2 Chronicles 18
The second Book of Chronicles
܀ ܒ ܕܘܒܪ ܝܘܡ̈ܬܐ ܝܚ ܀
1 ܘܰܗܘܳܐ ܠܝܳܗܽܘܫܳܦܳܛ ܥܽܘܬܪܳܐ ܘܺܐܝܩܳܪܳܐ ܣܰܓܺܝ ܛܳܒ. ܘܶܐܬܩܰܪܰܒ ܠܘܳܬ ܐܳܚܳܒ.
2 ܘܰܢܚܶܬ ܒܳܬܰܪ ܬܰܪܬܶܝܢ ܫܢܺܝ̈ܢ. ܠܘܳܬ ܐܳܚܳܒ ܠܫܳܡܪܺܝܢ. ܘܕܰܒܰܚ ܠܶܗ ܐܳܚܳܒ ܥܳܢ̈ܳܐ ܘܬܰܘܖ̈ܶܐ ܣܽܘܓܳܐܐ ܕܛܳܒ. ܘܰܠܚܰܝ̈ܠܰܘܳܬܳܐ ܕܥܰܡܶܗ ܘܡܰܠܟܶܗ ܕܢܶܣܰܩ ܠܪܳܡܰܬ ܓܶܠܥܳܕ.
3 ܘܶܐܡܰܪ ܐܳܚܳܒ ܡܰܠܟܳܐ ܕܺܝܣܪܳܐܶܝܠ. ܠܝܳܗܽܘܫܳܦܳܛ ܡܰܠܟܳܐ ܕܺܝܗܽܘܕܳܐ. ܬܶܣܰܩ ܥܰܡܝ ܠܪܳܡܰܬ ܓܶܠܥܳܕ ܘܶܐܡܰܪ ܠܶܗ. ܣܳܠܶܩ ܐ̱ܢܳܐ ܐܰܟܘܳܬܳܟ ܘܥܰܡܝ ܐܰܝܟ ܥܰܡܳܟ. ܘܖ̈ܰܟܫܝ ܐܰܝܟ ܖ̈ܰܟܫܳܟ. ܘܥܰܡܳܟ ܐܳܙܶܠ ܐ̱ܢܳܐ ܠܰܩܪܳܒܳܐ.
4 ܘܶܐܡܰܪ ܝܳܗܽܘܫܳܦܳܛ ܠܡܰܠܟܳܐ ܕܺܝܣܪܳܐܶܝܠ. ܫܐܰܠ ܢܺܐ ܐܰܝܟ ܝܰܘܡܳܢܳܐ. ܦܶܬܓܳܡܶܗ ܕܡܳܪܝܳܐ.
5 ܘܟܰܢܶܫ ܡܰܠܟܳܐ ܕܺܝܣܪܳܐܶܝܠ. ܢܒܺܝ̈ܶܐ ܐܰܝܟ ܐܰܪܒܰܥܡܳܐܐ ܓܰܒܖ̈ܺܝܢ. ܘܶܐܡܰܪ ܠܗܽܘܢ. ܢܺܐܙܰܠ ܠܰܩܪܳܒܳܐ ܠܪܳܡܰܬ ܓܶܠܥܳܕ ܐܰܘ ܠܳܐ ܘܳܐܡܪܺܝܢ ܠܶܗ. ܣܰܩ. ܘܡܳܪܝܳܐ ܢܰܫܠܶܡ ܒܥܶܠܕܒܳܒܰܝ̈ܟ ܒܺܐܝܕܰܝ̈ܟ.
6 ܘܶܐܡܰܪ ܡܰܠܟܳܐ ܝܳܗܽܘܫܳܦܳܛ. ܕܰܠܡܳܐ ܐܺܝܬ ܗܳܪܟܳܐ ܢܒܺܝܳܐ ܕܩܽܘܫܬܳܐ ܕܡܳܪܝܳܐ. ܘܢܶܫܐܰܠ ܡܶܢܶܗ.
7 ܘܶܐܡܰܪ ܡܰܠܟܳܐ ܕܺܝܣܪܳܐܶܝܠ ܠܝܳܗܽܘܫܳܦܳܛ. ܬܽܘܒ ܐܺܝܬ ܓܰܒܪܳܐ ܚܰܕ ܠܡܶܫܐܰܠ ܡܶܠܬܶܗ ܕܡܳܪܝܳܐ ܡܶܢܶܗ. ܘܶܐܢܳܐ ܣܳܢܶܐ ܐ̱ܢܳܐ ܠܶܗ. ܕܠܳܐ ܡܶܬܢܰܒܶܐ ܥܠܰܝ ܛܳܒܬܳܐ. ܐܶܠܳܐ ܒܺܝܫܬܳܐ ܡܺܝܟܳܐ ܒܰܪ ܝܰܡܠܳܐ ܫܡܶܗ. ܘܶܐܡܰܪ ܝܳܗܽܘܫܳܦܳܛ. ܠܳܐ ܢܺܐܡܰܪ ܡܰܠܟܳܐ ܗܳܟܰܢܳܐ.
8 ܘܰܩܪܳܐ ܡܰܠܟܳܐ ܕܺܝܣܪܳܐܶܝܠ ܠܰܡܗܰܝܡܢܳܐ ܚܰܕ. ܘܶܐܡܰܪ ܠܶܗ. ܣܰܪܗܶܒ ܐܰܝܬܳܐ ܠܺܝ ܠܡܺܝܟܳܐ ܒܰܪ ܝܰܡܠܳܐ.
9 ܘܡܰܠܟܳܐ ܕܺܝܣܪܳܐܶܝܠ. ܘܝܳܗܽܘܫܳܦܳܛ ܡܰܠܟܳܐ ܕܺܝܗܽܘܕܳܐ. ܝܳܬܒܺܝܢ ܓܒܰܪ ܥܰܠ ܟܽܘܪܣܝܶܗ. ܘܰܠܒܺܝܫܺܝܢ ܠܒܽܘܫܳܐ ܒܳܪܕܳܐ. ܘܝܳܬܒܺܝܢ ܒܬܰܪܥܳܐ ܕܫܳܡܪܺܝܢ ܘܟܽܠܗܽܘܢ ܢܒܺܝ̈ܶܐ ܕܰܓ̈ܳܠܶܐ ܡܶܬܢܰܒܶܝܢ ܗܘܰܘ ܩܕܳܡܰܝܗܽܘܢ.
10 ܘܰܥܒܰܕ ܠܶܗ ܨܶܕܰܩܝܳܐ ܒܰܪ ܟܢܰܥܢܳܝܬܳܐ. ܩܰܖ̈ܢܳܬܳܐ ܕܦܰܪܙܠܳܐ. ܘܶܐܡܰܪ ܠܶܗ. ܗܳܟܰܢܳܐ ܐܳܡܰܪ ܡܳܪܝܳܐ. ܒܗܳܠܶܝܢ ܬܕܰܩܰܪ ܐܶܢܽܘܢ ܠܰܐܕܽܘܡܳܝ̈ܶܐ. ܥܕܰܡܳܐ ܕܰܬܓܰܡܰܪ ܐܶܢܽܘܢ. ܘܰܥܕܰܡܳܐ ܠܰܐܝܟܳܐ ܕܬܰܘܒܶܕ ܐܶܢܽܘܢ.
11 ܘܟܽܠܗܽܘܢ ܢܒܺܝ̈ܶܐ ܕܰܓ̈ܳܠܶܐ ܡܶܬܢܰܒܶܝܢ ܗܳܟܰܢܳܐ. ܘܳܐܡܪܺܝܢ. ܣܰܩ ܠܪܳܡܰܬ ܓܶܠܥܳܕ ܘܰܙܟܺܝܗ̇ ܘܢܰܫܠܶܡ ܡܳܪܝܳܐ ܒܥܶܠܕܒܳܒܰܝ̈ܟ ܒܺܐܝܕܰܝ̈ܟ. ܡܰܠܟܳܐ.
12 ܘܺܐܝܙܓܰܕܳܐ ܕܶܐܙܰܠ ܠܡܶܩܪܳܐ ܠܡܺܝܟܳܐ. ܡܰܠܶܠ ܥܰܡܶܗ. ܘܶܐܡܰܪ ܠܶܗ. ܗܳܐ ܡܶܠܰܝ̈ܗܽܘܢ ܕܰܢܒܺܝ̈ܶܐ ܕܰܓ̈ܳܠܶܐ. ܫܰܘ̈ܝܳܢ ܐܶܢܶܝܢ ܠܰܡܡܰܠܳܠܽܘ ܐܰܟܰܚܕ ܛܳܒܬܳܐ ܩܕܳܡ ܡܰܠܟܳܐ. ܢܶܗܘܽܘܢ ܦܶܬܓܳܡܰܝ̈ܟ ܒܰܣܝܺܡܺܝܢ ܐܰܝܟ ܕܚܰܕ ܡܶܢܗܽܘܢ ܘܬܶܬܢܰܒܶܐ ܐܳܦ ܐܰܢ̱ܬ ܛܳܒܬܳܐ.
13 ܘܶܐܡܰܪ ܡܺܝܟܳܐ. ܚܰܝ ܗ̱ܘ ܡܳܪܝܳܐ ܐܰܠܳܗܳܐ. ܐܶܠܳܐ ܡܶܕܶܡ ܕܢܰܪܡܶܐ ܐܰܠܳܗܳܐ ܒܠܶܒܝ. ܗܰܘ ܐܶܡܰܠܶܠ.
14 ܘܶܐܙܰܠ ܠܘܳܬ ܡܰܠܟܳܐ. ܘܶܐܡܰܪ ܠܶܗ ܡܰܠܟܳܐ. ܡܺܝܟܳܐ. ܢܺܐܙܰܠ ܠܪܳܡܰܬ ܓܶܠܥܳܕ ܐܰܘ ܠܳܐ. ܘܶܐܡܰܪ ܠܶܗ. ܣܰܩ ܘܰܙܟܺܝܗ̇. ܘܢܶܫܬܰܠܡܽܘܢ ܒܺܐܝܕܰܝ̈ܟ.
15 ܘܶܐܡܰܪ ܠܶܗ ܡܰܠܟܳܐ. ܥܰܠ ܟܡܳܐ ܙܰܒܢܺܝ̈ܢ ܐܶܢܳܐ ܡܰܘܡܶܐ ܐ̱ܢܳܐ ܠܳܟ. ܕܠܳܐ ܬܡܰܠܶܠ ܥܰܡܝ. ܐܶܠܳܐ ܐܶܢ ܬܖ̈ܺܝܨܳܬܳܐ. ܒܰܫܡܶܗ ܕܡܳܪܝܳܐ.
16 ܘܶܐܡܰܪ ܚܳܙܶܐ ܗܘܺܝܬ ܠܶܗ ܠܟܽܠܶܗ ܝܺܣܪܳܐܶܝܠ. ܕܰܡܒܰܕܪܺܝܢ ܒܶܝܬ ܛܽܘܖ̈ܶܐ. ܘܕܳܡܶܝܢ ܠܥܳܢ̈ܳܐ ܕܠܰܝܬ ܠܳܗ̇ ܪܳܥܝܳܐ ܘܶܐܡܰܪ ܡܳܪܝܳܐ. ܠܰܝܬ ܡܰܠܟܳܐ ܠܗܳܠܶܝܢ. ܢܶܗܦܽܘܟ ܓܒܰܪ ܠܒܰܝܬܶܗ ܒܰܫܠܳܡܳܐ.
17 ܘܶܐܡܰܪ ܡܰܠܟܳܐ ܕܺܝܣܪܳܐܶܝܠ ܠܝܳܗܽܘܫܳܦܳܛ. ܠܳܐ ܐܶܡܪܶܬ ܠܳܟ ܕܠܳܐ ܡܶܬܢܰܒܶܐ ܥܠܰܝ ܗܳܢܳܐ ܛܳܒܬܳܐ. ܐܶܠܳܐ ܐܶܢ ܒܺܝܫܬܳܐ.
18 ܘܶܐܡܰܪ ܡܺܝܟܳܐ. ܡܶܛܽܠ ܗܳܢܳܐ ܫܡܰܥ ܦܶܬܓܳܡܶܗ ܕܡܳܪܝܳܐ. ܚܙܺܝܬ ܠܡܳܪܝܳܐ ܝܳܬܶܒ ܥܰܠ ܟܽܘܪܣܝܶܗ. ܘܟܽܠ ܚܰܝ̈ܠܰܘܳܬܳܐ ܕܰܫܡܰܝܳܐ ܩܳܝܡܺܝܢ ܡܶܢ ܝܰܡܺܝܢܶܗ ܘܡܶܢ ܣܶܡܳܠܶܗ.
19 ܘܶܐܡܰܪ ܡܳܪܝܳܐ ܡܰܢܽܘ ܢܫܰܕܠܺܝܘܗܝ ܠܳܐܚܳܒ ܡܰܠܟܳܐ ܕܺܝܣܪܳܐܶܝܠ. ܕܢܶܣܰܩ ܘܢܶܬܩܛܶܠ ܒܪܳܡܰܬ ܓܶܠܥܳܕ ܚܰܕ ܐܳܡܰܪ ܡܫܰܕܶܠ ܐ̱ܢܳܐ ܠܶܗ. ܘܰܐ̱ܚܪܺܢܳܐ ܐܳܡܰܪ ܡܫܰܕܶܠ ܐ̱ܢܳܐ ܠܶܗ.
20 ܘܰܢܦܰܩ ܪܽܘܚܳܐ. ܘܩܳܡ ܩܕܳܡ ܡܳܪܝܳܐ ܘܶܐܡܰܪ. ܐܶܢܳܐ ܡܫܰܕܶܠ ܐ̱ܢܳܐ ܠܶܗ. ܘܶܐܡܰܪ ܠܶܗ ܡܳܪܝܳܐ. ܒܡܳܢܳܐ.
21 ܘܶܐܡܰܪ ܐܶܢܳܐ ܐܶܦܽܘܩ. ܘܶܐܗܘܶܐ ܪܽܘܚܳܐ ܟܰܕܳܒܳܐ ܒܦܽܘܡܳܐ ܕܟܽܠܗܽܘܢ ܢܒܺܝܰܘ̈ܗܝ ܘܶܐܡܰܪ ܠܶܗ. ܡܫܰܕܶܠ ܐܰܢ̱ܬ ܠܶܗ. ܐܳܦ ܡܶܫܟܰܚ ܐܰܢ̱ܬ ܠܶܗ. ܦܽܘܩ ܘܰܥܒܶܕ ܐܰܝܟܰܢܳܐ ܕܶܐܡܰܪܬ.
22 ܘܳܐܦ ܗܳܫܳܐ ܗܳܐ ܝܰܗܒ ܡܳܪܝܳܐ ܪܽܘܚܳܐ ܟܰܕܳܒܳܐ ܒܦܽܘܡܳܐ ܕܟܽܠܗܽܘܢ ܢܒܺܝܰܝ̈ܟ ܗܳܠܶܝܢ. ܘܡܳܪܝܳܐ ܦܣܰܩ ܥܠܰܝܟ ܒܺܝܫܬܳܐ.
23 ܘܰܩܪܶܒ ܨܶܕܰܩܝܳܐ ܒܰܪ ܟܢܰܥܢܳܝܬܳܐ. ܘܰܡܚܳܝܗܝ ܠܡܺܝܟܳܐ ܥܰܠ ܦܰܟܶܗ. ܘܶܐܡܰܪ ܠܶܗ. ܡܶܢ ܐܶܡܰܬܝ ܘܰܠܟܳܐ. ܥܶܒܪܰܬ ܪܽܘܚܶܗ ܕܡܳܪܝܳܐ ܡܶܢܝ. ܠܰܡܡܰܠܳܠܽܘ ܥܰܡܳܟ.
24 ܘܶܐܡܰܪ ܡܺܝܟܳܐ. ܗܳܐ ܚܳܙܶܝܬ ܒܝܰܘܡܳܐ ܗܰܘ. ܟܰܕ ܬܶܥܽܘܠ ܬܰܘܳܢ ܒܓܰܘ ܬܰܘܳܢ ܠܡܶܬܛܰܫܳܝܽܘ.
25 ܘܶܐܡܰܪ ܡܰܠܟܳܐ ܕܺܝܣܪܳܐܶܝܠ. ܕܒܰܪܘ ܠܡܺܝܟܳܐ. ܘܙܶܠܘ ܟܰܠܐܗܝ ܒܶܝܬ ܐܰܡܽܘܢ ܫܰܠܺܝܛܳܐ ܕܰܩܪܺܝܬܳܐ. ܘܰܒܒܰܝܬܶܗ ܕܝܽܘܐܳܫ ܒܰܪ ܡܰܠܟܳܐ.
26 ܘܬܺܐܡܪܽܘܢ. ܗܳܟܰܢܳܐ ܐܳܡܰܪ ܡܰܠܟܳܐ. ܐܰܪܡܰܐܗܝ ܠܗܳܢܳܐ ܒܶܝܬ ܐܰܣܺܝܖ̈ܶܐ. ܘܰܐܘܟܠܽܘܗܝ ܠܰܚܡܳܐ ܠܡܰܛܰܪ ܢܦܶܫ. ܘܰܐܫܩܰܐܗܝ ܡܰܝ̈ܳܐ ܠܡܰܛܰܪ ܢܦܶܫ. ܥܕܰܡܳܐ ܠܰܐܝܟܳܐ ܕܶܐܗܦܽܘܟ ܒܰܫܠܡܳܐ.
27 ܘܶܐܡܰܪ ܡܺܝܟܳܐ. ܐܶܢ ܡܶܗܦܰܟ ܗܳܦܶܟ ܐܰܢ̱ܬ. ܘܳܐܬܶܐ ܐܰܢ̱ܬ ܒܰܫܠܳܡܳܐ. ܠܳܐ ܡܰܠܶܠ ܡܳܪܝܳܐ ܥܰܡܝ. ܘܶܐܡܰܪ. ܫܡܰܥܘ ܥܰܡ̈ܡܶܐ ܟܽܠܟܽܘܢ.
28 ܘܰܣܠܶܩ ܝܳܗܽܘܫܳܦܳܛ ܡܰܠܟܳܐ ܕܺܝܗܽܘܕܳܐ. ܘܳܐܚܳܒ ܡܰܠܟܳܐ ܕܺܝܣܪܳܐܶܝܠ. ܠܪܳܡܰܬ ܓܶܠܥܳܕ
29 ܘܶܐܡܰܪ ܡܰܠܟܳܐ ܕܺܝܣܪܳܐܶܝܠ ܠܝܳܗܽܘܫܳܦܳܛ ܐܶܙܕܰܝܰܢ. ܘܺܐܬܶܐ. ܘܶܐܩܽܘܡ ܒܣܶܕܪܳܐ ܕܰܩܪܳܒܳܐ. ܘܰܐܢ̱ܬ ܠܒܰܫ ܡܳܐܢܰܝ̈ ܙܰܝܢܳܟ. ܘܶܐܙܕܰܝܰܢ ܡܰܠܟܳܐ ܕܺܝܣܪܳܐܶܝܠ. ܘܥ̣ܰܠ ܘܩܳܡ ܒܣܶܕܪܳܐ ܕܰܩܪܳܒܳܐ.
30 ܘܡܰܠܟܳܐ ܕܰܐܕܽܘܡܳܝ̈ܶܐ. ܦܩܰܕ ܠܫܰܠܺܝܛܳܢ̈ܶܐ ܕܙܰܘ̈ܓܶܐ ܕܺܐܝܬ ܠܶܗ. ܬܠܳܬܺܝܢ ܘܰܬܪܶܝܢ. ܘܶܐܡܰܪ ܠܗܽܘܢ. ܠܳܐ ܬܶܬܟܰܬܫܽܘܢ ܠܳܐ ܥܰܡ ܙܥܽܘܪܳܐ. ܘܠܳܐ ܥܰܡ ܪܰܒܳܐ. ܐܶܠܳܐ ܥܰܡ ܡܰܠܟܳܐ ܕܺܝܣܪܳܐܶܝܠ ܒܰܠܚܽܘܕ.
31 ܘܰܗܘܳܐ ܕܟܰܕ ܚܙܰܘ ܫܰܠܺܝܛܳܢ̈ܶܐ ܕܙܰܘ̈ܓܶܐ. ܠܝܳܗܽܘܫܳܦܳܛ. ܐܳܡܪܺܝܢ. ܡܰܠܟܳܐ ܕܺܝܣܪܳܐܶܝܠ ܗܳܢܰܘ ܘܶܐܬܰܘ ܥܠܰܘܗܝ. ܠܡܶܬܟܰܬܳܫܽܘ ܥܰܡܶܗ. ܘܰܐܝܠܶܠ ܝܳܗܽܘܫܳܦܳܛ ܘܡܳܪܝܳܐ ܥܰܕܪܶܗ. ܘܰܐܦܪܶܩ ܐܶܢܽܘܢ ܡܶܢܶܗ.
32 ܘܰܗܘܳܐ ܕܟܰܕ ܚܙܰܘ ܫܰܠܺܝܛܳܢ̈ܶܐ ܕܙܰܘ̈ܓܶܐ. ܕܠܳܐ ܗܘܳܐ ܡܰܠܟܳܐ ܕܺܝܣܪܳܐܶܝܠ. ܗܦܰܟܘ ܠܗܽܘܢ ܡܶܢ ܒܶܣܬܪܶܗ.
33 ܘܓܰܒܪܳܐ ܫܳܕܶܐ ܗܘܳܐ ܒܩܶܫܬܳܐ ܬܰܡܺܝܡܳܐܺܝܬ ܠܩܽܘܒܠܶܗ ܘܰܡܚܳܝܗܝ ܠܡܰܠܟܳܐ ܕܺܝܣܪܳܐܶܝܠ. ܒܶܝܬ ܦܪܳܩܳܐ ܕܫܶܪܝܳܢܶܗ. ܘܶܐܡܰܪ ܠܡܰܪܟܒܳܢܶܗ. ܐܰܗܦܶܟ ܐܺܝܕܳܟ. ܘܰܐܦܶܩܰܝܢܝ ܠܒܰܪ ܡܶܢ ܡܰܫܪܺܝܬܳܐ. ܡܶܛܽܠ ܕܰܡܚܽܘܬܳܐ ܕܡܰܘܬܳܐ ܡܚܶܐ ܐ̱ܢܳܐ.
34 ܘܰܥܫܶܢ ܩܺܐܪܣܳܐ ܒܝܰܘܡܳܐ ܗܰܘ. ܘܡܰܠܟܳܐ ܕܺܝܣܪܳܐܶܝܠ ܝܳܬܶܒ ܗܘܳܐ ܒܙܰܘܓܳܐ. ܘܡܶܬܟܰܬܰܫ ܗܘܳܐ ܥܰܡ ܐܰܕܽܘܡܳܝ̈ܶܐ. ܥܕܰܡܳܐ ܠܪܰܡܫܳܐ ܘܡܺܝܬ ܥܶܕܳܢ ܡܰܥܖ̈ܳܒܰܝ ܫܶܡܫܳܐ.