2 Chronicles 8
The second Book of Chronicles
܀ ܒ ܕܘܒܪ ܝܘܡ̈ܬܐ ܚ ܀
1 ܘܰܗܘܳܐ ܠܣܽܘܦ ܥܶܣܪܺܝܢ ܫܢܺܝ̈ܢ ܕܰܒܢܳܐ ܫܠܶܝܡܽܘܢ ܠܒܰܝܬܶܗ ܕܡܳܪܝܳܐ. ܘܰܠܒܰܝܬܳܐ ܕܡܰܠܟܽܘܬܶܗ.
2 ܘܩܽܘܖ̈ܝܳܐ ܕܝܰܗܒ ܚܺܝܪܳܡ ܠܰܫܠܶܝܡܽܘܢ. ܒܢܳܐ ܐܶܢܶܝܢ ܫܠܶܝܡܽܘܢ. ܘܰܐܘܬܶܒ ܒܗܶܝܢ ܠܰܒܢܰܝ̈ ܝܺܣܪܳܐܶܝܠ.
3 ܘܶܐܙܰܠ ܫܠܶܝܡܽܘܢ ܠܰܐܢܛܺܝܽܘܟܺܝ. ܘܰܫܪܳܐ ܥܠܶܝܗ̇ ܘܥܰܩܪܳܗ̇.
4 ܘܰܒܢܳܐ ܠܬܶܕܡܽܘܪ ܕܚܰܪܒܳܐ ܗܘܳܬ ܐܰܝܟ ܡܰܕܒܪܳܐ. ܘܰܠܟܽܠܗܶܝܢ ܩܽܘܖ̈ܝܳܐ ܕܰܐܘܨܖ̈ܶܐ.
5 ܘܰܒܢܳܐ ܒܶܝܬ ܚܳܘܪܳܢ ܥܶܠܳܝܬܳܐ. ܘܒܶܝܬ ܚܳܘܪܳܢ ܬܰܚܬܳܝܬܳܐ.
6 ܘܰܠܟܽܠܗܶܝܢ ܩܽܘܖ̈ܝܳܐ ܕܰܐܘܨܖ̈ܶܐ. ܕܰܗܘܰܝ̈ ܠܰܫܠܶܝܡܽܘܢ. ܘܩܽܘܖ̈ܝܳܐ ܕܙܰܘ̈ܓܶܐ. ܘܩܽܘܖ̈ܝܳܐ ܕܦܰܖ̈ܳܫܶܐ. ܘܟܽܠܳܗ̇ ܪܶܓܬܶܗ ܕܰܫܠܶܝܡܽܘܢ. ܕܪܳܐܶܓ ܗܘܳܐ ܠܡܶܒܢܳܐ ܒܽܐܘܪܺܫܠܶܡ ܘܰܒܠܶܒܢܳܢ. ܘܰܒܟܽܠ ܐܰܪܥܳܐ ܕܫܽܘܠܛܳܢܶܗ.
7 ܘܟܽܠ ܥܰܡܳܐ ܕܺܝܬܰܪܘ ܡܶܢ ܐܳܡܽܘܖ̈ܳܝܶܐ. ܘܚܺܝܬܳܝ̈ܶܐ. ܘܦܰܖ̈ܙܳܝܶܐ. ܘܚܳܘܳܝ̈ܶܐ. ܘܝܳܒܽܘܣܳܝ̈ܶܐ. ܕܠܳܐ ܗܘܰܘ ܡܶܢ ܒܢܰܝ̈ ܝܺܣܪܳܐܶܝܠ.
8 ܒܢܰܝ̈ܗܽܘܢ ܕܺܝܬܰܪܘ ܡܶܢ ܒܳܬܰܪܗܽܘܢ ܒܰܐܪܥܳܐ. ܕܠܳܐ ܐܶܫܟܰܚܘ ܒܢܰܝ̈ ܝܺܣܪܳܐܶܝܠ ܠܡܰܘܒܳܕܽܘ ܐܶܢܽܘܢ. ܥܒܰܕ ܐܶܢܽܘܢ ܫܠܶܝܡܽܘܢ ܕܢܶܗܘܽܘܢ ܠܶܗ ܥܰܒܕ̈ܶܐ. ܘܦܰܠܳܚ̈ܶܐ ܘܡܰܣ̈ܩܰܝ ܡܰܕܰܐܬܳܐ ܥܕܰܡܳܐ ܠܝܰܘܡܳܢܳܐ.
9 ܘܡܶܢ ܒܢܰܝ̈ ܝܺܣܪܳܐܶܝܠ ܠܳܐ ܥܒܰܕ ܫܠܶܝܡܽܘܢ ܥܰܒܕ̈ܶܐ ܒܡܰܠܟܽܘܬܶܗ. ܡܶܛܽܠ ܕܗܶܢܽܘܢ ܗܘܰܘ ܓܰܒܖ̈ܶܐ. ܥܳܒܕܰܝ̈ ܩܪܳܒܳܐ. ܘܪܰܘܖ̈ܒܳܢܶܐ ܒܙܰܘܓܰܘ̈ܗܝ. ܘܦܰܖ̈ܳܫܰܘܗܝ.
10 ܘܗܳܠܶܝܢ ܫܰܠܺܝ̈ܛܶܐ ܘܩܳܝܽܘ̈ܡܶܐ ܕܩܳܝܡܺܝܢ ܗܘܰܘ ܠܶܗ ܠܰܫܠܶܝܡܽܘܢ ܡܰܠܟܳܐ. ܡܰܐܬܶܝܢ ܘܚܰܡܫܺܝܢ ܕܡܰܥܒܕܺܝܢ ܗܘܰܘ ܠܥܰܡܳܐ. ܕܥܳܒܕܺܝܢ ܗܘܰܘ ܥܒܺܝ̈ܕܳܬܳܐ.
11 ܒܪܰܡ ܒܰܪܬܶܗ ܕܦܶܪܥܽܘܢ. ܐܰܣܩܳܗ̇ ܫܠܶܝܡܽܘܢ ܡܶܢ ܩܪܺܝܬܶܗ ܕܕܰܘܺܝܕ. ܠܒܰܝܬܳܐ ܕܰܒܢܳܐ ܠܳܗ̇. ܡܶܛܽܠ ܕܶܐܡܰܪ ܗܘܳܐ ܕܠܳܐ ܬܶܬܶܒ ܐܰܢ̱ܬܬܳܐ ܥܰܡܝ ܒܒܰܝܬܶܗ ܕܕܰܘܺܝܕ. ܡܰܠܟܳܐ ܕܺܝܣܪܳܐܶܝܠ. ܡܶܛܽܠ ܕܩܰܕܺܝܫ ܗ̱ܘ. ܕܥܶܠܰܬ ܠܶܗ ܩܺܐܒܽܘܬܶܗ ܕܡܳܪܝܳܐ.
12 ܗܳܝܕܶܝܢ ܡܩܰܪܶܒ ܗܘܳܐ ܫܠܶܝܡܽܘܢ ܥܠܰܘ̈ܳܬܳܐ ܠܡܳܪܝܳܐ ܘܫܰܠ̈ܡܶܐ. ܥܰܠ ܡܰܕܒܚܳܐ ܕܡܳܪܝܳܐ ܕܰܒܢܳܐ ܩܕܳܡ ܣܪܽܘܓܳܐ.
13 ܘܚܽܘܫܒܳܢܳܐ ܕܟܽܠ ܝܽܘܡ ܡܰܣܶܩ ܗܘܳܐ. ܐܰܝܟ ܦܽܘܩܕܳܢܳܐ ܕܡܽܘܫܶܐ. ܒܫܰܒ̈ܶܐ. ܘܰܒܥܺܐܕ̈ܶܐ. ܬܠܳܬ ܙܰܒܢܺܝ̈ܢ ܒܫܰܢ̱ܬܳܐ. ܒܥܺܐܕܳܐ ܕܦܰܛܺܝܖ̈ܶܐ. ܘܰܒܥܺܐܕܳܐ ܕܨܰܘܡܳܐ. ܘܰܒܥܺܐܕܳܐ ܕܰܡܛܰܠ̈ܠܶܐ.
14 ܘܰܐܩܺܝܡ ܐܰܝܟ ܢܳܡܽܘܣܳܐ ܕܕܰܘܺܝܕ ܐܰܒܽܘܗܝ. ܟܳܗ̈ܢܶܐ ܥܰܠ ܥܒܺܝ̈ܕܳܬܗܽܘܢ. ܘܠܶܘ̈ܳܝܶܐ ܥܰܠ ܡܰܛܰܪܬܗܽܘܢ. ܠܰܡܫܰܒܳܚܽܘ ܘܠܰܡܫܰܡܳܫܽܘ ܩܕܳܡ ܟܳܗ̈ܢܶܐ. ܚܽܘܫܒܳܢ ܝܽܘܡ ܒܝܰܘܡܶܗ. ܘܬܰܖ̈ܳܥܶܐ ܐܰܝܟ ܙܶܕܩܗܽܘܢ ܕܢܶܗܘܽܘܢ ܢܳܛܪܺܝܢ ܬܰܖ̈ܥܶܐ. ܟܽܠ ܝܽܘܡ ܡܶܛܽܠ ܕܗܳܟܰܢܳܐ ܦܰܩܶܕ ܕܰܘܺܝܕ ܡܰܠܟܳܐ ܕܺܝܣܪܳܐܶܝܠ. ܕܩܳܡ ܒܡܰܠܟܽܘܬܳܐ. ܡܶܢ ܩܕܳܡ ܡܳܪܝܳܐ.
15 ܘܠܳܐ ܣܛܳܐ ܡܶܢ ܟܽܠ ܡܶܕܶܡ ܕܦܰܩܕܶܗ ܡܰܠܟܳܐ. ܥܰܠ ܟܳܗ̈ܢܶܐ ܘܥܰܠ ܠܶܘ̈ܳܝܶܐ. ܘܥܰܠ ܟܽܠܳܗ̇ ܬܶܫܡܶܫܬܳܐ ܕܒܰܝܬܳܐ.
16 ܘܰܬܩܶܢ ܗܘܰܝ̈ ܟܽܠܗܶܝܢ ܥܒܺܝ̈ܕܳܬܶܗ ܕܰܫܠܶܝܡܽܘܢ. ܡܶܢ ܝܰܘܡܳܐ ܕܰܢܦܰܠ ܫܶܬܶܐܣ̈ܶܐ ܕܒܰܝܬܶܗ ܕܡܳܪܝܳܐ. ܥܕܰܡܳܐ ܠܝܰܘܡܳܐ ܕܰܓܡܰܪ ܟܽܠܶܗ ܥܒܳܕܶܗ.
17 ܗܳܝܕܶܝܢ ܐܶܙܰܠ ܗܘܳܐ ܫܠܶܝܡܽܘܢ ܠܥܺܝܨܺܝܢܽܘ ܓܒܰܪ. ܩܪܺܝܬܳܐ ܕܺܐܝܬ ܗܘܳܐ ܠܽܘܩܒܰܠ ܐܰܠܽܘܬ. ܥܰܠ ܣܶܦܬܳܐ ܕܝܰܡܳܐ ܒܰܐܪܥܳܐ ܕܰܐܕܽܘܡ.
18 ܘܫܰܕܰܪ ܚܺܝܪܳܡ ܒܰܣܦܺܝܢ̈ܶܐ ܠܥܰܒܕܰܘ̈ܗܝ. ܓܰܒܖ̈ܶܐ ܣܰܦܳܢ̈ܶܐ ܕܝܳܕܥܺܝܢ ܠܰܡܕܰܒܳܪܽܘ ܐܶܠܦ̈ܶܐ ܕܝܰܡܳܐ. ܥܰܡ ܥܰܒܕܰܘ̈ܗܝ ܕܰܫܠܶܝܡܽܘܢ. ܘܶܐܙܰܠܘ ܠܰܐܘܦܺܝܪ ܡܕܺܝܢܬܳܐ. ܘܰܢܣܰܒܘ ܡܶܢ ܬܰܡܳܢ ܐܰܪܒܰܥܡܳܐܐ ܟܰܟܖ̈ܺܝܢ ܕܕܰܗܒܳܐ. ܘܰܐܝܬܺܝܘ ܠܡܰܠܟܳܐ ܫܠܶܝܡܽܘܢ.