Revelation 6
The Book of Revelation
܀ ܓܠܝܢܐ ܕܝܘܚܢܢ ܘ ܀
1- ܘܰܚܙܺܝܬ ܟܰܕ ܦܬܰܚ ܐܶܡܪܳܐ ܠܚܰܕ ܡܶܢ ܛܰܒ̈ܥܶܐ. ܘܫܶܡܥܶܬ ܠܰܚܕܳܐ ܡܶܢ ܗܳܠܶܝܢ ܐܰܪܒܰܥ ܚܰܝ̈ܘܳܬܳܐ ܕܳܐܡܪܳܐ܆ ܐܰܝܟ ܩܳܠܳܐ ܕܪܰܥܡܳܐ܆ ܬܳܐ ܘܰܚܙܺܝ.
2- ܘܰܚܙܺܝܬ ܘܗܳܐ ܣܽܘܣܝܳܐ ܚܶܘܳܪܳܐ. ܘܗܰܘ ܕܝܳܬܶܒ ܥܠܰܘܗ̱ܝ܆ ܐܺܝܬ ܠܶܗ ܩܶܫܬܳܐ. ܘܶܐܬܺܝܗܶܒ ܠܶܗ ܟܠܺܝܠܳܐ. ܘܰܢܦܰܩ ܟܰܕ ܙܰܟܳܝ ܐܰܝܟܰܢܳܐ ܕܢܶܙܟܶܐ܀
3- ܘܟܰܕ ܦܬܰܚ ܠܛܰܒܥܳܐ ܗܰܘ ܬܪܰܝܳܢܳܐ܆ ܫܶܡܥܶܬ ܠܚܰܝܽܘܬܳܐ ܬܪܰܝܳܢܺܝܬܳܐ ܕܳܐܡܪܳܐ ܬܳܐ.
4- ܘܰܢܦܰܩ ܐ̱ܚܪܺܢܳܐ ܣܽܘܣܝܳܐ ܣܽܘܡܳܩܳܐ. ܘܰܠܗܰܘ ܕܝܳܬܶܒ ܥܠܰܘܗ̱ܝ܆ ܐܶܬܺܝܗܶܒ ܠܶܗ ܠܡܶܣܰܒ ܫܰܝܢܳܐ ܡܶܢ ܐܰܪܥܳܐ܆ ܘܰܐܝܟܰܢܳܐ ܕܠܰܚܕ̈ܳܕܶܐ ܢܢܰܟܣܽܘܢ. ܘܶܐܬܺܝܗܶܒ ܠܶܗ ܣܰܝܦܳܐ ܪܰܒܳܐ܀
5- ܘܟܰܕ ܦܬܰܚ ܠܛܰܒܥܳܐ ܗܰܘ ܬܠܺܝܬܳܝܳܐ܆ ܫܶܡܥܶܬ ܠܚܰܝܽܘܬܳܐ ܬܠܺܝܬܳܝܬܳܐ ܕܳܐܡܪܳܐ ܬܳܐ ܘܰܚܙܺܝ. ܘܰܚܙܺܝܬ ܘܗܳܐ ܣܽܘܣܝܳܐ ܐܽܘܟܳܡܳܐ ܘܗܰܘ ܕܝܳܬܶܒ ܥܠܰܘܗ̱ܝ ܕܺܐܝܬ ܠܶܗ ܡܰܐܣܰܬܳܐ ܒܺܐܝܕܳܐ ܕܺܝܠܶܗ.
6- ܘܫܶܡܥܶܬ ܩܳܠܳܐ ܒܰܡܨܰܥܬܳܐ ܕܰܐܪ̈ܒܥܳܬܰܝܗܶܝܢ ܚܰܝ̈ܘܳܬܳܐ ܕܳܐܡܰܪ܆ ܟܽܘܢܺܝ̈ܩܰܣ ܕܚ̈ܶܛܶܐ ܒܕܺܝܢܳܪܳܐ܆ ܘܰܬܠܳܬ ܟܽܘܢܺܝ̈ܩܰܣ ܕܰܣܥܳܪܳܐ ܒܕܺܝܢܳܪܳܐ. ܘܰܠܡܶܫܚܳܐ ܘܰܠܚܰܡܪܳܐ ܠܳܐ ܬܰܗܰܪ܀
7- ܘܟܰܕ ܦܬܰܚ ܠܛܰܒܥܳܐ ܗܰܘ ܪܒܺܝܥܳܝܳܐ܆ ܫܶܡܥܶܬ ܠܗܳܝ ܪܒܺܝܥܳܝܬܳܐ ܚܰܝܽܘܬܳܐ ܕܳܐܡܪܳܐ܆ ܬܳܐ ܘܰܚܙܺܝ.
8- ܘܰܚܙܺܝܬ ܘܗܳܐ ܣܽܘܣܝܳܐ ܝܽܘܪܳܩܳܐ. ܘܗܰܘ ܕܝܳܬܶܒ ܥܠܰܘܗ̱ܝ ܫܡܳܐ ܠܶܗ ܡܰܘܬܳܐ. ܘܰܫܝܽܘܠ ܢܳܩܦܳܐ ܒܳܬܪܶܗ. ܘܶܐܬܺܝܗܶܒ ܠܶܗ ܫܽܘܠܛܳܢܳܐ ܥܰܠ ܪܽܘܒܥܳܗ̇ ܕܰܐܪܥܳܐ. ܠܡܶܩܛܰܠ ܒܟܰܦܢܳܐ ܘܰܒܣܰܝܦܳܐ ܘܰܒܡܰܘܬܳܐ. ܡܶܢ ܚܰܝ̈ܘܳܬ ܫܶܢܳܐ ܕܰܐܪܥܳܐ܀
9- ܘܟܰܕ ܦܬܰܚ ܠܛܰܒܥܳܐ ܗܰܘ ܚܡܺܝܫܳܝܳܐ܆ ܚܙܺܝܬ ܠܬܰܚܬ ܡܶܢ ܡܰܕܒܚܳܐ܆ ܠܢܰܦ̈ܫܳܬܳܐ ܕܗܳܢܽܘܢ ܕܰܢܟܺܝܣܺܝܢ ܡܶܛܽܠ ܡܶܠܬܳܐ ܐܰܠܳܗܳܐ: ܘܡܶܛܽܠ ܣܳܗܕܽܘܬܳܐ ܕܶܐܡܪܳܐ ܗܳܝ ܕܺܐܝܬ ܗ̱ܘܳܐ ܠܗܽܘܢ.
10- ܘܩܳܥܶܝܢ ܗ̱ܘܰܘ ܒܩܳܠܳܐ ܪܰܒܳܐ ܟܰܕ ܐܳܡܪܺܝܢ. ܥܕܰܡܳܐ ܠܶܐܡܰܬܝ ܗܰܘ ܡܳܪܝܳܐ܇ ܗܰܘ ܩܰܕܺܝܫܳܐ܇ ܗܰܘ ܫܰܪܺܝܪܳܐ: ܠܳܐ ܕܳܐܶܢ ܐܰܢ̱ܬ ܘܬܳܒܰܥ ܐܰܢ̱ܬ ܕܡܳܐ ܕܺܝܠܰܢ ܡܶܢ ܗܳܠܶܝܢ ܕܥܳܡܪܺܝܢ ܥܰܠ ܐܰܪܥܳܐ.
11- ܘܶܐܬܝܰܗܒܰܬ ܠܟܽܠ ܚܰܕ ܡܶܢܗܽܘܢ ܐܶܣܛܠܳܐ ܚܶܘܳܪܬܳܐ. ܘܶܐܬܶܐܡܰܪ ܠܗܽܘܢ ܐܰܝܟܰܢܳܐ ܕܢܶܬܬܢܺܝܚܽܘܢ ܙܰܒܢܳܐ ܬܽܘܒ ܙܥܽܘܪܳܐ. ܥܕܰܡܳܐ ܕܰܡܫܰܡܠܶܝܢ ܐܳܦ ܟܢܰܘ̈ܳܬܗܽܘܢ ܗܳܢܽܘܢ ܐܰܚ̈ܶܐ ܕܺܝܠܗܽܘܢ. ܗܳܢܽܘܢ ܕܰܥܬܺܝܕܺܝܢ ܠܡܶܬܩܰܛܳܠܽܘ ܐܰܝܟ ܕܳܐܦ ܗܶܢܽܘܢ܀
12- ܘܰܚܙܺܝܬ ܟܰܕ ܦܬܰܚ ܠܛܰܒܥܳܐ ܗܰܘ ܫܬܺܝܬܳܝܳܐ܆ ܘܙܰܘܥܳܐ ܪܰܒܳܐ ܗܘܳܐ. ܘܫܶܡܫܳܐ ܗܘܳܐ ܐܽܘܟܳܡܳܐ ܐܰܝܟ ܣܰܩܳܐ ܕܣܰܥܪܳܐ. ܘܣܰܗܪܳܐ ܟܽܠܶܗ ܗܘܳܐ ܐܰܝܟ ܕܡܳܐ.
13- ܘܟܰܘ̈ܟܒܶܐ ܕܰܫܡܰܝܳܐ ܢܦܰܠܘ ܒܰܐܪܥܳܐ܆ ܐܰܝܟ ܬܺܬܳܐ ܕܫܳܕܝܳܐ ܦܰܩܽܘ̈ܥܶܐ ܕܺܝܠܳܗ̇. ܟܰܕ ܡܶܢ ܪܽܘܚܳܐ ܪܰܒܬܳܐ ܡܶܬܬܙܺܝܥܳܐ.
14- ܘܰܫܡܰܝ̈ܳܐ ܐܶܬܦܪܶܫܘ܆ ܘܰܐܝܟ ܟܬܳܒܳܐ ܕܡܶܬܟܪܶܟ. ܘܟܽܠ ܛܽܘܪܳܐ ܘܓܳܙܰܪܬܳܐ ܡܶܢ ܕܽܘ̈ܟܝܳܬܳܐ ܕܺܝܠܗܽܘܢ ܐܶܬܬܙܺܝܥܘ.
15- ܘܡ̈ܰܠܟܶܐ ܕܰܐܪܥܳܐ ܘܪܰܘܪ̈ܒܳܢܶܐ ܘܪ̈ܺܝܫܳܢܰܝ ܐܰܠܦܰܝ̈ܳܐ ܘܥܰܬܺܝܪ̈ܶܐ ܘܚܰܝ̈ܠܬܳܢܶܐ܆ ܘܟܽܠ ܥܰܒ̈ܕܶܐ ܘܒܰܪ ܚܺܐܪ̈ܶܐ܆ ܛܰܫܺܝܘ ܗܶܢܽܘܢ ܠܗܽܘܢ ܒܰܡܥܰܪ̈ܶܐ ܘܰܒܫܽܘ̈ܥܶܐ ܕܛܽܘܪ̈ܶܐ.
16- ܘܳܐܡܪܺܝܢ ܠܛܽܘܪ̈ܶܐ ܘܰܠܫܽܘ̈ܥܶܐ ܦܶܠܘ ܥܠܰܝܢ܆ ܘܛܰܫܰܘ ܠܰܢ ܡܶܢ ܦܰܪ̈ܨܽܘܦܰܘܗ̱ܝ ܕܗܰܘ ܕܝܳܬܶܒ ܥܰܠ ܬܪܽܘܢܽܘܣ܆ ܘܡܶܢ ܪܽܘܓܙܶܗ ܕܶܐܡܪܳܐ.
17- ܡܶܛܽܠ ܕܶܐܬܳܐ ܝܰܘܡܳܐ ܗܰܘ ܪܰܒܳܐ ܕܪܽܘܓܙܳܐ ܕܺܝܠܗܽܘܢ. ܘܡܰܢܽܘ ܡܨܶܐ ܠܰܡܩܳܡ؟܀