2 Chronicles 32
The second Book of Chronicles
܀ ܒ ܕܘܒܪ ܝܘܡ̈ܬܐ ܠܒ ܀
1 ܒܳܬܰܪ ܡ̈ܶܠܶܐ ܗܳܠܶܝܢ. ܘܩܽܘܫܬܳܐ ܕܰܥܒܰܕ ܚܶܙܰܩܝܳܐ. ܐܶܬܳܐ ܣܰܢܚܰܪܺܝܒ ܡܰܠܟܳܐ ܕܳܐܬܽܘܪ. ܘܰܫܪܳܐ ܥܰܠ ܝܺܗܽܘܕܳܐ. ܥܰܠ ܚܶܣܢ̈ܶܐ ܥܰܫܺܝܢ̈ܶܐ. ܘܶܐܡܰܪ ܠܥܳܡܽܘܖ̈ܰܝܗܽܘܢ. ܩܰܒܶܠܘ ܝܰܡܺܝܢܳܐ. ܘܬܰܘ ܠܘܳܬ.
2 ܘܰܚܙܳܐ ܚܶܙܰܩܝܳܐ ܕܶܐܬܳܐ ܣܰܢܚܰܪܺܝܒ ܡܰܠܟܳܐ ܕܳܐܬܽܘܪ. ܘܚܰܝ̈ܠܰܘܳܬܳܐ ܠܰܩܪܳܒܳܐ ܠܽܐܘܪܺܫܠܶܡ.
3 ܘܶܐܬܡܰܠܰܟ ܗܽܘ ܘܫܰܠܺܝܛܳܢܰܘ̈ܗܝ ܘܓܰܢ̱ܒܳܖ̈ܰܘܗܝ ܠܰܡܟܰܣܳܝܽܘ ܡܰܝ̈ܳܐ ܕܥܰܝ̈ܢܳܬܳܐ ܕܺܐܝܬ ܠܒܰܪ ܡܶܢ ܡܕܺܝܢܬܳܐ. ܘܥܰܕܪܽܘܗܝ ܫܰܠܺܝܛܳܢܰܘ̈ܗܝ.
4 ܘܶܐܬܟܰܢܰܫܘ ܥܰܡܳܐ ܕܺܝܣܪܳܐܶܝܠ ܣܽܘܓܳܐܐ ܕܛܳܒ. ܘܟܰܣܺܝܘ ܟܽܠܗܶܝܢ ܥܰܝ̈ܢܳܬܳܐ ܘܢܰܚ̈ܠܶܐ ܪܰܘܖ̈ܒܶܐ. ܕܺܐܝܬ ܒܓܰܘ ܐܰܪܥܳܐ. ܡܶܛܽܠ ܕܳܐܡܪܺܝܢ. ܕܰܠܡܳܐ ܢܺܐܬܶܐ ܡܰܠܟܳܐ ܕܳܐܬܽܘܪ. ܘܢܶܫܟܚܽܘܢ ܡܰܝ̈ܳܐ ܣܰܓܺܝ̈ܐܶܐ.
5 ܘܢܶܬܓܰܢ̱ܒܪܽܘܢ ܘܢܶܒܢܽܘܢ ܫܽܘܖ̈ܶܐ ܠܽܘܩܒܰܠ ܫܽܘܪܳܐ ܐ̱ܚܪܺܢܳܐ. ܘܰܢܛܰܡܡܽܘܢ ܚܶܐܪܺܝܬܳܐ ܕܰܥܒܰܕ ܕܰܘܺܝܕ. ܘܰܥܒܰܕ ܚܶܙܰܩܝܳܐ ܙܰܝܢܳܐ ܣܰܓܺܝܐܳܐ. ܘܣܰܟܖ̈ܶܐ ܘܖ̈ܽܘܡܚܶܐ.
6 ܘܰܐܩܺܝܡ ܓܰܒܖ̈ܶܐ ܥܳܒܕܰܝ̈ ܩܪܳܒܳܐ ܥܰܠ ܥܰܡܳܐ. ܚܰܕ ܥܰܠ ܥܶܣܪܳܐ. ܘܟܰܢܶܫ ܐܶܢܽܘܢ ܠܘܳܬܶܗ. ܠܘܳܬ ܫܽܘܩܳܐ ܕܰܩܪܺܝܬܳܐ. ܘܡܰܠܶܠ ܥܰܡ ܟܽܠܗܽܘܢ. ܘܶܐܡܰܪ ܠܗܽܘܢ.
7 ܐܶܬܓܰܢ̱ܒܪܘ ܘܶܐܬܟܰܬܫܘ ܘܠܳܐ ܬܶܕܚܠܽܘܢ ܘܠܳܐ ܬܙܽܘܥܽܘܢ. ܡܶܢ ܩܕܳܡ ܡܰܠܟܳܐ ܕܳܐܬܽܘܪ. ܘܡܶܢ ܩܕܳܡ ܚܰܝ̈ܠܰܘܳܬܳܐ ܕܶܐܬܰܘ ܥܰܡܶܗ. ܥܰܡܰܢ ܕܺܝܠܰܢ ܣܰܓܺܝ ܡܶܢ ܕܥܰܡܶܗ.
8 ܥܰܡܶܗ ܚܰܝܠܳܐ ܕܒܶܣܪܳܐ. ܘܥܰܡܰܢ ܡܳܪܝܳܐ ܐܰܠܳܗܰܢ. ܕܰܢܥܰܕܪܰܢ ܘܢܶܬܟܰܬܰܫ ܒܬܰܟܬܽܘܫܰܢ. ܘܶܐܬܡܠܺܝ ܒܠܶܒܶܗ ܕܥܰܡܳܐ. ܥܰܠ ܦܶܬܓܳܡܰܘ̈ܗܝ ܕܚܶܙܰܩܝܳܐ ܡܰܠܟܳܐ ܕܒܶܝܬ ܝܺܗܽܘܕܳܐ.
9 ܡܶܢ ܒܳܬܰܪ ܗܳܠܶܝܢ. ܫܰܕܰܪ ܣܰܢܚܰܪܺܝܒ ܡܰܠܟܳܐ ܕܳܐܬܽܘܪ. ܠܪܰܒ ܫܳܩ̈ܶܐ. ܘܶܐܬܳܐ ܠܽܐܘܪܺܫܠܶܡ ܘܥܰܒܕܰܘ̈ܗܝ ܥܰܡܶܗ. ܘܗܽܘ ܫܪܶܐ ܗܘܳܐ ܥܰܠ ܠܟܺܝܫ. ܘܫܰܠܺܝܛܳܢܰܘ̈ܗܝ ܥܰܡܶܗ. ܥܰܠ ܟܽܠܗܽܘܢ ܕܒܶܝܬ ܝܺܗܽܘܕܳܐ. ܕܺܐܝܬ ܒܽܐܘܪܺܫܠܶܡ. ܘܶܐܡܰܪ ܠܗܽܘܢ.
10 ܗܳܟܰܢܳܐ ܐܳܡܰܪ ܣܰܢܚܰܪܺܝܒ ܡܰܠܟܳܐ ܕܳܐܬܽܘܪ. ܥܰܠ ܡܰܢ ܬܟܺܝܠܺܝܢ ܐ̱ܢܬܽܘܢ. ܕܝܳܬܒܺܝܢ ܐ̱ܢܬܽܘܢ ܒܰܚܒܽܘܫܝܳܐ ܒܽܐܘܪܺܫܠܶܡ.
11 ܗܽܘ ܚܶܙܰܩܝܳܐ ܡܰܛܥܶܐ ܠܟܽܘܢ ܠܡܰܫܠܳܡܽܘܬܟܽܘܢ ܕܰܬܡܽܘܬܽܘܢ ܒܟܰܦܢܳܐ ܘܰܒܨܶܗܝܳܐ. ܘܡܰܛܥܶܐ ܠܟܽܘܢ ܘܳܐܡܰܪ. ܕܡܳܪܝܳܐ ܐܰܠܳܗܰܢ ܢܦܰܨܶܝܢ ܡܶܢ ܐܺܝܕܰܘ̈ܗܝ ܕܡܰܠܟܳܐ ܕܳܐܬܽܘܪ.
12 ܐܰܝܟܰܘ ܚܶܙܰܩܝܳܐ. ܕܰܐܥܒܰܪ ܥܠܰܘ̈ܳܬܳܐ ܘܡܰܕܒ̈ܚܶܐ. ܘܶܐܡܰܪ ܠܰܕܒܶܝܬ ܝܺܗܽܘܕܳܐ ܘܰܠܥܳܡܽܘܖ̈ܶܝܗ̇ ܕܽܐܘܪܺܫܠܶܡ. ܕܰܩܕܳܡ ܡܰܕܒܚܳܐ ܚܰܕ ܬܶܣܓܕܽܘܢ. ܘܰܥܠܰܘܗܝ ܬܰܣܩܽܘܢ ܒܶܣ̈ܡܶܐ.
13 ܘܰܟܒܰܪ ܬܶܕܥܽܘܢ ܡܶܕܶܡ ܕܥܶܒܕܶܬ ܐܶܢܳܐ ܘܰܐܒܳܗܰܝ̈. ܠܟܽܠܗܽܘܢ ܥܰܡ̈ܡܶܐ ܕܒܰܡܕܺܝ̈ܢܳܬܳܐ. ܘܠܳܐ ܐܶܫܟܰܚܘ ܐܰܠܳܗ̈ܶܐ ܕܥܰܡ̈ܡܶܐ ܗܳܠܶܝܢ. ܠܰܡܦܰܨܳܝܽܘ ܡܕܺܝ̈ܢܳܬܗܽܘܢ ܡܶܢ ܐܺܝ̈ܕܰܝ.
14 ܘܡܰܢܽܘ ܐܺܝܬ ܒܟܽܠܗܽܘܢ ܐܰܠܳܗܰܝ̈ܗܽܘܢ ܕܥܰܡ̈ܡܶܐ ܗܳܠܶܝܢ ܕܰܚܪܰܒܘ ܐܰܒܳܗܰܝ̈. ܕܶܐܫܟܰܚܘ ܠܰܡܦܰܨܳܝܽܘ ܡܕܺܝ̈ܢܳܬܗܽܘܢ ܡܶܢ ܐܺܝܕܰܝ̈.
15 ܘܳܐܦ ܗܳܫܳܐ ܠܳܐ ܢܰܛܥܶܝܟܽܘܢ ܚܶܙܰܩܝܳܐ. ܘܠܳܐ ܢܰܬܟܠܟܽܘܢ ܥܰܠ ܗܳܕܶܐ. ܘܠܳܐ ܬܗܰܝܡܢܽܘܢܶܗ. ܡܶܛܽܠ ܕܠܳܐ ܡܶܫܟܰܚ ܐܰܠܳܗܟܽܘܢ ܠܰܡܦܰܨܳܝܽܘܬܟܽܘܢ ܡܶܢ ܐܺܝܕܰܝ̈ ܟܽܠ ܥܰܡ̈ܡܶܐ ܘܡܰܠܟ̈ܘܳܬܳܐ ܠܳܐ ܐܶܫܟܰܚܘ ܠܰܡܦܰܨܳܝܽܘ ܡܕܺܝ̈ܢܳܬܗܽܘܢ ܡܶܢ ܐܺܝܕܰܝ̈. ܘܡܶܢ ܐܺܝܕܳܐ ܕܰܐܒܳܗܰܝ̈. ܘܳܐܦ ܐܰܠܳܗܟܽܘܢ ܠܳܐ ܡܶܫܟܰܚ ܠܰܡܦܰܨܳܝܽܘܬܟܽܘܢ ܡܶܢ ܐܺܝ̈ܕܰܝ.
16 ܗܳܠܶܝܢ ܡܰܠܶܠܘ ܗܘܰܘ ܥܰܒܕܰܘ̈ܗܝ ܩܕܳܡ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ. ܘܰܩܕܳܡ ܚܶܙܰܩܝܳܐ ܥܰܒܕܶܗ.
17 ܘܰܟܬܰܒ ܐܶܓܖ̈ܳܬܳܐ ܠܰܡܨܰܥܳܪܽܘ ܠܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ. ܘܰܠܡܺܐܡܰܪ ܠܶܗ ܠܥܰܡܳܐ ܕܺܝܣܪܳܐܶܝܠ. ܕܰܐܠܳܗ̈ܶܐ ܕܰܡܕܺܝ̈ܢܳܬܳܐ ܗܳܠܶܝܢ. ܠܳܐ ܐܶܫܟܰܚܘ ܠܰܡܦܰܨܳܝܽܘ ܡܕܺܝ̈ܢܳܬܗܽܘܢ ܡܶܢ ܐܺܝܕܰܝ̈.
18 ܘܰܩܪܰܘ ܒܩܳܠܳܐ ܪܳܡܳܐ ܒܠܶܫܳܢܳܐ ܝܺܗܽܘܕܳܝܳܐ. ܠܥܰܡܳܐ ܕܝܳܬܒܺܝܢ ܥܰܠ ܫܽܘܪܳܐ ܕܽܐܘܪܺܫܠܶܡ. ܕܰܢܕܰܚܠܽܘܢ ܐܶܢܽܘܢ. ܘܰܢܙܽܘܥܽܘܢ ܐܶܢܽܘܢ. ܡܶܛܽܠ ܕܢܶܐܚܕܽܘܢ ܫܽܘܪܳܐ ܕܰܡܕܺܝܢܬܳܐ.
19 ܘܡܰܠܶܠܘ ܒܰܐܠܳܗ̈ܶܐ ܕܥܰܡ̈ܡܶܐ ܕܰܐܪܥܳܐ. ܘܳܐܦ ܒܰܐܠܳܗܳܐ ܕܫܰܠܺܝܛ ܒܽܐܘܪܺܫܠܶܡ. ܕܗܽܘ ܢܶܦܪܽܘܥ ܐܶܢܽܘܢ ܥܒܳܕ̈ܶܐ ܕܺܐܝܕܰܝ̈ܗܽܘܢ.
20 ܘܨܰܠܺܝ ܚܶܙܰܩܝܳܐ ܘܶܐܫܰܥܝܳܐ ܒܰܪ ܐܰܡܽܘܨ ܢܒܺܝܳܐ ܡܶܛܽܠ ܗܳܕܶܐ. ܘܰܫܡܰܥ ܒܩܳܠܳܐ ܕܰܨܠܽܘܬܗܽܘܢ ܡܳܪܝܳܐ.
21 ܘܫܰܕܰܪ ܡܳܪܝܳܐ ܡܰܠܰܐܟܳܐ ܡܶܢ ܩܕܳܡܰܘܗܝ. ܘܰܚܪܰܒ ܟܽܠܗܽܘܢ ܓܰܢ̱ܒܳܖ̈ܰܝ ܚܰܝܠܳܐ. ܘܡܰܠ̈ܟܶܐ ܘܫܰܠܺܝ̈ܛܳܢܶܐ ܕܰܗܘܰܘ ܒܡܰܫܪܺܝܬܶܗ ܕܡܰܠܟܳܐ ܕܳܐܬܽܘܪ. ܘܰܗܦܰܟ ܡܰܠܟܳܐ ܕܳܐܬܽܘܪ ܟܰܕ ܒܰܗܺܝ̈ܬܳܢ ܐܰܦܰܘ̈ܗܝ ܠܰܡܕܺܝܢ̱ܬܶܗ. ܘܶܐܬܳܐ ܠܒܶܝܬ ܐܰܠܳܗܰܘ̈ܗܝ. ܘܰܒܢܰܘ̈ܗܝ ܕܰܢܦܰܩܘ ܡܶܢ ܡܥܰܘ̈ܗܝ. ܬܰܡܳܢ ܩܰܛܠܽܘܗܝ ܒܚܰܪܒܳܐ.
22 ܘܰܦܪܰܩ ܡܳܪܝܳܐ ܠܚܶܙܰܩܝܳܐ. ܘܰܠܟܽܠܗܽܘܢ ܥܳܡܽܘܖ̈ܶܝܗ̇ ܕܽܐܘܪܺܫܠܶܡ. ܡܶܢ ܐܺܝܕܰܘ̈ܗܝ ܕܣܰܢܚܰܪܺܝܒ ܡܰܠܟܳܐ ܕܳܐܬܽܘܪ. ܘܡܶܢ ܐܺܝܕܳܐ ܕܟܽܠ ܒܰܥ̈ܠܰܝ ܬܚܽܘܡܶܗ.
23 ܘܣܰܓܺܝ̈ܐܶܐ ܡܶܢ ܒܢܰܝ̈ ܝܺܣܪܳܐܶܝܠ. ܡܰܝܬܶܝܢ ܗܘܰܘ ܩܽܘܖ̈ܒܳܢܶܐ ܠܡܳܪܝܳܐ ܠܽܐܘܪܺܫܠܶܡ ܘܝܳܗܒܺܝܢ ܗܘܰܘ ܡܰܘ̈ܗܒܳܬܳܐ ܠܚܶܙܰܩܝܳܐ ܡܰܠܟܳܐ ܕܒܶܝܬ ܝܺܗܽܘܕܳܐ. ܘܶܐܬܬܪܺܝܡ ܠܥܶܠ ܡܶܢ ܥܰܡ̈ܡܶܐ ܟܽܠܗܽܘܢ.
24 ܘܡܶܢ ܒܳܬܰܪ ܗܳܠܶܝܢ. ܒܝܰܘ̈ܡܳܬܳܐ ܗܳܢܽܘܢ. ܐܶܬܟܪܰܗ ܚܶܙܰܩܝܳܐ ܥܕܰܡܳܐ ܠܡܰܘܬܳܐ. ܘܨܰܠܺܝ ܩܕܳܡ ܡܳܪܝܳܐ ܘܶܐܡܰܪ. ܓܒܰܖ̈ܘܳܬܳܐ ܣܰܓܺܝ̈ܐܳܬܳܐ ܥܒܰܕܬ ܠܺܝ. ܘܠܳܐ ܐܰܝܟ ܥܒܳܕ ܐܺܝܕܰܝ̈ ܐܰܗܦܶܟܬ ܠܺܝ.
25 ܘܗܳܢܳܐ ܟܽܘܪܗܳܢܳܐ ܕܶܐܬܟܪܰܗ ܚܶܙܰܩܝܳܐ. ܡܶܛܽܠ ܕܶܐܬܬܪܺܝܡ ܠܶܒܶܗ. ܘܰܗܘܳܐ ܥܠܰܘܗܝ ܪܽܘܓܙܳܐ ܕܡܳܪܝܳܐ. ܘܥܰܠ ܒܶܝܬ ܝܺܗܽܘܕܳܐ. ܘܥܰܠ ܥܳܡܽܘܖ̈ܶܝܗ̇ ܕܽܐܘܪܺܫܠܶܡ.
26 ܘܶܐܬܟܪܰܗ ܚܶܙܰܩܝܳܐ ܡܶܛܽܠ ܕܶܐܬܬܪܺܝܡ ܠܶܒܶܗ ܗܽܘ ܘܥܳܡܽܘܖ̈ܶܝܗ̇ ܕܽܐܘܪܺܫܠܶܡ ܘܠܳܐ ܐܶܬܳܐ ܥܠܰܝܗܽܘܢ ܪܽܘܓܙܳܐ ܕܡܳܪܝܳܐ ܒܝܰܘܡܰܘ̈ܗܝ ܕܚܶܙܰܩܝܳܐ.
27 ܘܰܗܘܳܐ ܠܚܶܙܰܩܝܳܐ ܥܽܘܬܪܳܐ ܘܺܐܝܩܳܪܳܐ ܣܽܘܓܳܐܐ ܕܛܳܒ. ܘܰܐܘܨܖ̈ܶܐ ܥܒܰܕ ܠܶܗ. ܠܟܶܣܦܳܐ ܘܰܠܕܰܗܒܳܐ. ܘܰܠܟܺܐܦ̈ܶܐ ܛܳܒ̈ܳܬܳܐ. ܘܰܠܒܶܣ̈ܡܶܐ. ܘܠܰܡܓܶܢ̈ܶܐ. ܘܰܠܡܳܐܢܰܝ̈ ܖ̈ܳܓܰܝ ܪܶܓܬܳܐ.
28 ܘܰܐܘܨܖ̈ܶܐ ܠܥܰܠ̈ܠܳܬܳܐ ܕܰܥܒܽܘܪܳܐ ܘܰܕܚܰܡܪܳܐ ܘܰܕܡܶܫܚܳܐ. ܐܘܖ̈ܰܘܳܬܳܐ ܠܟܽܠܳܗ̇ ܒܥܺܝܪܳܐ.
29 ܘܩܽܘܖ̈ܝܳܐ ܠܰܒܥܺܝܪܳܐ. ܘܰܠܥܳܢ̈ܳܐ. ܘܰܠܬܰܘܖ̈ܶܐ. ܘܰܠܚܰܝ̈ܘܳܬܳܐ. ܡܶܛܽܠ ܕܝܰܗܒ ܠܶܗ ܡܳܪܝܳܐ ܩܶܢܝܳܢܳܐ ܣܽܘܓܳܐܐ ܕܛܳܒ.
30 ܘܗܽܘ ܚܶܙܰܩܝܳܐ ܛܡܰܪ ܡܰܦܩܳܢܳܐ ܕܡܰܝ̈ܳܐ ܕܥܰܝܢܳܐ ܥܶܠܳܝܬܳܐ. ܘܰܫܪܳܐ ܐܶܢܽܘܢ ܠܓܽܘܒܳܐ ܡܰܥܪܒܳܝܳܐ ܕܰܩܪܺܝܬܶܗ ܕܕܰܘܺܝܕ. ܘܰܐܨܠܰܚ ܚܶܙܰܩܝܳܐ ܒܟܽܠܗܽܘܢ ܥܒܳܕܰܘ̈ܗܝ.
31 ܘܰܬܒܰܥ ܗܘܳܐ ܢܳܡܽܘܣܳܐ ܕܡܳܪܝܳܐ ܐܰܝܟܰܢܳܐ ܕܠܶܗ ܝܺܗܺܝܒ ܗܘܳܐ ܒܰܐܪܥܳܐ. ܘܺܝܕܰܥ ܟܽܠܡܶܕܶܡ ܕܺܐܝܬ ܒܠܶܒܶܗ.
32 ܘܫܰܪܟܳܐ ܕܦܶܬܓܳܡܰܘ̈ܗܝ ܕܚܶܙܰܩܝܳܐ. ܘܛܰܝܒܽܘܬܶܗ. ܐܘܖ̈ܚܳܬܶܗ ܫܰܦܺܝܖ̈ܳܬܳܐ. ܗܳܐ ܗܶܢܽܘܢ ܟܬܺܝܒܺܝܢ ܒܰܢܒܺܝܽܘܬܶܗ ܕܶܐܫܰܥܝܳܐ ܒܰܪ ܐܰܡܽܘܨ ܢܒܺܝܳܐ. ܘܰܒܣܶܦܪܳܐ ܕܡܰܠ̈ܟܶܐ ܕܺܝܗܽܘܕܳܐ ܘܕܺܝܣܪܳܐܶܝܠ.
33 ܘܰܫܟܶܒ ܚܶܙܰܩܝܳܐ ܥܰܡ ܐܰܒܳܗ̈ܳܬܶܗ. ܘܩܰܒܪܽܘܗܝ ܒܰܩܪܺܝܬܶܗ ܕܕܰܘܺܝܕ. ܘܺܐܝܩܳܪܳܐ ܪܰܒܳܐ ܥܒܰܕܘ ܠܶܗ ܒܡܰܘܬܶܗ. ܟܽܠܗܽܘܢ ܕܒܶܝܬ ܝܺܗܽܘܕܳܐ. ܘܰܗܦܰܟܘ ܠܽܐܘܪܺܫܠܶܡ. ܘܰܐܡܠܶܟ ܡܢܰܫܶܐ ܒܪܶܗ ܒܳܬܪܶܗ.