Acts 7
Acts of the Apostles
܀ ܦܪܟܣܝܣ ܕܫܠܝ̈ܚܐ ܙ ܀
1- ܘܫܰܐܠܶܗ ܪܰܒ ܟܳܗ̈ܢܶܐ ܕܶܐܢ ܗܽܘ ܕܗܳܠܶܝܢ ܗܳܟܰܢܳܐ ܐܶܢܶܝܢ؟
2- ܗܽܘ ܕܶܝܢ ܐܶܡܰܪ ܠܗܽܘܢ. ܓܰܒܪ̈ܶܐ܁ ܐܰܚܺܝ̈ܢ܁ ܘܰܐܒܳܗ̈ܳܬܰܢ. ܫܡܰܥܘ. ܐܰܠܳܗܳܐ ܕܬܶܫܒܽܘܚܬܳܐ ܐܶܬܚܙܺܝ ܠܰܐܒܽܘܢ ܐܰܒܪܳܗܳܡ܆ ܟܰܕ ܐܺܝܬܰܘܗ̱ܝ ܗ̱ܘܳܐ ܒܶܝܬ ܢܰܗܪܺܝܢ. ܥܰܕ ܠܳܐ ܢܺܐܬܶܐ ܢܶܥܡܰܪ ܒܚܳܪܳܢ.
3- ܘܶܐܡܰܪ ܗ̱ܘܳܐ ܠܶܗ܆ ܕܦܽܘܩ ܡܶܢ ܐܰܪܥܳܟ. ܘܡܶܢ ܠܘܳܬ ܒܢ̈ܰܝ ܛܽܘܗܡܳܟ܆ ܘܬܳܐ ܠܰܐܪܥܳܐ ܐܰܝܕܳܐ ܕܶܐܚܰܘܶܝܟ.
4- ܗܳܝܕܶܝܢ ܢܦܰܩ ܐܰܒܪܳܗܳܡ ܡܶܢ ܐܰܪܥܳܐ ܕܟܰܠܕܳܝ̈ܶܐ܆ ܘܶܐܬܳܐ ܥܡܰܪ ܒܚܳܪܳܢ. ܘܡܶܢ ܬܰܡܳܢ ܟܰܕ ܡܺܝܬ ܐܰܒܽܘܗ̱ܝ܆ ܫܰܢܝܶܗ ܐܰܠܳܗܳܐ ܠܰܐܪܥܳܐ ܗܳܕܶܐ܇ ܕܒܳܗ̇ ܥܳܡܪܺܝܢ ܐܢ̱ܬܽܘܢ ܝܰܘܡܳܢܳܐ.
5- ܘܠܳܐ ܝܰܗ̱ܒ ܠܶܗ ܝܳܪܬܽܘܬܳܐ ܒܳܗ̇. ܐܳܦ ܠܳܐ ܕܽܘܪܟܬܳܐ ܕܪܶܓܠܳܐ. ܘܶܐܫܬܰܘܕܺܝ ܗ̱ܘܳܐ ܕܢܶܬܠܺܝܗ̇ ܠܶܗ ܐܰܝܟ ܕܰܠܡܺܐܪܬܳܗ̇܁ ܠܶܗ. ܘܰܠܙܰܪܥܶܗ. ܟܰܕ ܠܰܝܬ ܗ̱ܘܳܐ ܠܶܗ ܒܪܳܐ.
6- ܘܡܰܠܶܠ ܗ̱ܘܳܐ ܥܰܡܶܗ ܐܰܠܳܗܳܐ ܟܰܕ ܐܳܡܰܪ ܠܶܗ܆ ܕܢܶܗܘܶܐ ܙܰܪܥܳܟ ܬܰܘܬܳܒܳܐ ܒܰܐܪܥܳܐ ܢܽܘܟܪܳܝܬܳܐ. ܘܰܢܫܰܥܒܕܽܘܢܳܝܗ̱ܝ. ܘܢܰܒܶܐܫܽܘܢ ܠܶܗ ܐܰܪܒܰܥܡܳܐܐ ܫܢܺܝ̈ܢ.
7- ܘܰܠܥܰܡܳܐ ܕܢܶܦܠܚܽܘܢ ܥܰܒܕܽܘܬܳܐ܆ ܐܶܕܽܘܢܺܝܘܗ̱ܝ ܐܶܢܳܐ ܐܳܡܰܪ ܐܰܠܳܗܳܐ. ܘܡܶܢ ܒܳܬܰܪ ܗܳܠܶܝܢ܆ ܢܶܦܩܽܘܢ܁ ܘܢܶܦܠܚܽܘܢ ܠܺܝ ܒܰܐܬܪܳܐ ܗܳܢܳܐ.
8- ܘܝܰܗ̱ܒ ܠܶܗ ܕܺܝܰܬܺܩܺܐ ܕܰܓܙܽܘܪܬܳܐ. ܘܗܳܝܕܶܝܢ ܐܰܘܠܶܕ ܠܺܐܝܣܚܳܩ. ܘܓܰܙܪܶܗ ܒܝܰܘܡܳܐ ܬܡܺܝܢܳܝܳܐ. ܘܺܐܝܣܚܳܩ ܐܰܘܠܶܕ ܠܝܰܥܩܽܘܒ. ܝܰܥܩܽܘܒ ܐܰܘܠܶܕ ܠܰܬܪܶܥܣܰܪ ܐܰܒܳܗ̈ܳܬܰܢ܀
9- ܘܗܶܢܽܘܢ ܐܰܒܳܗ̈ܳܬܰܢ ܛܰܢܘ ܒܝܰܘܣܶܦ. ܘܙܰܒܢܽܘܗ̱ܝ ܠܡܶܨܪܶܝܢ. ܘܰܐܠܳܗܳܐ ܥܰܡܶܗ ܗ̱ܘܳܐ.
10- ܘܦܰܪܩܶܗ ܗ̱ܘܳܐ ܡܶܢ ܟܽܠܗܽܘܢ ܐܽܘ̈ܠܨܳܢܰܘܗ̱ܝ. ܘܝܰܗ̱ܒ ܠܶܗ ܛܰܝܒܽܘܬܳܐ ܘܚܶܟܡܬܳܐ ܩܕܳܡ ܦܶܪܥܽܘܢ ܡܰܠܟܳܐ ܕܡܶܨܪܶܝܢ. ܘܰܐܩܺܝܡܶܗ ܪܺܝܫܳܐ ܥܰܠ ܡܶܨܪܶܝܢ. ܘܥܰܠ ܒܰܝܬܶܗ ܟܽܠܶܗ܀
11- ܘܰܗܘܳܐ ܟܰܦܢܳܐ܁ ܘܽܐܘܠܨܳܢܳܐ ܪܰܒܳܐ܁ ܒܟܽܠܳܗ̇ ܡܶܨܪܶܝܢ. ܘܒܰܐܪܥܳܐ ܕܰܟܢܰܥܢ. ܘܠܰܝܬ ܗ̱ܘܳܐ ܠܗܽܘܢ ܠܰܐܒܳܗ̈ܳܬܰܢ ܠܡܶܣܒܰܥ.
12- ܘܟܰܕ ܫܡܰܥ ܝܰܥܩܽܘܒ ܕܺܐܝܬ ܥܒܽܘܪܳܐ ܒܡܶܨܪܶܝܢ܆ ܫܰܕܰܪ ܗ̱ܘܳܐ ܠܰܐܒܳܗ̈ܳܬܰܢ ܠܽܘܩܕܰܡ.
13- ܘܟܰܕ ܐܶܙܰܠܘ ܕܬܰܪܬܶܝܢ ܙܰܒܢܺܝ̈ܢ܆ ܐܰܘܕܰܥ ܝܰܘܣܶܦ ܢܰܦܫܶܗ ܠܰܐܚܰܘ̈ܗ̱ܝ ܘܶܐܬܺܝܕܰܥ ܠܦܶܪܥܽܘܢ ܛܽܘܗܡܶܗ ܕܝܰܘܣܶܦ.
14- ܘܫܰܕܰܪ ܗ̱ܘܳܐ ܝܰܘܣܶܦ܆ ܘܰܐܝܬܝܶܗ ܠܰܐܒܽܘܗ̱ܝ ܝܰܥܩܽܘܒ. ܘܰܠܟܽܠܶܗ ܛܽܘܗܡܶܗ. ܘܗܳܘܶܝܢ ܗ̱ܘܰܘ ܒܡܶܢܝܳܢܳܐ܆ ܫܰܒܥܺܝܢ ܘܚܰܡܶܫ ܢܰܦ̈ܫܳܢ.
15- ܘܰܢܚܶܬ ܝܰܥܩܽܘܒ ܠܡܶܨܪܶܝܢ. ܘܡܺܝܬ ܬܰܡܳܢ܁ ܗܽܘ ܘܰܐܒܳܗ̈ܳܬܰܢ.
16- ܘܶܐܫܬܰܢܺܝ ܠܰܫܟܺܝܡ. ܘܶܐܬܬܣܺܝܡ ܒܩܰܒܪܳܐ܁ ܕܰܙܒܰܢ ܗ̱ܘܳܐ ܐܰܒܪܳܗܳܡ ܒܟܶܣܦܳܐ ܡܶܢ ܒܢ̈ܰܝ ܚܡܽܘܪ܀
17- ܘܟܰܕ ܡܰܛܺܝ ܗ̱ܘܳܐ ܙܰܒܢܳܐ ܕܡܶܕܶܡ ܕܶܐܫܬܰܘܕܺܝ ܗ̱ܘܳܐ ܒܡܰܘ̈ܡܳܬܳܐ ܐܰܠܳܗܳܐ ܠܰܐܒܪܳܗܳܡ܆ ܣܓܺܝ ܗ̱ܘܳܐ ܥܰܡܳܐ ܘܰܬܩܶܦ ܒܡܶܨܪܶܝܢ܆
18- ܥܕܰܡܳܐ ܕܩܳܡ ܡܰܠܟܳܐ ܐ̱ܚܪܺܢܳܐ ܥܰܠ ܡܶܨܪܶܝܢ܇ ܐܰܝܢܳܐ ܕܠܳܐ ܝܳܕܰܥ ܗ̱ܘܳܐ ܠܶܗ ܠܝܰܘܣܶܦ.
19- ܘܶܐܨܛܰܢܰܥ ܥܰܠ ܛܽܘܗܡܰܢ. ܘܰܐܒܶܐܫ ܠܰܐܒܳܗ̈ܳܬܰܢ. ܘܰܦܩܰܕ ܕܢܶܗܘܽܘܢ ܡܶܫܬܕܶܝܢ ܝܰܠܽܘܕܰܝ̈ܗܽܘܢ. ܕܠܳܐ ܢܺܚܽܘܢ.
20- ܒܶܗ ܒܙܰܒܢܳܐ ܗܰܘ ܐܶܬܺܝܠܶܕ ܡܽܘܫܶܐ. ܘܰܪܚܺܝܡ ܗ̱ܘܳܐ ܠܰܐܠܳܗܳܐ. ܘܶܐܬܪܰܒܺܝ ܝܰܪ̈ܚܶܐ ܬܠܳܬܳܐ ܒܶܝܬ ܐܰܒܽܘܗ̱ܝ.
21- ܘܟܰܕ ܐܶܫܬܕܺܝ ܡܶܢ ܐܶܡܶܗ܆ ܐܶܫܟܰܚܬܶܗ ܒܰܪ̱ܬ ܦܶܪܥܽܘܢ. ܘܪܰܒܝܰܬܶܗ ܠܳܗ̇ ܠܰܒܪܳܐ.
22- ܘܶܐܬܪܕܺܝ ܡܽܘܫܶܐ ܒܟܽܠܳܗ̇ ܚܶܟܡܬܳܐ ܕܡܶܨܪ̈ܳܝܶܐ. ܘܰܥܬܺܝܕ ܗ̱ܘܳܐ ܒܡܶܠܰܘ̈ܗ̱ܝ. ܘܳܐܦ ܒܰܥ̈ܒܳܕܰܘܗ̱ܝ܀
23- ܘܟܰܕ ܗܘܳܐ ܒܰܪ ܐܰܪܒܥܺܝܢ ܫܢܺܝ̈ܢ܆ ܣܠܶܩ ܗ̱ܘܳܐ ܥܰܠ ܠܶܒܶܗ܆ ܕܢܶܣܥܽܘܪ ܠܰܐܚܰܘ̈ܗ̱ܝ ܒܢ̈ܰܝ ܐܺܝܣܪܳܐܶܝܠ.
24- ܘܰܚܙܳܐ ܠܚܰܕ ܡܶܢ ܒܢ̈ܰܝ ܫܰܪܒܬܶܗ ܕܡܶܬܕܒܰܪ ܒܰܩܛܺܝܪܳܐ܆ ܘܬܰܒܥܶܗ. ܘܰܥܒܰܕ ܠܶܗ ܕܺܝܢܳܐ. ܘܩܰܛܠܶܗ ܠܡܶܨܪܳܝܳܐ ܗܰܘ. ܕܡܰܣܟܶܠ ܗ̱ܘܳܐ ܒܶܗ.
25- ܘܰܣܒܰܪ ܕܡܶܣܬܰܟܠܺܝܢ ܐܰܚܰܘ̈ܗ̱ܝ ܒܢ̈ܰܝ ܐܺܝܣܪܳܐܶܝܠ܇ ܕܰܐܠܳܗܳܐ ܒܺܐܝܕܶܗ ܝܳܗܶܒ ܠܗܽܘܢ ܦܽܘܪܩܳܢܳܐ ܘܠܳܐ ܐܶܣܬܰܟܰܠܘ.
26- ܘܰܠܝܰܘܡܳܐ ܐ̱ܚܪܺܢܳܐ܆ ܐܶܬܚܙܺܝ ܠܗܽܘܢ܁ ܟܰܕ ܢܳܨܶܝܢ ܗܶܢܽܘܢ ܚܰܕ ܥܰܡ ܚܰܕ. ܘܰܡܦܺܝܣ ܗ̱ܘܳܐ ܠܗܽܘܢ ܕܢܶܫܬܰܝܢܽܘܢ. ܟܰܕ ܐܳܡܰܪ. ܓܰܒܪ̈ܶܐ ܐܰܚ̈ܶܐ ܐܰܢ̱ܬܽܘܢ܆ ܡܶܛܽܠ ܡܳܢܳܐ ܡܰܣܟܠܺܝܢ ܐܢ̱ܬܽܘܢ ܚܰܕ ܒܚܰܕ؟
27- ܗܰܘ ܕܶܝܢ ܕܡܰܣܟܶܠ ܗ̱ܘܳܐ ܒܚܰܒܪܶܗ܆ ܕܰܚܩܶܗ ܡܶܢ ܠܘܳܬܶܗ. ܘܶܐܡܰܪ ܠܶܗ. ܡܰܢܽܘ ܐܰܩܺܝܡܳܟ ܥܠܰܝܢ ܪܺܝܫܳܐ ܘܕܰܝܳܢܳܐ؟
28- ܕܰܠܡܳܐ ܠܡܶܩܛܠܰܢܝ ܒܳܥܶܐ ܐܰܢ̱ܬ؟ ܐܰܝܟ ܕܰܩܛܰܠܬ ܐܶܬܡܳܠܝ ܠܡܶܨܪܳܝܳܐ ܗܰܘ؟
29- ܘܰܥܪܰܩ ܡܽܘܫܶܐ ܒܡܶܠܬܳܐ ܗܳܕܶܐ܆ ܘܰܗܘܳܐ ܬܰܘܬܳܒܳܐ ܒܰܐܪܥܳܐ ܕܡܶܕܝܰܢ. ܘܰܗܘܰܘ ܠܶܗ ܬܪܶܝܢ ܒܢܺܝ̈ܢ܀
30- ܘܟܰܕ ܡܠܰܝ̈ ܠܶܗ ܬܰܡܳܢ ܐܰܪܒܥܺܝܢ ܫܢܺܝ̈ܢ܆ ܐܶܬܚܙܺܝ ܠܶܗ ܒܡܰܕܒܪܳܐ ܕܛܽܘܪ ܣܺܝܢܰܝ܆ ܡܰܠܰܐܟܶܗ ܕܡܳܪܝܳܐ ܒܢܽܘܪܳܐ ܕܝܳܩܕܳܐ ܒܣܰܢܝܳܐ.
31- ܘܟܰܕ ܚܙܳܐ ܡܽܘܫܶܐ ܐܶܬܕܰܡܰܪ ܒܚܶܙܘܳܐ. ܘܟܰܕ ܐܶܬܩܰܪܰܒ ܕܢܶܚܙܶܐ܆ ܐܶܡܰܪ ܠܶܗ ܡܳܪܝܳܐ ܒܩܳܠܳܐ.
32- ܐܶܢܳܐ ܐ̱ܢܳܐ ܐܰܠܳܗܳܐ ܕܰܐܒܳܗܰܝ̈ܟ. ܐܰܠܳܗܶܗ ܕܰܐܒܪܳܗܳܡ܁ ܘܕܺܐܝܣܚܳܩ. ܘܰܕܝܰܥܩܽܘܒ. ܘܟܰܕ ܪܰܬܺܝܬ ܗ̱ܘܳܐ ܡܽܘܫܶܐ܆ ܠܳܐ ܡܰܡܪܰܚ ܗ̱ܘܳܐ ܕܰܢܚܽܘܪ ܒܚܶܙܘܳܐ.
33- ܘܶܐܡܰܪ ܠܶܗ ܡܳܪܝܳܐ. ܫܪܺܝ ܡܣܳܐܢܰܝ̈ܟ ܡܶܢ ܪ̈ܶܓܠܰܝܟ. ܐܰܪܥܳܐ ܓܶܝܪ ܕܩܳܐܶܡ ܐܰܢ̱ܬ ܒܳܗ̇. ܩܰܕܺܝܫܳܐ ܗ̱ܝ.
34- ܡܶܚܙܳܐ ܚܙܺܝܬ ܐܽܘܠܨܳܢܶܗ ܕܥܰܡܝ ܕܰܒܡܶܨܪܶܝܢ܆ ܘܬܶܢܚ̈ܳܬܶܗ ܫܶܡܥܶܬ. ܘܢܶܚܬܶܬ ܕܶܐܦܪܽܘܩ ܐܶܢܽܘܢ. ܘܗܳܫܳܐ ܬܳܐ ܐܶܫܰܕܪܳܟ ܠܡܶܨܪܶܝܢ܀
35- ܠܗܳܢܳܐ ܡܽܘܫܶܐ ܕܰܟܦܰܪܘ ܒܶܗ ܟܰܕ ܐܳܡܪܺܝܢ: ܕܡܰܢܽܘ ܐܰܩܺܝܡܳܟ ܥܠܰܝܢ ܪܺܝܫܳܐ ܘܕܰܝܳܢܳܐ؟ ܠܶܗ ܠܗܳܢܳܐ ܐܰܠܳܗܳܐ ܪܺܝܫܳܐ ܘܦܳܪܽܘܩܳܐ ܫܰܕܰܪ ܠܗܽܘܢ܇ ܒܺܐܝ̈ܕܰܝ ܡܰܠܰܐܟܳܐ ܗܰܘ ܕܶܐܬܚܙܺܝ ܠܶܗ ܒܣܰܢܝܳܐ.
36- ܗܳܢܰܘ ܕܰܐܦܶܩ ܐܶܢܽܘܢ܇ ܟܰܕ ܥܳܒܶܕ ܐܳܬܘ̈ܳܬܳܐ ܘܬܶܕܡܪ̈ܳܬܳܐ ܘܰܓܒܰܪ̈ܘܳܬܳܐ܇ ܒܰܐܪܥܳܐ ܕܡܶܨܪܶܝܢ. ܘܰܒܝܰܡܳܐ ܕܣܽܘܦ. ܘܰܒܡܰܕܒܪܳܐ ܫܢܺܝ̈ܢ ܐܰܪܒܥܺܝܢ.
37- ܗܳܢܰܘ ܡܽܘܫܶܐ ܗܰܘ ܕܶܐܡܰܪ ܠܰܒܢ̈ܰܝ ܐܺܝܣܪܳܐܶܝܠ܇ ܕܰܢܒܺܝܳܐ ܢܩܺܝܡ ܠܟܽܘܢ ܡܳܪܝܳܐ ܐܰܠܳܗܳܐ ܡܶܢ ܐܰܚܰܝ̈ܟܽܘܢ ܐܰܟܘܳܬܝ܁ ܠܶܗ ܬܶܫܡܥܽܘܢ.
38- ܗܳܢܰܘ ܕܰܗܘܳܐ ܒܰܟܢܽܘܫܬܳܐ ܒܡܰܕܒܪܳܐ܇ ܥܰܡ ܡܰܠܰܐܟܳܐ ܗܰܘ ܕܡܰܠܶܠ ܗ̱ܘܳܐ ܥܰܡܶܗ. ܘܥܰܡ ܐܰܒܳܗ̈ܳܬܰܢ. ܒܛܽܘܪܳܐ ܕܣܺܝܢܰܝ. ܘܗܽܘܝܽܘ ܕܩܰܒܶܠ ܡ̈ܶܠܶܐ ܚܰܝ̈ܳܬܳܐ ܕܠܰܢ ܢܶܬܶܠ.
39- ܘܠܳܐ ܨܒܰܘ ܠܡܶܬܕܢܳܝܽܘ ܠܶܗ ܐܰܒܳܗ̈ܳܬܰܢ. ܐܶܠܳܐ ܫܰܒܩܽܘܗ̱ܝ܆ ܘܰܒܠܶܒܰܘ̈ܳܬܗܽܘܢ ܗܦܰܟܘ ܠܗܽܘܢ ܠܡܶܨܪܶܝܢ܇
40- ܟܰܕ ܐܳܡܪܺܝܢ ܠܰܐܗܪܽܘܢ. ܥܒܶܕ ܠܰܢ ܐܰܠܳܗ̈ܶܐ ܕܢܺܐܙܽܠ̱ܘܢ ܩܕܳܡܰܝܢ܇ ܡܶܛܽܠ ܕܗܳܢܳܐ ܡܽܘܫܶܐ ܕܰܐܦܩܰܢ ܡܶܢ ܐܰܪܥܳܐ ܕܡܶܨܪܶܝܢ܆ ܠܳܐ ܝܳܕܥܺܝܢܰܢ ܡܳܢܳܐ ܗܘܳܝܗ̱ܝ؟
41- ܘܰܥܒܰܕܘ ܠܗܽܘܢ ܥܶܓܠܳܐ ܒܝܰܘ̈ܡܳܬܳܐ ܗܳܢܽܘܢ܆ ܘܕܰܒܰܚܘ ܕܶܒܚ̈ܶܐ ܠܰܦܬܰܟܪ̈ܶܐ. ܘܡܶܬܒܰܣܡܺܝܢ ܗ̱ܘܰܘ ܒܰܥܒܳܕ ܐܺܝ̈ܕܰܝܗܽܘܢ.
42- ܘܰܗܦܰܟ ܐܰܠܳܗܳܐ ܘܰܐܫܠܶܡ ܐܶܢܽܘܢ܆ ܕܢܶܗܘܽܘܢ ܦܳܠܚܺܝܢ ܠܚܰܝ̈ܠܰܘܳܬܳܐ ܕܰܫܡܰܝܳܐ܇ ܐܰܝܟ ܕܰܟܬܺܝܒ ܒܰܟܬܳܒܳܐ ܕܰܢܒܺܝ̈ܶܐ. ܠܡܳܐ ܐܰܪܒܥܺܝܢ ܫܢܺܝ̈ܢ ܒܡܰܕܒܪܳܐ: ܢܶܟܣܬܳܐ ܐܰܘ ܕܶܒܚܬܳܐ ܩܰܪܶܒܬܽܘܢ ܠܺܝ ܒܢ̈ܰܝ ܐܺܝܣܪܳܐܶܝܠ؟
43- ܐܶܠܳܐ ܫܩܰܠܬܽܘܢ ܡܰܫܟܢܶܗ ܕܡܰܠܟܽܘܡ܆ ܘܟܰܘܟܒܶܗ ܕܰܐܠܳܗܳܐ ܕܰܪܦܳܢ܆ ܕܶܡܘ̈ܳܬܳܐ ܕܰܥܒܰܕ ܬܽܘܢ ܕܬܶܗܘܽܘܢ ܣܳܓܕܺܝܢ ܠܗܶܝܢ. ܐܶܫܰܢܶܝܟܽܘܢ ܠܗܰܠ ܡܶܢ ܒܳܒܶܝܠ܀
44- ܗܳܐ ܡܰܫܟܢܳܐ ܕܣܳܗܕܽܘܬܳܐ ܕܰܐܒܳܗ̈ܳܬܰܢ. ܒܡܰܕܒܪܳܐ ܐܺܝܬܰܘܗ̱ܝ ܗ̱ܘܳܐ܇ ܐܰܝܟ ܡܳܐ ܕܦܰܩܶܕ ܗܰܘ ܕܡܰܠܶܠ ܥܰܡ ܡܽܘܫܶܐ ܠܡܶܥܒܕܶܗ ܒܰܕܡܽܘܬܳܐ ܕܚܰܘܝܶܗ.
45- ܘܠܶܗ ܠܗܳܢܳܐ ܡܰܫܟܢܳܐ܆ ܐܳܦ ܡܰܥܳܠܽܘ ܐܰܥܠܽܘܗ̱ܝ ܐܰܒܳܗ̈ܳܬܰܢ ܥܰܡ ܝܶܫܽܘܥ܇ ܠܰܐܪܥܳܐ ܕܝܰܗ̱ܒ ܠܗܽܘܢ ܐܰܠܳܗܳܐ ܝܽܘܪܬܳܢܳܐ܇ ܡܶܢ ܥܰܡ̱̈ܡܶܐ ܗܳܢܽܘܢ ܕܰܫܕܳܐ ܡܶܢ ܩܕܳܡܰܝܗܽܘܢ. ܘܶܐܬܝܰܒܰܠ ܥܕܰܡܳܐ ܠܝܰܘ̈ܡܰܘܗ̱ܝ ܕܕܰܘܺܝܕ܇
46- ܗܰܘ ܕܶܐܫܟܰܚ ܪ̈ܰܚܡܶܐ ܩܕܳܡܰܘܗ̱ܝ ܕܰܐܠܳܗܳܐ. ܘܫܶܐܠ ܕܢܶܫܟܰܚ ܡܰܫܟܢܳܐ ܠܰܐܠܳܗܶܗ ܕܝܰܥܩܽܘܒ.
47- ܫܠܶܝܡܳܘܢ ܕܶܝܢ. ܒܢܳܐ ܠܶܗ ܒܰܝܬܳܐ.
48- ܘܰܡܪܰܝܡܳܐ ܠܳܐ ܫܪܳܐ ܒܰܥܒܳܕ ܐܺܝ̈ܕܰܝܳܐ. ܐܰܝܟ ܕܶܐܡܰܪ ܢܒܺܝܳܐ.
49- ܕܰܫܡܰܝܳܐ ܟܽܘܪܣܰܝ. ܘܰܐܪܥܳܐ ܟܽܘܒܫܳܐ ܕܰܬܚܶܝܬ ܪ̈ܶܓܠܰܝ. ܐܰܝܢܰܘ ܒܰܝܬܳܐ ܕܬܶܒܢܽܘܢ ܠܺܝ؟ ܐܳܡܰܪ ܡܳܪܝܳܐ. ܐܰܘ ܐܰܝܢܰܘ ܐܰܬܪܳܐ ܕܰܢܝܳܚܬܝ؟
50- ܠܳܐ ܗܳܐ ܐܺܝܕܳܐ ܕܺܝܠܝ܆ ܥܶܒܕܰܬ ܗܳܠܶܝܢ ܟܽܠܗܶܝܢ؟܀
51- ܐܳܘ ܩܰܫ̈ܝܰܝ ܩܕܳܠܳܐ ܘܰܕܠܳܐ ܓܙܺܝܪܺܝܢ ܒܠܶܒܗܽܘܢ ܘܰܒܡܰܫܡܰܥܬܗܽܘܢ܅ ܐܰܢ̱ܬܽܘܢ ܒܟܽܠܙܒܰܢ ܠܽܘܩܒܰܠ ܪܽܘܚܳܐ ܕܩܽܘܕܫܳܐ ܩܳܝܡܺܝܢ ܐܢ̱ܬܽܘܢ. ܐܰܝܟ ܐܰܒܳܗܰܝ̈ܟܽܘܢ. ܐܳܦ ܐܰܢ̱ܬܽܘܢ.
52- ܠܰܐܝܢܳܐ ܓܶܝܪ ܡܶܢ ܢܒܺܝ̈ܶܐ ܕܠܳܐ ܪܕܰܦܘ ܘܩܰܛܶܠܘ ܐܰܒܳܗܰܝ̈ܟܽܘܢ؟ ܠܰܐܝܠܶܝܢ ܕܩܰܕܶܡܘ ܒܰܕܶܩܘ ܥܰܠ ܡܶܐܬܺܝܬܶܗ ܕܙܰܕܺܝܩܳܐ܇ ܗܰܘ ܕܰܐܢ̱ܬܽܘܢ ܐܰܫܠܶܡܬܽܘܢ ܘܰܩܛܰܠܬܽܘܢܳܝܗ̱ܝ.
53- ܘܩܰܒܶܠܬܽܘܢ ܢܳܡܽܘܣܳܐ ܒܝܰܕ ܦܽܘܩܕܳܢܳܐ ܕܡ̈ܰܠܰܐܟܶܐ. ܘܠܳܐ ܢܛܰܪܬܽܘܢܳܝܗ̱ܝ܀
54- ܘܟܰܕ ܫܡܰܥܘ ܗ̱ܘܰܘ ܗܳܠܶܝܢ܆ ܐܶܬܡܠܺܝܘ ܚܶܡܬܳܐ ܒܢܰܦܫܗܽܘܢ. ܘܰܡܚܰܪܩܺܝܢ ܗ̱ܘܰܘ ܫܶܢܰܝ̈ܗܽܘܢ ܥܠܰܘܗ̱ܝ.
55- ܘܗܽܘ ܟܰܕ ܡܠܶܐ ܗ̱ܘܳܐ ܗܰܝܡܳܢܽܘܬܳܐ ܘܪܽܘܚܳܐ ܕܩܽܘܕܫܳܐ܆ ܚܳܪ ܒܰܫܡܰܝܳܐ. ܘܰܚܙܳܐ ܬܶܫܒܽܘܚܬܳܐ ܕܰܐܠܳܗܳܐ܆ ܘܰܠܝܶܫܽܘܥ ܟܰܕ ܩܳܐܶܡ ܡܶܢ ܝܰܡܺܝܢܳܐ ܕܰܐܠܳܗܳܐ.
56- ܘܶܐܡܰܪ. ܗܳܐ ܚܳܙܶܐ ܐ̱ܢܳܐ ܫܡܰܝ̈ܳܐ ܟܰܕ ܦܬܺܝܚܺܝܢ܆ ܘܠܰܒܪܶܗ ܕܐ̱ܢܳܫܳܐ ܟܰܕ ܩܳܐܶܡ ܡܶܢ ܝܰܡܺܝܢܳܐ ܕܰܐܠܳܗܳܐ.
57- ܘܰܩܥܰܘ ܒܩܳܠܳܐ ܪܳܡܳܐ. ܘܣܰܟܰܪܘ ܐܶܕ̈ܢܰܝܗܽܘܢ. ܘܰܓܙܰܡܘ ܥܠܰܘܗ̱ܝ ܟܽܠܗܽܘܢ.
58- ܘܶܐܚܰܕܘ ܐܰܦܩܽܘܗ̱ܝ ܠܒܰܪ ܡܶܢ ܡܕܺܝܢ̱ܬܳܐ ܘܪܳܓܡܺܝܢ ܗ̱ܘܰܘ ܠܶܗ. ܘܰܐܝܠܶܝܢ ܕܰܐܣܗܶܕܘ ܥܠܰܘܗ̱ܝ܆ ܣܳܡܘ ܢܰܚܬܰܝ̈ܗܽܘܢ ܠܘܳܬ ܪ̈ܶܓܠܰܘܗ̱ܝ ܕܰܥܠܰܝܡܳܐ ܚܰܕ܇ ܕܡܶܬܩܪܶܐ ܫܳܐܘܳܠ.
59- ܘܪܳܓܡܺܝܢ ܗ̱ܘܰܘ ܠܶܗ ܠܶܐܣܛܶܦܰܢܳܘܣ܁ ܟܰܕ ܡܨܰܠܶܐ ܘܳܐܡܰܪ܆ ܡܳܪܰܢ ܝܶܫܽܘܥ. ܩܰܒܶܠ ܪܽܘܚܝ.
60- ܘܟܰܕ ܣܳܡ ܒܽܘܪܟܳܐ܆ ܩܥܳܐ ܒܩܳܠܳܐ ܪܳܡܳܐ ܘܶܐܡܰܪ. ܡܳܪܰܢ܁ ܠܳܐ ܬܩܺܝܡ ܠܗܽܘܢ ܗܳܕܶܐ ܚܛܺܝܬܳܐ! ܘܟܰܕ ܗܳܕܶܐ ܐܶܡܰܪ. ܫܟܶܒ܀