2 Chronicles 24
The second Book of Chronicles
܀ ܒ ܕܘܒܪ ܝܘܡ̈ܬܐ ܟܕ ܀
1 ܒܰܪ ܫܒܰܥ ܫܢܺܝ̈ܢ ܝܽܘܐܳܫ ܟܰܕ ܩܳܡ ܒܡܰܠܟܽܘܬܳܐ. ܘܰܐܪܒܥܺܝܢ ܫܢܺܝ̈ܢ ܐܰܡܠܶܟ ܒܽܐܘܪܺܫܠܶܡ ܘܰܫܡܳܗ̇ ܕܶܐܡܶܗ ܨܰܘܒܳܐ. ܡܶܢ ܒܰܪ ܫܒܰܥ ܡܕܺܝܢܬܳܐ.
2 ܘܰܥܒܰܕ ܝܽܘܐܳܫ ܕܫܰܦܺܝܪ ܩܕܳܡ ܡܳܪܝܳܐ. ܟܽܠ ܝܰܘ̈ܡܳܬܳܐ ܕܚܰܝܰܘ̈ܗܝ ܕܝܽܘܝܳܕܳܥ ܟܳܗܢܳܐ.
3 ܘܰܢܣܰܒ ܠܶܗ ܝܽܘܝܳܕܳܥ ܢܶܫ̈ܶܐ ܬܰܪܬܶܝܢ. ܘܰܐܘܠܶܕ ܠܶܗ ܒܢܰܝ̈ܳܐ ܘܰܒܢ̈ܳܬܳܐ.
4 ܘܰܗܘܳܐ ܡܶܢ ܒܳܬܰܪ ܗܳܠܶܝܢ. ܗܘܳܐ ܠܶܒܶܗ ܥܰܡ ܝܽܘܐܳܫ ܒܐ̱ܪܳܙܳܐ. ܠܰܡܚܰܕܳܬܽܘ ܒܰܝܬܶܗ ܕܡܳܪܝܳܐ. ܘܰܠܡܶܒܕܰܩ ܒܶܗ ܟܽܠ ܡܶܕܶܡ ܕܡܶܬܒܥܶܐ.
5 ܘܟܰܢܶܫ ܝܽܘܝܳܕܳܥ ܟܳܗܢܳܐ. ܠܟܳܗ̈ܢܶܐ. ܘܰܠܠܶܘ̈ܳܝܶܐ. ܘܶܐܡܰܪ ܠܗܽܘܢ. ܦܽܘܩܘ ܠܩܽܘܖ̈ܝܳܐ ܕܒܶܝܬ ܝܺܗܽܘܕܳܐ. ܘܟܰܢܶܫܘ ܡܶܢ ܟܽܠܗܶܝܢ ܩܽܘܖ̈ܝܳܐ ܕܺܝܣܪܳܐܶܝܠ. ܟܶܣܦܳܐ ܘܕܰܗܒܳܐ ܘܰܒܕܽܘܩܘ ܒܰܝܬܶܗ ܕܰܐܠܳܗܟܽܘܢ. ܐܰܝܟ ܕܟܽܠ ܫܢܳܐ ܒܰܫܢܳܐ ܘܰܐܢ̱ܬܽܘܢ ܬܶܣܬܰܪܗܒܽܘܢ ܠܰܡܡܰܠܳܝܽܘ.
6 ܘܰܩܪܳܐ ܡܰܠܟܳܐ ܠܝܽܘܝܳܕܳܥ ܩܰܫܺܝܫܳܐ. ܘܶܐܡܰܪ ܠܶܗ. ܡܶܛܽܠ ܡܳܢܳܐ ܠܳܐ ܬܳܒܰܥ ܐܰܢ̱ܬ ܠܠܶܘ̈ܳܝܶܐ. ܕܢܺܐܙܽܠܘܢ ܘܢܰܝܬܽܘܢ ܡܶܢ ܝܺܗܽܘܕܳܐ. ܘܡܶܢ ܐܽܘܪܺܫܠܶܡ. ܡܰܘܗ̈ܒܳܬܳܐ ܕܡܽܘܫܶܐ ܥܰܒܕܶܗ ܕܡܳܪܝܳܐ. ܘܟܰܢܶܫܘ ܠܺܝܣܪܳܐܶܝܠ ܠܡܰܫܟܢܳܐ ܕܥܺܐܕܳܐ.
7 ܘܰܥܬܰܠܝܳܐ ܡܰܠܦܳܐ ܗܘܳܬ ܒܥܺܝܢ ܥܰܘܠܳܐ ܘܬܶܪܥܰܬ ܠܒܰܝܬܶܗ ܕܡܳܪܝܳܐ. ܘܳܐܦ ܠܟܽܠ ܩܰܕܺܝ̈ܫܶܐ ܕܺܐܝܬ ܗܘܰܘ ܒܒܰܝܬܶܗ ܕܡܳܪܝܳܐ. ܥܶܒܕܰܬ ܐܶܢܽܘܢ ܕܳܚܠܰܝ̈ ܦܬܰܟܖ̈ܶܐ.
8 ܘܶܐܡܰܪ ܡܰܠܟܳܐ. ܘܰܥܒܰܕܘ ܩܺܐܒܽܘܬܳܐ ܚܕܳܐ. ܘܣܳܡܽܘܗ̇ ܒܬܰܪܥܳܐ ܕܒܰܝܬܶܗ ܕܡܳܪܝܳܐ ܡܶܢ ܠܒܰܪ.
9 ܘܝܰܗܒܘ ܩܳܠܳܐ ܒܺܝܗܽܘܕܳܐ. ܘܒܽܐܘܪܺܫܠܶܡ. ܕܢܰܝܬܽܘܢ ܠܡܳܪܝܳܐ ܡܢܳܬܳܐ ܕܡܽܘܫܶܐ ܥܰܒܕܶܗ ܕܡܳܪܝܳܐ. ܕܦܰܩܶܕ ܒܡܰܕܒܪܳܐ.
10 ܘܰܚܕܺܝܘ ܟܽܠܗܽܘܢ ܪܰܘܖ̈ܒܳܢܶܐ. ܘܟܽܠܶܗ ܥܰܡܳܐ. ܘܰܐܝܬܺܝܘ ܘܰܥܒܰܕܘ ܩܺܐܒܽܘܬܳܐ ܚܕܳܐ. ܘܣܳܡܽܘܗ̇ ܘܰܐܪܡܺܝܘ ܥܕܰܡܳܐ ܕܰܡܠܳܬ.
11 ܘܟܰܕ ܚܙܰܘ ܕܰܣܓܺܝ ܟܶܣܦܳܐ ܒܳܗ̇ ܒܩܺܐܒܽܘܬܳܐ ܥܰܠ ܣܳܦܪܳܐ ܕܡܰܠܟܳܐ. ܘܪܰܒ ܒܰܝܬܶܗ ܕܟܳܗܢܳܐ ܪܰܒܳܐ. ܘܰܡܢܰܘ. ܘܨܰܪܘ. ܟܶܣܦܳܐ.
12 ܘܝܰܗܒܽܘܗܝ ܠܥܳܒܕܰܝ̈ ܥܒܺܝ̈ܕܳܬܳܐ ܕܒܰܝܬܶܗ ܕܡܳܪܝܳܐ. ܘܰܗܘܰܘ ܐܳܓܪܺܝܢ ܠܗܽܘܢ ܦܳܣܽܘ̈ܠܶܐ ܘܢܰܓܳܖ̈ܶܐ. ܘܒܳܕܩܺܝܢ ܒܰܝܬܶܗ ܕܡܳܪܝܳܐ. ܘܳܐܦ ܥܳܒܕܰܝ̈ ܦܰܪܙܠܳܐ ܘܰܢܚܳܫܳܐ. ܠܡܶܒܕܰܩ ܒܰܝܬܶܗ ܕܡܳܪܝܳܐ.
13 (ܠܝܬ)
14 (ܠܝܬ)
15 ܘܩܰܫ ܝܽܘܝܳܕܳܥ ܘܰܣܒܰܥ ܝܰܘ̈ܡܳܬܶܗ. ܘܡܺܝܬ ܒܰܪ ܡܳܐܐ ܘܰܬܠܳܬܺܝܢ ܫܢܺܝ̈ܢ.
16 ܘܩܰܒܪܽܘܗܝ ܒܰܩܪܺܝܬܳܐ ܕܕܰܘܺܝܕ ܒܰܩܒܽܘܪܬܳܐ ܕܡܰܠ̈ܟܶܐ ܘܶܐܡܰܪ. ܗܳܟܰܢܳܐ ܢܶܬܦܪܰܥ ܡܰܢ ܕܥܳܒܶܕ ܛܳܒܬܳܐ ܒܺܝܣܪܳܐܶܝܠ ܘܳܐܦ ܥܰܡ ܒܝܬܶܗ ܕܡܳܪܝܳܐ ܡܰܖ̈ܗܳܛܶܐ ܪܰܘܖ̈ܒܶܐ ܪܗܶܛ.
17 ܘܡܶܢ ܒܳܬܰܪ ܕܡܺܝܬ ܝܽܘܝܳܕܳܥ. ܐܶܬܰܘ ܪܰܘܖ̈ܒܳܢܶܐ ܕܺܝܗܽܘܕܳܐ. ܘܰܣܓܶܕܘ ܠܡܰܠܟܳܐ. ܡܶܛܽܠ ܕܰܫܡܰܥ ܐܶܢܽܘܢ.
18 ܘܰܫܒܰܩܘ ܠܒܰܝܬܶܗ ܕܡܳܪܝܳܐ ܐܰܠܳܗܳܐ ܕܰܐܒܳܗܰܝ̈ܗܽܘܢ. ܘܶܐܙܰܠܘ ܦܠܰܚܘ ܠܨܰܠ̈ܡܶܐ ܘܠܰܦܬܰܟܖ̈ܶܐ. ܘܰܗܘܳܐ ܪܽܘܓܙܳܐ ܥܰܠ ܝܺܗܽܘܕܳܐ ܥܰܠ ܐܽܘܪܺܫܠܶܡ. ܥܰܠ ܕܰܚܛܰܘ ܚܛܺܝܬܳܐ ܗܳܕܶܐ.
19 ܘܫܰܕܰܪ ܠܘܳܬܗܽܘܢ ܒܝܰܕ ܢܒܺܝ̈ܶܐ. ܠܡܰܗܦܳܟܽܘ ܐܶܢܽܘܢ ܡܶܢ ܐܽܘܖ̈ܚܳܬܗܽܘܢ. ܘܠܳܐ ܫܡܰܥܘ ܘܰܐܣܗܶܕ ܒܗܽܘܢ. ܘܠܳܐ ܩܰܒܶܠܘ.
20 ܘܪܽܘܚܶܗ ܕܡܳܪܝܳܐ ܠܶܒܫܰܬ ܠܰܙܟܰܪܝܳܐ ܒܰܪ ܝܽܘܝܳܕܳܥ ܟܳܗܢܳܐ. ܘܰܣܠܶܩ ܘܩܳܡ ܠܥܶܠ ܡܶܢ ܥܰܡܳܐ. ܘܶܐܡܰܪ ܠܗܽܘܢ. ܗܳܟܰܢܳܐ ܐܳܡܰܪ ܡܳܪܝܳܐ. ܠܡܳܢܳܐ ܥܒܰܪܬܽܘܢ ܥܰܠ ܦܽܘܩܕܳܢܰܘ̈ܗܝ ܕܡܳܪܝܳܐ. ܠܳܐ ܬܰܟܫܪܽܘܢ. ܡܶܛܽܠ ܕܰܫܒܰܩܬܽܘܢ ܐܽܘܪܚܝ. ܘܳܐܦ ܐܶܢܳܐ ܫܳܒܶܩ ܐ̱ܢܳܐ ܠܟܽܘܢ.
21 ܘܰܡܪܰܕܘ ܥܠܰܘܗܝ ܘܪܰܓܡܽܘܗܝ ܒܟܺܐܦ̈ܶܐ ܒܦܽܘܩܕܳܢܳܐ ܕܡܰܠܟܳܐ. ܒܕܳܪܬܳܐ ܕܒܰܝܬܶܗ ܕܡܳܪܝܳܐ.
22 ܘܠܳܐ ܐܰܪܓܶܫ ܝܽܘܐܳܫ ܡܰܠܟܳܐ. ܛܰܝ̈ܒܘܳܬܳܐ ܕܰܥܒܰܕ ܒܶܗ ܝܽܘܝܳܕܳܥ ܟܳܗܢܳܐ ܐܰܒܽܘܗܝ. ܘܩܰܛܶܠ ܠܰܒܢܰܘ̈ܗܝ ܡܶܢ ܒܳܬܪܶܗ. ܘܰܒܢܰܘ̈ܗܝ ܟܰܕ ܡܶܬܩܰܛܠܺܝܢ ܗܘܰܘ. ܐܳܡܪܺܝܢ. ܢܶܚܙܶܐ ܡܳܪܝܳܐ. ܘܢܶܬܒܰܥ.
23 ܘܰܗܘܳܐ ܠܚܰܪܬܳܗ̇ ܕܫܰܢ̱ܬܳܐ. ܣܠܶܩ ܥܠܰܘܗܝ ܚܰܝܠܳܐ ܕܰܐܕܽܘܡ. ܘܶܐܬܳܐ ܥܰܠ ܝܺܗܽܘܕܳܐ ܘܥܰܠ ܐܽܘܪܺܫܠܶܡ. ܘܚܰܒܶܠܘ ܟܽܠܗܽܘܢ ܪܰܘܖ̈ܒܢܰܘ̈ܗܝ ܕܥܰܡܳܐ. ܘܟܽܠ ܫܒܺܝܬܗܽܘܢ ܫܰܕܰܪܘ ܠܡܰܠܟܳܐ ܕܕܰܪܡܣܽܘܩ.
24 ܡܶܛܽܠ ܕܰܙܥܽܘܪܺܝܢ ܗܘܰܘ ܓܰܒܖ̈ܶܐ ܕܶܐܬܰܘ ܥܰܡ ܚܰܝܠܳܐ ܕܰܐܕܽܘܡ. ܘܡܳܪܝܳܐ ܐܰܫܠܶܡ ܠܗܽܘܢ ܚܰܝܠܳܐ ܕܣܰܓܺܝ ܛܳܒ. ܡܶܛܽܠ ܕܰܫܒܰܩܘ ܠܡܳܪܝܳܐ ܐܰܠܳܗܳܐ ܕܰܐܒܳܗ̈ܳܬܗܽܘܢ ܘܰܠܡܶܕܶܡ ܕܰܥܒܰܕ ܝܽܘܐܳܫ. ܐܰܣܠܝܽܘܗܝ ܕܰܝܳܢ̈ܶܐ. ܟܰܕ ܐܶܙܰܠܘ ܠܗܽܘܢ ܡܶܢ ܠܘܳܬܶܗ.
25 ܡܶܛܽܠ ܕܫܰܒܩܽܘܗܝ ܗܘܰܘ ܒܟܽܘܖ̈ܗܳܢܶܐ ܣܰܓܺܝ̈ܐܶܐ. ܘܶܐܬܢܟܶܠܘ ܥܠܰܘܗܝ ܥܰܒܕܰܘ̈ܗܝ. ܒܰܕܡܳܐ ܕܰܒܢܰܘ̈ܗܝ ܕܝܽܘܝܳܕܳܥ ܟܳܗܢܳܐ. ܘܩܰܛܠܽܘܗܝ ܥܰܠ ܥܰܪܣܶܗ. ܘܡܺܝܬ ܘܩܰܒܪܽܘܗܝ ܒܰܩܪܺܝܬܳܐ ܕܕܰܘܺܝܕ ܐܰܒܽܘܗܝ. ܘܠܳܐ ܩܰܒܪܽܘܗܝ ܒܰܩܒܽܘܪܬܳܐ ܕܡܰܠ̈ܟܶܐ.
26 ܘܗܳܠܶܝܢ ܫܡܳܗ̈ܶܐ ܕܐ̱ܢܳܫ̈ܳܐ ܕܶܐܬܢܟܶܠܘ ܥܠܰܘܗܝ. ܙܰܟܽܘܪ ܒܰܪ ܫܶܡܥܰܬ ܥܰܡܽܘܢܳܝܬܳܐ. ܘܝܳܗܽܘܙܳܒܳܪ ܒܰܪ ܢܛܽܘܪܽܘܬ ܡܽܘܐܳܒܳܝܬܳܐ. ܘܰܒܢܰܘ̈ܗܝ. ܘܣܽܘܓܳܐܐ ܕܐ̱ܢܳܫ̈ܳܐ ܕܶܐܬܢܟܶܠܘ ܥܠܰܘܗܝ.
27 ܘܫܰܪܟܳܐ ܕܰܚܛܳܗ̈ܶܐ ܕܰܥܒܰܕ ܒܒܰܝܬܶܗ ܕܡܳܪܝܳܐ. ܗܳܐ ܗܶܢܽܘܢ ܟܬܺܝܒܺܝܢ ܥܰܠ ܡܰܕܪܳܫܳܐ ܕܰܣܦܰܪ ܡܰܠ̈ܟܶܐ. ܘܰܐܡܠܶܟ ܐܳܡܽܘܨܺܝܳܐ ܒܪܶܗ ܒܳܬܪܶܗ.