2 Chronicles 23
The second Book of Chronicles
܀ ܒ ܕܘܒܪ ܝܘܡ̈ܬܐ ܟܓ ܀
1 ܒܫܰܢ̱ܬܳܐ ܫܒܺܝܥܳܝܬܳܐ. ܐܶܬܓܰܢ̱ܒܰܪ ܝܽܘܝܳܕܳܥ. ܘܰܕܒܰܪ ܠܪܰܘܖ̈ܒܳܢܶܐ ܕܡܰܐܘ̈ܳܬܳܐ. ܠܥܰܙܰܪܝܳܐ ܒܰܪ ܝܰܪܚܽܘܡ. ܘܠܺܐܝܫܶܡܥܺܝܠ ܒܰܪ ܝܽܘܚܰܢܳܢ. ܘܰܠܥܰܙܰܪܝܳܐ ܒܰܪ ܥܽܘܒܺܝܕ. ܘܠܰܫܡܰܥܝܳܐ ܒܰܪ ܥܰܕܽܘ. ܘܠܶܐܠܺܝܫܳܦܳܛ ܒܰܪ ܙܰܟܪܺܝ.
2 ܘܥ̣ܰܠܘ ܟܽܠܗܽܘܢ ܗܳܠܶܝܢ ܒܡܰܘܡܳܬܳܐ. ܕܢܶܬܟܰܪܟܽܘܢ ܒܺܝܗܽܘܕܳܐ. ܘܟܰܢܶܫܘ ܐܶܢܽܘܢ ܠܠܶܘ̈ܳܝܶܐ. ܡܶܢ ܟܽܠܗܶܝܢ ܩܽܘܖ̈ܝܳܐ ܕܺܝܗܽܘܕܳܐ. ܘܪܺܝܫܳܐ ܕܰܐܒܳܗ̈ܳܬܳܐ ܕܺܝܣܪܳܐܶܝܠ. ܘܶܐܬܰܘ ܠܽܐܘܪܺܫܠܶܡ.
3 ܘܺܝܡܰܘ ܟܽܠܶܗ ܥܰܡܳܐ ܒܡܰܘܡܳܬܳܐ. ܒܒܰܝܬܶܗ ܕܡܳܪܝܳܐ ܩܕܳܡ ܡܰܠܟܳܐ. ܘܶܐܡܰܪ ܠܗܽܘܢ. ܗܳܐ ܒܰܪ ܡܰܠܟܳܐ. ܗܽܘ ܢܩܽܘܡ ܥܠܰܝܟܽܘܢ. ܐܰܝܟܰܢܳܐ ܕܡܰܠܶܠ ܡܳܪܝܳܐ ܥܰܡ ܕܰܘܺܝܕ ܥܰܒܕܶܗ.
4 ܗܳܢܳܐ ܦܶܬܓܳܡܳܐ ܬܶܥܒܕܽܘܢ. ܦܶܠܓܳܐ ܡܶܢܟܽܘܢ ܒܡܰܥ̈ܠܰܝ ܫܰܒܬܳܐ ܕܟܳܗ̈ܢܶܐ ܘܰܕܠܶܘ̈ܳܝܶܐ. ܘܰܕܢܳܛܖ̈ܰܝ ܬܰܖ̈ܥܶܐ.
5 ܘܬܽܘܠܬܳܐ ܒܶܝܬ ܡܰܠܟܳܐ. ܘܬܽܘܠܬܳܐ ܒܬܰܪܥܳܐ ܕܛܰܒܳܚ̈ܶܐ ܘܟܽܠܶܗ ܥܰܡܳܐ ܢܳܛܪܺܝܢ ܒܕܳܪܬܳܐ ܕܒܶܝܬ ܡܳܪܝܳܐ.
6 ܘܠܳܐ ܢܶܗܘܶܐ ܐ̱ܢܳܫ ܥܳܐܶܠ ܠܒܰܝܬܶܗ ܕܡܳܪܝܳܐ. ܐܶܠܳܐ ܟܳܗ̈ܢܶܐ ܘܠܶܘ̈ܳܝܶܐ ܗܶܢܽܘܢ ܢܶܥܠܽܘܢ. ܡܶܛܽܠ ܕܩܰܕܺܝܫܺܝܢ ܐܶܢܽܘܢ. ܘܟܽܠܶܗ ܥܰܡܳܐ ܢܳܛܪܺܝܢ ܡܰܛܰܪܬܳܐ ܕܒܰܝܬܶܗ ܕܡܳܪܝܳܐ.
7 ܘܢܶܩܦܽܘܢ ܠܶܘ̈ܳܝܶܐ ܠܡܰܠܟܳܐ. ܟܰܕ ܚܕܺܝܪܺܝܢ ܠܶܗ. ܓܒܰܪ ܘܡܳܐܢܰܝ̈ ܙܰܝܢܶܗ ܒܺܐܝܕܶܗ. ܘܰܕܢܶܥܽܘܠ ܠܒܰܝܬܳܐ ܓܰܘܳܝܳܐ. ܢܡܽܘܬ ܘܰܗܘܰܘ ܠܘܳܬ ܡܰܠܟܳܐ ܒܡܰܥܠܶܗ ܘܰܒܡܰܦܩܶܗ.
8 ܘܰܥܒܰܕܘ ܠܶܘ̈ܳܝܶܐ ܘܟܽܠܗܽܘܢ ܕܒܶܝܬ ܝܺܗܽܘܕܳܐ. ܐܰܝܟܰܢܳܐ ܕܦܰܩܶܕ ܐܶܢܽܘܢ ܝܽܘܝܳܕܳܥ ܟܳܗܢܳܐ. ܘܰܕܒܰܪ ܓܰܒܪܳܐ ܠܚܰܒܪܶܗ. ܐܰܝܠܶܝܢ ܕܢܳܛܪܺܝܢ ܗܘܰܘ ܒܡܰܥ̈ܠܰܝ ܫܰܒܬܳܐ. ܥܰܡ ܐܰܝܠܶܝܢ ܕܢܳܛܪܺܝܢ ܗܘܰܘ ܒܡܰܦܩܰܝ̈ ܫܰܒܬܳܐ ܡܶܛܽܠ ܕܫܳܪܶܐ ܗܘܳܐ ܐܶܢܽܘܢ ܝܽܘܝܳܕܳܥ ܟܳܗܢܳܐ ܡܶܢ ܡܰܛܰܪܬܗܽܘܢ.
9 ܘܝܰܗܒ ܝܽܘܝܳܕܳܥ ܟܳܗܢܳܐ ܠܪܰܘܖ̈ܒܳܢܶܐ ܕܡܰܐܘ̈ܳܬܳܐ. ܖ̈ܽܘܡܚܶܐ ܘܣܰܟܖ̈ܶܐ. ܘܫܳܠ̈ܛܶܐ ܕܡܰܠܟܳܐ ܕܰܘܺܝܕ. ܕܺܐܝܬ ܗܘܳܐ ܒܒܰܝܬܶܗ ܕܡܳܪܝܳܐ.
10 ܘܩܳܡ ܟܽܠܶܗ ܥܰܡܳܐ. ܓܒܰܪ ܠܓܰܒܶܗ ܕܒܰܝܬܳܐ ܕܣܶܡܳܠܳܐ ܠܡܰܕܒܚܳܐ ܘܰܠܒܰܝܬܳܐ. ܘܚܰܕܪܽܘܗܝ ܠܡܰܠܟܳܐ.
11 ܘܰܐܦܶܩܘ ܠܒܰܪ ܡܰܠܟܳܐ. ܘܝܰܗܒܘ ܒܪܺܝܫܶܗ ܬܳܓܳܐ ܘܚܽܘܕܪܳܐ. ܘܰܐܩܺܝܡܽܘܗܝ ܒܡܰܠܟܽܘܬܳܐ. ܘܡܰܫܚܽܘܗܝ ܝܽܘܝܳܕܳܥ ܘܰܒܢܰܘ̈ܗܝ. ܘܳܐܡܪܺܝܢ ܢܺܚܶܐ ܡܰܠܟܳܐ.
12 ܘܫܶܡܥܰܬ ܥܬܰܠܝܳܐ ܩܳܠܳܐ ܕܥܰܡܳܐ ܕܚܳܕܶܐ. ܘܰܡܫܰܒܚܺܝܢ ܠܡܰܠܟܳܐ. ܘܶܐܬܳܬ ܠܘܳܬ ܡܰܠܟܳܐ ܠܒܰܝܬܶܗ ܕܡܳܪܝܳܐ.
13 ܘܚܳܙܝܳܐ. ܘܗܳܐ ܡܰܠܟܳܐ ܩܳܐܶܡ ܥܰܠ ܐܶܣܛܽܘܢܳܐ. ܐܰܝܟ ܢܳܡܽܘܣܳܐ ܕܡܰܠ̈ܟܶܐ. ܘܩܰܖ̈ܢܳܬܳܐ ܟܦܺܝ̈ܦܳܬܳܐ ܘܰܦܫܺܝ̈ܛܳܬܳܐ. ܩܳܖ̈ܝܳܢ ܩܕܳܡ ܡܰܠܟܳܐ. ܘܟܽܠܶܗ ܥܰܡܳܐ ܚܳܕܶܝܢ. ܘܰܡܝܰܒܒܺܝܢ ܒܩܰܖ̈ܢܳܬܳܐ. ܘܰܡܫܰܒܚܺܝܢ ܒܬܶܫܒ̈ܚܳܬܳܐ ܘܣܰܕܩܰܬ ܥܬܰܠܝܳܐ ܢܰܚ̈ܬܶܝܗ̇. ܘܳܐܡܪܳܐ. ܟܰܕܳܒܽܘܬܳܐ. ܟܰܕܳܒܽܘܬܳܐ.
14 ܘܰܦܩܰܕ ܝܽܘܝܳܕܳܥ ܟܳܗܢܳܐ ܠܪܰܒܝ ܡܰܐܘ̈ܳܬܳܐ. ܕܫܰܠܺܝܛܺܝܢ ܥܰܠ ܚܰܝܠܳܐ. ܘܶܐܡܰܪ ܠܗܽܘܢ. ܐܰܦܩܽܘܗ̇ ܠܒܰܪ ܡܶܢ ܣܶܕܖ̈ܶܐ. ܘܡܰܢ ܕܥܳܐܶܠ ܒܳܬܪܳܗ̇. ܢܶܬܩܛܶܠ ܒܚܰܪܒܳܐ. ܡܶܛܽܠ ܕܶܐܡܰܪ ܟܳܗܢܳܐ. ܠܳܐ ܒܒܰܝܬܶܗ ܕܡܳܪܝܳܐ.
15 ܘܰܥܒܰܕܘ ܠܳܗ̇ ܕܽܘܟܬܳܐ. ܘܥܶܠܰܬ ܒܽܐܘܪܚܳܐ ܕܡܰܥܠܳܢܳܐ ܕܖ̈ܰܟܫܳܐ. ܘܡܺܝܬܰܬ ܬܰܡܳܢ.
16 ܘܺܝܡܳܐ ܝܽܘܝܳܕܳܥ ܒܡܰܘܡܳܬܳܐ ܒܰܝܢܰܘ̈ܗܝ ܠܒܶܝܬ ܟܽܠܶܗ ܥܰܡܳܐ. ܘܒܶܝܬ ܡܰܠܟܳܐ. ܠܡܶܗܘܳܐ ܥܰܡܳܐ ܠܡܳܪܝܳܐ.
17 ܘܥ̣ܰܠܘ ܟܽܠܶܗ ܥܰܡܳܐ ܕܺܝܣܪܳܐܶܝܠ. ܠܒܶܝܬ ܒܰܥܠܳܐ. ܘܥܰܩܪܽܘܗܝ ܘܰܥܠܰܘ̈ܳܬܶܗ ܬܰܒܰܪܘ ܫܰܦܺܝܪ ܘܨܰܠܡܰܘ̈ܗܝ ܕܰܩܶܩܘ ܘܟܽܘܡܪܳܐ ܕܒܰܥܠܳܐ ܩܰܛܠܽܘܗܝ ܩܕܳܡ ܡܰܕܒܚܳܐ.
18 ܘܰܥܒܰܕ ܝܽܘܝܳܕܳܥ ܫܰܠܺܝܛܳܢ̈ܶܐ ܒܒܰܝܬܶܗ ܕܡܳܪܝܳܐ. ܘܟܳܗ̈ܢܶܐ ܘܠܶܘ̈ܳܝܶܐ ܕܦܰܠܶܓ ܕܰܘܺܝܕ. ܕܢܶܗܘܽܘܢ ܢܳܛܽܘܖ̈ܶܐ ܥܰܠ ܒܰܝܬܶܗ ܕܡܳܪܝܳܐ. ܠܡܰܣܳܩܽܘ ܥܠܰܘ̈ܳܬܳܐ. ܐܰܝܟ ܕܰܟܬܺܝܒ ܒܽܐܘܪܳܝܬܶܗ ܕܡܽܘܫܶܐ. ܒܚܰܕܽܘܬܳܐ ܘܰܒܬܶܫܒ̈ܚܳܬܳܐ ܥܰܠ ܐܺܝܕܰܘ̈ܗܝ ܕܕܰܘܺܝܕ.
19 ܘܰܢܩܽܘܡܽܘܢ ܢܳܛܖ̈ܰܝ ܬܰܖ̈ܥܶܐ ܥܰܠ ܬܰܖ̈ܥܶܐ ܕܒܰܝܬܶܗ ܕܡܳܪܝܳܐ. ܕܠܳܐ ܢܶܥܠܽܘܢ ܠܬܰܡܳܢ ܡܣܰܝ̈ܒܶܐ.
20 ܘܰܢܣܰܒܘ ܖ̈ܺܝܫܰܝ ܡܰܐܘ̈ܳܬܳܐ. ܫܰܠܺܝ̈ܛܶܐ ܕܥܰܡܳܐ. ܘܟܽܠܶܗ ܥܰܡܳܐ ܕܰܐܪܥܳܐ. ܘܶܐܬܰܘ ܒܓܰܘ ܬܰܪܥܳܐ ܥܰܠ ܟܽܘܪܣܝܳܐ ܕܡܰܠܟܽܘܬܳܐ.
21 ܘܚܳܕܶܝܢ ܟܽܠܶܗ ܥܰܡܳܐ ܕܰܐܪܥܳܐ. ܘܰܒܩܰܖ̈ܢܳܬܳܐ ܡܫܰܒܚܺܝܢ. ܘܠܰܥܬܰܠܝܳܐ ܩܛܰܠܘ ܒܚܰܪܒܳܐ.