Acts 25
Acts of the Apostles
܀ ܦܪܟܣܝܣ ܕܫܠܝ̈ܚܐ ܟܗ ܀
1- ܘܟܰܕ ܐܶܬܳܐ ܦܶܗ̱ܣܛܳܘܣ ܠܩܶܣܰܪܺܝܰܐ܆ ܒܳܬܰܪ ܬܠܳܬܳܐ ܝܰܘ̈ܡܺܝܢ ܣܠܶܩ ܠܽܐܘܪܺܫܠܶܡ.
2- ܘܰܐܘܕܥܽܘܗ̱ܝ ܪ̈ܰܒܰܝ ܟܳܗ̈ܢܶܐ ܘܪ̈ܺܝܫܶܐ ܕܺܝܗܽܘ̈ܕܳܝܶܐ ܥܰܠ ܦܰܘܠܳܘܣ. ܒܳܥܶܝܢ ܗ̱ܘܰܘ ܡܶܢܶܗ܁
3- ܟܰܕ ܫܳܐܠܺܝܢ ܠܶܗ ܗܳܕܶܐ ܛܰܝܒܽܘܬܳܐ܆ ܕܰܢܫܰܕܰܪ ܢܰܝܬܶܝܘܗ̱ܝ ܠܽܐܘܪܺܫܠܶܡ܆ ܟܰܕ ܥܳܒܕܺܝܢ ܗ̱ܘܰܘ ܟܡ̈ܺܐܢܶܐ ܒܽܐܘܪܚܳܐ ܕܢܶܩܛܠܽܘܢܳܝܗ̱ܝ.
4- ܘܦܺܗ̱ܣܛܳܘܣ ܦܰܢܺܝ ܦܶܬܓܳܡܳܐ܆ ܕܦܰܘܠܳܘܣ ܡܶܬܢܛܰܪ ܒܩܶܣܰܪܺܝܰܐ. ܘܶܐܢܳܐ ܡܣܰܪܗܰܒ ܐ̱ܢܳܐ ܕܶܐܚܙܽܘܩ.
5- ܐܰܝܠܶܝܢ ܗܳܟܺܝܠ ܕܺܐܝܬ ܒܟܽܘܢ ܕܡܳܛܝܳܐ ܒܺܐܝ̈ܕܰܝܗܽܘܢ܆ ܢܶܚܬܽܘܢ ܥܰܡܰܢ. ܘܥܰܠ ܟܽܠ ܣܰܟܠܽܘ ܕܺܐܝܬ ܒܶܗ ܒܓܰܒܪܳܐ܆ ܢܩܰܛܪܓܽܘܢ.
6- ܘܟܰܕ ܗܘܳܐ ܬܰܡܳܢ ܝܰܘ̈ܡܳܬܳܐ ܬܡܳܢܝܳܐ ܐܰܘ ܥܶܣܪܳܐ܆ ܢܚܶܬ ܠܶܗ ܠܩܶܣܰܪܺܝܰܐ. ܘܰܠܝܰܘܡܳܐ ܐ̱ܚܪܺܢܳܐ܆ ܝܺܬܶܒ ܥܰܠ ܒܺܝܡ. ܘܰܦܩܰܕ ܕܢܰܝܬܽܘܢ ܠܦܰܘܠܳܘܣ.
7- ܘܟܰܕ ܐܶܬܳܐ܆ ܚܰܕܪܽܘܗ̱ܝ ܝܺܗܽܘ̈ܕܳܝܶܐ ܕܰܢܚܶܬܘ ܡܶܢ ܐܽܘܪܺܫܠܶܡ. ܘܪ̈ܶܫܝܳܢܶܐ ܣܰܓܺܝ̈ܶܐܐ ܘܕ̈ܺܝܢܶܐ ܩܫܰܝ̈ܳܐ ܡܰܝܬܶܝܢ ܗ̱ܘܰܘ ܒܳܬܪܶܗ܆ ܐܰܝܠܶܝܢ ܕܠܳܐ ܡܶܫܟܚܺܝܢ ܗ̱ܘܰܘ ܕܰܢܚܰܘܽܘܢ.
8- ܘܟܰܕ ܦܰܘܠܳܘܣ ܢܳܦܶܩ ܗ̱ܘܳܐ ܪܽܘܚܳܐ ܕܠܳܐ ܐܰܣܟܶܠ ܡܶܕܶܡ܇ ܠܳܐ ܒܢܳܡܽܘܣܳܐ ܕܺܝܗܽܘ̈ܕܳܝܶܐ ܘܠܳܐ ܒܗܰܝܟܠܳܐ ܘܠܳܐ ܒܩܶܣܰܪ.
9- ܦܶܗ̱ܣܛܳܘܣ ܕܶܝܢ ܡܶܛܽܠ ܕܨܳܒܶܐ ܗ̱ܘܳܐ ܕܢܰܪܫܶܐ ܛܰܝܒܽܘܬܳܐ ܒܺܝܗܽܘ̈ܕܳܝܶܐ܆ ܐܶܡܰܪ ܠܶܗ ܠܦܰܘܠܳܘܣ. ܨܳܒܶܐ ܐܰܢ̱ܬ ܕܬܶܣܰܩ ܠܽܐܘܪܺܫܠܶܡ܆ ܘܬܰܡܳܢ ܥܰܠ ܗܳܠܶܝܢ ܬܶܬܕܺܝܢ ܩܕܳܡܰܝ؟
10- ܥܢܳܐ ܦܰܘܠܳܘܣ ܘܶܐܡܰܪ. ܥܰܠ ܒܺܝܡ ܩܶܣܰܪ ܩܳܐܶܡ ܐ̱ܢܳܐ. ܗܳܪܟܰܐ ܗ̱ܘ ܙܳܕܶܩ ܠܺܝ ܠܡܶܬܬܕܳܢܽܘ. ܠܳܐ ܡܶܕܶܡ ܚܛܺܝܬ ܠܺܝܗܽܘ̈ܕܳܝܶܐ܆ ܐܰܝܟ ܕܳܐܦ ܐܰܢ̱ܬ ܝܳܕܰܥ ܐܰܢ̱ܬ.
11- ܘܶܐܢ ܣܰܟܠܽܘܬܳܐ ܥܒܺܝܕܳܐ ܠܺܝ ܐܰܘ ܡܶܕܶܡ ܕܫܳܘܶܐ ܠܡܰܘܬܳܐ܆ ܠܳܐ ܡܶܫܬܶܐܠ ܐ̱ܢܳܐ ܡܶܢ ܡܰܘܬܳܐ. ܐܶܢ ܕܶܝܢ ܠܰܝܬ ܡܶܕܶܡ ܨܶܐܕ̈ܰܝ ܡܶܢ ܗܳܠܶܝܢ ܕܰܡܩܰܛܪܓܺܝܢ ܠܺܝ܆ ܠܳܐ ܐ̱ܢܳܫ ܝܳܗܶܒ ܠܺܝ ܠܗܽܘܢ ܡܰܘܗܒܰܬ. ܒܓܶܢ̈ܰܘܗ̱ܝ ܕܩܶܣܰܪ ܩܳܪܶܐ ܐ̱ܢܳܐ.
12- ܗܳܝܕܶܝܢ ܦܶܗ̱ܣܛܳܘܣ ܡܰܠܶܠ ܥܰܡ ܒܢ̈ܰܝ ܡܶܠܟܶܗ ܘܶܐܡܰܪ. ܒܓܶܢ ܩܶܣܰܪ ܩܪܰܝܬ܆ ܠܘܳܬ ܩܶܣܰܪ ܐܳܙܶܠ ܐܰܢ̱ܬ܀
13- ܘܟܰܕ ܗܘܰܘ ܝܰܘ̈ܡܳܬܳܐ܆ ܢܚܶܬ ܐܰܓܪܺܦܳܘܣ ܡܰܠܟܳܐ ܘܒܶܪܢܺܝܩܺܐ ܠܩܶܣܰܪܺܝܰܐ ܕܢܶܫܶܐܠܽܘܢ ܫܠܳܡܶܗ ܕܦܶܗ̱ܣܛܳܘܣ.
14- ܘܟܰܕ ܗ̱ܘܰܘ ܠܘܳܬܶܗ ܝܰܘ̈ܡܳܬܳܐ܆ ܐܶܫܬܰܥܺܝ ܦܶܗ̱ܣܛܳܘܣ ܠܡܰܠܟܳܐ ܕܺܝܢܶܗ ܕܦܰܘܠܳܘܣ܁ ܟܰܕ ܐܳܡܰܪ. ܓܰܒܪܳܐ ܚܰܕ ܐܰܣܺܝܪܳܐ ܐܶܫܬܒܶܩ ܡܶܢ ܐܺܝ̈ܕܰܝ ܦܺܝܠܺܟܣ.
15- ܘܟܰܕ ܗ̱ܘܺܝܬ ܒܽܐܘܪܺܫܠܶܡ܆ ܐܰܘܕܰܥܘ ܠܺܝ ܥܠܰܘܗ̱ܝ ܪ̈ܰܒܰܝ ܟܳܗ̈ܢܶܐ ܘܩܰܫܺܝ̈ܫܶܐ ܕܺܝܗܽܘ̈ܕܳܝܶܐ. ܘܰܒܥܰܘ ܕܶܐܥܒܶܕ ܠܗܽܘܢ ܕܺܝܢܳܐ ܡܶܢܶܗ.
16- ܘܶܐܡܪܶܬ ܠܗܽܘܢ܆ ܕܠܰܝܬ ܥܝܳܕܳܐ ܠܪ̈ܽܗ̱ܘܡܳܝܶܐ ܕܢܶܬܠܽܘܢ ܒܰܪܢܳܫܳܐ ܡܰܘܗܒܰܬ ܠܩܶܛܠܳܐ܇ ܥܕܰܡܳܐ ܕܢܺܐܬܶܐ ܒܥܶܠ ܕܺܝܢܶܗ ܘܢܰܟܣܺܝܘܗ̱ܝ ܒܰܐܦܰܘ̈ܗ̱ܝ܇ ܘܢܶܬܺܝܗܶܒ ܠܶܗ ܐܰܬܪܳܐ ܠܡܰܦܰܩ ܒܪܽܘܚܳܐ ܥܰܠ ܡܳܐ ܕܡܶܬܪܫܶܐ.
17- ܘܟܰܕ ܐܶܬܺܝܬ ܠܟܳܐ܆ ܕܠܳܐ ܬܽܘܗܳܝܳܐ ܠܝܰܘܡܳܐ ܐ̱ܚܪܺܢܳܐ܁ ܝܶܬܒܶܬ ܥܰܠ ܒܺܝܡ. ܘܦܶܩܕܶܬ ܕܢܰܝܬܽܘܢܳܝܗ̱ܝ ܠܺܝ ܠܓܰܒܪܳܐ.
18- ܘܩܳܡܘ ܥܰܡܶܗ ܩܛܺܝܓܪ̈ܳܢܰܘܗ̱ܝ܆ ܘܠܳܐ ܐܶܫܟܰܚܘ ܡܶܕܶܡ ܪܶܫܝܳܢܳܐ ܒܺܝܫܳܐ ܕܰܢܚܰܘܽܘܢ ܥܠܰܘܗ̱ܝ܇ ܐܰܝܟ ܡܳܐ ܕܣܳܒܰܪ ܗ̱ܘܺܝܬ.
19- ܙܺܛܺܡ̈ܶܐ ܕܶܝܢ ܡܶܕܶܡ ܡܶܕܶܡ ܥܰܠ ܕܶܚܠܰܬܗܽܘܢ ܐܺܝܬ ܗ̱ܘܳܐ ܠܗܽܘܢ ܠܘܳܬܶܗ܆ ܘܥܰܠ ܝܶܫܽܘܥ ܐ̱ܢܳܫ ܕܡܺܝܬ܇ ܗܰܘ ܕܳܐܡܰܪ ܗ̱ܘܳܐ ܦܰܘܠܳܘܣ ܕܚܰܝ ܗ̱ܘ.
20- ܘܡܶܛܽܠ ܕܠܳܐ ܩܳܐܶܡ ܗ̱ܘܺܝܬ ܐܶܢܳܐ ܥܰܠ ܒܥܳܬܳܐ ܕܗܳܠܶܝܢ܆ ܐܶܡܪܶܬ ܗ̱ܘܺܝܬ ܠܦܰܘܠܳܘܣ. ܕܶܐܢ ܒܳܥܶܐ ܐܰܢ̱ܬ܆ ܕܬܺܐܙܰܠ ܠܽܐܘܪܺܫܠܶܡ܇ ܘܬܰܡܳܢ ܬܶܬܕܺܝܢ ܥܰܠ ܗܳܠܶܝܢ.
21- ܗܽܘ ܕܶܝܢ ܒܥܳܐ ܕܢܶܬܢܛܰܪ ܠܕܺܝܢܶܗ ܕܩܶܣܰܪ. ܘܦܶܩܕܶܬ ܕܢܶܬܢܛܰܪ܆ ܥܕܰܡܳܐ ܕܶܐܫܰܕܪܺܝܘܗ̱ܝ ܠܘܳܬ ܩܶܣܰܪ.
22- ܘܶܐܡܰܪ ܐܰܓܪܺܦܳܘܣ. ܨܳܒܶܐ ܗ̱ܘܺܝܬ ܕܶܐܫܡܥܺܝܘܗ̱ܝ ܠܓܰܒܪܳܐ ܗܳܢܳܐ. ܘܦܺܗ̱ܣܛܳܘܣ ܐܶܡܰܪ܆ ܕܠܰܡܚܳܪ ܫܳܡܰܥ ܐܰܢ̱ܬ ܠܶܗ܀
23- ܘܰܠܝܰܘܡܳܐ ܐ̱ܚܪܺܢܳܐ܆ ܐܶܬܳܐ ܐܰܓܪܺܦܳܘܣ ܘܒܶܪܢܺܝܩܺܐ ܒܙܰܘܚܳܐ ܣܰܓܺܝܳܐܐ. ܘܥܰܠ ܠܒܶܝܬ ܕܺܝܢܳܐ܁ ܥܰܡ ܟܺܠܺܝܰܪ̈ܟܶܐ ܘܪ̈ܺܝܫܶܐ ܕܰܡܕܺܝܢ̱ܬܳܐ. ܘܰܦܩܰܕ ܦܶܗ̱ܣܛܳܘܣ ܘܶܐܬܳܐ ܦܰܘܠܳܘܣ.
24- ܘܶܐܡܰܪ ܦܶܗ̱ܣܛܳܘܣ. ܐܰܓܪܺܦܳܘܣ ܡܰܠܟܳܐ ܘܟܽܠܟܽܘܢ ܓܰܒܪ̈ܶܐ ܕܺܐܝܬܰܝܟܽܘܢ ܥܰܡܰܢ܆ ܥܰܠ ܗܳܢܳܐ ܓܰܒܪܳܐ ܕܚܳܙܶܝܢ ܐܢ̱ܬܽܘܢ܆ ܟܽܠܶܗ ܥܰܡܳܐ ܕܺܝܗܽܘ̈ܕܳܝܶܐ ܩܰܒܠܰܢܝ ܒܽܐܘܪܺܫܠܶܡ ܘܗܳܪܟܳܐ܇ ܟܰܕ ܩܳܥܶܝܢ ܕܠܳܐ ܬܽܘܒ ܘܳܠܶܐ ܠܶܗ ܠܗܳܢܳܐ ܕܢܺܚܶܐ.
25- ܐܶܢܳܐ ܕܶܝܢ ܐܰܕܪܟܶܬ܆ ܕܡܶܕܶܡ ܕܫܳܘܶܐ ܠܡܰܘܬܳܐ ܠܳܐ ܣܥܺܝܪ ܠܶܗ. ܘܡܶܛܽܠ ܕܗܽܘ ܒܥܳܐ ܕܢܶܬܢܛܰܪ ܠܕܺܝܢܶܗ ܕܩܶܣܰܪ܆ ܦܶܩܕܶܬ ܕܢܶܫܬܰܕܰܪ.
26- ܘܠܳܐ ܝܳܕܰܥ ܐ̱ܢܳܐ ܡܳܢܳܐ ܐܶܟܬܽܘܒ ܥܠܰܘܗ̱ܝ ܠܩܶܣܰܪ. ܡܶܛܽܠ ܗܳܢܳܐ ܨܒܺܝܬ ܠܡܰܝܬܳܝܽܘܬܶܗ ܩܕܳܡܰܝܟܽܘܢ܆ ܘܝܰܬܺܝܪܳܐܺܝܬ ܩܕܳܡܰܝܟ ܡܰܠܟܳܐ ܐܰܓܪܺܦܶܐ܆ ܕܡܳܐ ܕܶܐܫܬܰܐܰܠ ܕܺܝܢܶܗ܆ ܐܶܫܟܰܚ ܡܳܢܳܐ ܐܶܟܬܽܘܒ.
27- ܠܳܐ ܓܶܝܪ ܘܳܠܶܐ ܕܟܰܕ ܡܫܰܕܪܺܝܢܰܢ ܓܰܒܪܳܐ ܐܰܣܺܝܪܳܐ܆ ܕܠܳܐ ܢܶܟܬܽܘܒ ܣܰܟܠܽܘܬܶܗ܀