2 Chronicles 29
The second Book of Chronicles
܀ ܒ ܕܘܒܪ ܝܘܡ̈ܬܐ ܟܛ ܀
1 ܚܶܙܰܩܝܳܐ ܩܳܡ ܒܡܰܠܟܽܘܬܳܐ. ܒܰܪ ܥܶܣܪܺܝܢ ܘܚܰܡܶܫ ܫܢܺܝ̈ܢ. ܐܺܝܬܰܘܗܝ ܗܘܳܐ. ܟܰܕ ܩܳܡ ܒܡܰܠܟܽܘܬܳܐ ܘܥܶܣܪܺܝܢ ܘܰܬܫܰܥ ܫܢܺܝ̈ܢ ܐܰܡܠܶܟ ܒܽܐܘܪܺܫܠܶܡ ܘܰܫܡܳܐ ܕܶܐܡܶܗ ܐܰܢܺܝ ܒܰܪܬ ܙܟܰܪܝܳܐ.
2 ܘܰܥܒܰܕ ܕܫܰܦܺܝܪ ܩܕܳܡ ܡܳܪܝܳܐ. ܐܰܝܟܰܢܳܐ ܕܰܥܒܰܕ ܕܰܘܺܝܕ ܐܰܒܽܘܗܝ.
3 ܒܫܰܢ̱ܬܳܐ ܩܰܕܡܳܝܬܳܐ ܕܡܰܠܟܽܘܬܶܗ. ܒܝܰܪܚܳܐ ܩܰܕܡܳܝܳܐ. ܦܬܰܚ ܬܰܖ̈ܥܰܝ ܒܰܝܬܶܗ ܕܡܳܪܝܳܐ. ܘܰܒܕܰܩ ܐܶܢܽܘܢ.
4 ܘܰܐܝܬܺܝ ܟܳܗ̈ܢܶܐ ܘܠܶܘ̈ܳܝܶܐ. ܘܟܰܢܶܫ ܐܶܢܽܘܢ ܠܓܰܘܳܗ̇ ܕܕܳܪܬܳܐ ܕܡܰܩܕܫܳܐ.
5 ܘܶܐܡܰܪ ܠܗܽܘܢ. ܫܽܘܡܥܽܘܢܝ ܠܶܘ̈ܳܝܶܐ. ܘܰܐܦ ܗܳܫܳܐ ܐܶܬܩܰܕܰܫܘ. ܘܩܰܕܶܫܘ ܒܰܝܬܶܗ ܕܡܳܪܝܳܐ ܐܰܠܳܗܳܐ ܕܰܐܒܳܗ̈ܳܬܰܢ. ܘܰܐܦܪܶܩܘ ܥܒܳܕܰܝ̈ܟܽܘܢ ܒܺܝ̈ܫܶܐ ܡܶܢ ܖ̈ܶܥܝܳܢܰܝܟܽܘܢ.
6 ܘܠܳܐ ܢܶܥܒܶܕ ܐܰܝܟܰܢܳܐ ܕܰܥܒܰܕܘ ܐܰܒܳܗ̈ܳܬܰܢ. ܕܰܥܒܰܕܘ ܕܒܺܝܫ ܩܕܳܡ ܡܳܪܝܳܐ ܐܰܠܳܗܰܢ. ܘܫܰܒܩܽܘܗܝ ܘܰܐܦܢܺܝܘ ܐܰܦܰܝ̈ܗܽܘܢ ܡܶܢ ܡܰܫܟܢܶܗ ܕܡܳܪܝܳܐ. ܘܰܐܟܪܶܟܘ ܩܕܳܠܰܝ̈ܗܽܘܢ. ܘܚܰܘܝܽܘܗܝ.
7 ܘܳܐܦ ܐܶܚܰܕ ܬܰܖ̈ܥܶܐ ܕܰܣܪܽܘܓܳܐ. ܘܰܐܕܥܶܟܘ ܫܖ̈ܳܓܶܐ. ܘܩܰܛܖ̈ܽܘܩܶܐ ܠܳܐ ܐܰܣܶܩܘ ܠܡܰܕܒܚܳܐ ܕܰܐܠܳܗܳܐ ܕܺܝܣܪܳܐܶܝܠ.
8 ܘܰܗܘܳܐ ܪܽܘܓܙܶܗ ܕܡܳܪܝܳܐ ܥܰܠ ܝܺܗܽܘܕܳܐ ܘܥܰܠ ܐܽܘܪܺܫܠܶܡ ܘܝܰܗܒ ܐܶܢܽܘܢ ܠܠܰܘܛܬܳܐ. ܘܰܠܨܰܕܝܽܘܬܳܐ. ܘܰܠܚܰܪܒܳܐ. ܐܰܝܟܰܢܳܐ ܕܚܳܙܶܝܢ ܐ̱ܢܬܽܘܢ ܒܥܰܝܢܰܝ̈ܟܽܘܢ.
9 ܘܗܳܐ ܢܦܰܠܘ ܐܰܒܳܗ̈ܳܬܰܢ ܒܚܰܪܒܳܐ. ܘܰܒܢܰܝ̈ܢ ܘܰܒ̈ܢܳܬܰܢ ܒܫܶܒܝܳܐ. ܘܳܐܦ ܗܳܫܳܐ ܕܰܛܥܰܝܢ ܡܶܢ ܒܳܬܰܪ ܡܳܪܝܳܐ ܐܰܠܳܗܰܢ. ܘܰܫܒܰܩܢ ܕܺܝܰܐܬܺܝܩܺܝ ܕܝܰܗܒ ܠܰܐܒܳܗ̈ܳܬܰܢ. ܐܳܦ ܗܽܘ ܫܰܒܩܰܢ.
10 (ܠܝܬ)
11 (ܠܝܬ)
12 (ܠܝܬ)
13 (ܠܝܬ)
14 (ܠܝܬ)
15 (ܠܝܬ)
16 (ܠܝܬ)
17 (ܠܝܬ)
18 (ܠܝܬ)
19 (ܠܝܬ)
20 ܘܩܰܕܶܡ ܚܶܙܰܩܝܳܐ ܡܰܠܟܳܐ. ܘܟܰܢܶܫ ܠܩܰܫܺܝ̈ܫܶܐ ܕܽܐܘܪܺܫܠܶܡ. ܘܥܰܠ ܠܒܰܝܬܶܗ ܕܡܳܪܝܳܐ.
21 ܘܰܐܝܬܺܝܘ ܠܶܗ ܬܰܘܖ̈ܶܐ ܫܰܒܥܳܐ. ܘܕܶܟܖ̈ܶܐ ܫܰܒܥܳܐ. ܘܶܐܡܖ̈ܶܐ ܫܰܒܥܳܐ. ܘܨܺܦܖ̈ܳܝܶܐ ܕܥܶܙ̈ܶܐ ܫܰܒܥܳܐ. ܠܰܡܚܰܣܳܝܽܘ ܥܰܠ ܡܰܠܟܽܘܬܳܐ. ܘܥܰܠ ܝܺܗܽܘܕܳܐ. ܘܥܰܠ ܡܰܩܕܫܳܐ. ܘܶܐܡܰܪ ܠܰܒܢܰܘ̈ܗܝ ܕܰܐܗܪܽܘܢ ܟܳܗ̈ܢܶܐ. ܕܢܰܣܩܽܘܢ ܥܠܰܘ̈ܳܬܳܐ ܥܰܠ ܡܰܕܒܚܶܗ ܕܡܳܪܝܳܐ.
22 ܘܢܶܟܣܽܘܢ ܬܰܘܖ̈ܶܐ. ܘܰܢܩܰܒܠܽܘܢ ܟܳܗ̈ܢܶܐ ܠܕܶܡܗܽܘܢ. ܘܢܶܪܣܽܘܢ ܥܰܠ ܩܰܖ̈ܢܳܬܳܐ ܕܡܰܕܒܚܳܐ.
23 ܘܰܢܩܰܪܒܽܘܢ ܨܺܦܖ̈ܳܝܶܐ ܩܕܳܡ ܡܳܪܝܳܐ. ܘܰܩܕܳܡ ܡܰܠܟܳܐ. ܘܰܩܕܳܡ ܥܰܡܳܐ ܕܺܝܣܪܳܐܶܝܠ. ܘܢܶܣܡܟܽܘܢ ܐܺܝܕܰܝ̈ܗܽܘܢ ܥܠܰܝܗܽܘܢ.
24 ܘܢܶܟܣܽܘܢ ܐܶܢܽܘܢ ܟܳܗ̈ܢܶܐ. ܘܢܶܪܙܦܽܘܢ ܕܶܡܗܽܘܢ ܥܰܠ ܩܰܖ̈ܢܳܬܳܐ ܕܡܰܕܒܚܳܐ. ܘܰܢܚܰܣܽܘܢ ܥܰܠ ܟܽܠܶܗ ܝܺܣܪܳܐܶܝܠ ܡܶܛܽܠ ܕܰܠܟܽܠܶܗ ܝܺܣܪܳܐܶܝܠ ܦܩܰܕ ܡܰܠܟܳܐ. ܕܢܰܝܬܽܘܢ ܥܠܰܘ̈ܳܬܳܐ ܘܕܶܒܚ̈ܶܐ.
25 ܘܰܐܩܺܝܡ ܐܶܢܽܘܢ ܠܠܶܘ̈ܳܝܶܐ ܒܒܰܝܬܶܗ ܕܡܳܪܝܳܐ. ܒܬܶܫܒ̈ܚܳܬܳܐ ܒܩܳܠܳܐ ܕܟܶܢܳܖ̈ܶܐ. ܘܰܒܬܶܫܒ̈ܚܳܬܶܗ ܕܕܰܘܺܝܕ. ܘܰܒܬܶܫܒ̈ܚܳܬܶܗ ܕܓܳܕ ܢܒܺܝܳܐ ܕܡܰܠܟܳܐ ܕܰܘܺܝܕ. ܘܰܕܢܳܬܳܢ ܢܒܺܝܳܐ ܕܡܰܠܟܳܐ ܕܰܘܺܝܕ. ܡܶܛܽܠ ܕܰܗܘܳܐ ܕܰܘܺܝܕ ܡܫܰܒܰܚ ܬܶܫܒ̈ܚܳܬܶܗ ܕܡܳܪܝܳܐ ܐܰܠܳܗܶܗ. ܐܰܝܟ ܕܡܶܢ ܦܽܘܡܳܐ ܕܰܢܒܺܝ̈ܶܐ.
26 ܘܩܳܡܘ ܠܶܘ̈ܳܝܶܐ ܒܬܶܫܒ̈ܚܳܬܶܗ ܕܕܰܘܺܝܕ. ܘܟܳܗ̈ܢܶܐ ܡܝܰܒܒܺܝܢ ܗܘܰܘ ܒܩܰܖ̈ܢܳܬܳܐ ܟܦܺܝ̈ܦܳܬܳܐ ܘܰܦܫܺܝ̈ܛܳܬܳܐ.
27 ܘܶܐܡܰܪ ܚܶܙܰܩܝܳܐ ܠܡܰܣܳܩܽܘ ܥܠܰܘ̈ܳܬܳܐ ܠܡܰܕܒܚܳܐ. ܘܟܰܕ ܫܰܖ̈ܺܝ ܥܠܰܘ̈ܳܬܳܐ ܠܡܶܣܰܩ. ܫܰܪܺܝ ܚܶܙܰܩܝܳܐ ܠܰܡܫܰܒܳܚܽܘ ܬܶܫܒ̈ܚܳܬܶܗ ܕܡܳܪܝܳܐ. ܐܰܝܟ ܕܡܶܢ ܦܽܘܡܳܐ ܕܕܰܘܺܝܕ ܡܰܠܟܳܐ ܕܺܝܣܪܳܐܶܝܠ.
28 ܘܟܽܠܶܗ ܥܰܡܳܐ ܕܺܝܣܪܳܐܶܝܠ ܣܳܓܕܺܝܢ ܗܘܰܘ. ܘܰܡܫܰܒܚܺܝܢ ܒܬܶܫܒ̈ܚܳܬܳܐ. ܘܩܳܪܶܝܢ ܗܘܰܘ ܒܩܰܖ̈ܢܳܬܳܐ ܟܦܺܝ̈ܦܳܬܳܐ ܘܰܦܫܺܝ̈ܛܳܬܳܐ. ܥܕܰܡܳܐ ܕܫܰܠܶܡܘ ܠܡܰܣܳܩܽܘ ܥܠܰܘ̈ܳܬܳܐ.
29 ܘܟܰܕ ܫܰܠܶܡܘ ܠܡܰܣܳܩܽܘ ܥܠܰܘ̈ܳܬܳܐ. ܒܪܶܟ ܡܰܠܟܳܐ ܥܰܠ ܒܽܘܖ̈ܟܰܘܗܝ. ܘܟܽܠ ܐ̱ܢܳܫ ܕܶܐܫܬܟܰܚ ܠܘܳܬܶܗ. ܢܦܰܠܘ ܘܰܣܓܶܕܘ.
30 ܘܶܐܡܰܪ ܚܶܙܰܩܝܳܐ ܡܰܠܟܳܐ ܘܪܰܘܖ̈ܒܳܢܶܐ ܠܠܶܘ̈ܳܝܶܐ. ܠܰܡܫܰܒܳܚܽܘ ܠܡܳܪܝܳܐ. ܒܦܶܬܓܳܡܰܘ̈ܗܝ ܕܕܰܘܺܝܕ. ܘܕܳܐܣܳܦ ܢܒܺܝܳܐ. ܘܫܰܒܰܚܘ ܛܳܒ ܒܚܰܕܽܘܬܳܐ. ܘܰܢܦܰܠܘ ܘܰܣܓܶܕܘ.
31 ܘܰܥܢܳܐ ܚܶܙܰܩܝܳܐ ܘܶܐܡܰܪ. ܡܶܟܺܝܠ ܐܶܬܩܰܪܰܒܬܽܘܢ ܠܽܐܘܪܚܶܗ ܕܡܳܪܝܳܐ. ܩܪܽܘܒܘ ܐܰܝܬܰܘ ܠܺܝ ܕܶܒܚ̈ܶܐ ܘܬܰܘܕܺܝܬܳܐ. ܠܒܰܝܬܶܗ ܕܡܳܪܝܳܐ. ܘܰܐܝܬܺܝܘ ܥܰܡܳܐ ܕܶܒܚ̈ܶܐ ܘܬܰܘܕܺܝܬܳܐ. ܘܟܽܠ ܡܶܕܶܡ ܕܨܳܒܶܐ ܗܘܳܐ ܠܶܒܗܽܘܢ. ܡܰܝܬܶܝܢ ܗܘܰܘ.
32 ܘܰܗܘܳܐ ܡܶܢܝܳܢܳܐ ܕܰܥܠܰܘ̈ܳܬܳܐ ܕܰܐܝܬܺܝܘ ܥܰܡܳܐ. ܬܰܘܖ̈ܶܐ ܫܰܒܥܺܝܢ. ܘܕܶܟܖ̈ܶܐ ܡܳܐܐ. ܘܶܐܡܖ̈ܶܐ ܡܰܐܬܶܝܢ. ܠܰܥܠܳܬܳܐ ܕܡܳܪܝܳܐ.
33 ܟܽܠܗܽܘܢ ܗܳܠܶܝܢ ܕܶܐܬܩܰܕܰܫܘ. ܬܰܘܖ̈ܶܐ ܫܶܬܡܳܐܐ. ܘܥܳܢ̈ܳܐ ܐܰܠܦ̈ܶܐ ܬܠܳܬܳܐ.
34 ܒܰܠܚܽܘܕ ܟܳܗ̈ܢܶܐ ܙܥܽܘܪܺܝܢ ܗܘܰܘ. ܘܠܳܐ ܡܶܫܟܚܺܝܢ ܗܘܰܘ ܠܰܡܫܰܡܳܫܽܘ ܠܟܽܠܗܶܝܢ ܥܠܰܘ̈ܳܬܳܐ. ܘܥܰܕܰܪܘ ܐܶܢܽܘܢ ܐܰܚܰܝ̈ܗܽܘܢ ܠܶܘ̈ܳܝܶܐ. ܥܕܰܡܳܐ ܠܰܐܝܟܳܐ ܕܫܶܠܡܰܬ ܟܽܠܳܗ̇ ܥܒܺܝܕܬܳܐ. ܘܡܶܢ ܒܳܬܰܪ ܗܳܠܶܝܢ. ܐܶܬܩܰܕܰܫܘ ܟܳܗ̈ܢܶܐ. ܡܶܛܽܠ ܕܠܶܘ̈ܳܝܶܐ ܡܰܟܺܝܟܺܝܢ ܗܘܰܘ ܒܠܶܒܗܽܘܢ. ܠܡܶܬܩܰܕܳܫܽܘ ܡܶܢ ܟܳܗ̈ܢܶܐ.
35 ܘܳܐܦ ܥܠܰܘ̈ܳܬܳܐ ܠܣܽܘܓܳܐܐ. ܐܰܝܟ ܬܰܪܒܳܐ ܕܫܰܠ̈ܡܶܐ. ܘܕܶܐܡܖ̈ܶܐ ܠܰܥܠܰܘ̈ܳܬܳܐ ܘܫܶܠܡܰܬ ܥܒܺܝܕܬܳܐ ܕܒܰܝܬܶܗ ܕܡܳܪܝܳܐ.
36 ܘܰܚܕܺܝ ܚܶܙܰܩܝܳܐ ܘܟܽܠܶܗ ܥܰܡܳܐ ܕܺܝܣܪܳܐܶܝܠ. ܥܰܠ ܕܫܶܠܡܰܬ ܥܒܺܝܕܬܳܐ ܕܒܰܝܬܳܐ. ܕܡܶܢ ܫܶܝܠ ܗܘܳܐ ܦܶܬܓܳܡܳܐ.