2 Chronicles 33
The second Book of Chronicles
܀ ܒ ܕܘܒܪ ܝܘܡ̈ܬܐ ܠܓ ܀
1 ܒܰܪ ܬܰܪܬܰܥܶܣܖ̈ܶܐ ܗܘܳܐ ܫܢܺܝ̈ܢ ܡܢܰܫܶܐ. ܟܰܕ ܩܳܡ ܒܡܰܠܟܽܘܬܶܗ. ܘܚܰܡܫܺܝܢ ܘܚܰܡܶܫ ܫܢܺܝ̈ܢ ܐܰܡܠܶܟ ܒܽܐܘܪܺܫܠܶܡ.
2 ܘܰܥܒܰܕ ܕܒܺܝܫ ܩܕܳܡ ܡܳܪܝܳܐ. ܐܰܝܟ ܥܒܳܕ̈ܶܐ ܕܥܰܡ̈ܡܶܐ. ܕܰܐܘܒܶܕ ܐܶܢܽܘܢ ܡܳܪܝܳܐ ܡܶܢ ܩܕܳܡ ܒܢܰܝ̈ ܝܺܣܪܳܐܶܝܠ.
3 ܘܰܗܦܰܟ ܘܰܒܢܳܐ ܡܰܕܒ̈ܚܶܐ ܕܰܥܩܰܪ ܚܶܙܰܩܝܳܐ ܐܰܒܽܘܗܝ ܘܰܐܩܺܝܡ ܥܠܰܘ̈ܳܬܳܐ ܠܰܦܬܰܟܖ̈ܶܐ. ܘܰܥܒܰܕ ܢܶܡܖ̈ܶܐ. ܘܰܣܓܶܕ ܠܗܽܘܢ. ܘܰܣܓܶܕ ܠܟܽܠܗܽܘܢ ܚܰܝ̈ܠܘܳܬܐ ܕܰܫܡܰܝܳܐ. ܒܬܰܪܬܶܝܢ ܕܳܖ̈ܺܝܢ ܕܒܰܝܬܶܗ ܕܡܳܪܝܳܐ.
4 (ܠܝܬ)
5 (ܠܝܬ)
6 ܘܳܐܦ ܗܽܘ ܐܰܥܒܰܪ ܒܪܶܗ ܒܢܽܘܪܳܐ. ܒܢܰܚܠܳܐ ܪܰܒܳܐ. ܘܶܐܚܰܕ ܥܰܝ̈ܢܶܐ. ܘܢܰܚܶܫ ܢܶܚܫ̈ܶܐ. ܘܰܥܒܰܕ ܚܰܖ̈ܳܫܶܐ ܘܰܫܐܶܠ ܒܟܰܠܕܳܝ̈ܶܐ. ܘܰܒܙܰܟܽܘܖ̈ܶܐ. ܘܰܐܣܓܺܝ ܠܡܶܥܒܰܕ ܕܒܺܝܫ ܩܕܳܡ ܡܳܪܝܳܐ. ܘܰܠܡܰܪܓܳܙܽܘ ܩܕܳܡܰܘܗܝ.
7 ܘܣܳܡܶܗ ܠܨܰܠܡܳܐ ܕܰܐܪܒܰܥ ܐܰܦܺܝ̈ܢ ܕܰܥܒܰܕ ܒܒܰܝܬܶܗ ܕܡܳܪܝܳܐ. ܕܶܐܡܰܪ ܡܳܪܝܳܐ ܠܕܰܘܺܝܕ. ܘܠܰܫܠܶܝܡܽܘܢ ܒܪܶܗ. ܒܒܰܝܬܳܐ ܗܳܢܳܐ ܕܒܽܐܘܪܺܫܠܶܡ. ܕܰܓܒܺܝܬ ܠܺܝ ܡܶܢ ܟܽܠܗܽܘܢ ܫܰܒ̈ܛܶܐ ܕܺܝܣܪܳܐܶܝܠ. ܐܰܫܪܶܐ ܫܟܺܝܢܬܝ ܠܥܳܠܰܡ.
8 ܘܠܳܐ ܐܰܘܣܶܦ ܬܽܘܒ ܠܡܰܦܳܩܽܘ ܠܺܝܣܪܳܐܶܝܠ ܡܶܢ ܐܰܪܥܳܐ ܗܳܕܶܐ. ܕܝܶܗܒܶܬ ܠܰܐܒܳܗܰܝ̈ܗܽܘܢ. ܒܰܠܚܽܘܕ ܐܶܢܗܽܘ ܕܢܶܛܪܽܘܢ ܠܡܶܥܒܰܕ ܟܽܠ ܡܶܕܶܡ ܕܦܰܩܕܶܬ ܐܶܢܽܘܢ. ܘܰܠܟܽܠܶܗ ܢܳܡܽܘܣܳܐ. ܘܠܰܩܝܳܡܰܝ̈ ܘܰܠܕܺܝ̈ܢܰܝ. ܕܦܰܩܶܕ ܐܶܢܽܘܢ ܥܰܒܕܝ ܡܽܘܫܶܐ.
9 ܘܰܐܛܥܺܝ ܡܢܰܫܶܐ ܠܺܝܗܽܘܕܳܐ. ܘܰܠܥܳܡܽܘܖ̈ܶܝܗ̇ ܕܽܐܘܪܺܫܠܶܡ. ܠܡܶܥܒܰܕ ܥܒܳܕ̈ܶܐ ܒܺܝ̈ܫܶܐ. ܐܰܝܟ ܥܰܡ̈ܡܶܐ ܕܰܐܘܒܶܕ ܡܳܪܝܳܐ ܡܢ ܩܕܳܡ ܒܢܰܝ̈ ܝܺܣܪܳܐܶܝܠ.
10 ܘܡܰܠܶܠ ܡܳܪܝܳܐ ܥܰܡ ܡܢܰܫܶܐ ܘܥܰܡ ܥܰܡܶܗ. ܘܠܳܐ ܩܰܒܶܠܘ.
11 ܘܰܐܝܬܺܝ ܡܳܪܝܳܐ ܥܠܰܝܗܽܘܢ ܪܰܘܖ̈ܒܳܢܰܝ ܚܰܝܠܳܐ ܕܡܰܠܟܳܐ ܕܳܐܬܽܘܪ. ܘܶܐܚܰܕܘ ܠܰܡܢܰܫܶܐ ܒܚܰܝܰܘ̈ܗܝ ܘܰܐܣܪܽܘܗܝ ܒܫܺܫ̈ܠܳܬܳܐ. ܘܰܐܘܒܠܽܘܗܝ ܠܒܳܒܶܝܠ.
12 ܘܟܰܕ ܥܳܩܰܬ ܠܶܗ. ܨܰܠܺܝ ܩܕܳܡ ܡܳܪܝܳܐ ܐܰܠܳܗܶܗ. ܘܰܕܚܶܠ ܛܳܒ ܡܶܢ ܩܕܳܡ ܡܳܪܝܳܐ ܐܰܠܳܗܳܐ ܕܰܐܒܳܗܰܘ̈ܗܝ.
13 ܘܨܠܺܝ ܩܕܳܡ ܡܳܪܝܳܐ. ܘܰܫܡܰܥ ܒܩܳܠܶܗ. ܘܩܰܒܶܠ ܨܠܽܘܬܶܗ ܘܰܐܗܦܟܶܗ ܠܽܐܘܪܺܫܠܶܡ ܒܡܰܠܟܽܘܬܶܗ. ܘܺܝܕܰܥ ܡܢܰܫܶܐ ܕܡܳܪܝܰܐ ܗ̱ܘ ܐܰܠܳܗܳܐ.
14 ܘܡܶܢ ܒܳܬܰܪ ܗܳܠܶܝܢ ܒܢܳܐ ܫܽܘܪܳܐ ܒܰܪܳܝܳܐ ܠܰܩܪܺܝܬܶܗ ܕܕܰܘܺܝܕ. ܡܶܢ ܡܰܥܪܒܳܝܳܐ ܕܓܺܝܚܽܘܢ ܢܰܗܪܳܐ. ܘܰܠܡܰܥܠܳܢܳܐ ܕܬܰܪܥܳܐ ܕܨܰܝܳܕ̈ܶܐ. ܘܰܐܟܪܟܳܗ̇ ܠܟܽܠܳܗ̇ ܐܽܘܪܺܫܠܶܡ ܫܽܘܪܳܐ ܒܰܪܳܝܳܐ. ܘܰܐܪܺܝܡܶܗ ܛܳܒ. ܘܰܐܩܺܝܡ ܪܰܘܖ̈ܒܳܢܰܝ ܚܰܝܠܳܐ. ܒܟܽܠܗܶܝܢ ܩܽܘܖ̈ܝܳܐ ܖ̈ܳܡܳܬܳܐ ܕܒܶܝܬ ܝܺܗܽܘܕܳܐ.
15 ܘܰܐܥܒܰܪ ܐܰܠܳܗ̈ܶܐ ܢܽܘܟܖ̈ܳܝܶܐ. ܘܨܰܠ̈ܡܶܐ ܓܠܺܝ̈ܦܶܐ ܕܺܐܝܬ ܒܒܰܝܬܶܗ ܕܡܳܪܝܳܐ. ܘܟܽܠܗܶܝܢ ܥܠܰܘ̈ܳܬܳܐ ܕܰܒܢܳܐ ܗܘܳܐ ܒܛܽܘܪ ܒܰܝܬܳܐ ܕܡܳܪܝܳܐ ܘܒܽܐܘܪܺܫܠܶܡ. ܘܰܫܕܳܐ ܐܶܢܽܘܢ ܠܒܰܪ ܡܶܢ ܩܪܺܝܬܳܐ.
16 ܘܰܒܢܳܐ ܡܰܕܒܚܳܐ ܠܡܳܪܝܳܐ. ܘܕܰܒܰܚ ܥܠܰܘ̈ܳܬܳܐ ܘܕܶܒܚ̈ܶܐ ܫܰܠ̈ܡܶܐ ܘܬܰܘܖ̈ܶܐ. ܘܶܐܡܰܪ ܠܺܝܗܽܘܕܳܐ ܠܡܶܥܒܰܕ ܠܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ. ܬܽܘܒ ܥܺܐܕܳܐ.
17 ܘܕܶܒܚ̈ܶܐ ܐ̱ܚܖ̈ܳܢܶܐ ܘܰܥܠܰܘ̈ܳܬܳܐ ܠܳܐ ܬܰܣܩܽܘܢ. ܐܶܠܳܐ ܩܕܳܡ ܡܳܪܝܳܐ ܐܰܠܳܗܟܽܘܢ.
18 ܘܫܰܪܟܳܐ ܕܦܶܬܓܳܡܰܘ̈ܗܝ ܕܰܡܢܰܫܶܐ. ܘܰܨܠܽܘܬܶܗ ܕܰܩܕܳܡ ܐܰܠܳܗܳܐ. ܘܦܶܬܓܳܡ̈ܶܐ ܕܰܢܒܺܝ̈ܶܐ ܕܶܐܬܢܰܒܺܝܘ ܥܠܰܘܗܝ ܒܰܫܡܶܗ ܕܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ. ܗܳܐ ܗܶܢܽܘܢ ܟܬܺܝܒܺܝܢ ܒܦܶܬܓܳܡ̈ܶܐ ܕܡܰܠ̈ܟܶܐ ܕܺܝܣܪܳܐܶܝܠ ܘܕܺܝܗܽܘܕܳܐ.
19 ܘܰܨܠܽܘܬܶܗ ܕܶܐܫܬܰܡܥܰܬ ܒܩܳܠܶܗ. ܘܟܽܠܗܽܘܢ ܚܛܳܗܰܘ̈ܗܝ ܘܥܰܘܠܶܗ. ܘܕܽܘܟ̈ܝܳܬܳܐ ܕܰܒܢܳܐ ܒܗܶܝܢ ܡܰܕܒ̈ܚܶܐ. ܘܰܐܩܺܝܡ ܟܽܘܡܖ̈ܶܐ. ܘܰܥܒܰܕ ܚܽܘܓ̈ܒܶܐ ܠܰܦܬܰܟܖ̈ܶܐ. ܗܳܐ ܗܶܢܽܘܢ ܟܬܺܝܒܺܝܢ ܒܦܶܬܓܳܡܰܘ̈ܗܝ ܕܚܰܢܳܢ ܢܒܺܝܳܐ.
20 ܘܰܫܟܶܒ ܡܢܰܫܶܐ ܥܰܡ ܐܰܒܳܗ̈ܳܬܶܗ. ܘܩܰܒܽܪܘܗܝ ܒܒܰܝܬܶܗ ܒܓܰܢܰܬ ܓܰܙܳܐ. ܘܰܐܡܠܶܟ ܐܰܡܽܘܢ ܒܪܶܗ ܒܳܬܪܶܗ.
21 ܒܰܪ ܥܶܣܪܺܝܢ ܘܬܰܪܬܶܝܢ ܫܢܺܝ̈ܢ ܐܰܡܽܘܢ ܟܰܕ ܩܳܡ ܒܡܰܠܟܽܘܬܳܐ. ܘܬܰܪܬܶܝܢ ܫܢܺܝ̈ܢ ܐܰܡܠܶܟ ܒܽܐܘܪܺܫܠܶܡ.
22 ܘܰܥܒܰܕ ܕܒܺܝܫ ܩܕܳܡ ܡܳܪܝܳܐ. ܐܰܝܟܰܢܳܐ ܕܰܥܒܰܕ ܡܢܰܫܶܐ ܐܰܒܽܘܗܝ ܘܰܠܟܽܠܗܽܘܢ ܨܰܠ̈ܡܶܐ ܘܰܦܬܰܟܖ̈ܶܐ ܕܰܥܒܰܕ ܡܢܰܫܶܐ ܐܰܒܽܘܗܝ. ܕܰܒܰܚ ܐܰܡܽܘܢ ܘܰܣܓܕ.
23 ܘܠܳܐ ܙܳܥ ܡܶܢ ܩܕܳܡ ܡܳܪܝܳܐ ܐܰܠܳܗܶܗ. ܡܶܛܽܠ ܕܗܽܘ ܡܢܰܫܶܐ ܙܳܥ ܗܘܳܐ ܡܶܢ ܩܕܳܡ ܡܳܪܝܳܐ ܐܰܠܳܗܶܗ. ܡܶܛܽܠ ܕܗܽܘ ܐܰܡܽܘܢ ܐܰܣܓܺܝ ܗܘܳܐ ܠܡܶܚܛܳܐ.
24 ܘܶܐܬܢܟܶܠܘ ܥܠܰܘܗܝ ܥܰܒܕܰܘ̈ܗܝ. ܘܩܰܛܠܽܘܗܝ ܒܒܰܝܬܶܗ.
25 ܘܰܩܛܰܠܘ ܥܰܡܳܐ ܕܰܐܪܥܳܐ ܠܟܽܠ ܡܰܢ ܕܶܐܬܢܟܶܠ ܥܰܠ ܡܰܠܟܳܐ ܐܰܡܽܘܢ. ܘܰܐܡܠܶܟܘ ܥܰܡܳܐ ܕܰܐܪܥܳܐ. ܠܝܽܘܫܺܝܳܐ ܒܪܶܗ ܒܳܬܪܶܗ.