2 Chronicles 7
The second Book of Chronicles
܀ ܒ ܕܘܒܪ ܝܘܡ̈ܬܐ ܙ ܀
1 ܘܟܰܕ ܓܡܰܪ ܫܠܶܝܡܽܘܢ ܠܰܡܨܰܠܳܝܽܘ. ܢܽܘܪܳܐ ܢܶܚܬܰܬ ܡܶܢ ܫܡܰܝܳܐ. ܘܶܐܟܠܰܬ ܥܠܰܘ̈ܳܬܳܐ ܘܕܶܒܚ̈ܶܐ. ܘܺܐܝܩܳܪܳܐ ܕܰܫܟܺܝܢܬܶܗ ܕܡܳܪܝܳܐ ܐܶܬܡܠܺܝ ܒܰܝܬܳܐ.
2 ܘܠܳܐ ܡܶܫܟܚܺܝܢ ܗܘܰܘ ܟܳܗ̈ܢܶܐ ܠܡܶܥܰܠ ܠܒܰܝܬܶܗ ܕܡܳܪܝܳܐ. ܡܶܛܽܠ ܕܶܐܬܡܠܺܝ ܠܶܗ ܒܰܝܬܳܐ ܐܺܝܩܳܪ ܫܟܺܝܢܬܶܗ ܕܡܳܪܝܳܐ.
3 ܘܟܽܠ ܒܢܰܝ̈ ܝܺܣܪܳܐܶܝܠ ܚܳܙܶܝܢ ܗܘܰܘ. ܟܰܕ ܢܶܚܬܰܬ ܢܽܘܪܳܐ. ܘܺܐܝܩܳܪ ܫܟܺܝܢܬܶܗ ܕܡܳܪܝܳܐ ܐܶܬܡܠܺܝ ܒܰܝܬܳܐ. ܘܰܢܦܰܠܘ ܥܰܠ ܐܰܦܰܝ̈ܗܽܘܢ ܥܰܠ ܐܰܪܥܳܐ ܥܰܠ ܖ̈ܨܺܝܦܳܬܳܐ. ܘܰܣܓܶܕܘ ܘܳܐܡܪܺܝܢ ܓܒܰܪ ܠܚܰܒܪܶܗ. ܐܰܘܕܰܘ ܠܡܳܪܝܳܐ ܕܛܳܒ ܗ̱ܘ ܘܰܠܥܳܠܰܡ ܛܰܝܒܽܘܬܶܗ.
4 ܘܡܰܠܟܳܐ ܘܟܽܠܶܗ ܥܰܡܳܐ ܡܕܰܒܚܺܝܢ ܕܶܒܚ̈ܶܐ ܠܡܳܪܝܳܐ.
5 ܘܕܰܒܰܚ ܡܰܠܟܳܐ ܫܠܶܝܡܽܘܢ ܕܶܒ̈ܚܳܬܳܐ. ܬܰܘܖ̈ܶܐ ܥܶܣܪܺܝܢ ܘܰܬܪܶܝܢ ܐܰܠܦܺܝ̈ܢ. ܘܥܳܢ̈ܳܐ ܡܳܐܐ ܘܥܶܣܪܺܝܢ ܐܰܠܦܺܝ̈ܢ. ܘܚܰܕܶܬ ܒܰܝܬܶܗ ܕܡܳܪܝܳܐ ܡܰܠܟܳܐ ܫܠܶܝܡܽܘܢ. ܘܟܽܠܶܗ ܥܰܡܳܐ.
6 ܘܟܳܗ̈ܢܶܐ ܩܳܝܡܺܝܢ ܗܘܰܘ ܥܰܠ ܬܶܫܡ̈ܫܳܬܗܽܘܢ ܘܠܶܘ̈ܳܝܶܐ ܒܡܳܐܢ̈ܶܐ ܕܬܶܫܒ̈ܚܳܬܳܐ ܡܫܰܒܚܺܝܢ ܗܘܰܘ ܩܕܳܡ ܡܳܪܝܳܐ. ܘܗܳܟܰܢܳܐ ܐܳܡܪܺܝܢ ܗܘܰܘ ܒܬܶܫ̈ܒܚ̈ܳܬܗܽܘܢ. ܐܰܘܕܰܘ ܠܡܳܪܝܳܐ ܕܛܳܒܽ ܗ̱ܘ ܘܰܠܥܳܠܰܡ ܛܰܝܒܽܘܬܶܗ. ܒܬܶܫܒ̈ܚܳܬܳܐ ܕܕܰܘܺܝܕ. ܘܟܳܗ̈ܢܶܐ ܡܫܰܒܚܺܝܢ ܗܘܰܘ ܒܩܰܖ̈ܢܳܬܳܐ ܟܦܺܝ̈ܦܳܬܳܐ ܘܰܦܫܺܝ̈ܛܳܬܳܐ. ܘܟܽܠܶܗ ܥܰܡܳܐ ܕܺܝܣܪܳܐܶܝܠ ܩܳܐܶܡ.
7 ܘܩܰܕܶܫ ܫܠܶܝܡܽܘܢ ܓܰܘܳܗ̇ ܕܕܳܪܬܳܐ ܕܰܩܕܳܡ ܒܰܝܬܶܗ ܕܡܳܪܝܳܐ. ܡܶܛܽܠ ܕܰܐܣܶܩ ܠܬܰܡܳܢ ܕܶܒܚ̈ܶܐ. ܘܬܰܪܒܳܐ ܕܫܰܠ̈ܡܶܐ ܡܶܛܽܠ ܕܡܰܕܒܚܳܐ ܕܰܢܚܳܫܳܐ ܕܰܥܒܰܕ ܫܠܶܝܡܽܘܢ. ܙܥܽܘܪ ܗܘܳܐ. ܘܠܳܐ ܡܶܫܟܰܚ ܗܘܳܐ ܠܰܡܣܰܝܒܳܪܽܘ ܕܶܒܚ̈ܶܐ. ܘܢܰܫܺܝܦܳܐ. ܘܬܰܪܒܳܐ ܕܫܰܠ̈ܡܶܐ.
8 ܘܰܥܒܰܕ ܫܠܶܝܡܽܘܢ ܒܶܗ ܒܙܰܒܢܳܐ ܗܰܘ. ܥܺܐܕܳܐ ܫܰܒܥܳܐ ܝܰܘܡܺܝ̈ܢ. ܘܟܽܠܶܗ ܝܺܣܪܳܐܶܝܠ ܥܰܡܶܗ. ܟܢܽܘ̈ܫܳܬܳܐ ܪܰܘܖ̈ܒܳܬܳܐ. ܡܶܢ ܐܰܢܛܺܝܽܘܟܺܝ ܘܰܥܕܰܡܳܐ ܠܢܰܚܠܳܐ ܕܡܶܨܪܶܝܢ. ܩܕܳܡ ܡܳܪܝܳܐ ܐܰܠܳܗܰܢ.
9 ܫܰܒܥܳܐ ܝܰܘܡܺܝ̈ܢ ܕܥܺܐܕܳܐ. ܘܫܰܒܥܳܐ ܝܰܘܡܺܝ̈ܢ ܕܚܽܘܕܳܬܶܗ ܕܒܰܝܬܳܐ. ܗܳܠܶܝܢ ܘܗܳܠܶܝܢ ܗܘܳܐ ܚܽܘܫܒܳܢܗܽܘܢ ܐܰܪܒܰܥܬܰܥܣܰܪ ܝܰܘܡܺܝ̈ܢ.
10 ܘܰܒܝܰܘܡܳܐ ܕܟܶܣܳܐܐ ܒܶܗ ܒܝܰܪܚܳܐ ܕܬܶܫܪܺܝ. ܫܰܕܰܪ ܡܰܠܟܳܐ ܠܥܰܡܳܐ. ܘܒܰܪܟܶܗ ܠܡܰܠܟܳܐ ܥܰܡܳܐ. ܘܶܐܙܰܠܘ ܠܩܽܘܖ̈ܺܝܗܽܘܢ. ܟܰܕ ܚܳܕܶܝܢ ܘܛܳܒ ܠܶܒܗܽܘܢ. ܘܡܰܘܕܶܝܢ ܘܰܡܫܰܒܚܺܝܢ ܥܰܠ ܟܽܠܗܶܝܢ ܛܳܒ̈ܳܬܳܐ ܕܰܥܒܰܕ ܡܳܪܝܳܐ ܠܕܰܘܺܝܕ ܥܰܒܕܶܗ. ܘܠܰܫܠܶܝܡܽܘܢ ܒܪܶܗ. ܘܠܺܝܣܪܳܐܶܝܠ ܥܰܡܶܗ.
11 ܘܰܗܘܳܐ ܕܟܰܕ ܫܰܠܶܡ ܡܰܠܟܳܐ ܫܠܶܝܡܽܘܢ ܠܡܶܒܢܳܐ ܒܰܝܬܶܗ ܕܡܳܪܝܳܐ. ܘܰܠܒܰܝܬܳܐ ܕܡܰܠܟܳܐ. ܘܟܽܠܡܶܕܶܡ ܕܡܶܬܪܰܥܶܐ ܗܘܳܐ ܫܠܶܝܡܽܘܢ ܠܡܶܥܒܰܕ ܒܒܰܝܬܶܗ ܕܡܳܪܝܳܐ. ܘܰܒܒܰܝܬܶܗ ܕܡܰܠܟܳܐ. ܡܰܟܫܰܪ ܗܘܳܐ.
12 ܘܶܐܬܓܠܺܝ ܡܳܪܝܳܐ ܥܰܠ ܫܠܶܝܡܽܘܢ ܒܠܺܠܝܳܐ ܗܰܘ. ܘܶܐܡܰܪ ܠܶܗ. ܫܶܡܥܶܬ ܨܠܽܘܬܳܟ ܘܰܓܒܺܝܬ ܕܽܘܟܬܳܐ ܗܳܕܶܐ ܠܺܝ. ܠܒܰܝܬܳܐ ܕܕܶܒܚ̈ܳܬܳܐ.
13 ܐܶܢ ܐܶܨܒܶܐ ܐܶܟܠܶܐ ܫܡܰܝܳܐ. ܘܠܳܐ ܢܶܚܽܘܬ ܡܶܛܪܳܐ. ܘܶܐܢ ܐܶܨܒܶܐ ܐܶܦܩܽܘܕ ܥܰܠ ܩܰܡܨܳܐ. ܘܢܶܐܟܠܺܝܗ̇ ܠܰܐܪܥܳܐ. ܘܶܐܢ ܐܶܨܒܶܐ ܐܶܓܰܪܶܐ ܡܰܘܬܳܢܳܐ ܒܥܰܡܝ.
14 ܘܢܶܬܕܰܟܪܽܘܢ ܥܰܡܝ ܕܶܐܬܩܪܺܝ ܫܶܡܝ ܥܠܰܝܗܽܘܢ. ܢܨܰܠܽܘܢ ܘܢܶܒܥܽܘܢ ܡܶܢ ܩܕܳܡܰܝ. ܘܢܶܗܦܟܽܘܢ ܡܶܢ ܐܽܘܖ̈ܚܳܬܗܽܘܢ ܒܺܝ̈ܫܳܬܳܐ. ܘܶܐܢܳܐ ܐܶܫܡܰܥ ܡܶܢ ܫܡܰܝܳܐ. ܘܶܐܫܒܽܘܩ ܠܰܚܛܳܗܰܝ̈ܗܽܘܢ. ܘܰܐܣܶܐ ܐܰܪܥܗܽܘܢ.
15 ܘܳܐܦ ܗܳܫܳܐ ܥܰܝܢܰܝ̈ ܢܶܗܘ̈ܝܳܢ ܦܬܺܝ̈ܚܳܢ. ܘܶܐܕܢܰܝ̈ ܨܳܝ̈ܬܳܢ ܠܰܨܠܽܘܬܳܐ ܕܕܽܘܟܬܳܐ ܗܳܕܶܐ.
16 ܘܳܐܦ ܗܳܫܳܐ ܓܒܶܝܬ ܠܺܝ ܒܰܝܬܳܐ ܗܳܢܳܐ. ܕܬܶܗܘܶܐ ܒܶܗ ܫܟܺܝܢܬܝ ܠܥܳܠܰܡ ܘܢܶܗܘܽܘܢ ܥܒܳܕܰܝ̈ ܫܰܦܺܝܖ̈ܶܐ ܘܨܶܒܝܳܢܰܝ̈ ܡܶܬܥܰܒܕܺܝܢ ܒܓܰܘܶܗ ܟܽܠܗܽܘܢ ܝܰܘ̈ܡܳܬܳܐ.
17 ܘܰܐܢ̱ܬ ܐܶܢ ܬܗܰܠܶܟ ܩܕܳܡܰܝ. ܐܰܝܟܰܢܳܐ ܕܗܰܠܶܟ ܕܰܘܺܝܕ ܐܰܒܽܘܟ. ܒܬܰܡܺܝܡܽܘܬܳܐ ܕܠܶܒܳܐ ܘܒܰܬܪܺܝܨܽܘܬܳܐ. ܠܡܶܥܒܰܕ ܟܽܠ ܡܶܕܶܡ ܕܦܰܩܶܕܬܳܟ. ܘܦܽܘܩܕܳܢܰܝ̈ ܘܢܳܡܽܘܣܰܝ̈ ܬܶܛܰܪ.
18 ܐܶܫܰܪܪܺܝܘܗܝ ܠܟܽܘܪܣܝܳܐ ܕܡܰܠܟܽܘܬܳܟ ܠܥܳܠܰܡ. ܐܰܝܟ ܕܝܺܡܺܝܬ ܠܕܰܘܺܝܕ ܐܰܒܽܘܟ. ܘܶܐܡܪܶܬ ܠܶܗ. ܕܠܳܐ ܢܶܥܢܰܕ ܠܳܟ ܒܪܳܐ ܡܶܢ ܩܕܳܡܰܝ. ܕܩܳܐܶܡ ܥܰܠ ܟܽܘܪܣܝܳܐ ܕܺܝܣܪܳܐܶܝܠ.
19 ܘܶܐܢ ܡܶܗܦܰܟ ܬܶܗܦܟܽܘܢ ܐܰܢ̱ܬܽܘܢ ܘܰܒܢܰܝ̈ܟܽܘܢ ܡܶܢ ܐܽܘܖ̈ܚܳܬܝ. ܘܠܳܐ ܬܶܛܪܽܘܢ ܦܽܘܩܕܳܢܰܝ̈ ܘܢܳܡܽܘܣܰܝ̈ ܕܝܶܗܒܶܬ ܩܕܳܡܰܝܟܽܘܢ. ܘܬܶܦܠܚܽܘܢ ܠܰܦܬܰܟܖ̈ܶܐ ܕܥܰܡ̈ܡܶܐ. ܘܬܶܣܓܕܽܘܢ ܠܗܽܘܢ.
20 ܐܶܒܰܕܰܪܟܽܘܢ ܡܶܢ ܐܰܪܥܳܐ ܗܳܕܶܐ ܕܝܶܗܒܶܬ ܠܟܽܘܢ. ܘܒܰܝܬܳܐ ܗܳܢܳܐ ܕܩܰܕܫܶܬ ܠܫܶܡܝ. ܐܶܥܩܪܺܝܘܗܝ ܡܶܢ ܩܕܳܡܰܝ ܘܢܶܗܘܶܐ ܝܺܣܪܳܐܶܝܠ ܠܡܰܬܠܳܐ ܘܰܠܬܰܫܥܺܝܬܳܐ. ܒܶܝܬ ܟܽܠܗܽܘܢ ܥܰܡ̈ܡܶܐ.
21 ܘܒܰܝܬܳܐ ܗܳܢܳܐ ܢܶܗܘܶܐ ܚܪܶܒ. ܘܟܽܠ ܡܰܢ ܕܢܶܥܒܰܪ ܥܠܰܘܗܝ. ܢܩܽܘܡ ܘܰܢܢܺܝܕ ܪܺܝܫܶܗ. ܘܰܢܢܺܝܦ ܒܺܐܝܕܶܗ. ܘܢܺܐܡܪܽܘܢ. ܡܶܛܽܠ ܡܳܢܳܐ ܥܒܰܕ ܡܳܪܝܳܐ ܗܳܟܰܢܳܐ ܠܰܩܪܺܝܬܳܐ ܗܳܕܶܐ ܪܰܒܬܳܐ. ܘܰܠܒܰܝܬܳܐ ܗܳܢܳܐ.
22 ܘܢܺܐܡܪܽܘܢ. ܥܰܠ ܕܰܫܒܰܩܘ ܕܺܝܰܐܬܺܝܩܺܝ ܕܡܳܪܝܳܐ ܐܰܠܳܗܳܐ ܕܰܐܒܳܗ̈ܳܬܗܽܘܢ. ܕܰܐܦܶܩ ܐܶܢܽܘܢ ܡܶܢ ܐܰܪܥܳܐ ܕܡܶܨܪܶܝܢ ܘܶܐܙܰܠܘ ܕܚܶܠܘ ܠܰܐܠܳܗ̈ܶܐ ܕܥܰܡ̈ܡܶܐ. ܘܰܦܠܰܚܘ ܠܗܽܘܢ. ܘܰܣܓܶܕܘ ܠܗܽܘܢ. ܡܶܛܽܠ ܗܳܢܳܐ ܐܰܝܬܺܝ ܥܠܰܝܗܽܘܢ ܡܳܪܝܳܐ ܒܺܝ̈ܫܳܬܳܐ ܗܳܠܶܝܢ.