2 Chronicles 14
The second Book of Chronicles
܀ ܒ ܕܘܒܪ ܝܘܡ̈ܬܐ ܝܕ ܀
1 ܘܰܫܟܶܒ ܐܰܒܺܝܳܐ ܥܰܡ ܐܰܒܳܗ̈ܳܬܶܗ. ܘܩܰܒܪܽܘܗܝ ܒܰܩܪܺܝܬܳܐ ܕܕܰܘܺܝܕ ܘܩܳܡ ܒܡܰܠܟܽܘܬܶܗ ܐܳܣܳܐ ܒܪܶܗ ܒܳܬܪܶܗ. ܒܝܰܘܡܰܘ̈ܗܝ ܐܶܬܬܢܺܝܚܰܬ ܐܰܪܥܳܐ ܡܶܢ ܩܺܐܖ̈ܣܶܐ ܥܶܣܪܺܝܢ ܫܢܺܝ̈ܢ.
2 ܘܰܥܒܰܕ ܐܳܣܳܐ ܕܛܳܒ ܘܫܰܦܺܝܪ ܩܕܳܡ ܡܳܪܝܳܐ ܐܰܠܳܗܶܗ.
3 ܘܰܥܩܰܪ ܡܰܕܒܚ̈ܶܐ ܕܰܐܠܳܗ̈ܶܐ ܢܽܘܟܖ̈ܳܝܶܐ. ܘܒܽܘܡ̈ܣܶܐ. ܘܬܰܒܰܪ ܩܳܝ̈ܡܳܬܳܐ ܘܦܰܣܶܩ ܐܰܢܕܖ̈ܝܳܢܛܶܐ.
4 ܘܶܐܡܰܪ ܠܺܝܗܽܘܕܳܐ. ܬܘ ܢܨܰܠܶܐ ܩܕܳܡ ܡܳܪܝܳܐ ܐܰܠܳܗܳܐ ܕܰܐܒܳܗ̈ܳܬܰܢ.
5 ܘܰܥܩܰܪ ܡܶܢ ܟܽܠܗܶܝܢ ܩܽܘܖ̈ܝܳܐ ܕܒܶܝܬ ܝܺܗܽܘܕܳܐ. ܥܠܰܘ̈ܳܬܳܐ. ܘܰܦܬܰܟܖ̈ܶܐ. ܘܶܐܬܬܢܺܝܚܰܬ ܡܰܠܟܽܘܬܶܗ ܒܝܰܘ̈ܡܳܬܶܗ. ܘܰܒܥܶܠܕܒܳܒ̈ܶܐ ܠܳܐ ܗܘܳܐ ܠܶܗ. ܡܶܢ ܟܽܠܗܽܘܢ ܒܰܥ̈ܠܰܝ ܬܚܽܘܡܶܗ.
6 ܘܰܒܢܳܐ ܩܽܘܖ̈ܝܳܐ ܥܰܫܺܝ̈ܢܳܬܳܐ. ܒܰܐܪܥܳܐ ܕܺܝܗܽܘܕܳܐ. ܡܶܛܽܠ ܕܶܐܬܬܢܺܝܚܰܬ ܐܰܪܥܳܐ. ܘܠܳܐ ܐܺܝܬ ܗܘܳܐ ܐ̱ܢܳܫ ܕܥܳܒܶܕ ܥܰܡܶܗ ܩܪܳܒܳܐ ܫܢܰܝ̈ܳܐ ܗܳܠܶܝܢ. ܡܶܛܽܠ ܕܰܐܢܺܝܚܶܗ ܗܘܳܐ ܡܳܪܝܳܐ.
7 ܘܶܐܡܰܪ ܠܰܕܒܶܝܬ ܝܺܗܽܘܕܳܐ. ܬܰܘ ܢܶܒܢܶܐ ܩܽܘܖ̈ܝܳܐ ܗܳܠܶܝܢ. ܘܢܰܟܪܶܟ ܐܶܢܶܝܢ ܫܽܘܖ̈ܶܐ ܘܡܰܓ̈ܕܠܶܐ. ܘܬܰܖ̈ܥܶܐ ܘܣܽܘܟܖ̈ܶܐ. ܥܰܕ ܫܰܠܝܳܐ ܐܰܪܥܳܐ ܡܶܢ ܩܺܐܪܣܳܐ. ܡܶܛܽܠ ܕܰܒܥܰܝܢ ܠܡܳܪܝܳܐ ܐܰܠܳܗܰܢ. ܐܳܦ ܗܽܘ ܒܥܳܢ. ܘܰܐܢܺܝܚܰܢ ܡܶܢ ܟܽܠܗܽܘܢ ܕܰܚܕܳܖ̈ܰܝܢ. ܘܒܰܝܐܰܢ ܘܦܰܨܝܰܢ.
8 ܘܰܗܘܰܘ ܠܳܐܣܳܐ ܓܰܒܖ̈ܶܐ ܓܰܢ̱ܒܳܖ̈ܰܝ ܚܰܝܠܳܐ. ܫܳܩ̈ܠܰܝ ܣܰܝ̈ܦܶܐ ܘܖ̈ܽܘܡܚܶܐ ܡܶܢ ܕܒܶܝܬ ܝܺܗܽܘܕܳܐ. ܬܠܳܬܡܳܐܐ ܐܰܠܦܺܝ̈ܢ. ܘܡܶܢ ܕܒܶܝܬ ܒܶܢܝܳܡܶܝܢ. ܠܒܺܝ̈ܫܰܝ ܫܶܪܝܳܢܳܐ. ܘܡܳܬܚܰܝ̈ ܩܶܫܬܳܐ. ܡܰܐܬܶܝܢ ܘܰܬܡܳܢܺܝܢ ܐܰܠܦܺܝ̈ܢ ܟܽܠܗܽܘܢ ܗܳܠܶܝܢ ܓܰܢ̱ܒܳܖ̈ܰܝ ܚܰܝܠܳܐ.
9 ܘܰܢܦܰܩ ܠܘܳܬܗܽܘܢ ܙܳܪܳܚ ܗܶܢܕܘܳܝܳܐ. ܒܚܰܝܠܳܐ ܣܰܓܺܝܐܐ. ܐܳܠܶܦ ܐܰܠܦܺܝ̈ܢ. ܘܰܒܙܰܘ̈ܓܶܐ ܬܠܳܬܺܝܢ ܐܰܠܦܺܝ̈ܢ. ܘܶܐܬܰܘ ܘܰܡܛܰܘ ܥܕܰܡܳܐ ܠܡܶܐܪܫܳܐ.
10 ܘܰܢܦܰܩ ܐܳܣܳܐ ܠܩܽܘܒܠܶܗ. ܘܰܥܒܰܕ ܥܰܡܶܗ ܩܪܳܒܳܐ ܒܢܰܚܠܳܐ ܕܡܶܐܪܫܳܐ.
11 ܘܨܰܠܺܝ ܐܳܣܳܐ ܩܕܳܡ ܡܳܪܝܳܐ ܐܰܠܳܗܶܗ. ܘܶܐܡܰܪ. ܐܰܢ̱ܬ ܗ̱ܘ ܡܳܪܰܢ ܥܳܕܽܘܪܶܗ ܕܥܰܡܳܟ. ܟܰܕ ܬܰܫܠܶܡ ܚܰܝܠܳܐ ܣܰܓܺܝܐܳܐ ܒܺܐܝ̈ܕܰܝ ܙܥܽܘܖ̈ܶܐ. ܗܳܝܕܶܝܢ ܢܶܕܥܽܘܢ ܟܽܠܗܽܘܢ ܥܳܡܽܘܖ̈ܰܘܗܝ ܕܥܳܠܡܳܐ ܕܫܰܦܺܝܪ ܡܶܬܬܰܟܠܺܝܢܰܢ ܥܠܰܝܟ. ܥܰܕܰܪܰܝܢ ܡܳܪܝܳܐ ܐܰܠܳܗܰܢ. ܥܰܕܰܪܰܝܢ. ܡܶܛܽܠ ܕܒܰܫܡܳܟ ܐܶܬܰܝܢ ܥܰܠ ܚܰܝܠܳܐ ܗܳܢܳܐ ܪܰܒܳܐ. ܡܳܪܝܳܐ ܐܰܠܳܗܰܢ. ܠܳܐ ܬܶܫܬܰܘܚܰܪ ܓܰܢ̱ܒܳܪܽܘܬܳܟ ܡܶܢܰܢ.
12 ܘܗܳܝܕܶܝܢ ܟܰܕ ܓܡܰܪ ܐܳܣܳܐ ܠܰܡܨܰܠܳܝܽܘ ܨܠܽܘܬܶܗ. ܬܒܰܪ ܡܰܠܰܐܟܶܗ ܕܡܳܪܝܳܐ ܠܗܶܢܕܘܳܝ̈ܶܐ. ܩܕܳܡ ܐܳܣܳܐ ܘܰܩܕܳܡ ܝܺܗܽܘܕܳܐ. ܘܰܥܪܰܩܘ ܗܶܢܕܘܳܝ̈ܶܐ.
13 ܘܰܪܕܰܦ ܐܶܢܽܘܢ ܐܳܣܳܐ ܘܥܰܡܳܐ ܕܥܰܡܶܗ ܥܕܰܡܳܐ ܠܓܳܕܳܪ. ܘܰܢܦܰܠܘ ܡܶܢ ܗܶܢܕܘܳܝ̈ܶܐ ܕܠܳܐ ܡܶܢܝܳܢܳܐ. ܡܶܛܽܠ ܕܶܐܬܬܒܰܪܘ ܩܕܳܡ ܡܳܪܝܳܐ. ܘܰܩܕܳܡ ܚܰܝ̈ܠܰܘܳܬܶܗ. ܘܰܢܣܰܒܘ. ܘܰܫܒܰܘ ܫܒܺܝܬܳܐ ܣܽܘܓܳܐܐ.
14 ܘܰܚܪܰܒܘ ܟܽܠܗܶܝܢ ܩܽܘܖ̈ܝܳܐ ܕܺܐܝܬ ܚܕܳܖ̈ܰܝ ܓܳܕܳܪ. ܡܶܛܽܠ ܕܰܗܘܳܬ ܕܶܚܠܬܶܗ ܕܡܳܪܝܳܐ ܥܠܰܝܗܽܘܢ ܘܒܰܙܘ ܟܽܠܗܶܝܢ ܩܽܘܖ̈ܝܳܐ. ܡܶܛܽܠ ܕܒܶܙܬܳܐ ܣܰܓܺܝܐܬܳܐ ܗܘܳܬ ܒܗܶܝܢ.
15 ܘܳܐܦ ܡܰܫܟ̈ܢܶܐ ܕܥܰܖ̈ܒܳܝܶܐ ܐܰܝܬܺܝܘ. ܘܰܫܒܰܘ ܥܳܢ̈ܳܐ ܣܽܘܓܳܐܐ ܕܛܳܒ. ܘܓܰܡ̈ܠܶܐ ܘܰܐܘܒܰܠܘ ܠܽܐܘܪܺܫܠܶܡ.