2 Chronicles 6
The second Book of Chronicles
܀ ܒ ܕܘܒܪ ܝܘܡ̈ܬܐ ܘ ܀
1 ܗܳܝܕܶܝܢ ܐܶܡܰܪ ܫܠܶܝܡܽܘܢ. ܡܳܪܝܳܐ ܐܰܢ̱ܬ ܐܶܡܰܪܬ ܠܡܶܫܪܳܐ ܒܥܰܪܦܶܠܳܐ.
2 ܘܶܐܢܳܐ ܡܶܒܢܳܐ ܒܢܺܝܬ ܒܰܝܬܳܐ ܠܳܟ. ܕܽܘܟܬܳܐ ܠܰܫܟܺܝܢܬܳܟ ܠܥܳܠܡܺܝܢ.
3 ܘܰܐܦܢܺܝ ܡܰܠܟܳܐ ܐܰܦܰܘ̈ܗܝ. ܘܒܰܪܶܟ ܠܟܽܠܗܶܝܢ ܟܢܽܘ̈ܫܳܬܳܐ ܕܺܝܣܪܳܐܶܝܠ ܘܟܽܠܗܶܝܢ ܟܢܽܘ̈ܫܳܬܳܐ ܕܺܝܣܪܳܐܶܝܠ ܩܳܝ̈ܡܳܢ.
4 ܘܶܐܡܰܪ. ܒܪܺܝܟܽ ܗ̱ܘ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ. ܕܡܰܠܶܠ ܒܦܽܘܡܶܗ ܥܰܡ ܕܰܘܺܝܕ ܐܳܒܝ. ܘܰܒܡܶܠܬܶܗ ܐܰܫܰܪ ܡܶܕܶܡ ܕܶܐܡܰܪ.
5 ܕܡܶܢ ܝܰܘܡܳܐ ܕܰܐܦܩܶܬ ܠܥܰܡܝ ܝܺܣܪܳܐܶܝܠ ܡܶܢ ܐܰܪܥܳܐ ܕܡܶܨܪܶܝܢ. ܠܳܐ ܓܒܺܝܬ ܠܺܝ ܩܪܺܝܬܳܐ ܡܶܢ ܟܽܠܗܽܘܢ ܫܰܒ̈ܛܶܐ ܕܺܝܣܪܳܐܶܝܠ. ܠܡܶܒܢܳܐ ܒܰܝܬܳܐ ܕܢܶܗܘܶܐ ܫܶܡܝ ܬܰܡܳܢ.
6 ܘܰܓܒܺܝܬ ܠܕܰܘܺܝܕ ܕܢܶܗܘܶܐ ܡܰܠܟܳܐ ܥܰܠ ܥܰܡܝ ܝܺܣܪܳܐܶܝܠ.
7 ܘܰܗܘܳܐ ܒܠܶܒܶܗ ܕܕܰܘܺܝܕ ܐܳܒܝ. ܠܡܶܒܢܳܐ ܒܰܝܬܳܐ ܠܰܫܡܶܗ ܕܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ.
8 ܘܶܐܡܰܪ ܡܳܪܝܳܐ ܠܕܰܘܺܝܕ ܐܳܒܝ. ܡܶܟܺܝܠ ܕܰܗܘܳܐ ܒܠܶܒܳܟ ܠܡܶܒܢܳܐ ܒܰܝܬܳܐ ܠܫܶܡܝ. ܐܰܛܐܶܒܬ ܡܶܛܽܠ ܕܰܗܘܳܐ ܒܠܶܒܳܟ.
9 ܐܰܢ̱ܬ ܕܶܝܢ ܠܳܐ ܬܶܒܢܶܐ ܒܰܝܬܳܐ. ܐܶܠܳܐ ܒܪܳܟ ܕܢܳܦܶܩ ܡܶܢ ܚܰܨܳܟ. ܗܽܘ ܢܶܒܢܶܐ ܒܰܝܬܳܐ ܠܫܶܡܝ.
10 ܘܰܐܩܺܝܡ ܡܳܪܝܳܐ ܦܶܬܓܳܡܰܘ̈ܗܝ ܕܶܐܡܰܪ. ܘܩܳܡܶܬ ܡܶܢ ܒܳܬܰܪ ܕܰܘܺܝܕ ܐܳܒܝ. ܘܝܶܬܒܶܬ ܥܰܠ ܟܽܘܪܣܝܳܐ ܕܺܝܣܪܳܐܶܝܠ ܐܰܝܟܰܢܳܐ ܕܶܐܡܰܪ ܠܺܝ ܡܳܪܝܳܐ. ܘܰܒܢܺܝܬ ܒܰܝܬܳܐ ܠܰܫܡܶܗ ܕܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ.
11 ܘܰܐܬܩܢܶܬ ܕܽܘܟܬܳܐ ܠܩܺܐܒܽܘܬܳܐ ܕܒܳܗ̇ ܣܺܝܡܳܐ ܕܺܝܰܐܬܺܝܩܺܝ ܕܡܳܪܝܳܐ. ܕܝܰܗܒ ܠܰܐܒܳܗ̈ܳܬܰܢ ܟܰܕ ܐܰܦܶܩ ܐܶܢܽܘܢ ܡܶܢ ܐܰܪܥܳܐ ܕܡܶܨܪܶܝܢ.
12 ܘܩܳܡ ܫܠܶܝܡܽܘܢ ܩܕܳܡ ܡܰܕܒܚܳܐ ܕܡܳܪܝܳܐ. ܩܕܳܡ ܟܽܠܗܶܝܢ ܟܢܽܘ̈ܫܳܬܳܐ ܕܺܝܣܪܳܐܶܝܠ. ܘܰܦܪܰܣ ܐܺܝܕܰܘ̈ܗܝ ܠܰܫܡܰܝܳܐ.
13 ܘܰܥܒܰܕ ܫܠܶܝܡܽܘܢ ܐܶܣܛܽܘܢܳܐ ܚܰܕ ܕܰܢܚܳܫܳܐ. ܘܰܐܩܺܝܡܶܗ ܗܘܳܐ ܡܶܨܥܰܬ ܕܳܪܬܳܐ. ܪܰܘܡܶܗ ܚܰܡܶܫ ܐܰܡܺܝ̈ܢ. ܘܰܦܬܳܝܶܗ ܬܰܪܬܶܝܢ ܐܰܡܺܝ̈ܢ. ܘܰܣܠܶܩ ܗܘܳܐ ܘܩܳܡ ܥܠܰܘܗܝ. ܘܰܒܪܶܟ ܥܰܠ ܒܽܘܖ̈ܟܰܘܗܝ ܘܚܳܙܶܝܢ ܗܘܰܘ ܠܶܗ ܟܽܠܶܗ ܥܰܡܳܐ ܕܺܝܣܪܳܐܶܝܠ ܘܰܦܪܰܣ ܐܺܝܕܰܘ̈ܗܝ ܒܰܨܠܽܘܬܳܐ. ܠܥܺܝܢ ܥܰܡܳܐ ܕܺܝܣܪܳܐܶܝܠ. ܠܘܳܬ ܫܡܰܝܳܐ.
14 ܘܨܰܠܺܝ ܘܶܐܡܰܪ. ܡܳܪܶܐ ܡܳܖ̈ܰܘܳܬܳܐ ܕܺܝܣܪܳܐܶܝܠ. ܠܰܝܬ ܐܰܟܘܳܬܳܟ ܐܰܢ̱ܬ ܗ̱ܘ ܡܳܪܝܳܐ ܕܝܳܬܶܒ ܐܰܢ̱ܬ ܒܰܫܡܰܝܳܐ ܡܶܢ ܠܥܶܠ. ܘܨܶܒܝܳܢܰܝ̈ܟ ܡܶܬܥܰܒܕܺܝܢ ܥܰܠ ܐܰܪܥܳܐ ܡܶܢ ܠܬܰܚܬ ܕܢܳܛܰܪ ܐܰܢ̱ܬ ܕܺܝܰܐܬܺܝܩܺܝ ܘܚܶܣܕܳܐ ܠܥܰܒܕܰܝ̈ܟ. ܕܰܡܗܰܠܟܺܝܢ ܩܕܳܡܰܝܟ ܬܪܺܝܨܳܐܺܝܬ ܒܟܽܠܶܗ ܠܶܒܗܽܘܢ.
15 ܕܰܢܛܰܪܬ ܠܕܰܘܺܝܕ ܥܰܒܕܳܟ ܐܳܒܝ ܡܶܕܶܡ ܕܶܐܡܰܪܬ ܠܶܗ. ܘܡܰܠܶܠܬ ܒܦܽܘܡܳܟ ܘܰܒܨܶܒܝܳܢܳܟ ܫܰܠܶܡܬ ܐܰܝܟ ܕܝܰܘܡܳܢܳܐ.
16 ܘܳܐܦ ܗܳܫܳܐ ܡܳܪܶܐ ܡܳܖ̈ܰܘܳܬܳܐ ܕܺܝܣܪܳܐܶܝܠ. ܛܰܪ ܠܥܰܒܕܳܟ ܕܰܘܺܝܕ ܐܳܒܝ. ܡܶܕܶܡ ܕܶܐܡܰܪܬ ܠܶܗ. ܕܠܳܐ ܢܶܥܢܰܕ ܠܳܟ ܒܪܳܐ ܡܶܢ ܩܕܳܡܰܝ. ܕܝܳܬܶܒ ܥܰܠ ܟܽܘܪܣܝܳܐ ܕܺܝܣܪܳܐܶܝܠ. ܒܰܠܚܽܘܕ ܐܶܢܗܽܘ ܕܢܶܛܪܽܘܢ ܒܢܰܝ̈ܟ ܐܽܘܖ̈ܚܳܬܗܽܘܢ ܠܰܡܗܰܠܳܟܽܘ ܩܕܳܡܰܝ ܒܢܳܡܽܘܣܳܐ. ܐܰܝܟܰܢܳܐ ܕܗܰܠܶܟܬ ܐܰܢ̱ܬ ܩܕܳܡܰܝ.
17 ܘܡܶܟܺܝܠ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ. ܢܶܬܗܰܝܡܢܽܘܢ ܡܶܟܺܝܠ ܦܶܬܓܳܡܰܝ̈ܟ ܕܡܰܠܶܠܬ ܠܕܰܘܺܝܕ ܐܳܒܝ ܥܰܒܕܳܟ.
18 ܡܶܛܽܠ ܕܰܒܗܰܝܡܳܢܽܘܬܳܐ ܐܰܫܪܺܝ ܡܳܪܝܳܐ ܫܟܺܝܢܬܶܗ ܥܰܠ ܥܰܡܶܗ ܝܺܣܪܳܐܶܝܠ ܥܰܠ ܐܰܪܥܳܐ. ܗܳܐ ܫܡܰܝܳܐ ܘܰܫܡܰܝ̈ ܫܡܰܝܳܐ ܠܳܐ ܡܣܰܝܒܪܺܝܢ ܠܳܟ. ܠܳܐ ܟܶܢ ܗܳܢܳܐ ܒܰܝܬܳܐ ܕܰܒܢܺܝܬ.
19 ܘܬܶܬܦܢܶܐ ܥܰܠ ܨܠܽܘܬܳܐ ܕܥܰܒܕܳܟ ܘܥܰܠ ܒܳܥܽܘܬܶܗ. ܡܳܪܝܳܐ ܐܰܠܳܗܳܐ. ܠܡܶܫܡܰܥ ܠܰܨܠܽܘܬܳܐ ܘܰܠܒܳܥܽܘܬܳܐ. ܕܥܰܒܕܳܟ ܡܨܰܠܶܐ ܩܕܳܡܰܝܟ ܝܰܘܡܳܢܳܐ.
20 ܗܳܐ ܠܡܶܗܘܳܐ ܩܕܳܡܰܝܟ ܝܺܕܺܝܥ. ܘܰܠܡܶܫܡܰܥ ܠܩܳܠ ܨܠܽܘܬܳܐ ܕܡܰܢ ܕܢܺܐܬܶܐ ܘܰܢܨܰܠܶܐ ܩܕܳܡܰܝܟ ܒܒܰܝܬܳܐ ܗܳܢܳܐ. ܒܠܺܠܝܳܐ ܘܒܺܐܝܡܳܡܳܐ. ܗܳܝ ܕܽܘܟܬܳܐ ܕܶܐܡܰܪܬ ܠܡܰܫܪܳܝܽܘ ܫܟܺܝܢܬܳܟ ܬܰܡܳܢ.
21 ܠܡܶܫܡܰܥ ܒܰܨܠܽܘܬܳܐ ܕܥܰܒܕܳܟ ܘܰܕܥܰܡܳܟ ܝܺܣܪܳܐܶܝܠ. ܕܰܡܨܰܠܶܐ ܩܕܳܡܰܝܟ ܒܕܽܘܟܬܳܐ ܗܳܕܶܐ. ܘܰܐܢ̱ܬ ܬܶܫܡܰܥ ܡܶܢ ܕܽܘܟܬܳܐ ܕܡܰܘܬܒܳܟ ܡܶܢ ܫܡܰܝܳܐ. ܘܬܶܫܡܰܥ ܘܬܶܫܒܽܘܩ.
22 ܐܶܢܗܽܘ ܕܢܰܣܟܶܠ ܒܰܪܢܳܫܳܐ ܒܚܰܒܪܶܗ. ܘܢܶܦܣܽܘܩ ܥܠܰܘܗܝ ܡܰܘܡܳܬܳܐ ܠܡܰܘܡܳܝܽܘܬܶܗ. ܘܢܺܐܬܶܐ ܘܢܺܐܡܶܐ ܩܕܳܡ ܡܰܕܒܚܳܟ ܒܒܰܝܬܳܐ ܗܳܢܳܐ.
23 ܘܰܐܢ̱ܬ ܬܶܫܡܰܥ ܒܩܳܠ ܨܠܽܘܬܶܗ. ܡܶܢ ܕܽܘܟܬܳܟ ܡܶܢ ܫܡܰܝܳܐ. ܘܬܶܥܒܶܕ ܘܰܬܕܽܘܢ ܠܥܰܒܕܰܝ̈ܟ. ܠܰܡܚܰܝܳܒܽܘ ܠܚܰܝܳܒܳܐ. ܘܰܠܡܶܬܰܠ ܐܽܘܪܚܶܗ ܒܪܺܝܫܶܗ. ܘܠܰܡܙܰܕܳܩܽܘ ܠܙܰܕܺܝܩܳܐ. ܘܰܠܡܶܬܰܠ ܠܶܗ ܐܰܝܟ ܙܰܕܺܝܩܽܘܬܶܗ.
24 ܘܶܐܢܗܽܘ ܕܢܶܬܬܒܰܪ ܥܰܡܳܟ ܝܺܣܪܳܐܶܝܠ. ܩܕܳܡ ܒܥܶܠܕܒܳܒܶܗ ܟܰܕ ܢܶܚܛܽܘܢ ܩܕܳܡܰܝܟ. ܘܢܶܗܦܟܽܘܢ ܠܘܳܬܳܟ. ܘܢܰܘܕܽܘܢ ܠܰܫܡܳܟ ܪܰܒܳܐ. ܘܰܢܨܰܠܽܘܢ. ܘܢܶܒܥܽܘܢ ܡܶܢ ܩܕܳܡܰܝܟ ܒܒܰܝܬܳܐ ܗܳܢܳܐ.
25 ܘܰܐܢ̱ܬ ܬܶܫܡܰܥ ܡܶܢ ܫܡܰܝܳܐ. ܘܬܶܫܒܽܘܩ ܠܰܚܛܳܗܰܘ̈ܗܝ ܕܥܰܡܳܟ ܝܺܣܪܳܐܶܝܠ. ܘܬܰܗܦܶܟ ܐܶܢܽܘܢ ܠܰܐܪܥܳܐ ܕܝܰܗܒܬ ܠܗܽܘܢ ܘܠܰܐܒܳܗܰܝ̈ܗܽܘܢ.
26 ܘܟܰܕ ܢܶܬܟܠܽܘܢ ܫܡܰܝܳܐ. ܘܠܳܐ ܢܶܗܘܶܐ ܡܶܛܪܳܐ. ܟܰܕ ܢܶܚܛܽܘܢ ܩܕܳܡܰܝܟ. ܘܰܢܨܰܠܽܘܢ ܩܕܳܡܰܝܟ ܒܕܽܘܟܬܳܐ ܗܳܕܶܐ. ܘܢܰܘܕܽܘܢ ܠܰܫܡܳܟ ܪܰܒܳܐ. ܘܡܶܢ ܚܛܳܗܰܝ̈ܗܽܘܢ ܢܶܗܦܟܽܘܢ. ܡܶܛܽܠ ܕܬܶܥܢܶܐ ܐܶܢܽܘܢ.
27 ܘܰܐܢ̱ܬ ܬܶܫܡܰܥ ܒܩܳܠ ܨܠܽܘܬܗܽܘܢ ܡܶܢ ܫܡܰܝܳܐ ܘܬܶܫܒܽܘܩ ܠܰܚܛܳܗܰܘ̈ܗܝ ܕܥܰܒܕܳܟ ܘܰܕܥܰܡܳܟ ܝܺܣܪܳܐܶܝܠ ܡܶܛܽܠ ܕܬܰܠܶܦ ܐܶܢܽܘܢ ܐܽܘܪܚܳܟ ܫܰܦܺܝܪܬܳܐ ܕܢܺܐܙܽܠܘܢ ܒܳܗ̇. ܘܬܶܬܶܠ ܡܶܛܪܳܐ ܕܒܽܘܪܟܬܳܐ ܥܰܠ ܐܰܪܥܳܐ ܕܝܰܗܒܬ ܒܝܳܪܬܽܘܬܶܗ ܕܥܰܡܳܟ.
28 ܘܟܰܦܢܳܐ ܟܰܕ ܢܶܗܘܶܐ ܒܰܐܪܥܳܐ. ܘܡܰܘܬܳܢܳܐ ܟܰܕ ܢܶܗܘܶܐ. ܘܫܽܘܚܢܳܐ ܘܫܽܘܢܳܩܳܐ. ܘܩܰܡܨܳܐ ܦܳܪܚܳܐ. ܘܙܳܚܠܳܐ ܟܰܕ ܢܶܗܘܶܐ. ܘܟܰܕ ܢܥܺܝܩܽܘܢ ܠܗܽܘܢ ܒܥܶܠ̈ܕܒܳܒܶܐ ܒܰܐܪܥܗܽܘܢ ܘܰܒܩܽܘܖ̈ܺܝܗܽܘܢ. ܟܽܠ ܡܰܟܬܫܳܐ ܘܟܽܠ ܟܺܐܒܺܝ̈ܢ.
29 ܟܽܠ ܨܠܽܘܬܳܐ ܘܒܳܥܽܘܬܳܐ ܕܬܶܗܘܶܐ ܠܟܽܠܗܽܘܢ ܒܢܰܝ̈ܢܳܫܳܐ. ܠܟܽܠܶܗ ܥܰܡܳܟ ܝܺܣܪܳܐܶܝܠ. ܕܰܢܣܰܝܒܪܽܘܢ ܓܒܰܪ ܟܺܐܒܳܐ ܕܠܶܒܶܗ. ܘܢܺܐܬܶܐ ܘܢܶܦܪܽܘܣ ܐܺܝܕܰܘ̈ܗܝ ܒܒܰܝܬܳܐ ܗܳܢܳܐ.
30 ܘܰܐܢ̱ܬ ܬܶܫܡܰܥ ܒܩܳܠܳܐ ܕܰܨܠܽܘܬܗܽܘܢ ܡܶܢ ܫܡܰܝܳܐ. ܘܬܶܫܒܽܘܩ ܠܚܰܘ̈ܒܰܝܗܽܘܢ ܘܬܶܦܪܽܘܥ ܠܓܰܒܪܳܐ ܐܰܝܟ ܟܽܠܗܶܝܢ ܐܽܘܖ̈ܚܳܬܶܗ. ܕܝܳܕܰܥ ܐܰܢ̱ܬ ܠܶܒܶܗ. ܡܶܛܽܠ ܕܰܐܢ̱ܬ ܗ̱ܘ ܝܳܕܰܥ ܐܰܢ̱ܬ ܒܰܠܚܽܘܕܰܝܟ ܠܶܒܗܽܘܢ ܕܟܽܠܗܽܘܢ ܒܢܰܝ̈ܢܳܫܳܐ.
31 ܡܶܛܽܠ ܗܳܢܳܐ ܢܶܕܚܠܽܘܢ ܠܰܡܗܰܠܳܟܽܘ ܩܕܳܡܰܝܟ ܒܽܐܘܖ̈ܚܳܬܳܟ. ܟܽܠܗܽܘܢ ܝܰܘ̈ܡܳܬܳܐ ܕܚܰܝܺܝܢ ܥܰܠ ܐܰܪܥܳܐ ܕܝܰܗܒܬ ܠܰܐܒܳܗܰܝ̈ܗܽܘܢ.
32 ܐܳܦ ܥܰܠ ܢܽܘܟܪܳܝܳܐ ܕܠܳܐ ܗܘܳܐ ܡܶܢ ܥܰܡܳܟ ܝܺܣܪܳܐܶܝܠ. ܘܢܺܐܬܶܐ ܡܶܢ ܡܕܺܝ̈ܢܳܬܳܐ ܖ̈ܰܚܺܝܩܳܬܳܐ ܡܶܛܽܠ ܫܡܳܟ. ܡܶܛܽܠ ܕܢܶܫܡܥܽܘܢ ܛܶܒܶܗ ܕܰܫܡܳܟ ܪܰܒܳܐ. ܘܢܺܐܬܽܘܢ ܘܰܢܨܰܠܽܘܢ ܩܕܳܡܰܝܟ ܒܝܰܘܡܳܐ ܗܰܘ ܒܒܰܝܬܳܐ ܗܳܢܳܐ.
33 ܘܰܐܢ̱ܬ ܬܶܫܡܰܥ ܡܶܢ ܕܽܘܟܬܳܟ ܡܶܢ ܫܡܰܝܳܐ. ܘܬܶܥܒܶܕ ܐܰܝܟܰܢܳܐ ܕܰܢܨܰܠܶܐ ܩܕܳܡܰܝܟ ܢܽܘܟܪܳܝܳܐ. ܡܶܛܽܠ ܕܢܶܕܥܽܘܢ ܟܽܠܗܽܘܢ ܥܰܡ̈ܡܶܐ ܕܰܐܪܥܳܐ ܫܡܳܟ. ܠܡܶܕܚܰܠ ܩܕܳܡܰܝܟ ܐܰܝܟ ܥܰܡܳܟ ܝܺܣܪܳܐܶܝܠ. ܘܰܠܡܶܕܰܥ ܕܰܫܡܳܟ ܐܶܬܩܪܺܝ ܥܰܠ ܒܰܝܬܳܐ ܗܳܢܳܐ ܕܰܒܢܺܝܬ.
34 ܘܟܰܕ ܢܶܦܽܘܩ ܥܰܡܳܟ ܠܰܩܪܳܒܳܐ ܥܰܠ ܒܥܶܠܕܒܳܒܰܘ̈ܗܝ ܒܽܐܘܪܚܳܐ ܕܰܬܫܰܕܰܪ ܐܶܢܽܘܢ. ܘܰܢܨܰܠܽܘܢ ܩܕܳܡܰܝܟ ܒܽܐܘܪܚܳܐ ܕܰܐܪܥܳܐ ܕܝܰܗܒܬ ܠܰܐܒܳܗ̈ܳܬܗܽܘܢ. ܒܰܩܪܺܝܬܳܐ ܕܰܓܒܰܝܬ ܠܳܟ. ܘܒܰܝܬܳܐ ܕܰܒܢܺܝܬ ܠܰܫܡܳܟ.
35 ܘܬܶܫܡܰܥ ܡܶܢ ܫܡܰܝܳܐ ܨܠܽܘܬܗܽܘܢ ܘܒܳܥܽܘܬܗܽܘܢ. ܘܬܶܥܒܶܕ ܕܺܝܢܗܽܘܢ.
36 ܟܰܕ ܢܶܚܛܽܘܢ ܩܕܳܡܰܝܟ. ܡܶܛܽܠ ܕܠܳܐ ܐܺܝܬ ܒܰܪܢܳܫܳܐ ܕܠܳܐ ܚܳܛܶܐ ܘܪܳܓܶܙ ܐܰܢ̱ܬ ܥܠܰܝܗܽܘܢ. ܘܡܰܫܠܶܡ ܐܰܢ̱ܬ ܠܗܽܘܢ ܩܕܳܡ ܒܥܶܠܕܒܳܒܰܝ̈ܗܽܘܢ. ܘܢܶܫܒܽܘܢ ܐܶܢܽܘܢ ܫܳܒܰܝ̈ܗܽܘܢ. ܠܰܐܪܥܳܐ ܪܚܺܝܩܬܳܐ ܐܰܘ ܩܰܪܺܝܒܬܳܐ.
37 ܘܰܢܨܰܠܽܘܢ ܩܕܳܡܰܝܟ. ܘܢܶܗܦܟܽܘܢ. ܘܒܰܡܕܺܝ̈ܢܳܬܳܐ ܕܫܳܒܰܝ̈ܗܽܘܢ. ܢܺܐܡܪܽܘܢ ܕܰܚܛܰܝܢ ܘܰܐܪܓܶܙܢ ܘܰܐܥܘܶܠ̱ܢ.
38 ܘܢܶܗܦܟܽܘܢ ܠܘܳܬܳܟ. ܒܟܽܠܶܗ ܠܶܒܗܽܘܢ. ܘܰܒܟܽܠܳܗ̇ ܢܰܦܫܗܽܘܢ. ܒܰܡܕܺܝ̈ܢܳܬܳܐ ܕܫܳܒܰܝ̈ܗܽܘܢ ܕܰܫܒܰܘ ܐܶܢܽܘܢ. ܘܰܢܨܰܠܽܘܢ ܒܽܐܘܪܚܳܐ ܕܰܐܪܥܳܐ ܕܝܰܗܒܬ ܠܰܐܒܳܗ̈ܳܬܗܽܘܢ. ܩܪܺܝܬܳܐ ܕܰܓܒܰܝܬ ܠܳܟ. ܘܒܰܝܬܳܐ ܕܰܒܢܺܝܬ ܠܰܫܡܳܟ.
39 ܘܬܶܫܡܰܥ ܡܶܢ ܫܡܰܝܳܐ ܡܶܢ ܕܽܘܟܬܳܟ ܨܠܽܘܬܗܽܘܢ ܘܒܳܥܽܘܬܗܽܘܢ. ܘܬܶܥܒܶܕ ܕܺܝܢܗܽܘܢ. ܘܬܶܫܒܽܘܩ ܠܥܰܡܳܟ ܕܰܚܛܰܘ ܩܕܳܡܰܝܟ.
40 ܘܡܶܟܺܝܠ ܐܰܠܳܗܝ. ܢܶܗܘ̈ܝܳܢ ܥܰܝܢܰܝ̈ܟ ܦܬܺܝ̈ܚܳܢ. ܘܶܐܕܢܰܝ̈ܟ ܨܳܝ̈ܬܳܢ ܠܰܨܠܽܘܬܳܐ ܕܕܽܘܟܬܳܐ ܗܳܕܶܐ.
41 ܘܡܶܟܺܝܠ ܩܽܘܡ ܡܳܪܶܐ ܡܳܖ̈ܰܘܳܬܳܐ ܠܰܢܝܳܚܬܳܟ. ܐܰܢ̱ܬ ܘܳܐܪܽܘܢ ܥܽܘܫܢܳܟ. ܟܳܗ̈ܢܰܝܟ ܡܳܪܶܐ ܡܳܖ̈ܰܘܳܬܳܐ ܦܽܘܪܩܳܢܳܐ ܬܰܠܒܶܫ. ܘܙܰܕܺܝܩܰܝ̈ܟ ܢܶܚܕܽܘܢ ܒܛܳܒ̈ܳܬܳܟ.
42 ܡܳܪܶܐ ܡܳܖ̈ܰܘܳܬܳܐ ܠܳܐ ܬܰܗܦܶܟ ܐܰܦܰܘ̈ܗܝ ܕܰܡܫܺܝܚܳܟ. ܐܶܬܕܰܟܪ ܛܰܝ̈ܒܘܳܬܶܗ ܕܥܰܒܕܳܟ ܕܰܘܺܝܕ.