peshitta bible

Matthew 1

The Gospel according to Matthew

← Go back to NT index

܀ ܡܬܝ ܐ ܀

1- ܟܬܳܒܳܐ ܕܺܝܠܺܝܕܽܘܬܶܗ ܕܝܶܫܽܘܥ ܡܫܺܝܚܳܐ܆ ܒܪܶܗ ܕܕܰܘܺܝܕ ܒܪܶܗ ܕܰܐܒܪܳܗܳܡ.
2- ܐܰܒܪܳܗܳܡ ܐܰܘܠܶܕ ܠܺܐܝܣܚܳܩ. ܐܺܝܣܚܳܩ ܐܰܘܠܶܕ ܠܝܰܥܩܽܘܒ. ܝܰܥܩܽܘܒ ܐܰܘܠܶܕ ܠܺܝܗܽܘܕܳܐ ܘܠܰܐܚܰܘ̈ܗ̱ܝ.
3- ܝܺܗܽܘܕܳܐ ܐܰܘܠܶܕ ܠܦܰܪܨ ܘܰܠܙܰܪܚ ܡܶܢ ܬܳܡܳܪ. ܦܰܪܨ ܐܰܘܠܶܕ ܠܚܶܨܪܽܘܢ. ܚܶܨܪܽܘܢ ܐܰܘܠܶܕ ܠܳܐܪܳܡ.
4- ܐܳܪܳܡ ܐܰܘܠܶܕ ܠܥܰܡܺܝܢܳܕܳܒ܆ ܥܰܡܺܝܢܳܕܳܒ ܐܰܘܠܶܕ ܠܢܰܚܫܽܘܢ܆ ܢܰܚܫܽܘܢ ܐܰܘܠܶܕ ܠܣܰܠܡܽܘܢ.
5- ܘܣܰܠܡܽܘܢ ܐܰܘܠܶܕ ܠܒܳܥܳܙ ܡܶܢ ܪܳܚܳܒ. ܒܳܥܳܙ ܐܰܘܠܶܕ ܠܥܽܘܒܺܝܕ ܡܶܢ ܪܥܽܘܬ. ܥܽܘܒܺܝܕ ܐܰܘܠܶܕ ܠܺܐܝܫܰܝ.
6- ܐܺܝܫܰܝ ܐܰܘܠܶܕ ܠܕܰܘܺܝܕ ܡܰܠܟܳܐ. ܕܰܘܺܝܕ ܐܰܘܠܶܕ ܠܰܫܠܶܝܡܽܘܢ ܡܶܢ ܐܰܢ̱ܬܬܶܗ ܕܽܐܘܪܺܝܳܐ.
7- ܫܠܶܝܡܽܘܢ ܐܰܘܠܶܕ ܠܰܪܚܶܒܥܰܡ. ܪܚܶܒܥܰܡ ܐܰܘܠܶܕ ܠܰܐܒܺܝܳܐ. ܐܰܒܺܝܳܐ ܐܰܘܠܶܕ ܠܳܐܣܳܐ.
8- ܐܳܣܳܐ ܐܰܘܠܶܕ ܠܝܳܗܽܘܫܳܦܳܛ. ܝܳܗܽܘܫܳܦܳܛ ܐܰܘܠܶܕ ܠܝܽܘܪܳܡ. ܝܽܘܪܳܡ ܐܰܘܠܶܕ ܠܥܽܘܙܺܝܳܐ.
9- ܥܽܘܙܺܝܳܐ ܐܰܘܠܶܕ ܠܝܽܘܬܳܡ. ܝܽܘܬܳܡ ܐܰܘܠܶܕ ܠܳܐܚܳܙ. ܐܳܚܳܙ ܐܰܘܠܶܕ ܠܚܶܙܰܩܝܳܐ.
10- ܚܶܙܰܩܝܳܐ ܐܰܘܠܶܕ ܠܰܡܢܰܫܶܐ. ܡܢܰܫܶܐ ܐܰܘܠܶܕ ܠܰܐܡܽܘܢ. ܐܰܡܽܘܢ ܐܰܘܠܶܕ ܠܝܽܘܫܺܝܳܐ.
11- ܝܽܘܫܺܝܳܐ ܐܰܘܠܶܕ ܠܝܽܘܟܰܢܝܳܐ ܘܠܰܐܚܰܘ̈ܗ̱ܝ ܒܓܳܠܽܘܬܳܐ ܕܒܳܒܶܝܠ܀
12- ܡܶܢ ܒܳܬܰܪ ܓܳܠܽܘܬܳܐ ܕܶܝܢ ܕܒܳܒܶܝܠ܆ ܝܽܘܟܰܢܝܳܐ ܐܰܘܠܶܕ ܠܫܶܠܰܬܺܐܶܝܠ. ܫܶܠܰܬܺܐܶܝܠ ܐܰܘܠܶܕ ܠܙܽܘܪܒܳܒܶܠ.
13- ܙܽܘܪܒܳܒܶܠ ܐܰܘܠܶܕ ܠܰܐܒܺܝܽܘܕ. ܐܰܒܺܝܽܘܕ ܐܰܘܠܶܕ ܠܶܐܠܝܳܩܺܝܡ. ܐܶܠܝܳܩܺܝܡ ܐܰܘܠܶܕ ܠܥܳܙܽܘܪ.
14- ܥܳܙܽܘܪ ܐܰܘܠܶܕ ܠܙܳܕܽܘܩ. ܙܳܕܽܘܩ ܐܰܘܠܶܕ ܠܰܐܟܺܝܢ. ܐܰܟܺܝܢ ܐܰܘܠܶܕ ܠܶܐܠܺܝܽܘܕ.
15- ܐܶܠܺܝܽܘܕ ܐܰܘܠܶܕ ܠܶܐܠܺܝܥܳܙܳܪ. ܐܶܠܺܝܥܳܙܳܪ ܐܰܘܠܶܕ ܠܡܳܬܳܢ. ܡܳܬܳܢ ܐܰܘܠܶܕ ܠܝܰܥܩܽܘܒ.
16- ܝܰܥܩܽܘܒ ܐܰܘܠܶܕ ܠܝܰܘܣܶܦ ܓܰܒܪܳܗ̇ ܕܡܰܪܝܰܡ܆ ܕܡܶܢܳܗ̇ ܐܶܬܺܝܠܶܕ ܝܶܫܽܘܥ ܕܡܶܬܩܪܶܐ ܡܫܺܝܚܳܐ܀
17- ܟܽܠܗܶܝܢ ܗܳܟܺܝܠ ܫܰܪ̈ܒܳܬܳܐ ܡܶܢ ܐܰܒܪܳܗܳܡ ܥܕܰܡܳܐ ܠܕܰܘܺܝܕ܆ ܫܰܪ̈ܒܳܬܳܐ ܐܰܪܒܰܥܶܣܪ̈ܶܐ. ܘܡܶܢ ܕܰܘܺܝܕ ܥܕܰܡܳܐ ܠܓܳܠܽܘܬܳܐ ܕܒܳܒܶܝܠ܆ ܫܰܪ̈ܒܳܬܳܐ ܐܰܪܒܰܥܶܣܪ̈ܶܐ. ܘܡܶܢ ܓܳܠܽܘܬܳܐ ܕܒܳܒܶܝܠ ܥܕܰܡܳܐ ܠܰܡܫܺܝܚܳܐ܆ ܫܰܪ̈ܒܳܬܳܐ ܐܰܪܒܰܥܶܣܪ̈ܶܐ܀
18- ܝܰܠܕܶܗ ܕܶܝܢ ܕܝܶܫܽܘܥ ܡܫܺܝܚܳܐ ܗܳܟܰܢܳܐ ܗܘܳܐ. ܟܰܕ ܡܟܺܝܪܳܐ ܗ̱ܘܳܬ ܡܰܪܝܰܡ ܐܶܡܶܗ ܠܝܰܘܣܶܦ: ܥܰܕܠܳܐ ܢܶܫܬܰܘܬܦܽܘܢ܆ ܐܶܫܬܰܟܚܰܬ ܒܰܛܢܳܐ ܡܶܢ ܪܽܘܚܳܐ ܕܩܽܘܕܫܳܐ.
19- ܝܰܘܣܶܦ ܕܶܝܢ ܒܰܥܠܳܗ̇ ܟܺܐܢܳܐ ܗ̱ܘܳܐ܆ ܘܠܳܐ ܨܒܳܐ ܕܰܢܦܰܪܣܶܝܗ̇܆ ܘܶܐܬܪܰܥܺܝ ܗ̱ܘܳܐ ܕܡܰܛܫܝܳܐܺܝܬ ܢܶܫܪܶܝܗ̇.
20- ܟܰܕ ܗܳܠܶܝܢ ܕܶܝܢ ܐܶܬܪܰܥܺܝ. ܐܶܬܚܙܺܝ ܠܶܗ ܡܰܠܰܐܟܳܐ ܕܡܳܪܝܳܐ ܒܚܶܠܡܳܐ. ܘܶܐܡܰܪ ܠܶܗ ”ܝܰܘܣܶܦ ܒܪܶܗ ܕܕܰܘܺܝܕ܆ ܠܳܐ ܬܶܕܚܰܠ ܠܡܶܣܰܒ ܠܡܰܪܝܰܡ ܐܰܢ̱ܬܬܳܟ. ܗܰܘ ܓܶܝܪ ܕܶܐܬܺܝܠܶܕ ܒܳܗ̇܆ ܡܶܢ ܪܽܘܚܰܐ ܗ̱ܘ ܕܩܽܘܕܫܳܐ.
21- ܬܺܐܠܰܕ ܕܶܝܢ ܒܪܳܐ܆ ܘܬܶܩܪܶܐ ܫܡܶܗ ܝܶܫܽܘܥ. ܗܽܘ ܓܶܝܪ ܢܰܚܶܝܘܗ̱ܝ ܠܥܰܡܶܗ ܡܶܢ ܚܛܳܗܰܝ̈ܗܽܘܢ.“
22- ܗܳܕܶܐ ܕܶܝܢ ܟܽܠܳܗ̇ ܕܰܗܘܳܬ܆ ܕܢܶܬܡܰܠܶܐ ܡܶܕܶܡ ܕܶܐܬܶܐܡܰܪ ܡܶܢ ܡܳܪܝܳܐ ܒܝܰܕ ܢܒܺܝܳܐ܇
23- ”ܕܗܳܐ ܒܬܽܘܠܬܳܐ ܬܶܒܛܰܢ ܘܬܺܐܠܰܕ ܒܪܳܐ܇ ܘܢܶܩܪܽܘܢ ܫܡܶܗ ܥܰܡܰܢܽܘܐܝܶܠ“ ܕܡܶܬܬܰܪܓܰܡ ܥܰܡܰܢ ܐܰܠܳܗܰܢ.
24- ܟܰܕ ܩܳܡ ܕܶܝܢ ܝܰܘܣܶܦ ܡܶܢ ܫܶܢܬܶܗ܆ ܥܒܰܕ ܐܰܝܟܰܢܳܐ ܕܰܦܩܰܕ ܠܶܗ ܡܰܠܰܐܟܶܗ ܕܡܳܪܝܳܐ. ܘܕܰܒܪܳܗ̇ ܠܰܐܢ̱ܬܬܶܗ.
25- ܘܠܳܐ ܚܰܟܡܳܗ̇܆ ܥܕܰܡܳܐ ܕܺܝܠܶܕܬܶܗ ܠܰܒܪܳܗ̇ ܒܽܘܟܪܳܐ܇ ܘܰܩܪܳܬ ܫܡܶܗ ܝܶܫܽܘܥ܀