2 Chronicles 9
The second Book of Chronicles
܀ ܒ ܕܘܒܪ ܝܘܡ̈ܬܐ ܛ ܀
1 ܘܡܰܠܟܰܬ ܫܒܳܐ ܫܶܡܥܰܬ ܛܶܒܶܗ ܕܰܫܠܶܝܡܽܘܢ. ܘܶܐܬܳܬ ܠܰܡܢܰܣܳܝܽܘܬܶܗ ܕܰܫܠܶܝܡܽܘܢ ܒܽܐܘܚ̈ܕܳܬܳܐ. ܘܶܐܬܳܬ ܠܽܐܘܪܺܫܠܶܡ. ܒܚܰܝܠܳܐ ܕܣܰܓܺܝ ܛܳܒ. ܘܓܰܡ̈ܠܶܐ ܕܰܛܥܺܝܢܺܝܢ ܒܶܣ̈ܡܶܐ. ܘܕܰܗܒܳܐ ܕܣܰܓܺܝ ܛܳܒ. ܘܛܰܒ̈ܥܶܐ ܛܳܒ̈ܶܐ. ܘܶܐܬܳܬ ܠܘܳܬ ܡܰܠܟܳܐ ܫܠܶܝܡܽܘܢ. ܘܰܓܠܳܬ ܠܶܗ ܟܽܠ ܕܰܒܠܶܒܳܗ̇.
2 ܘܰܓܠܳܐ ܠܳܗ̇ ܡܰܠܟܳܐ ܫܠܶܝܡܽܘܢ ܟܽܠܡܶܕܶܡ. ܘܐ̱ܪܳܙ ܠܶܒܳܗ̇. ܘܠܳܐ ܡܶܕܶܡ ܟܣܳܐ ܡܰܠܟܳܐ ܕܠܳܐ ܓܠܳܐ ܠܳܗ̇.
3 ܘܰܚܙܳܬ ܡܰܠܟܰܬ ܫܒܳܐ ܚܶܟܡܬܶܗ ܕܰܫܠܶܝܡܽܘܢ. ܘܒܰܝܬܳܐ ܕܰܒܢܳܐ.
4 ܘܡܰܘܟܶܠ ܦܳܬܽܘܪܶܗ. ܘܡܰܘܬܰܒ ܥܰܒܕܰܘ̈ܗܝ. ܘܰܩܝܳܡ ܡܫܰܡܫܳܢܰܘ̈ܗܝ. ܘܰܠܒܽܘ̈ܫܰܝܗܽܘܢ. ܘܫܳܩܰܘ̈ܳܬܶܗ ܘܰܠܒܽܘܫܰܝ̈ܗܽܘܢ. ܘܕܶܒܚ̈ܶܐ ܕܰܡܕܰܒܰܚ ܗܘܳܐ ܒܒܰܝܬܶܗ ܕܡܳܪܝܳܐ. ܘܠܳܐ ܗܘܳܬ ܒܳܗ̇ ܪܽܘܚܳܐ ܬܽܘܒ ܠܡܶܚܙܳܐ.
5 ܘܳܐܡܪܳܐ ܠܡܰܠܟܳܐ ܫܠܶܝܡܽܘܢ. ܫܰܪܺܝܪܳܐ ܗܘܳܬ ܡܶܠܬܳܐ ܕܫܳܡܥܳܐ ܗܘܺܝܬ ܒܰܡܕܺܝܢܬܝ. ܥܰܠ ܦܶܬܓܳܡܰܝ̈ܟ. ܘܥܰܠ ܚܶܟܡܬܳܟ.
6 ܘܠܳܐ ܡܗܰܝܡܢܳܐ ܗܘܺܝܬ. ܥܕܰܡܳܐ ܠܰܐܝܟܳܐ ܕܶܐܬܺܝܬ ܘܰܚܙܰܝ̈ ܥܰܝܢܰܝ̈ ܘܗܳܐ ܠܳܐ ܚܰܘܝܽܘܢܝ ܦܶܠܓܳܐ. ܐܰܣܓܺܝܬ ܚܶܟܡܬܳܟ. ܘܰܐܘܣܶܦܬ ܥܰܠ ܛܶܒܳܐ ܕܫܶܡܥܶܬ.
7 ܛܽܘܒܰܝܗܽܘܢ ܠܥܰܒܕܰܝ̈ܟ ܗܳܢܽܘܢ ܕܩܳܝܡܺܝܢ ܩܕܳܡܰܝܟ ܐܰܡܺܝܢܳܐܺܝܬ. ܘܫܳܡܥܺܝܢ ܚܶܟܡܬܳܟ.
8 ܘܢܶܗܘܶܐ ܡܳܪܝܳܐ ܐܰܠܳܗܳܟ ܒܪܺܝܟ ܗܰܘ ܡܰܢ ܕܰܓܒܳܟ. ܘܰܐܘܬܒܳܟ ܥܰܠ ܟܽܘܪܣܝܳܐ ܕܡܰܠܟܽܘܬܳܐ ܕܺܝܣܪܳܐܶܝܠ. ܘܡܶܛܽܠ ܕܰܪܚܶܡ ܡܳܪܝܳܐ ܠܺܝܣܪܳܐܶܝܠ. ܐܰܩܺܝܡܳܟ ܡܰܠܟܳܐ ܥܠܰܝܗܽܘܢ ܠܥܳܠܰܡ. ܠܡܶܥܒܰܕ ܕܺܝܢܳܐ ܘܙܰܕܺܝܩܽܘܬܳܐ.
9 ܘܝܶܗܒܰܬ ܠܡܰܠܟܳܐ ܡܳܐܐ ܘܥܶܣܪܺܝܢ ܟܰܟܖ̈ܶܐ ܕܕܰܗܒܳܐ. ܘܒܶܣ̈ܡܶܐ ܣܰܓܺܝ̈ܐܶܐ ܕܛܳܒ. ܘܛܰܒ̈ܥܶܐ ܛܳܒ̈ܶܐ. ܘܠܳܐ ܐܶܬܚܙܺܝܘ ܐܰܝܟ ܒܶܣ̈ܡܶܐ ܗܳܠܶܝܢ ܒܥܳܠܡܳܐ. ܕܝܶܗܒܰܬ ܡܰܠܟܰܬ ܫܒܳܐ ܠܡܰܠܟܳܐ ܫܠܶܝܡܽܘܢ.
10 ܘܳܐܦ ܥܰܒܕܰܘ̈ܗܝ ܕܚܺܝܪܳܡ. ܘܥܰܒܕܰܘ̈ܗܝ ܕܡܰܠܟܳܐ ܫܠܶܝܡܽܘܢ. ܐܰܝܬܺܝܘ ܕܰܗܒܳܐ ܡܶܢ ܐܰܘܦܺܝܪ.
11 ܘܰܐܝܬܺܝܘ ܩܰܝ̈ܣܶܐ ܕܶܐܫܟܳܪܥܳܐ. ܠܣܶܦܣ̈ܺܠܶܐ ܠܒܰܝܬܶܗ ܕܡܳܪܝܳܐ. ܘܰܠܒܰܝܬܶܗ ܕܡܰܠܟܳܐ ܫܠܶܝܡܽܘܢ. ܘܟܶܢܳܖ̈ܶܐ ܠܰܡܫܰܒ̈ܚܳܢܶܐ ܘܠܳܐ ܐܶܬܚܙܺܝܘ ܐܰܟܘܳܬܗܽܘܢ ܒܰܐܪܥܳܐ ܕܺܝܗܽܘܕܳܐ.
12 ܘܡܰܠܟܳܐ ܫܠܶܝܡܽܘܢ ܝܰܗܒ ܠܡܰܠܟܰܬ ܫܒܳܐ. ܟܽܠܡܶܕܶܡ ܕܰܫܐܶܠܬܶܗ. ܠܒܰܪ ܡܶܢ ܕܝܰܗܒ ܠܳܗ̇. ܘܰܓܠܳܐ ܠܳܗ̇ ܟܽܠ ܡܶܕܶܡ ܕܺܐܝܬ ܗܘܳܐ ܒܠܶܒܳܗ̇. ܘܩܳܡܰܬ ܐܶܙܰܠ̱ܬ ܠܰܡܕܺܝܢ̱ܬܳܗ̇ ܗܺܝ ܘܥܰܒܕܶܝ̈ܗ̇.
13 ܘܰܗܘܳܐ ܡܶܢܝܳܢܳܐ ܕܕܰܗܒܳܐ ܕܥܳܐܶܠ ܗܘܳܐ ܠܰܫܠܶܝܡܽܘܢ ܒܫܰܢ̱ܬܳܐ. ܫܶܬܡܳܐܐ ܘܶܫܬܺܝܢ ܘܫܶܬ ܟܰܟܖ̈ܺܝܢ ܕܕܰܗܒܳܐ.
14 ܠܒܰܪ ܡܶܢ ܡܰܟ̈ܣܶܐ ܕܰܡܕܺܝ̈ܢܳܬܳܐ. ܘܡܰܘ̈ܒܠܶܐ ܕܬܰܓܳܖ̈ܶܐ ܘܟܽܠ ܡܰܠ̈ܟܶܐ ܕܥܰܖ̈ܒܳܝܶܐ. ܘܫܰܠܺܝܛܳܢ̈ܶܐ ܕܰܐܪܥܳܐ. ܡܰܝܬܶܝܢ ܗܘܰܘ ܟܶܣܦܳܐ ܘܕܰܗܒܳܐ ܠܰܫܠܶܝܡܽܘܢ.
15 ܘܰܥܒܰܕ ܡܰܠܟܳܐ ܫܠܶܝܡܽܘܢ ܡܰܐܬܶܝܢ ܣܰܟܖ̈ܺܝܢ ܕܕܰܗܒܳܐ ܛܳܒܳܐ. ܘܫܶܬܡܳܐܐ ܕܖ̈ܺܝܟܽܘܢܶܐ ܕܕܰܗܒܳܐ ܛܳܒܳܐ. ܩܪܰܡ ܠܣܰܟܪܳܐ ܚܕܳܐ.
16 ܘܰܬܠܳܬܡܳܐܐ ܡܓܶܢܺܝ̈ܢ ܕܕܰܗܒܳܐ ܛܳܒܳܐ. ܘܰܬܠܳܬܳܐ ܡܢܺܝܢ ܕܕܰܗܒܳܐ. ܥܒܺܝܕ ܒܶܝܬ ܡܰܘܚܰܕ ܐܺܝܕܳܐ ܕܰܡܓܶܢܳܐ ܚܕܳܐ. ܘܝܰܗܒ ܐܶܢܶܝܢ ܡܰܠܟܳܐ ܒܶܝܬ ܥܳܒܳܐ ܕܠܶܒܢܳܢ.
17 ܘܰܥܒܰܕ ܡܰܠܟܳܐ ܟܽܘܪܣܝܳܐ ܕܫܶܢܳܐ ܪܰܒܳܐ. ܘܩܰܪܡܶܗ ܕܰܗܒܳܐ ܕܰܟܝܳܐ.
18 ܫܬܳܐ ܕܰܖ̈ܓܺܝܢ ܠܟܽܘܪܣܝܳܐ. ܘܣܶܦܬܶܗ ܕܟܽܘܪܣܝܳܐ ܟܪܺܝܟܳܐ ܡܶܢ ܒܶܣܬܪܶܗ. ܘܺܐܝ̈ܕܰܗܳܬܳܐ ܡܶܟܳܐ ܘܡܶܟܳܐ ܥܰܠ ܐܰܬܪܳܐ ܕܡܰܘܬܒܳܐ. ܘܰܬܪܶܝܢ ܐܰܖ̈ܝܰܘܳܬܳܐ ܩܳܝܡܺܝܢ ܒܶܣܬܰܪ ܐܺܝ̈ܕܰܗܳܬܳܐ.
19 ܘܰܬܪܶܥܣܰܪ ܐܰܖ̈ܝܰܘܳܬܳܐ ܩܳܝܡܺܝܢ ܬܰܡܳܢ. ܥܰܠ ܫܬܳܐ ܕܰܖ̈ܓܺܝܢ. ܡܶܟܳܐ ܘܡܶܟܳܐ. ܘܠܳܐ ܐܶܬܥܒܶܕ ܗܳܟܰܢܳܐ ܒܟܽܠܗܶܝܢ ܡܰܠܟ̈ܘܳܬܳܐ.
20 ܘܟܽܠܗܽܘܢ ܡܳܐܢ̈ܶܐ ܕܬܶܫܡܶܫܬܶܗ ܕܡܰܠܟܳܐ ܫܠܶܝܡܽܘܢ ܕܕܰܗܒܳܐ. ܘܟܽܠ ܡܳܐܢ̈ܶܐ ܕܒܶܝܬ ܓܰܙܶܗ ܕܡܰܠܟܳܐ ܕܕܰܗܒܳܐ ܣܢܺܝܢܳܐ. ܘܟܶܣܦܳܐ ܠܳܐ ܚܫܺܝܒ ܗܘܳܐ ܒܝܰܘ̈ܡܳܬܶܗ ܕܰܫܠܶܝܡܽܘܢ ܐܰܝܟ ܡܶܕܶܡ.
21 ܡܶܛܽܠ ܕܰܣܦܺܝܢ̈ܶܐ ܓܶܝܪ ܐܺܝܬ ܗܘܰܝ̈ ܠܰܫܠܶܝܡܽܘܢ ܡܰܠܟܳܐ. ܕܳܐܙܳܠ̱̈ܢ ܗܘܰܝ̈ ܠܬܰܪܫܺܝܫ ܥܰܡ ܥܰܒܕܰܘ̈ܗܝ ܕܚܺܝܪܳܡ ܚܕܳܐ ܠܰܬܠܳܬ ܫܢܺܝ̈ܢ ܐܳܬܝ̈ܳܢ ܗܘܰܝ̈. ܘܰܣܦܺܝܢ̈ܶܐ ܕܳܐܙܳܠ̈ܢ ܗܘܰܝ̈ ܠܬܰܪܫܺܝܫ. ܛܥܺܝܢܳܢ ܟܶܣܦܳܐ. ܘܕܰܗܒܳܐ. ܘܦܺܝ̈ܠܶܐ. ܘܩܽܘ̈ܦܶܐ. ܘܛܽܘ̈ܣܶܐ.
22 ܘܺܝܪܶܒ ܡܰܠܟܳܐ ܫܠܶܝܡܽܘܢ. ܡܶܢ ܟܽܠܗܽܘܢ ܡܰܠ̈ܟܶܐ ܕܰܐܪܥܳܐ ܒܥܽܘܬܪܳܐ ܘܰܒܚܶܟܡܬܳܐ.
23 ܘܟܽܠܗܽܘܢ ܡܰܠ̈ܟܶܐ ܕܰܐܪܥܳܐ ܒܳܥܶܝܢ ܠܡܶܚܙܳܐ ܐܰܦܰܘ̈ܗܝ ܕܰܫܠܶܝܡܽܘܢ. ܘܰܠܡܶܫܡܰܥ ܚܶܟܡܬܳܐ ܕܝܰܗܒ ܡܳܪܝܳܐ ܒܠܶܒܶܗ.
24 ܘܗܶܢܽܘܢ ܡܰܝܬܶܝܢ ܗܘܰܘ ܠܶܗ ܓܒܰܪ ܩܽܘܪܒܳܢܶܗ. ܡܳܐܢܰܝ̈ ܣܺܐܡܳܐ ܘܕܰܗܒܳܐ. ܘܢܰܚ̈ܬܶܐ. ܘܡܽܘܪܳܐ. ܘܒܶܣ̈ܡܶܐ. ܘܖ̈ܰܟܫܳܐ. ܘܟܽܘܕܢܰܘ̈ܳܬܳܐ. ܒܚܽܘܫܒܳܢܳܐ ܕܟܽܠ ܫܢܳܐ ܒܰܫܢܳܐ.
25 (ܠܝܬ)
26 ܘܰܗܘܳܐ ܫܠܶܝܡܽܘܢ ܫܰܠܺܝܛܳܐ ܒܟܽܠܗܶܝܢ ܡܰܠܟ̈ܘܳܬܳܐ. ܡܶܢ ܢܰܗܪܳܐ ܦܪܳܬ ܘܰܥܕܰܡܳܐ ܠܰܐܪܥܳܐ ܕܰܦܠܶܫܬܳܝ̈ܶܐ. ܘܰܥܕܰܡܳܐ ܠܰܬܚܽܘܡܳܐ ܕܡܶܨܖ̈ܳܝܶܐ.
27 ܘܝܰܗܒ ܡܰܠܟܳܐ ܫܠܶܝܡܽܘܢ ܒܽܐܘܪܺܫܠܶܡ ܟܶܣܦܳܐ ܐܰܝܟ ܟܺܐܦ̈ܶܐ. ܘܰܐܖ̈ܙܶܐ ܝܰܗܒ ܐܰܝܟ ܚܳܠܳܐ ܕܺܐܝܬ ܥܰܠ ܣܶܦܰܬ ܝܰܡܳܐ ܣܽܘܓܳܐܐ.
28 ܘܙܳܒܢܺܝܢ ܗܘܰܘ ܖ̈ܰܟܫܳܐ ܠܰܫܠܶܝܡܽܘܢ. ܡܶܢ ܡܶܨܪܶܝܢ ܘܡܶܢ ܟܽܠܗܶܝܢ ܡܕܺܝ̈ܢܳܬܳܐ.
29 (ܠܝܬ)
30 ܘܰܐܡܠܶܟ ܫܠܶܝܡܽܘܢ ܥܰܠ ܐܽܘܪܺܫܠܶܡ ܘܥܰܠ ܝܺܣܪܳܐܶܝܠ ܐܰܪܒܥܺܝܢ ܫܢܺܝ̈ܢ.
31 ܘܰܫܟܶܒ ܫܠܶܝܡܽܘܢ ܥܰܡ ܐܰܒܳܗ̈ܳܬܶܗ. ܘܩܰܒܪܽܘܗܝ ܒܰܩܪܺܝܬܳܐ ܕܕܰܘܺܝܕ ܐܰܒܽܘܗܝ ܘܰܐܡܠܶܟ ܪܚܰܒܥܰܡ ܒܪܶܗ ܒܳܬܪܶܗ.