2 Chronicles 35
The second Book of Chronicles
܀ ܒ ܕܘܒܪ ܝܘܡ̈ܬܐ ܠܗ ܀
1 ܘܰܥܒܰܕ ܝܽܘܫܺܝܳܐ ܒܽܐܘܪܺܫܠܶܡ ܥܺܐܕܳܐ ܠܡܳܪܝܳܐ. ܘܰܥܒܰܕ ܥܺܐܕܳܐ ܒܰܐܪܒܰܥܶܣܖ̈ܶܐ ܒܝܰܪܚܳܐ ܩܰܕܡܳܝܳܐ.
2 ܘܰܐܩܺܝܡ ܟܳܗ̈ܢܶܐ ܥܰܠ ܡܰܛܰܪܬܗܽܘܢ. ܘܰܐܩܺܝܡ ܐܶܢܽܘ ܢ ܥܰܠ ܥܒܺܝ̈ܕܳܬܳܐ ܕܒܰܝܬܶܗ ܕܡܳܪܝܳܐ.
3 ܘܶܐܡܰܪ ܠܠܶܘܳܝ̈ܶܐ ܕܩܳܝܡܺܝܢ ܒܟܽܠ ܒܢܰܝ̈ ܝܺܣܪܳܐܶܝܠ. ܐܶܬܩܰܕܰܫܘ ܠܡܳܪܝܳܐ. ܘܗܰܒܘ ܩܺܐܒܽܘܬܳܐ ܕܩܽܘܕܫܳܐ ܒܒܰܝܬܳܐ ܕܰܒܢܳܐ ܫܠܶܝܡܽܘܢ ܒܰܪ ܕܰܘܺܝܕ ܡܰܠܟܳܐ ܕܺܝܣܪܳܐܶܝܠ. ܠܳܐ ܐܺܝܬ ܠܟܽܘܢ ܬܰܡܳܢ ܠܡܶܫܩܰܠ ܒܟܰܬܦ̈ܳܬܟܽܘܢ ܡܶܟܺܝܠ ܦܠܽܘܚܘ ܠܡܳܪܝܳܐ ܐܰܠܳܗܟܽܘܢ. ܘܰܠܥܰܡܶܗ ܝܺܣܪܳܐܶܝܠ.
4 ܘܰܐܬܩܶܢܘ ܠܶܒܟܽܘܢ. ܘܠܶܒܳܐ ܕܰܐܒܳܗ̈ܳܬܟܽܘܢ. ܐܰܝܟܰܢܳܐ ܕܰܟܬܰܒ ܕܰܘܺܝܕ ܡܰܠܟܳܐ ܕܺܝܣܪܳܐܶܝܠ. ܘܰܐܝܟܰܢܳܐ ܕܰܟܬܰܒ ܫܠܶܝܡܽܘܢ ܒܪܶܗ.
5 ܘܩܽܘܡܘ ܒܩܽܘܕܫܳܐ ܒܦܳܠܓܽܘܬܳܐ ܕܒܶܝܬ ܐܰܒܳܗܰܝ̈ܟܽܘܢ. ܘܰܐܚܰܝ̈ܟܽܘܢ ܒܢܰܝ̈ ܥܰܡܳܐ ܒܦܳܠܓܽܘܬܳܐ ܕܒܶܝܬ ܐܰܒܳܐ ܕܠܶܘ̈ܳܝܶܐ.
6 ܟܽܘܣܘ ܦܶܨܚܳܐ ܘܶܐܬܩܰܕܰܫܘ ܘܰܐܬܩܶܢܘ ܠܶܒܳܐ ܕܰܐܚܰܝ̈ܟܽܘܢ ܘܢܶܥܒܕܽܘܢ ܐܰܝܟܰܢܳܐ ܕܡܰܠܶܠ ܡܳܪܝܳܐ ܥܰܡ ܡܽܘܫܶܐ.
7 ܘܰܦܪܰܫ ܝܽܘܫܺܝܳܐ ܠܰܒܢܰܝ̈ ܥܰܡܳܐ. ܥܳܢ̈ܳܐ ܘܶܐܡܖ̈ܶܐ. ܘܨܺܦܖ̈ܳܝܶܐ ܕܥܶܙ̈ܶܐ. ܗܳܠܶܝܢ ܟܽܠܗܽܘܢ ܠܦܶܨܚܳܐ. ܠܟܽܠ ܕܶܐܫܬܟܰܚ. ܒܡܶܢܝܳܢܳܐ ܬܠܳܬܺܝܢ ܐܰܠܦܺܝ̈ܢ. ܘܬܰܘܖ̈ܶܐ ܬܠܳܬܳܐ ܐܰܠܦܺܝ̈ܢ. ܗܳܠܶܝܢ ܡܶܢ ܩܶܢܝܳܢܳܐ ܕܡܰܠܟܳܐ.
8 ܘܪܰܘܖ̈ܒܳܢܰܘ̈ܗܝ ܦܪܰܫܘ ܠܥܰܡܳܐ ܠܟܳܗ̈ܢܶܐ ܘܰܠܠܶܘ̈ܳܝܶܐ. ܘܰܦܪܰܫܘ ܚܶܠܰܩܝܳܐ. ܘܰܙܟܰܪܝܳܐ. ܘܰܢܚܳܐܶܝܠ. ܪܰܘܖ̈ܒܳܢܰܝ ܒܰܝܬܶܗ ܕܡܳܪܝܳܐ ܠܟܳܗ̈ܢܶܐ. ܘܝܰܗܒܘ ܠܦܶܨܚܳܐ. ܥܳܢ̈ܳܐ ܐܰܠܦ̈ܶܐ ܬܪܶܝܢ ܘܫܶܬ ܡܳܐܐ. ܘܬܰܘܖ̈ܶܐ ܬܠܳܬܡܳܐܐ.
9 ܘܰܟܢܰܢܝܳܐ ܘܰܫܡܶܥܝܳܐ ܒܰܪ ܐܰܚܽܘܗܝ. ܘܰܚܫܰܒܝܳܐ ܘܝܰܕܥܶܝܠ ܐܰܦܪܶܫܘ ܠܠܶܘ̈ܳܝܶܐ ܠܦܶܨܚܳܐ. ܥܳܢ̈ܳܐ ܚܰܡܫܳܐ ܐܰܠܦܺܝ̈ܢ. ܘܬܰܘܖ̈ܶܐ ܚܰܡܶܫܡܳܐܐ.
10 ܘܬܶܩܢܰܬ ܥܒܺܝܕܬܳܐ ܘܩܳܡܘ ܟܳܗ̈ܢܶܐ ܥܰܠ ܕܽܘܟܝܳܬܗܽܘܢ. ܘܠܶܘ̈ܳܝܶܐ ܥܰܠ ܕܽܘܟ̈ܝܳܬܗܽܘܢ.
11 ܘܰܢܟܰܣܘ ܦܶܨܚܳܐ ܐܰܝܟ ܦܽܘܩܕܳܢܳܐ ܕܡܰܠܟܳܐ. ܘܰܪܙܰܦܘ ܟܳܗ̈ܢܶܐ ܡܶܢ ܕܡܳܐ.
12 ܘܠܶܘ̈ܳܝܶܐ ܢܳܫܛܺܝܢ ܘܝܳܗܒܺܝܢ ܥܠܰܘ̈ܳܬܳܐ ܠܦܳܠ̈ܓܘܳܬܳܐ ܕܰܐܒܳܗܰܝ̈ܗܽܘܢ ܕܰܒܢܰܝ̈ ܥܰܡܳܐ. ܠܰܡܩܰܪܳܒܽܘ ܠܡܳܪܝܳܐ. ܐܰܝܟ ܕܰܟܬܺܝܒ ܒܣܶܦܪܳܐ ܕܢܳܡܽܘܣܳܐ ܕܡܽܘܫܶܐ ܘܗܳܟܰܢܳܐ ܡܩܰܪܒܺܝܢ ܗܘܰܘ ܒܟܽܠ ܨܦܰܪ ܘܰܨܦܰܪ.
13 ܘܒܰܫܠܶܘ ܦܶܨܚܳܐ ܒܢܽܘܪܳܐ. ܐܰܝܟ ܕܡܶܬܒܥܶܐ ܠܶܗ. ܘܩܽܘܕܫܶܗ ܒܰܫܶܠܘ ܒܢܽܘܪܳܐ. ܒܩܰܕܣ̈ܶܐ ܘܒܺܐܝܖ̈ܶܐ. ܘܰܒܩܰܖ̈ܕܳܠܶܐ. ܘܰܪܗܶܛܘ ܟܽܠ ܒܢܰܝ̈ ܥܰܡܳܐ.
14 ܘܡܶܢ ܒܳܬܰܪ ܗܳܠܶܝܢ. ܛܰܝܶܒܘ ܟܳܗ̈ܢܶܐ ܠܗܽܘܢ ܕܺܝܠܗܽܘܢ. ܡܶܛܽܠ ܕܟܳܗ̈ܢܶܐ ܒܢܰܘ̈ܗܝ ܕܰܐܗܪܽܘܢ ܡܰܣܩܺܝܢ ܗܘܰܘ ܥܠܰܘ̈ܳܬܳܐ ܘܬܰܪܒܳܐ ܥܕܰܡܳܐ ܠܠܶܘ̈ܳܝܶܐ. ܘܠܶܘ̈ܳܝܶܐ ܛܰܝܶܒܘ ܠܗܽܘܢ ܘܰܠܟܳܗܢ̈ܶܐ ܒܢܰܘ̈ܗܝ ܕܰܐܗܪܽܘܢ ܕܰܡܫܰܡܫܺܝܢ.
15 ܒܢܰܘ̈ܗܝ ܕܳܐܣܳܦ ܥܰܠ ܕܽܘܟܬܗܽܘܢ. ܐܰܝܟ ܦܽܘܩܕܳܢܳܐ ܕܕܰܘܺܝܕ ܘܟܰܢܶܫ ܗܳܡܳܢ ܘܺܝܪܬܽܘܢ ܚܳܙܽܘܝ̈ܶܐ ܕܡܰܠܟܳܐ. ܘܢܳܛܖ̈ܰܝ ܬܰܪܥܳܐ ܕܰܒܟܽܠ ܬܪܰܥ ܘܰܬܪܰܥ. ܕܠܰܝܬ ܠܗܽܘܢ ܡܶܕܶܡ ܠܰܡܒܰܛܳܠܽܘ ܡܶܢ ܟܽܠ ܥܒܺܝ̈ܕܳܬܗܽܘܢ ܡܶܛܽܠ ܕܰܐܚܰܝ̈ܗܽܘܢ ܛܰܝܶܒܘ ܠܗܽܘܢ.
16 ܘܶܐܬܛܰܝܒܰܬ ܟܽܠܳܗ̇ ܥܒܺܝܕܳܬܳܐ ܕܡܳܪܝܳܐ ܒܝܰܘܡܳܐ ܗܰܘ. ܠܡܶܥܒܰܕ ܦܶܨܚܳܐ. ܘܰܥܠܰܘ̈ܳܬܳܐ ܩܰܪܶܒܘ ܥܰܠ ܡܰܕܒܚܶܗ ܕܡܳܪܝܳܐ. ܐܰܝܟ ܦܽܘܩܕܳܢܳܐ ܕܡܰܠܟܳܐ ܝܽܘܫܺܝܳܐ.
17 ܘܰܥܒܰܕܘ ܒܢܰܝ̈ ܝܺܣܪܳܐܶܝܠ ܕܶܐܫܬܟܰܚܘ. ܦܶܨܚܳܐ ܒܶܗ ܒܙܰܒܢܳܐ ܗܰܘ. ܘܥܺܐܕܳܐ ܕܦܰܛܺܝܖ̈ܶܐ ܫܰܒܥܳܐ ܝܰܘܡܺܝ̈ܢ.
18 ܘܠܳܐ ܐܶܬܥܒܶܕ ܥܺܐܕܳܐ ܒܺܝܣܪܳܐܶܝܠ ܐܰܝܟ ܗܰܘ. ܡܶܢ ܝܰܘܡܰܘ̈ܗܝ ܕܰܫܡܽܘܐܶܝܠ ܢܒܺܝܳܐ. ܘܟܽܠ ܡܰܠ̈ܟܶܐ ܕܺܝܣܪܳܐܶܝܠ ܠܳܐ ܥܒܰܕܘ ܐܰܝܟ ܗܰܘ ܦܶܨܚܳܐ. ܕܰܥܒܰܕ ܝܽܘܫܺܝܳܐ. ܘܟܳܗ̈ܢܶܐ ܘܠܶܘ̈ܳܝܶܐ. ܘܟܽܠܶܗ ܝܺܗܽܘܕܳܐ ܘܺܝܣܪܳܐܶܝܠ. ܕܶܐܫܬܟܰܚܘ ܗܘܰܘ ܒܽܐܘܪܺܫܠܶܡ.
19 ܘܒܰܬܡܳܢܰܥܶܣܖ̈ܶܐ ܫܢܺܝ̈ܢ ܠܡܰܠܟܽܘܬܶܗ ܕܝܽܘܫܺܝܳܐ. ܐܶܬܥܒܶܕ ܥܺܐܕܳܐ ܗܳܢܳܐ.
20 ܒܳܬܰܪ ܟܽܠܗܶܝܢ ܗܳܠܶܝܢ. ܕܰܐܬܩܶܢ ܝܽܘܫܺܝܳܐ ܨܶܒ̈ܘܳܬܶܗ ܕܒܰܝܬܳܐ. ܣܠܶܩ ܦܶܪܥܽܘܢ ܚܓܺܝܪܳܐ ܡܰܠܟܳܐ ܕܡܶܨܪܶܝܢ. ܠܡܶܬܟܰܬܳܫܽܘ ܥܰܠ ܡܰܒܽܘܓ ܕܥܰܠ ܦܪܳܬ ܘܰܢܦܰܩ ܝܽܘܫܺܝܳܐ ܠܽܐܘܪܥܶܗ.
21 ܘܫܰܕܰܪ ܐܺܝܙܓܰܕ̈ܶܐ ܠܘܳܬܶܗ. ܘܶܐܡܰܪ ܠܶܗ. ܡܳܢܳܐ ܐܺܝܬ ܠܺܝ ܥܰܡܳܟ ܡܰܠܟܳܐ ܕܺܝܗܽܘܕܳܐ. ܠܳܐ ܗܘܳܐ ܥܠܰܝܟ ܐܳܬܶܐ ܐ̱ܢܳܐ ܝܰܘܡܳܢܳܐ. ܡܰܠܟܳܐ ܕܺܝܗܽܘܕܳܐ. ܡܶܛܽܠ ܕܠܳܐ ܗܘܳܐ ܥܠܰܝܟ ܐܳܬܶܐ ܐ̱ܢܳܐ ܠܡܶܬܟܰܬܳܫܽܘ. ܡܳܪܝܳܐ ܐܶܡܰܪ ܠܳܟ ܠܰܡܕܰܚܳܠܽܘܬܰܢܝ ܦܪܽܘܩ ܠܳܟ ܡܶܢ ܐܰܠܳܗܳܐ ܕܥܰܡܝ. ܕܠܳܐ ܢܚܰܒܠܳܟ.
22 ܘܠܳܐ ܐܰܦܢܺܝ ܐܰܦܰܘ̈ܗܝ ܡܶܢܶܗ ܝܽܘܫܺܝܳܐ. ܡܶܛܽܠ ܕܰܠܡܶܬܟܰܬܳܫܽܘ ܘܰܠܡܶܥܒܰܕ ܩܪܳܒܳܐ ܐܳܙܶܠ ܗܘܳܐ. ܘܠܳܐ ܫܡܰܥ ܦܶܬܓܳܡܰܘ̈ܗܝ ܕܦܶܪܥܽܘܢ ܚܓܺܝܪܳܐ. ܘܠܳܐ ܝܳܕܰܥ ܗܘܳܐ ܝܽܘܫܺܝܳܐ ܡܶܢ ܩܕܳܡ ܡܳܪܝܳܐ ܗܘܳܬ. ܘܰܢܦܰܩ ܠܡܶܬܟܰܬܳܫܽܘ ܥܰܡܶܗ. ܒܰܦܩܰܥܬܳܐ ܕܡܰܓܕܽܘ.
23 ܘܰܡܚܳܐ ܦܶܪܥܽܘܢ ܚܓܺܝܪܳܐ ܠܝܽܘܫܺܝܳܐ ܬܪܶܝܢ ܓܶܐܖ̈ܺܝܢ ܘܶܐܡܰܪ ܡܰܠܟܳܐ. ܐܰܥܒܪܽܘܢܝ. ܡܶܛܽܠ ܕܰܡܚܽܘܬܳܐ ܕܡܰܘܬܳܐ ܡܚܶܐ ܐ̱ܢܳܐ.
24 ܘܰܐܥܒܪܽܘܗܝ ܥܰܒܕܰܘ̈ܗܝ ܡܶܢ ܡܰܪܟܰܒܬܳܐ. ܘܰܐܘܬܒܽܘܗܝ ܒܩܳܪܽܘܟܳܐ ܕܡܰܠܟܽܘܬܳܐ ܕܺܝܠܶܗ. ܘܰܐܘܒܠܽܘܗܝ ܠܽܐܘܪܺܫܠܶܡ. ܘܡܺܝܬ ܘܩܰܒܪܽܘܗܝ ܒܩܰܒܪܳܐ ܕܰܐܒܳܗ̈ܳܬܶܗ. ܘܟܽܠܗܽܘܢ ܕܒܶܝܬ ܝܺܗܽܘܕܳܐ ܘܥܳܡܽܘܖ̈ܶܝܗ̇ ܕܽܐܘܪܺܫܠܶܡ. ܢܳܛܪܺܝܢ ܗܘܰܘ ܐܶܒܠܳܐ ܥܰܠ ܝܽܘܫܺܝܳܐ.
25 ܘܶܐܠܳܐ ܐܶܪܰܡܝܳܐ ܥܰܠ ܝܽܘܫܺܝܳܐ. ܘܶܐܡܰܪ. ܟܽܠ ܙܰܕܺܝ̈ܩܶܐ ܘܙܰܕܺܝ̈ܩܳܬܳܐ ܒܽܐܘܠܝܳܬܟܶܝܢ ܥܰܠ ܝܽܘܫܺܝܳܐ ܒܟܳܝܶܝ̈ܢ. ܘܰܥܕܰܡܳܐ ܠܝܰܘܡܳܢܳܐ ܝܰܗܒ ܐܶܢܶܝܢ ܠܰܩܝܳܡܳܐ ܕܺܝܣܪܳܐܶܝܠ. ܘܗܶܢܶܝܢ ܟܬܺܝ̈ܒܳܢ ܒܰܣܦܰܪ ܐܽܘܠ̈ܝܳܬܳܐ.
26 ܘܫܰܪܟܳܐ ܕܦܶܬܓܳܡܰܘ̈ܗܝ ܕܝܽܘܫܺܝܳܐ. ܘܛܰܝܒ̈ܘܳܬܶܗ ܐܰܝܟ ܕܰܟܬܺܝܒ ܒܢܳܡܽܘܣܶܗ ܕܡܳܪܝܳܐ.
27 ܘܦܶܬܓܳܡܰܘ̈ܗܝ ܩܰܕܡܳܝ̈ܶܐ ܘܰܐ̱ܚܖ̈ܳܝܶܐ. ܗܳܐ ܗܶܢܽܘܢ ܟܬܺܝܒܺܝܢ ܒܰܣܦܰܪ ܡܰܠ̈ܟܶܐ ܕܺܝܣܪܳܐܶܝܠ ܘܕܺܝܗܽܘܕܳܐ.