2 Chronicles 5
The second Book of Chronicles
܀ ܒ ܕܘܒܪ ܝܘܡ̈ܬܐ ܗ ܀
1 ܘܫܶܠܡܰܬ ܟܽܠܳܗ̇ ܥܒܺܝܕܬܳܐ ܕܰܥܒܰܕ ܫܠܶܝܡܽܘܢ ܒܒܰܝܬܶܗ ܕܡܳܪܝܳܐ. ܘܰܐܝܬܺܝ ܫܠܶܝܡܽܘܢ ܩܽܘܕܫܳܐ ܕܕܰܘܺܝܕ ܐܰܒܽܘܗܝ. ܟܶܣܦܳܐ ܘܕܰܗܒܳܐ ܘܡܳܐܢ̈ܶܐ. ܘܟܰܢܶܫ ܐܶܢܽܘܢ. ܘܰܐܥܶܠ ܩܦܰܣ ܐܶܢܽܘܢ ܒܒܶܝܬ ܓܰܙܳܐ ܕܡܳܪܝܳܐ.
2 ܗܳܝܕܶܝܢ ܟܰܢܶܫ ܗܘܳܐ ܫܠܶܝܡܽܘܢ ܟܽܠܗܽܘܢ ܩܰܫܺܝ̈ܫܶܐ ܕܺܝܣܪܳܐܶܝܠ. ܖ̈ܺܝܫܰܝ ܫܰܒ̈ܛܶܐ. ܘܪܰܘܖ̈ܒܳܢܰܝ ܐܰܒܳܗ̈ܳܬܳܐ ܕܰܒܢܰܝ̈ ܝܺܣܪܳܐܶܝܠ. ܘܶܐܬܰܘ ܠܘܳܬ ܡܰܠܟܳܐ ܫܠܶܝܡܽܘܢ ܠܽܐܘܪܺܫܠܶܡ. ܠܡܰܣܳܩܽܘ ܠܩܺܐܒܽܘܬܳܐ ܕܺܐܝܬ ܒܳܗ̇ ܕܺܝܰܐܬܺܝܩܺܝ ܕܡܳܪܝܳܐ. ܡܶܢ ܩܪܺܝܬܶܗ ܕܕܰܘܺܝܕ. ܕܗܺܝ ܗܺܝ ܨܶܗܝܽܘܢ.
3 ܘܶܐܬܟܰܢܰܫܘ ܘܶܐܬܰܘ ܠܘܳܬ ܡܰܠܟܳܐ ܫܠܶܝܡܽܘܢ ܠܽܐܘܪܺܫܠܶܡ. ܒܝܰܪܚܳܐ ܕܶܐܒܳܐ ܕܥܺܐܕܳܐ ܕܰܡܛܰܠ̈ܠܶܐ. ܗܽܘ ܝܰܪܚܳܐ ܫܒܺܝܥܳܝܳܐ.
4 ܘܶܐܬܰܘ ܟܽܠܗܽܘܢ ܩܰܫܺܝ̈ܫܶܐ ܕܺܝܣܪܳܐܶܝܠ. ܘܰܫܩܰܠܘ ܟܳܗ̈ܢܶܐ ܠܩܺܐܒܽܘܬܳܐ.
5 ܘܰܐܣܩܽܘܗ̇ ܠܩܺܐܒܽܘܬܶܗ ܕܡܳܪܝܳܐ. ܘܰܠܡܰܫܟܢܳܐ ܕܥܺܐܕܳܐ. ܘܰܠܟܽܠܗܽܘܢ ܡܳܐܢܰܝ̈ ܩܽܘܕܫܳܐ ܕܰܗܘܰܘ ܒܡܰܫܟܢܳܐ. ܘܰܐܣܶܩܘ ܐܶܢܽܘܢ ܟܳܗ̈ܢܶܐ ܘܠܶܘܳܝ̈ܶܐ.
6 ܘܡܰܠܟܳܐ ܫܠܶܝܡܽܘܢ ܘܟܽܠܶܗ ܥܰܡܳܐ ܕܺܝܣܪܳܐܶܝܠ ܕܶܐܬܛܰܝܰܒܘ. ܩܳܝܡܺܝܢ ܩܕܳܡ ܩܺܐܒܽܘܬܳܐ ܘܰܡܕܰܒܚܺܝܢ ܥܳܢ̈ܳܐ ܘܬܰܘܖ̈ܶܐ ܕܠܳܐ ܡܶܬܡܰܢܝܳܐ ܘܠܳܐ ܡܶܬܚܰܫܒܺܝܢ ܡܶܢ ܣܽܘܓܐܗܽܘܢ.
7 ܘܰܐܝܬܺܝܘ ܟܳܗ̈ܢܶܐ ܠܩܺܐܒܽܘܬܳܐ ܕܡܳܪܝܳܐ. ܘܣܳܡܽܘܗ̇ ܠܩܺܐܒܽܘܬܳܐ ܒܕܽܘܟܬܳܗ̇ ܒܶܝܬ ܩܕܽܘܫ ܩܽܘܕ̈ܫܶܐ. ܬܚܶܝܬ ܟܶܢܦܰܝ̈ܗܽܘܢ ܕܰܟܖ̈ܽܘܒܶܐ.
8 ܘܰܗܘܰܘ ܟܖ̈ܽܘܒܶܐ ܦܪܺܝܣܺܝܢ ܥܰܠ ܕܽܘܟܬܳܗ̇ ܕܩܺܐܒܽܘܬܳܐ. ܘܰܡܟܰܣܶܝܢ ܗܘܰܘ ܟܖ̈ܽܘܒܶܐ ܥܰܠ ܩܺܐܒܽܘܬܳܐ ܘܥܰܠ ܩܽܘܦܶܝ̈ܗ̇ ܡܶܢ ܠܥܶܠ.
9 ܘܰܗܘܰܘ ܐܰܪܺܝܟܺܝܢ ܩܽܘ̈ܦܶܐ. ܘܡܶܬܚܙܶܝܢ ܗܘܰܘ ܖ̈ܺܝܫܰܝܗܽܘܢ ܡܶܢ ܬܚܶܝܬ ܩܺܐܒܽܘܬܳܐ ܠܓܰܘܶܗ ܕܒܰܝܬܳܐ. ܘܠܳܐ ܡܶܬܚܙܶܝܢ ܗܘܰܘ ܠܒܰܪ. ܘܰܗܘܰܘ ܬܰܡܳܢ. ܥܕܰܡܳܐ ܠܝܰܘܡܳܢܳܐ.
10 ܠܳܐ ܐܺܝܬ ܒܩܺܐܒܽܘܬܳܐ. ܐܶܠܳܐ ܬܰܪܬܶܝܢ ܠܽܘ̈ܚܶܐ ܕܟܺܐܦܳܐ. ܕܣܳܡ ܬܰܡܳܢ ܡܽܘܫܶܐ. ܕܰܐܚܶܬ ܡܶܢ ܛܽܘܪܳܐ ܕܣܺܝܢܰܝ. ܕܗܺܝ ܗܺܝ ܕܺܝܰܐܬܺܝܩܺܝ ܕܝܰܗܒ ܡܳܪܝܳܐ ܠܰܒܢܰܝ̈ ܝܺܣܪܳܐܶܝܠ ܟܰܕ ܢܦܰܩܘ ܡܶܢ ܐܰܪܥܳܐ ܕܡܶܨܪܶܝܢ.
11 ܘܰܗܘܳܐ ܕܟܰܕ ܢܦܰܩܘ̱ ܟܳܗ̈ܢܶܐ ܡܶܢ ܒܶܝܬ ܬܶܫܡܶܫܬܳܐ. ܡܶܛܽܠ ܕܟܽܠܗܽܘܢ ܟܳܗ̈ܢܶܐ ܕܶܐܫܬܟܰܚܘ ܬܰܡܳܢ. ܥ̣ܰܠܘ̱ ܠܒܶܝܬ ܬܶܫܡܶܫܬܳܐ.
12 (ܠܝܬ)
13 (ܠܝܬ)
14 ܘܠܳܐ ܐܶܫܟܰܚܘ ܟܳܗ̈ܢܶܐ ܠܰܡܩܳܡ ܠܰܡܫܰܡܳܫܽܘ ܡܶܢ ܩܕܳܡ ܥܢܳܢܳܐ. ܡܶܛܽܠ ܕܶܐܬܡܠܺܝ ܒܰܝܬܶܗ ܕܡܳܪܝܳܐ ܡܶܢ ܙܺܝܘܳܐ ܕܰܫܟܺܝܢܬܶܗ.