܛܳܢܳܐ.
14- ܐܶܠܳܐ ܐܺܝܬ ܠܺܝ ܥܠܰܝܟ ܙܥܽܘܪ̈ܝܳܬܳܐ܆ ܕܺܐܝܬ ܠܳܟ ܬܰܡܳܢ ܕܰܐܚܺܝܕܺܝܢ ܠܡܰܠܦܳܢܽܘܬܳܐ ܕܒܶܠܥܰܡ. ܗܰܘ ܕܰܐܠܶܦ ܠܒܳܠܳܩ ܠܡܰܪܡܳܝܽܘ ܟܶܫܠܳܐ ܩܕܳܡ ܒܢܰܝ̈ܳܐ ܕܺܐܝܣܪܳܐܶܝܠ. ܘܰܠܡܶܐܟܰܠ ܕܶܒܚ̈ܰܝ ܦܬܰܟܪ̈ܶܐ ܘܠܰܡܙܰܢܳܝܽܘ.
15- ܗܳܟܰܢܳܐ ܐܺܝܬ ܠܳܟ ܐܳܦ ܐܰܢ̱ܬ ܕܰܐܚܺܝܕܺܝܢ ܠܡܰܠܦܳܢܽܘܬܳܐ ܕܢܺܐܩܽܘ̈ܠܺܝܛܽܘ.
16- ܒܳܗ̇ ܒܰܕܡܽܘܬܳܐ ܐܶܬܬܘܳܐ. ܘܶܐܢ ܕܶܝܢ ܠܳܐ܆ ܐܳܬܶܐ ܐ̱ܢܳܐ ܠܳܟ ܥܓܰܠ. ܘܰܐܩܪܶܒ ܥܰܡܗܽܘܢ ܒܣܰܝܦܳܐ ܕܦܽܘܡܳܐ ܕܺܝܠܝ܀
17- ܗܰܘ ܕܺܐܝܬ ܠܶܗ ܐܶܕ̈ܢܶܐ܆ ܢܶܫܡܰܥ ܡܳܢܳܐ ܪܽܘܚܳܐ ܐܳܡܰܪ ܠܥ̈ܺܕܳܬܳܐ. ܠܗܰܘ ܕܙܳܟܶܐ ܐܶܬܶܠ ܠܶܗ ܠܡܶܐܟܰܠ ܡܶܢ ܡܰܢ̱ܢܳܐ ܗܰܘ ܕܡܰܛܫܰܝ. ܘܶܐܬܶܠ ܠܶܗ ܚܽܘܫܒܳܢܳܐ ܚܶܘܳܪܳܐ ܘܥܰܠ ܚܽܘܫܒܳܢܳܐ ܫܡܳܐ ܚܰܕ̱ܬܳܐ ܕܰܟܬܺܝܒ܆ ܠܗܰܘ ܕܠܳܐ ܐ̱ܢܳܫ ܝܳܕܰܥ ܐܶܠܳܐ ܐܶܢ ܗܰܘ ܕܢܳܣܶܒ܀
18- ܘܰܠܡܰܠܰܐܟܳܐ ܕܰܐܪܒܥܳܐ ܗܰܘ ܕܥܺܕܬܳܐ ܕܰܒܬܶܐܘܰܛܺܝܪܰܐ ܟܬܽܘܒ܆ ܗܳܠܶܝܢ ܐܳܡܰܪ ܒܪܶܗ ܕܰܐܠܳܗܳܐ܇ ܗܰܘ ܕܺܐܝܬ ܠܶܗ ܥܰܝ̈ܢܶܐ ܕܺܝܠܶܗ ܐܰܝܟ ܕܫܰܠܗܶܒܺܝܬܳܐ ܕܢܽܘܪܳܐ܇ ܘܪ̈ܶܓܠܶܐ ܕܺܝܠܶܗ ܕܳܡ̈ܝܳܢ ܠܰܢܚܳܫܳܐ ܠܶܒܢܳܝܳܐ.
19- ܝܳܕܰܥ ܐ̱ܢܳܐ ܠܰܥ̈ܒܳܕܶܐ ܕܺܝܠܳܟ ܘܰܠܚܽܘܒܳܐ ܘܰܠܗܰܝܡܳܢܽܘܬܳܐ. ܘܰܠܬܶܫܡܶܫܬܳܐ ܘܠܰܡܣܰܝܒܪܳܢܽܘܬܳܐ ܕܺܝܠܳܟ. ܘܠܰܥ̈ܒܳܕܶܐ ܕܺܝܠܳܟ ܗܳܠܶܝܢ ܐ̱ܚܪ̈ܳܝܶܐ ܕܣܰܓܺܝܐܺܝܢ ܡܶܢ ܩܰܕ̈ܡܳܝܶܐ.
20- ܐܶܠܳܐ ܐܺܝܬ ܠܺܝ ܥܠܰܝܟ܆ ܡܶܛܽܠ ܕܰܫܒܰܩܬ ܠܰܐܢ̱ܬܬܳܐ ܕܺܝܠܳܟ ܐܺܝܙܒܶܠ܇ ܗܳܝ ܕܳܐܡܪܳܐ ܗܺܝ ܠܳܗ̇ ܢܒܺܝܬܳܐ܆ ܘܡܰܠܦܳܐ ܘܡܰܛܥܝܳܐ ܠܥܰܒ̈ܕܶܐ ܕܺܝܠܝ ܠܰܡܙܰܢܳܝܽܘ܇ ܘܰܠܡܶܐܟܰܠ ܕܶܒܚ̈ܰܝ ܦܬܰܟܪ̈ܶܐ.
21- ܘܝܶܗܒܶܬ ܠܳܗ̇ ܙܰܒܢܳܐ ܐܰܝܟܰܢܳܐ ܕܬܶܬܘܶܐ܆ ܘܠܳܐ ܨܳܒܝܳܐ ܠܡܶܬܬܘܳܝܽܘ ܡܶܢ ܙܳܢܝܽܘܬܳܐ ܕܺܝܠܳܗ̇.
22- ܗܳܐ ܪܳܡܶܐ ܐ̱ܢܳܐ ܠܳܗ̇ ܒܥܰܪܣܳܐ܆ ܘܰܠܗܳܠܶܝܢ ܕܓܳܝܪܺܝܢ ܥܰܡܳܗ̇ ܒܽܐܘܠܨܳܢܳܐ ܪܰܒܳܐ܆ ܐܶܢ ܠܳܐ ܢܶܬܬܘܽܘܢ ܡܶܢ ܥ̈ܒܳܕܶܐ ܕܺܝܠܳܗ̇.
23- ܘܠܰܒ̈ܢܰܝܳܐ ܕܺܝܠܳܗ̇ ܐܶܩܛܽܘܠ ܒܡܰܘܬܳܐ. ܐܳܦ ܢܶܕ̈ܥܳܢ ܟܽܠܗܶܝܢ ܥ̈ܺܕܳܬܳܐ. ܕܶܐܢܳܐ ܐܺܝܬܰܝ ܗܰܘ ܒܳܨܶܐ ܠܶܒܰܘ̈ܳܬܳܐ ܘܟܽܘ̈ܠܝܳܬܳܐ. ܘܶܐܬܶܠ ܠܟܽܘܢ ܠܟܽܠ ܚܰܕ ܐܰܝܟ ܥ̈ܒܳܕܶܐ ܕܺܝܠܟܽܘܢ.
24- ܘܰܠܟܽܘܢ ܕܶܝܢ ܐܳܡܰܪ ܐ̱ܢܳܐ ܠܗܳܠܶܝܢ ܕܫܰܪܟܳܐ ܕܰܒܬܶܐܘܰܛܺܝܪܰܐ. ܟܽܠܗܽܘܢ ܗܳܢܽܘܢ ܕܠܰܝܬ ܠܗܽܘܢ ܡܰܠܦܳܢܽܘܬܳܐ ܗܳܕܳܐ. ܗܳܢܽܘܢ ܐ̱ܢܳܫܺܝ̈ܢ ܕܠܳܐ ܝܺܕܰܥܘ ܥܰܡܺܝ̈ܩܳܬܶܗ ܕܣܳܛܳܢܳܐ ܐܰܝܟ ܕܳܐܡܪܺܝܢ. ܐܶܠܳܐ ܪܳܡܶܐ ܐ̱ܢܳܐ ܥܠܰܝܟܽܘܢ ܐ̱ܚܪܺܢܳܐ ܝܽܘܩܪܳܐ.
25- ܒܪܰܡ ܗܰܘ ܕܺܐܝܬ ܠܟܽܘܢ ܐܰܚܽܘܕܘ ܥܕܰܡܳܐ ܕܳܐܬܶܐ ܐ̱ܢܳܐ܀
26- ܘܗܰܘ ܕܙܳܟܶܐ ܘܗܰܘ ܕܢܳܛܰܪ ܥܕܰܡܳܐ ܠܫܽܘܠܳܡܳܐ ܠܰܥ̈ܒܳܕܶܐ ܕܺܝܠܝ܆ ܐܶܬܶܠ ܠܶܗ ܫܽܘܠܛܳܢܳܐ ܥܰܠ ܥܰܡ̱̈ܡܶܐ.
27- ܘܢܶܪܥܶܐ ܐܶܢܽܘܢ ܒܫܰܒܛܳܐ ܕܦܰܪܙܠܳܐ܆ ܘܰܐܝܟ ܡܳܐܢܳܐ ܕܦܰܚܳܪܳܐ ܢܶܫܬܰܚܩܽܘܢ. ܐܰܝܟ ܕܳܐܦ ܐܶܢܳܐ ܢܶܣܒܶܬ ܡܶܢ ܐܰܒܳܐ ܕܺܝܠܝ.
28- ܘܶܐܬܶܠ ܠܶܗ ܠܟܰܘܟܒܳܐ ܗܰܘ ܨܰܦܪܳܝܳܐ܀
29- ܗܰܘ ܕܺܐܝܬ ܠܶܗ ܐܶܕ̈ܢܶܐ܆ ܢܶܫܡܰܥ ܡܳܢܳܐ ܐܳܡܰܪ ܪܽܘܚܳܐ ܠܥ̈ܺܕܳܬܳܐ܀