2 Chronicles 19
The second Book of Chronicles
܀ ܒ ܕܘܒܪ ܝܘܡ̈ܬܐ ܝܛ ܀
1 ܘܰܗܦܰܟ ܝܳܗܽܘܫܳܦܳܛ ܠܰܐܦܰܝ̈ ܪܰܡܫܳܐ ܠܒܰܝܬܶܗ ܒܰܫܠܳܡܳܐ ܠܽܐܘܪܺܫܠܶܡ.
2 ܘܰܢܦܰܩ ܠܽܐܘܪܥܶܗ ܒܰܪ ܚܰܢܰܢ ܚܰܙܳܝܳܐ ܘܶܐܡܰܪ ܠܡܰܠܟܳܐ ܝܳܗܽܘܫܳܦܳܛ. ܠܰܡܥܰܕܳܪܽܘ ܠܪܰܫܺܝܥܳܐ ܐܶܙܰܠܬ. ܘܰܠܣܳܢܰܐܘ̈ܗܝ ܕܡܳܪܝܳܐ ܪܚܶܡܬ ܡܶܛܽܠ ܗܳܢܳܐ ܪܓܶܙ ܡܳܪܝܳܐ ܥܠܰܝܟ.
3 ܐܶܠܳܐ ܡܗܰܝܡܶܢ ܐ̱ܢܳܐ. ܕܦܶܬܓܳܡ̈ܶܐ ܛܳܒ̈ܶܐ ܐܶܫܬܡܰܥܘ ܡܶܢܳܟ. ܡܶܛܽܠ ܕܰܕܡܳܐ ܙܰܟܳܝܳܐ ܠܳܐ ܐܶܫܰܕܬ ܒܰܐܪܥܳܐ. ܘܰܐܬܩܶܢܬ ܠܶܒܳܟ ܠܰܡܨܰܠܳܝܽܘ ܩܕܳܡ ܡܳܪܝܳܐ ܒܩܽܘܫܬܳܐ.
4 ܘܺܝܬܶܒ ܝܳܗܽܘܫܳܦܳܛ ܒܽܐܘܪܺܫܠܶܡ ܘܰܗܦܰܟ ܘܰܢܦܰܩ ܡܶܢ ܒܺܪ ܫܒܰܥ ܡܕܺܝܢܬܳܐ. ܘܡܰܛܺܝ ܠܛܽܘܪܳܐ ܕܰܐܦܪܶܝܡ ܘܰܐܗܦܶܟ ܐܶܢܽܘܢ ܠܡܶܕܚܰܠ ܩܕܳܡ ܡܳܪܝܳܐ ܐܰܠܳܗܳܐ ܕܰܐܒܳܗ̈ܳܬܰܢ.
5 ܘܰܐܩܺܝܡ ܕܰܝܳܢ̈ܶܐ ܒܰܐܪܥܳܐ. ܒܟܽܠܗܶܝܢ ܩܽܘܖ̈ܝܳܐ ܕܺܝܗܽܘܕܳܐ ܥܰܫܺܝ̈ܢܳܬܳܐ. ܘܩܽܘܖ̈ܝܳܐ ܓܰܢ̱ܒܳܖ̈ܳܬܳܐ.
6 ܘܶܐܡܰܪ ܠܕܰܝܳܢ̈ܶܐ. ܚܙܰܘ ܡܳܢܳܐ ܥܳܒܕܺܝܢ ܐ̱ܢܬܽܘܢ. ܕܠܳܐ ܗܘܳܐ ܠܰܒܢܰܝ̈ܢܳܫܳܐ ܕܳܝܢܺܝܢ ܐ̱ܢܬܽܘܢ. ܐܶܠܳܐ ܠܡܳܪܝܳܐ ܐܰܠܳܗܰܢ.
7 ܐܶܬܥܰܫܢܘ. ܘܕܽܘܢܘ ܕܺܝܢܳܐ ܕܩܽܘܫܬܳܐ ܘܢܶܗܘܶܐ ܡܳܪܝܳܐ ܥܰܡܟܽܘܢ ܠܥܳܠܰܡ. ܘܛܰܪܘ ܘܰܥܒܶܕܘ. ܡܶܛܽܠ ܕܠܰܝܬ ܩܕܳܡ ܡܳܪܝܳܐ ܐܰܠܳܗܰܢ ܥܰܘܠܳܐ. ܘܡܰܣܰܒ ܒܰܐܦ̈ܶܐ. ܘܩܽܘܒܳܠܳܐ ܕܫܽܘܚܕܳܐ.
8 ܘܳܐܦ ܒܽܐܘܪܺܫܠܶܡ ܐܰܩܺܝܡ ܝܳܗܽܘܫܳܦܳܛ ܡܶܢ ܠܶܘ̈ܳܝܶܐ. ܘܡܶܢ ܟܳܗ̈ܢܶܐ. ܘܡܶܢ ܖ̈ܺܝܫܶܐ ܕܰܐܒܳܗ̈ܳܬܳܐ ܕܰܒܢܰܝ̈ ܝܺܣܪܳܐܶܝܠ. ܠܕܺܝܢܳܐ ܕܡܳܪܝܳܐ.
9 ܘܰܗܦܰܟ ܠܽܐܘܪܺܫܠܶܡ ܦܩܰܕ ܐܶܢܽܘܢ ܘܶܐܡܰܪ ܠܗܽܘܢ. ܗܳܟܰܢܳܐ ܬܶܥܒܕܽܘܢ ܠܕܶܚܠܬܶܗ ܕܡܳܪܝܳܐ. ܒܗܰܝܡܳܢܽܘܬܳܐ ܘܰܒܠܶܒܳܐ ܫܰܠܡܳܐ.
10 ܘܟܽܠ ܕܺܝܢܳܐ ܕܳܐܬܶܐ ܠܘܳܬܟܽܘܢ ܡܶܢ ܐܰܚܰܝ̈ܟܽܘܢ. ܕܝܳܬܒܺܝܢ ܒܩܽܘܖ̈ܝܟܽܘܢ. ܒܶܝܬ ܕܡܳܐ ܠܰܕܡܳܐ. ܘܒܶܝܬ ܢܳܡܽܘܣܳܐ ܠܦܽܘܩܕܳܢܳܐ. ܘܰܠܕܺܝܢܳܐ. ܘܰܬܙܰܗܪܽܘܢ ܐܶܢܽܘܢ. ܕܠܳܐ ܢܚܽܘܒܽܘܢ ܩܕܳܡ ܡܳܪܝܳܐ. ܘܢܶܪܓܰܙ ܥܠܰܝܗܽܘܢ ܘܥܰܠ ܐܰܚܰܝ̈ܗܽܘܢ. ܘܗܳܟܰܢܳܐ ܬܶܥܒܕܽܘܢ. ܘܠܳܐ ܬܚܽܘܒܽܘܢ.
11 ܗܳܐ ܐܰܩܺܝܡܬ ܥܠܰܝܟܽܘܢ ܟܳܗ̈ܢܶܐ. ܕܰܢܕܽܘܢܽܘܢ ܕܺܝܢܳܐ ܕܩܽܘܫܬܳܐ. ܘܕܺܝܢܳܐ ܕܗܰܝܡܳܢܽܘܬܳܐ. ܐܰܝܟ ܦܽܘܩܕܳܢܶܗ ܕܡܳܪܝܳܐ. ܘܰܙܟܰܪܝܳܐ ܒܰܪ ܫܡܰܥܝܳܐ. ܚܰܘܺܝ ܠܟܽܠܗܽܘܢ ܕܒܶܝܬ ܝܺܗܽܘܕܳܐ. ܟܽܠܗܽܘܢ ܦܽܘܩܕܳܢܰܘ̈ܗܝ ܕܡܰܠܟܳܐ ܘܚܰܘܺܝ ܠܣܳܦܖ̈ܶܐ ܘܰܠܠܶܘ̈ܳܝܶܐ. ܟܽܠ ܡܶܕܶܡ ܩܕܳܡܰܝܗܽܘܢ ܬܰܢܺܝ. ܘܶܐܡܰܪ ܠܗܽܘܢ. ܐܶܬܥܰܫܢܘ. ܘܰܥܒܶܕܘ. ܘܢܶܗܘܶܐ ܡܳܪܝܳܐ ܒܥܶܕܪܟܽܘܢ ܠܥܳܠܰܡ.