2 Chronicles 30
The second Book of Chronicles
܀ ܒ ܕܘܒܪ ܝܘܡ̈ܬܐ ܠ ܀
1 ܘܫܰܕܰܪ ܚܶܙܰܩܝܳܐ ܠܘܳܬ ܟܽܠܶܗ ܝܺܣܪܳܐܶܝܠ. ܘܰܕܒܶܝܬ ܝܺܗܽܘܕܳܐ. ܘܳܐܦ ܐܶܓܖ̈ܳܬܳܐ ܟܬܰܒ ܠܰܕܒܶܝܬ ܐܰܦܪܶܝܡ. ܘܠܰܕܒܶܝܬ ܡܢܰܫܶܐ. ܠܡܶܐܬܳܐ ܠܒܰܝܬܶܗ ܕܡܳܪܝܳܐ ܕܒܽܐܘܪܺܫܠܶܡ. ܠܡܶܥܒܰܕ ܥܺܐܕܳܐ ܠܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ.
2 ܘܶܐܬܡܰܠܰܟ ܡܰܠܟܳܐ ܘܪܰܘܖ̈ܒܳܢܰܘ̈ܗܝ. ܘܟܽܠܳܗ̇ ܟܢܽܘܫܬܳܐ ܕܒܽܐܘܪܺܫܠܶܡ. ܠܡܶܥܒܰܕ ܥܺܐܕܳܐ ܠܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ. ܒܝܰܪܚܳܐ ܬܶܢܝܳܢܳܐ.
3 ܡܶܛܽܠ ܕܠܳܐ ܡܶܫܟܚܺܝܢ ܗܘܰܘ ܠܡܶܥܒܕܶܗ ܒܶܗ ܒܙܰܒܢܳܐ ܗܰܘ. ܡܶܛܽܠ ܕܟܳܗ̈ܢܶܐ ܠܳܐ ܐܶܬܩܰܕܰܫܘ ܗܘܰܘ. ܘܡܰܠܦܳܢܰܘ̈ܗܝ ܕܥܰܡܳܐ ܠܳܐ ܐܶܬܩܦܶܣܘ ܠܽܐܘܪܺܫܠܶܡ.
4 ܘܰܫܦܰܪ ܦܶܬܓܳܡܳܐ ܒܥܰܝܢܰܘ̈ܗܝ ܕܡܰܠܟܳܐ. ܘܰܒܥܰܝܢܰܘ̈ܗܝ ܕܟܽܠܶܗ ܥܰܡܳܐ ܕܺܝܣܪܳܐܶܝܠ.
5 ܘܩܳܡܘ ܘܰܐܫܰܪܘ ܦܶܬܓܳܡܳܐ ܠܡܶܥܒܕܶܗ. ܘܰܐܥܒܰܪܘ ܩܳܠܳܐ ܒܟܽܠܶܗ ܝܺܣܪܳܐܶܝܠ. ܡܶܢ ܒܪܺܫܒܰܥ ܘܰܥܕܰܡܳܐ ܠܕܳܢ. ܠܡܶܐܬܳܐ ܘܰܠܡܶܥܒܰܕ ܥܺܐܕܳܐ ܠܡܳܪܝܳܐ. ܐܰܠܳܗܳܐ ܕܺܝܣܪܳܐܶܝܠ. ܒܽܐܘܪܺܫܠܶܡ ܡܶܛܽܠ ܕܰܣܓܺܝ ܗܘܳܐ ܠܶܗ ܥܽܘܬܪܗܽܘܢ ܛܳܒ.
6 ܘܶܐܙܰܠܘ ܛܶܒܰܠܳܖ̈ܶܐ ܒܶܐܓܖ̈ܳܬܳܐ ܕܡܰܠܟܳܐ ܘܰܕܪܰܘܖ̈ܒܳܢܰܘ̈ܗܝ. ܒܟܽܠܶܗ ܝܺܣܪܳܐܶܝܠ ܘܺܝܗܽܘܕܳܐ. ܘܰܒܦܽܘܩܕܳܢܳܐ ܕܡܰܠܟܳܐ ܘܳܐܡܪܺܝܢ. ܒܢܰܝ̈ ܝܺܣܪܳܐܶܝܠ. ܬܽܘܒܘ ܠܘܳܬ ܡܳܪܝܳܐ ܐܰܠܳܗܶܗ ܕܰܐܒܪܳܗܳܡ ܘܕܺܐܝܣܚܳܩ ܘܕܺܝܣܪܳܐܶܝܠ ܘܢܶܗܦܽܘܟ ܫܰܪܟܳܢܳܐ ܕܶܐܫܬܟܰܚ ܡܶܢܟܽܘܢ. ܡܶܢ ܐܺܝܕܰܘ̈ܗܝ ܕܡܰܠܟܳܐ ܕܳܐܬܽܘܪ.
7 ܠܳܐ ܬܶܗܘܢ ܐܰܝܟ ܐܰܒܳܗܰܝ̈ܟܽܘܢ. ܘܰܐܝܟ ܐܰܚܰܝ̈ܟܽܘܢ. ܕܟܰܕܶܒܘ ܒܡܳܪܝܳܐ ܐܰܠܳܗܳܐ ܕܰܐܒܳܗ̈ܳܬܰܢ. ܘܝܰܗܒ ܐܶܢܽܘܢ ܠܠܰܘܛܬܳܐ. ܐܰܝܟܰܢܳܐ ܕܰܐܢ̱ܬܽܘܢ ܚܳܙܶܝܢ.
8 ܘܳܐܦ ܗܳܫܳܐ ܠܳܐ ܬܩܰܫܽܘܢ ܩܕܳܠܟܽܘܢ ܐܰܝܟ ܐܰܒܳܗܰܝ̈ܟܽܘܢ ܘܥܽܘܠܘ ܠܡܰܩܕܫܳܐ ܕܶܐܬܩܰܕܰܫ ܠܥܳܠܰܡ. ܘܰܦܠܽܘܚܘ ܠܡܳܪܝܳܐ ܐܰܠܳܗܟܽܘܢ. ܕܢܰܗܦܶܟ ܡܶܢܟܽܘܢ ܚܶܡܬܳܐ ܕܪܽܘܓܙܶܗ.
9 ܡܶܛܽܠ ܕܶܐܬܓܠܺܝ ܥܠܰܝܟܽܘܢ. ܘܥܰܠ ܐܰܚܰܝ̈ܟܽܘܢ. ܘܥܰܠ ܒܢܰܝ̈ܟܽܘܢ ܘܗܽܘ ܢܶܬܶܠܟܽܘܢ ܠܖ̈ܰܚܡܶܐ ܩܕܳܡ ܫܳܒܰܝ̈ܟܽܘܢ. ܘܢܰܗܦܶܟܟܽܘܢ ܠܰܐܪܥܳܐ ܗܳܕܶܐ. ܡܶܛܽܠ ܕܚܰܢܳܢ ܗ̱ܘ̣ ܘܪܰܚܶܡܬܳܢ ܗܽܘ ܡܳܪܝܳܐ ܐܰܠܳܗܟܽܘܢ. ܘܠܳܐ ܢܰܗܦܶܟ ܐܰܦܰܘ̈ܗܝ ܡܶܢܟܽܘܢ. ܟܰܕ ܬܶܬܦܢܽܘܢ ܠܘܳܬܶܗ.
10 ܘܰܗܘܰܘ ܛܶܒܰܠܳܖ̈ܰܘܗܝ ܕܡܰܠܟܳܐ ܚܶܙܰܩܝܳܐ. ܥܳܒܪܺܝܢ ܗܘܰܘ ܡܶܢ ܩܪܶܐ ܠܰܩܪܶܐ. ܒܰܐܪܥܳܐ ܕܰܐܦܪܶܝܡ ܘܕܰܡܢܰܫܶܐ. ܘܰܥܕܰܡܳܐ ܠܰܙܒܳܠܳܘܢ.
11 ܘܰܗܘܰܘ ܓܳܚܟܺܝܢ ܥܠܰܝܗܽܘܢ. ܘܡܰܡܣܪܺܝܢ ܥܠܰܝܗܽܘܢ. ܓܰܒܖ̈ܶܐ ܖ̈ܰܫܺܝܥܶܐ. ܕܺܐܝܬ ܒܫܰܒܛܳܐ ܕܒܶܝܬ ܐܳܫܺܝܪ. ܘܰܒܫܰܒܛܳܐ ܕܒܶܝܬ ܐܰܦܪܶܝܡ. ܘܰܒܫܰܒܛܳܐ ܕܒܶܝܬ ܡܢܰܫܶܐ. ܘܰܒܫܰܒܛܳܐ ܕܒܶܝܬ ܙܒܳܠܳܘܢ.
12 ܘܫܰܪܟܳܐ ܕܫܰܒ̈ܛܶܐ ܗܳܠܶܝܢ. ܐܶܬܬܒܰܪܘ ܒܠܶܒܗܽܘܢ. ܘܶܐܬܰܘ ܠܽܐܘܪܺܫܠܶܡ. ܥܰܡ ܫܰܒܛܳܐ ܕܒܶܝܬ ܝܺܗܽܘܕܳܐ. ܘܰܗܘܳܬ ܐܺܝܕܶܗ ܕܡܳܪܝܳܐ ܥܠܰܝܗܽܘܢ. ܠܡܶܬܰܠ ܠܗܽܘܢ ܠܶܒܳܐ ܚܰܕ. ܠܡܶܥܒܰܕ ܦܽܘܩܕܳܢܳܐ ܕܡܰܠܟܳܐ ܘܰܕܪܰܘܖ̈ܒܳܢܰܘ̈ܗܝ. ܐܰܝܟ ܡܶܠܬܶܗ ܕܡܳܪܝܳܐ.
13 ܘܶܐܬܟܰܢܰܫܘ ܠܽܐܘܪܺܫܠܶܡ ܥܰܡܳܐ ܣܰܓܺܝܐܳܐ. ܠܡܶܥܒܰܕ ܥܺܐܕܳܐ ܕܦܰܛܺܝܖ̈ܶܐ. ܒܝܰܪܚܳܐ ܬܶܢܝܳܢܳܐ. ܥܰܡܳܐ ܣܰܓܺܝܐܳܐ ܕܛܳܒ.
14 ܘܩܳܡܘ ܘܰܥܩܰܪܘ ܡܰܕܒܚ̈ܶܐ ܕܺܐܝܬ ܒܽܐܘܪܺܫܠܶܡ. ܘܟܽܠܗܶܝܢ ܥܠܰܘ̈ܳܬܳܐ ܚܪܰܒܘ. ܘܰܫܕܰܘ ܐܶܢܶܝܢ ܒܢܰܚܠܳܐ ܕܩܶܕܪܽܘܢ.
15 ܘܰܥܒܰܕܘ ܦܶܨܚܳܐ ܒܰܐܪܒܰܥܶܣܖ̈ܶܐ. ܫܰܒܥܳܐ ܝܰܘܡܺܝ̈ܢ ܒܝܰܪܚܳܐ ܬܶܢܝܳܢܳܐ. ܘܟܳܗ̈ܢܶܐ ܘܠܶܘ̈ܳܝܶܐ ܐܶܬܩܰܕܰܫܘ ܘܰܐܝܬܺܝܘ ܥܠܰܘ̈ܳܬܳܐ ܠܒܰܝܬܶܗ ܕܡܳܪܝܳܐ.
16 ܘܩܳܡܘ ܥܰܠ ܐܰܬܪܗܽܘܢ. ܐܰܝܟܰܢܳܐ ܕܡܶܬܚܙܶܐ. ܐܰܝܟܰܢܳܐ ܕܰܟܬܺܝܒ ܒܢܳܡܽܘܣܳܐ ܕܡܽܘܫܶܐ ܢܒܺܝܳܐ ܕܡܳܪܝܳܐ. ܟܳܗ̈ܢܶܐ ܡܩܰܒܠܺܝܢ ܗܘܰܘ ܕܡܳܐ ܡܶܢ ܐܺܝܕܳܐ ܕܠܶܘ̈ܳܝܶܐ.
17 ܡܶܛܽܠ ܕܣܰܓܺܝܐܺܝܢ ܗܘܰܘ ܓܶܝܪ ܒܥܰܡܳܐ ܕܺܝܣܪܳܐܶܝܠ ܕܠܳܐ ܐܶܬܩܰܕܰܫܘ. ܘܠܶܘ̈ܳܝܶܐ ܩܳܡܘ ܠܗܽܘܢ ܥܰܠ ܢܶܟܣܬܳܐ ܕܶܐܡܖ̈ܶܐ. ܘܚܳܙܶܝܢ ܟܽܠ ܐܰܝܢܳܐ ܕܰܕܟܶܐ. ܠܡܶܬܩܰܕܳܫܽܘ ܠܡܳܪܝܳܐ.
18 ܡܶܛܽܠ ܕܣܰܓܺܝܐܺܝܢ ܗܘܰܘ ܒܥܰܡܳܐ ܕܺܝܣܪܳܐܶܝܠ ܡܶܢ ܕܒܶܝܬ ܐܰܦܪܶܝܡ. ܘܰܡܢܰܫܶܐ. ܘܺܐܝܣܳܟܳܪ. ܘܰܙܒܳܠܳܘܢ. ܗܳܠܶܝܢ ܐܰܪܒܥܳܐ ܫܰܒܛܺܝ̈ܢ ܕܠܳܐ ܐܶܬܕܰܟܺܝܘ ܡܶܛܽܠ ܕܰܐܟܠܽܘܗܝ ܦܶܨܚܳܐ ܕܠܳܐ ܒܢܳܡܽܘܣ. ܡܶܛܽܠ ܕܨܰܠܺܝ ܚܶܙܰܩܝܳܐ ܥܠܰܝܗܽܘܢ. ܘܶܐܡܰܪ ܠܗܽܘܢ. ܐܰܠܳܗܳܐ ܛܳܒܳܐ ܢܚܣܶܐ ܚܠܳܦ ܥܰܡܳܐ ܟܽܠܶܗ ܕܺܝܣܪܳܐܶܝܠ.
19 ܡܶܛܽܠ ܕܰܐܬܩܶܢܢ ܠܶܒܰܢ ܠܰܡܨܰܠܳܝܽܘ ܠܡܳܪܝܳܐ ܐܰܠܳܗܳܐ ܕܰܐܒܳܗ̈ܳܬܰܢ. ܩܽܘܕܫܳܐ ܠܳܐ ܗܘܳܐ ܕܟܶܐ ܡܶܢܰܢ.
20 ܘܰܫܡܰܥ ܡܳܪܝܳܐ ܒܩܳܠܶܗ ܕܚܶܙܰܩܝܳܐ. ܘܰܐܣܝܶܗ ܠܥܰܡܳܐ.
21 ܘܰܥܒܰܕܘ ܒܢܰܝ̈ ܝܺܣܪܳܐܶܝܠ. ܘܟܽܠ ܕܶܐܫܬܟܰܚܘ ܒܽܐܘܪܺܫܠܶܡ. ܥܺܐܕܳܐ ܕܦܰܛܺܝܖ̈ܶܐ ܫܰܒܥܳܐ ܝܰܘܡܺܝ̈ܢ ܒܚܰܕܽܘܬܳܐ ܪܰܒܬܳܐ ܡܫܰܒܚܺܝܢ ܗܘܰܘ ܠܡܳܪܝܳܐ. ܟܽܠ ܝܽܘܡ ܒܝܽܘܡ. ܠܶܘ̈ܳܝܶܐ ܒܬܶܫܒ̈ܚܳܬܳܐ ܕܦܽܘܡܗܽܘܢ. ܘܟܳܗ̈ܢܶܐ ܒܬܶܫܒ̈ܚܳܬܳܐ.
22 ܘܡܰܠܶܠ ܚܶܙܰܩܝܳܐ ܥܰܡ ܟܽܠܗܽܘܢ ܠܶܘ̈ܳܝܶܐ. ܕܰܡܫܰܒܚܺܝܢ ܗܘܰܘ ܒܬܶܫܒ̈ܚܳܬܳܐ ܛܳܒ̈ܳܬܳܐ ܩܕܳܡ ܡܳܪܝܳܐ. ܘܶܐܟܰܠܘ ܗܘܰܘ ܓܰܒܖ̈ܶܐ ܫܰܒܥܳܐ ܝܰܘܡܺܝ̈ܢ. ܘܰܡܕܰܒܚܺܝܢ ܗܘܰܘ ܕܶܒܚ̈ܶܐ ܫܰܠ̈ܡܶܐ ܠܡܳܪܝܳܐ. ܘܡܰܘܕܶܝܢ ܗܘܰܘ ܠܡܳܪܝܳܐ ܐܰܠܳܗܳܐ ܕܰܐܒܳܗ̈ܳܬܗܽܘܢ.
23 ܘܶܐܬܟܠܺܝ ܟܽܠܶܗ ܥܰܡܳܐ ܕܺܝܣܪܳܐܶܝܠ. ܠܡܶܥܒܰܕ ܫܰܒܥܳܐ ܝܰܘܡܺܝ̈ܢ ܐ̱ܚܖ̈ܳܢܺܝܢ. ܘܫܰܒܥܳܐ ܝܰܘܡܺܝ̈ܢ ܒܚܰܕܽܘܬܳܐ.
24 ܡܶܛܽܠ ܕܚܶܙܰܩܝܳܐ ܡܰܠܟܳܐ ܕܺܝܗܽܘܕܳܐ. ܐܰܦܪܶܫ ܘܝܰܗܒ ܠܥܰܡܳܐ. ܫܰܒܥܳܐ ܐܰܠܦܺܝ̈ܢ ܚܰܝ̈ܘܳܬܳܐ ܪܰܘܖ̈ܒܳܬܳܐ ܘܕܰܩܕ̈ܩܳܬܳܐ. ܘܰܦܪܰܫ ܘܝܰܗܒ ܠܥܰܡܳܐ ܕܺܝܣܪܳܐܶܝܠ. ܬܰܘܖ̈ܶܐ ܐܳܠܶܦ. ܘܥܳܢ̈ܳܐ ܥܶܣܪܳܐ ܐܰܠܦܺܝ̈ܢ ܘܶܐܬܩܰܕܰܫܘ ܟܳܗ̈ܢܶܐ ܣܰܓܺܝ̈ܐܶܐ.
25 ܘܰܚܕܺܝ ܟܽܠܶܗ ܥܰܡܳܐ ܕܺܝܗܽܘܕܳܐ. ܘܟܳܗ̈ܢܶܐ ܘܠܶܘ̈ܳܝܶܐ. ܘܟܽܠ ܥܰܡܳܐ ܕܳܐܬܶܝܢ ܡܶܢ ܥܰܡܳܐ ܕܺܝܣܪܳܐܶܝܠ. ܘܓܺܝܽܘܖ̈ܶܐ ܕܳܐܬܶܝܢ ܡܶܢ ܐܰܪܥܳܐ ܕܺܝܣܪܳܐܶܝܠ. ܘܰܕܝܳܬܒܺܝܢ ܒܺܝܗܽܘܕܳܐ.
26 ܘܰܗܘܳܬ ܚܰܕܽܘܬܳܐ ܪܰܒܬܳܐ ܒܽܐܘܪܺܫܠܶܡ. ܡܶܛܽܠ ܕܡܶܢ ܝܰܘܡܰܘ̈ܗܝ ܕܰܫܠܶܝܡܽܘܢ ܒܰܪ ܕܰܘܺܝܕ ܡܰܠܟܳܐ ܕܺܝܣܪܳܐܶܝܠ. ܠܳܐ ܗܘܳܬ ܐܰܝܟ ܗܳܕܶܐ ܒܽܐܘܪܺܫܠܶܡ.
27 ܘܩܳܡܘ ܟܳܗ̈ܢܶܐ ܘܠܶܘ̈ܳܝܶܐ. ܘܒܰܪܶܟܘ ܠܥܰܡܳܐ ܕܺܝܣܪܳܐܶܝܠ. ܘܰܫܡܰܥ ܡܳܪܝܳܐ ܒܩܳܠܗܽܘܢ ܘܥܶܠܰܬ ܨܠܽܘܬܗܽܘܢ ܠܡܰܘܬܒܳܐ ܕܩܽܘܕܫܶܗ ܠܰܫܡܰܝܳܐ.