2 Chronicles 36
The second Book of Chronicles
܀ ܒ ܕܘܒܪ ܝܘܡ̈ܬܐ ܠܘ ܀
1 ܘܰܕܒܰܪܘ ܥܰܡܳܐ ܠܝܳܗܽܘܐܳܚܳܙ ܒܰܪ ܝܽܘܫܺܝܳܐ. ܘܰܐܩܺܝܡܽܘܗܝ ܒܡܰܠܟܽܘܬܶܗ ܒܳܬܰܪ ܐܰܒܽܘܗܝ ܒܽܐܘܪܺܫܠܶܡ.
2 ܒܰܪ ܥܶܣܪܺܝܢ ܘܰܬܠܳܬ ܫܢܺܝ̈ܢ ܝܳܗܽܘܐܳܚܳܙ. ܟܰܕ ܩܳܡ ܒܡܰܠܟܽܘܬܳܐ. ܘܰܬܠܳܬܳܐ ܝܰܖ̈ܚܺܝܢ ܐܰܡܠܶܟ ܗܘܳܐ ܒܽܐܘܪܺܫܠܶܡ.
3 ܘܰܐܥܒܪܶܗ ܡܰܠܟܳܐ ܕܡܶܨܪܶܝܢ.
4 ܘܰܐܩܺܝܡ ܠܶܐܠܝܳܩܺܝܡ ܐܰܚܽܘܗܝ. ܥܰܠ ܕܒܶܝܬ ܝܺܗܽܘܕܳܐ. ܘܥܰܠ ܥܳܡܽܘܖ̈ܶܝܗ̇ ܕܽܐܘܪܺܫܠܶܡ. ܘܫܰܡܺܝ ܫܡܶܗ ܝܽܘܝܰܩܺܝܡ. ܘܰܠܝܳܗܽܘܐܳܚܳܙ ܐܰܚܽܘܗܝ. ܕܒܰܪ ܦܶܪܥܽܘܢ ܚܓܺܝܪܳܐ. ܘܰܐܘܒܠܶܗ ܠܡܶܨܪܶܝܢ. ܘܡܺܝܬ ܬܰܡܳܢ.
5 ܒܰܪ ܥܶܣܪܺܝܢ ܘܚܰܡܶܫ ܫܢܺܝ̈ܢ ܝܽܘܝܰܩܺܝܡ. ܟܰܕ ܩܳܡ ܒܡܰܠܟܽܘܬܳܐ. ܘܰܚܕܰܥܶܣܖ̈ܶܐ ܫܢܺܝ̈ܢ ܐܰܡܠܶܟ ܒܽܐܘܪܺܫܠܶܡ ܘܰܥܒܰܕ ܕܒܺܝܫ ܩܕܳܡ ܡܳܪܝܳܐ ܐܰܠܳܗܶܗ.
6 ܥܠܰܘܗܝ ܣܠܶܩ ܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܝܠ. ܘܰܐܣܪܶܗ ܒܫܺܫ̈ܠܳܬܳܐ. ܠܡܰܘܒܳܠܽܘܬܶܗ ܠܒܳܒܶܝܠ.
7 ܘܡܶܢ ܟܽܠܗܽܘܢ ܡܳܐܢܰܝ̈ ܒܰܝܬܳܐ. ܐܰܝܬܺܝ ܢܰܒܽܘܟܰܕܢܳܨܰܪ ܠܒܳܒܶܝܠ. ܘܝܰܗܒ ܐܶܢܽܘܢ ܒܗܰܝܟܠܶܗ ܒܒܳܒܶܝܠ.
8 ܘܫܰܪܟܳܐ ܕܦܶܬܓܳܡܰܘ̈ܗܝ ܕܝܽܘܝܰܩܺܝܡ. ܘܣܰܢ̈ܝܳܬܳܐ ܕܰܥܒܰܕ. ܗܳܐ ܗܶܢܶܝܢ ܟܬܺܝ̈ܒܳܢ ܥܰܠ ܣܶܦܪܳܐ ܕܡܰܠ̈ܟܶܐ ܕܺܝܗܽܘܕܳܐ ܘܕܺܝܣܪܳܐܶܝܠ ܘܰܐܡܠܶܟ ܝܽܘܝܳܟܺܝܢ ܒܪܶܗ ܒܳܬܪܶܗ.
9 ܒܰܪ ܬܡܳܢܰܥܶܣܖ̈ܶܐ ܫܢܺܝ̈ܢ ܝܽܘܝܳܟܺܝܢ. ܟܰܕ ܩܳܡ ܒܡܰܠܟܽܘܬܳܐ. ܘܰܡܳܐܐ ܝܰܘܡܺܝ̈ܢ ܐܰܡܠܶܟ ܒܽܐܘܪܺܫܠܶܡ ܘܰܥܒܰܕ ܕܒܺܝܫ ܩܕܳܡ ܡܳܪܝܳܐ.
10 ܘܰܠܚܰܪܬܳܗ̇ ܕܫܰܢ̱ܬܳܐ. ܫܰܕܰܪ ܥܠܰܘܗܝ ܢܰܒܽܘܟܰܕܢܳܨܰܪ ܡܰܠܟܳܐ. ܘܰܐܝܬܝܶܗ ܠܒܳܒܶܝܠ. ܠܶܗ ܘܰܠܡܳܐܢܰܝ̈ ܪܶܓܬܳܐ ܕܰܗܘܰܘ ܒܒܰܝܬܶܗ ܕܡܳܪܝܳܐ ܘܰܐܡܠܶܟ ܠܨܶܕܰܩܝܳܐ ܕܳܕܶܗ ܒܡܰܠܟܽܘܬܳܐ. ܥܰܠ ܝܺܗܽܘܕܳܐ ܘܥܰܠ ܐܽܘܪܺܫܠܶܡ.
11 ܒܰܪ ܥܶܣܪܺܝܢ ܘܰܚܕܳܐ ܫܢܺܝ̈ܢ ܨܶܕܰܩܝܳܐ. ܟܰܕ ܩܳܡ ܒܡܰܠܟܽܘܬܳܐ. ܘܰܚܕܰܥܶܣܖ̈ܶܐ ܫܢܺܝ̈ܢ ܐܰܡܠܶܟ ܒܽܐܘܪܺܫܠܶܡ.
12 ܘܰܥܒܰܕ ܕܒܺܝܫ ܩܕܳܡ ܡܳܪܝܳܐ ܐܰܠܳܗܶܗ. ܘܠܳܐ ܕܚܶܠ ܡܶܢ ܐܶܪܰܡܝܳܐ ܢܒܺܝܳܐ. ܕܡܶܬܢܰܒܶܐ ܗܘܳܐ ܐܰܝܟ ܕܡܶܢ ܦܽܘܡܶܗ ܕܡܳܪܝܳܐ.
13 ܘܳܐܦ ܥܰܠ ܢܰܒܽܘܟܰܕܢܳܨܰܪ ܡܪܰܕ. ܕܺܝܡܳܐ ܗܘܳܐ ܠܶܗ ܒܰܫܡܶܗ ܕܡܳܪܝܳܐ ܘܩܰܫܺܝ ܩܕܳܠܶܗ. ܘܩܰܫܺܝ ܠܶܒܶܗ. ܘܠܳܐ ܨܒܳܐ ܠܰܡܨܰܠܳܝܽܘ ܩܕܳܡ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ.
14 ܘܳܐܦ ܟܽܠ ܩܰܫܺܝ̈ܫܶܐ ܕܟܳܗ̈ܢܶܐ ܘܰܕܠܶܘܳܝ̈ܶܐ ܘܰܕܥܰܡܳܐ. ܐܰܣܓܺܝܘ ܠܰܡܟܰܕܳܒܽܘ ܟܰܕܳܒܽܘܬܳܐ. ܐܰܝܟ ܟܽܠܗܽܘܢ ܥܒܳܕ̈ܶܐ ܕܥܰܡ̈ܡܶܐ. ܘܛܰܡܰܐܘ ܒܰܝܬܶܗ ܕܡܳܪܝܳܐ ܩܰܕܺܝܫܳܐ ܒܽܐܘܪܺܫܠܶܡ.
15 ܘܫܰܕܰܪ ܡܳܪܝܳܐ ܐܰܠܳܗܳܐ ܕܰܐܒܳܗܰܝ̈ܗܽܘܢ ܥܠܰܝܗܽܘܢ ܒܺܐܝܕܳܐ ܕܡܰܠܰܐܟܰܘ̈ܗܝ. ܡܩܰܕܡܺܝܢ ܘܡܰܚܫܟܺܝܢ. ܡܶܛܽܠ ܕܚܳܣ ܥܰܠ ܥܰܡܶܗ ܘܥܰܠ ܥܳܢ̈ܳܐ ܕܡܳܪܝܳܐ.
16 ܘܰܗܘܰܘ ܓܳܚܟܺܝܢ ܥܰܠ ܡܰܠܰܐܟܰܘ̈ܗܝ ܕܡܳܪܝܳܐ. ܘܰܡܒܰܣܪܺܝܢ ܥܰܠ ܡܶܠܰܝ̈ܗܽܘܢ. ܘܓܳܚܟܺܝܢ ܥܰܠ ܢܒܺܝܰܘ̈ܗܝ ܥܕܰܡܳܐ ܕܣܶܠܩܰܬ ܚܶܡܬܶܗ ܕܡܳܪܝܳܐ ܒܥܰܡܶܗ. ܥܕܰܡܳܐ ܠܰܐܝܟܳܐ ܕܠܳܐ ܗܘܳܬ ܠܗܽܘܢ ܐܳܣܝܽܘ.
17 ܘܰܐܣܶܩ ܥܠܰܝܗܽܘܢ ܠܡܰܠܟܳܐ ܕܟܰܠܕܳܝ̈ܶܐ. ܘܩܰܛܶܠ ܥܠܰܝܡܰܝ̈ܗܽܘܢ ܒܚܰܪܒܳܐ ܒܶܝܬ ܡܰܩܕܫܗܽܘܢ. ܘܠܳܐ ܚܳܣ ܥܰܠ ܓܰܕܽܘܕ̈ܶܐ ܘܥܰܠ ܒܬܽܘ̈ܠܳܬܳܐ. ܘܥܰܠ ܩܰܫܺܝ̈ܫܶܐ. ܘܳܐܦܠܳܐ ܥܰܠ ܝܳܢܩܰܝ̈ ܚܰܠܒܳܐ. ܟܽܠܗܽܘܢ ܐܰܫܠܶܡ ܒܺܐܝܕܶܗ.
18 ܘܟܽܠ ܡܳܐܢܰܝ̈ ܒܰܝܬܶܗ ܕܡܳܪܝܳܐ. ܪܰܘܖ̈ܒܶܐ ܘܕܰܩܕܩ̈ܶܐ. ܘܓܰܙܳܐ ܕܒܰܝܬܶܗ ܕܡܳܪܝܳܐ. ܘܓܰܙܳܐ ܕܡܰܠܟܳܐ ܘܰܕܫܰܠܺܝܛܳܢܰܘ̈ܗܝ. ܟܽܠܶܗ ܐܰܘܒܠܶܗ ܠܒܳܒܶܝܠ.
19 ܘܰܐܘܩܕܶܗ ܠܒܰܝܬܶܗ ܕܡܳܪܝܳܐ ܘܰܥܩܰܪ ܠܫܽܘܖ̈ܶܝܗ̇ ܕܽܐܘܪܺܫܠܶܡ. ܘܟܽܠܗܶܝܢ ܣܳܚܖ̈ܳܬܳܗ̇ ܐܰܘܩܶܕ ܒܢܽܘܪܳܐ. ܘܟܽܠ ܡܳܐܢ̈ܶܐ ܕܪܶܓܬܳܐ ܚܰܒܶܠܘ.
20 ܘܰܐܦܶܩܘ ܒܫܶܒܝܳܐ ܠܰܐܝܠܶܝܢ ܕܰܦܠܰܛܘ ܡܶܢ ܚܰܪܒܳܐ ܠܒܳܒܶܝܠ ܘܰܗܘܰܘ ܠܶܗ ܥܰܒܕܺܝ̈ܢ ܘܠܰܒܢܰܘ̈ܗܝ. ܥܕܰܡܳܐ ܠܰܐܝܟܳܐ ܕܰܐܫܠܶܡ ܡܰܠܟܽܘܬܳܐ ܠܦܳܖ̈ܣܳܝܶܐ.
21 ܕܬܶܫܠܰܡ ܡܶܠܬܶܗ ܕܡܳܪܝܳܐ ܕܡܰܠܶܠ ܗܘܳܐ ܐܶܪܰܡܝܳܐ ܢܒܺܝܳܐ. ܥܕܰܡܳܐ ܕܬܶܬܢܺܝܚ ܐܰܪܥܳܐ ܒܫܰܒܶܝ̈ܗ̇ ܟܽܠ ܝܰܘ̈ܡܳܬܳܐ ܕܬܶܨܕܶܐ. ܠܡܶܫܠܰܡ ܫܰܒܥܺܝܢ ܫܢܺܝ̈ܢ.
22 ܒܰܫܢܰܬ ܚܕܳܐ ܠܟܽܘܪܶܫ ܡܰܠܟܳܐ ܦܳܪܣܳܝܳܐ. ܕܬܶܫܠܰܡ ܡܶܠܬܶܗ ܕܡܳܪܝܳܐ ܒܦܽܘܡܶܗ ܕܶܐܪܰܡܝܳܐ ܢܒܺܝܳܐ. ܐܰܥܺܝܪ ܡܳܪܝܳܐ ܪܽܘܚܶܗ ܕܟܽܘܪܶܫ ܡܰܠܟܳܐ ܦܰܪܣܳܝܳܐ. ܘܰܐܥܒܰܪ ܩܳܠܳܐ ܒܟܽܠܳܗ̇ ܡܰܠܟܽܘܬܶܗ. ܘܳܐܦ ܒܰܟܬܳܒܳܐ ܐܰܡܺܝܪ ܗܘܳܐ ܫܡܶܗ.
23 ܗܳܟܰܢܳܐ ܐܳܡܰܪ ܟܽܘܪܶܫ ܡܰܠܟܳܐ ܦܳܪܣܳܝܳܐ. ܟܽܠ ܡܰܠܟܘ̈ܳܬܳܐ ܕܰܐܪܥܳܐ ܝܰܗܒ ܠܺܝ ܡܳܪܝܳܐ ܐܰܠܳܗܳܐ ܕܰܫܡܰܝܳܐ ܘܗܽܘ ܦܩܰܕ ܥܠܰܝ ܕܶܐܒܢܶܐ ܠܶܗ ܒܰܝܬܳܐ ܒܽܐܘܪܺܫܠܶܡ ܕܒܺܝܗܽܘܕܳܐ ܡܰܢܽܘ ܐܺܝܬ ܒܟܽܘܢ ܡܶܢ ܟܽܠܶܗ ܥܰܡܳܐ ܕܡܳܪܝܳܐ ܐܰܠܳܗܶܗ ܨܳܒܶܐ ܒܶܗ. ܢܶܣܰܩ ܢܺܐܬܶܐ ܠܘܳܬܝ.