2 Chronicles 1
The second Book of Chronicles
܀ ܒ ܕܘܒܪ ܝܘܡ̈ܬܐ ܐ ܀
1 ܘܶܐܬܥܰܫܰܢ ܫܠܶܝܡܽܘܢ ܒܪܶܗ ܕܕܰܘܺܝܕ ܒܡܰܠܟܽܘܬܶܗ. ܘܡܳܪܝܳܐ ܐܰܠܳܗܶܗ ܥܰܡܶܗ. ܘܰܐܘܪܒܶܗ ܠܥܶܠ ܡܶܢ ܟܽܠܗܽܘܢ ܡܰܠ̈ܟܶܐ ܕܰܐܪܥܳܐ.
2 ܘܶܐܡܰܪ ܫܠܶܝܡܽܘܢ ܠܟܽܠܶܗ ܝܺܣܪܳܐܶܝܠ. ܠܪܰܘܖ̈ܒܳܢܶܐ ܕܰܐܠܦ̈ܶܐ ܘܰܕܡܰܐܘ̈ܳܬܳܐ. ܘܰܠܕܰܝܳܢ̈ܶܐ. ܘܰܠܟܽܠܗܽܘܢ ܪܰܘܖ̈ܒܳܢܶܐ. ܖ̈ܺܝܫܶܐ ܕܰܐܒܳܗ̈ܳܬܳܐ.
3 ܘܶܐܙܰܠ ܫܠܶܝܡܽܘܢ ܘܟܽܠ ܥܰܡܳܐ ܕܺܐܝܬ ܥܰܡܶܗ. ܠܒܽܘܣܳܡܳܐ ܪܰܒܳܐ ܕܰܗܘܳܐ ܒܓܶܒܥܽܘܢ ܩܪܺܝܬܳܐ. ܡܶܛܽܠ ܕܬܰܡܳܢ ܗܘܳܐ ܡܰܫܟܢܳܐ ܕܥܺܐܕܳܐ ܕܡܳܪܝܳܐ. ܕܰܥܒܰܕ ܡܽܘܫܶܐ ܥܰܒܕܶܗ ܕܡܳܪܝܳܐ ܒܡܰܕܒܪܳܐ ܠܽܘܩܒܰܠ ܩܺܐܒܽܘܬܶܗ ܕܡܳܪܝܳܐ.
4 ܘܰܐܣܩܳܗ̇ ܗܘܳܐ ܕܰܘܺܝܕ ܡܶܢ ܩܪܺܝܬܳܐ ܕܟܰܦܖ̈ܽܘܢܶܐ. ܐܰܝܟܳܐ ܕܰܐܬܩܶܢ ܗܘܳܐ ܠܳܗ̇ ܕܰܘܺܝܕ ܕܽܘܟܬܳܐ. ܡܶܛܽܠ ܕܰܢܩܰܫ ܗܘܳܐ ܠܳܗ̇ ܡܰܫܟܢܳܐ ܒܽܐܘܪܺܫܠܶܡ.
5 ܘܡܰܕܒܚܳܐ ܕܰܢܚܳܫܳܐ ܕܰܥܒܰܕ ܗܘܳܐ ܒܰܨܠܳܝܶܐܠ ܒܰܪ ܐܽܘܪܺܝ. ܒܰܪ ܚܽܘܪ. ܣܺܝܡ ܗܘܳܐ ܩܕܳܡ ܡܰܫܟܢܳܐ ܕܡܳܪܝܳܐ. ܘܬܰܒܥܶܗ ܗܘܳܐ ܫܠܶܝܡܽܘܢ ܘܟܽܠܳܗ̇ ܟܢܽܘܫܬܳܐ ܕܺܝܣܪܳܐܶܝܠ.
6 ܘܰܐܣܶܩ ܗܘܳܐ ܫܠܶܝܡܽܘܢ ܬܰܡܳܢ ܥܰܠ ܡܰܕܒܚܳܐ ܕܰܢܚܳܫܳܐ. ܩܕܳܡ ܡܳܪܝܳܐ. ܕܺܐܝܬ ܗܘܳܐ ܒܡܰܫܟܢܳܐ ܕܥܺܐܕܳܐ. ܘܩܰܪܶܒ ܥܠܰܘܗܝ ܥܠܰܘ̈ܳܬܳܐ ܐܳܠܶܦ.
7 ܒܠܺܠܝܳܐ ܗܰܘ ܐܶܬܓܠܺܝ ܡܳܪܝܳܐ ܥܰܠ ܫܠܶܝܡܽܘܢ ܒܚܶܠܡܳܐ ܕܠܺܠܝܳܐ. ܘܶܐܡܰܪ ܠܶܗ ܡܳܪܝܳܐ. ܫܐܰܠ ܡܶܕܶܡ. ܘܶܐܬܶܠ ܠܳܟ.
8 ܘܶܐܡܰܪ ܫܠܶܝܡܽܘܢ ܠܡܳܪܝܳܐ. ܐܰܢ̱ܬ ܥܒܰܕܬ ܥܰܡ ܕܰܘܺܝܕ ܐܳܒܝ ܚܶܣܕܳܐ ܪܰܒܳܐ. ܘܰܐܩܺܝܡܬܳܢܝ ܠܺܝ ܒܡܰܠܟܽܘܬܳܐ ܡܶܢ ܒܳܬܪܶܗ.
9 ܘܳܐܦ ܗܳܫܳܐ ܡܳܪܝܳܐ ܐܰܠܳܗܝ. ܢܶܫܖ̈ܳܢ ܡܶܟܺܝܠ ܡܶܠܰܝ̈ܟ ܕܡܰܠܶܠܬ ܥܰܡ ܕܰܘܺܝܕ ܐܳܒܝ. ܡܶܛܽܠ ܕܰܐܢ̱ܬ ܐܰܩܺܝܡܬܳܢܝ ܥܰܠ ܥܰܡܳܐ ܗܳܢܳܐ. ܘܣܰܓܺܝܐܰܐ ܗ̱ܘ ܐܰܝܟ ܥܰܦܪܳܐ ܕܰܐܪܥܳܐ.
10 ܘܳܐܦ ܗܳܫܳܐ ܚܶܟܡܬܳܐ ܘܺܝܕܰܥܬܳܐ ܗܰܒܠܺܝ. ܕܶܐܗܘܶܐ ܥܳܐܶܠ ܘܢܳܦܶܩ ܒܪܺܝܫܶܗ ܕܥܰܡܳܐ ܡܶܛܽܠ ܕܡܰܢܽܘ ܡܶܫܟܰܚ ܠܰܡܕܳܢܶܗ ܠܥܰܡܳܟ ܗܳܢܳܐ ܪܰܒܳܐ.
11 ܘܶܐܡܰܪ ܡܳܪܝܳܐ ܠܰܫܠܶܝܡܽܘܢ. ܚܠܳܦ ܕܰܗܘܳܬ ܗܳܕܶܐ ܒܪܶܥܝܳܢܳܟ. ܘܠܳܐ ܫܐܶܠܬ ܠܳܟ ܢܶܟܣ̈ܶܐ ܘܺܐܝܩܳܪܳܐ. ܘܠܳܐ ܢܰܦ̈ܫܳܬܳܐ ܕܰܒܥܶܠܕܒܳܒܰܝ̈ܟ. ܘܠܳܐ ܫܐܶܠܬ ܠܳܟ ܝܰܘ̈ܡܳܬܶܐ ܣܰܓܺܝ̈ܐܶܐ ܕܬܺܚܶܐ ܒܗܽܘܢ. ܘܰܫܐܶܠܬ ܠܳܟ ܚܶܟܡܬܳܐ ܘܺܝܕܰܥܬܳܐ. ܕܰܬܕܽܘܢ ܠܥܰܡܝ ܕܰܐܩܺܝܡܬܳܟ ܒܡܰܠܟܽܘܬܳܐ ܥܠܰܘܗܝ.
12 ܘܳܐܦ ܡܶܕܶܡ ܕܠܳܐ ܫܐܶܠܬ. ܝܳܗܶܒ ܐ̱ܢܳܐ ܠܳܟ. ܚܶܟܡܬܳܐ ܘܺܝܕܰܥܬܳܐ. ܘܥܽܘܬܪܳܐ. ܘܢܶܟܣ̈ܶܐ. ܘܺܐܝܩܳܪܳܐ. ܕܠܳܐ ܗܘܳܐ ܐܰܟܘܳܬܳܟ. ܒܡܰܠ̈ܟܶܐ ܟܽܠܗܽܘܢ ܕܩܳܡܘ ܩܕܳܡܰܝܟ. ܘܒܳܬܪܳܟ ܠܳܐ ܢܩܽܘܡ ܐܰܟܘܳܬܳܟ.
13 ܘܶܐܬܳܐ ܫܠܶܝܡܽܘܢ ܠܒܽܘܣܳܡܳܐ ܪܰܒܳܐ ܕܺܐܝܬ ܒܓܶܒܥܽܘܢ ܩܪܺܝܬܳܐ ܕܡܶܢ ܡܰܕܢܚܳܐ ܕܽܐܘܪܺܫܠܶܡ. ܡܶܢ ܩܕܳܡ ܡܰܫܟܢܳܐ ܕܥܺܐܕܳܐ. ܘܰܐܡܠܶܟ ܥܰܠ ܟܽܠܶܗ ܝܺܣܪܳܐܶܝܠ.
14 ܘܟܰܢܶܫ ܫܠܶܝܡܽܘܢ ܙܰܘ̈ܓܶܐ ܘܦܰܖ̈ܳܫܶܐ. ܘܰܗܘܰܘ ܠܶܗ ܐܳܠܶܦ ܘܰܐܪܒܰܥܡܳܐܐ ܙܰܘܓܺܝ̈ܢ. ܘܰܬܪܶܥܣܰܪ ܐܰܠܦܺܝ̈ܢ ܦܰܖ̈ܳܫܺܝܢ ܘܰܐܩܺܝܡ ܐܶܢܽܘܢ ܠܙܰܘ̈ܓܶܐ ܒܩܽܘܖ̈ܝܳܐ. ܘܡܶܢܗܽܘܢ ܗܘܰܘ ܥܰܡ ܡܰܠܟܳܐ ܒܽܐܘܪܺܫܠܶܡ.
15 ܘܝܰܗܒ ܡܰܠܟܳܐ ܟܶܣܦܳܐ ܒܽܐܘܪܺܫܠܶܡ ܐܰܝܟ ܟܺܐܦ̈ܶܐ. ܘܰܐܖ̈ܙܶܐ ܝܰܗܒ ܐܰܝܟ ܚܳܠܳܐ ܕܥܰܠ ܣܶܦܰܬ ܝܰܡܳܐ ܣܽܘܓܳܐܐ.
16 ܘܙܳܒܢܺܝܢ ܗܘܰܘ ܖ̈ܰܟܫܳܐ ܠܰܫܠܶܝܡܽܘܢ ܡܶܢ ܡܶܨܪܶܝܢ. ܘܡܶܢ ܡܕܺܝܢܰܬ ܐܰܦܶܠܳܝ̈ܶܐ. ܬܰܓܳܖ̈ܰܘܗܝ ܕܡܰܠܟܳܐ. ܡܶܢ ܡܕܺܝܢܰܬ ܐܰܦܶܠܳܝ̈ܶܐ ܒܰܕܡܰܝ̈ܳܐ.
17 ܘܣܳܠܩܺܝܢ ܘܙܳܒܢܺܝܢ ܙܰܘܓܳܐ ܡܶܢ ܡܶܨܪܶܝܢ ܒܫܶܬܡܳܐܐ ܕܟܶܣܦܳܐ. ܘܣܽܘܣܝܳܐ ܒܰܡܳܐܐ ܘܚܰܡܫܺܝܢ ܘܗܳܟܰܢܳܐ ܠܟܽܠ ܡܰܠ̈ܟܶܐ ܚܺܝܬܳܝ̈ܶܐ. ܘܡܰܠܟܰܝ̈ ܐܰܕܽܘܡ. ܘܒܺܐܝܕܰܝ̈ܗܽܘܢ ܡܰܦܩܺܝܢ.