Matthew 9
The Gospel according to Matthew
܀ ܡܬܝ ܛ ܀
1- ܘܰܣܠܶܩ ܠܶܐܠܦܳܐ܆ ܘܰܥܒܰܪ ܐܶܬܳܐ ܠܰܡܕܺܝܢ̱ܬܶܗ.
2- ܘܩܰܪܶܒܘ ܠܶܗ ܡܫܰܪܝܳܐ ܟܰܕ ܪܡܶܐ ܒܥܰܪܣܳܐ. ܘܰܚܙܳܐ ܝܶܫܽܘܥ ܗܰܝܡܳܢܽܘܬܗܽܘܢ܆ ܘܶܐܡܰܪ ܠܗܰܘ ܡܫܰܪܝܳܐ: ”ܐܶܬܠܰܒِܒ ܒܶܪܝ܆ ܫܒܺܝܩܺܝܢ ܠܳܟ ܚܛܳܗ̈ܰܝܟ.“
3- ܐ̱ܢܳܫ̈ܳܐ ܕܶܝܢ ܡܶܢ ܣܳܦܪ̈ܶܐ ܐܶܡܰܪܘ ܒܢܰܦܫܗܽܘܢ܆ ܗܳܢܳܐ ܡܓܰܕܶܦ!
4- ܝܶܫܽܘܥ ܕܶܝܢ ܝܺܕܰܥ ܡܰܚܫ̈ܒܳܬܗܽܘܢ܆ ܘܶܐܡܰܪ ܠܗܽܘܢ: ”ܡܳܢܳܐ ܡܶܬܚܰܫܒܺܝܢ ܐܢ̱ܬܽܘܢ ܒܺܝܫܬܳܐ ܒܠܶܒܟܽܘܢ؟
5- ܡܳܢܳܐ ܓܶܝܪ ܦܫܺܝܩ ܠܡܺܐܡܰܪ܇ ܕܰܫܒܺܝܩܺܝܢ ܠܳܟ ܚܛܳܗ̈ܰܝܟ܆ ܐܰܘ ܠܡܺܐܡܰܪ܇ ܩܽܘܡ ܗܰܠܶܟ؟
6- ܕܬܶܕܥܽܘܢ ܕܶܝܢ ܕܫܽܘܠܛܳܢܳܐ ܐܺܝܬ ܠܰܒܪܶܗ ܕܐ̱ܢܳܫܳܐ ܒܰܐܪܥܳܐ ܠܡܶܫܒܰܩ ܚܛܳܗ̈ܶܐ“܇ ܐܶܡܰܪ ܠܗܰܘ ܡܫܰܪܝܳܐ. ”ܩܽܘܡ ܫܩܽܘܠ ܥܰܪܣܳܟ ܘܙܶܠ ܠܒܰܝܬܳܟ.“
7- ܘܩܳܡ ܐܶܙܰܠ ܠܒܰܝܬܶܗ܀
8- ܟܰܕ ܚܙܰܘ ܕܶܝܢ ܟܶܢ̈ܫܶܐ ܗܳܢܽܘܢ܆ ܕܚܶܠܘ. ܘܫܰܒܰܚܘ ܠܰܐܠܳܗܳܐ ܕܝܰܗ̱ܒ ܫܽܘܠܛܳܢܳܐ ܕܰܐܝܟ ܗܳܢܳܐ ܠܰܒܢܰܝ̈ܢܳܫܳܐ܀
9- ܘܟܰܕ ܥܒܰܪ ܝܶܫܽܘܥ ܡܶܢ ܬܰܡܳܢ܆ ܚܙܳܐ ܓܰܒܪܳܐ ܕܝܳܬܶܒ ܒܶܝܬ ܡܳܟ̈ܣܶܐ ܕܰܫܡܶܗ ܡܰܬܰܝ. ܘܶܐܡܰܪ ܠܶܗ: ”ܬܳܐ ܒܳܬܰܪܝ.“ ܘܩܳܡ ܐܶܙܰܠ ܒܳܬܪܶܗ.
10- ܘܟܰܕ ܣܡܺܝܟܺܝܢ ܒܒܰܝܬܳܐ܆ ܐܶܬܰܘ ܡܳܟ̈ܣܶܐ ܘܚܰܛܳܝ̈ܶܐ ܣܰܓܺܝ̈ܶܐܐ ܘܶܐܣܬܡܶܟܘ ܥܰܡ ܝܶܫܽܘܥ ܘܥܰܡ ܬܰܠܡܺܝ̈ܕܰܘܗ̱ܝ.
11- ܘܟܰܕ ܚܙܰܘ ܦܪ̈ܺܝܫܶܐ܆ ܐܳܡܪܺܝܢ ܠܬܰܠܡܺܝ̈ܕܰܘܗ̱ܝ. ܠܡܳܢܳܐ ܥܰܡ ܡܳܟ̈ܣܶܐ ܘܚܰܛܳܝ̈ܶܐ ܠܳܥܶܣ ܪܰܒܟܽܘܢ؟
12- ܝܶܫܽܘܥ ܕܶܝܢ ܟܰܕ ܫܡܰܥ ܐܶܡܰܪ ܠܗܽܘܢ: ”ܠܳܐ ܣܢܺܝܩܺܝܢ ܚܠܺܝ̈ܡܶܐ ܥܰܠ ܐܳܣܝܳܐ܆ ܐܶܠܳܐ ܐܰܝܠܶܝܢ ܕܒܺܝܫܳܐܺܝܬ ܥܒܺܝܕܺܝܢ.
13- ܙܶܠܘ ܝܺܠܰܦܘ ܡܳܢܰܘ܇ ܚܢܳܢܳܐ ܒܳܥܶܐ ܐ̱ܢܳܐ ܘܠܳܐ ܕܶܒܚܬܳܐ. ܠܳܐ ܓܶܝܪ ܐܶܬܺܝܬ ܕܶܐܩܪܶܐ ܠܙܰܕܺܝ̈ܩܶܐ ܐܶܠܳܐ ܠܚܰܛܳܝ̈ܶܐ.“
14- ܗܳܝܕܶܝܢ ܩܪܶܒܘ ܠܶܗ ܬܰܠܡܺܝ̈ܕܰܘܗ̱ܝ ܕܝܽܘܚܰܢܳܢ. ܘܳܐܡܪܺܝܢ: ܠܡܳܢܳܐ ܚܢܰܢ ܘܰܦܪ̈ܺܝܫܶܐ ܨܳܝܡܺܝܢܰܢ ܣܰܓܺܝ܆ ܘܬܰܠܡܺܝ̈ܕܰܝܟ ܠܳܐ ܨܳܝܡܺܝܢ؟
15- ܐܳܡܰܪ ܠܗܽܘܢ ܝܶܫܽܘܥ: ”ܕܰܠܡܳܐ ܡܶܫܟܚܺܝܢ ܒܢ̈ܰܘܗ̱ܝ ܕܰܓܢܽܘܢܳܐ ܠܰܡܨܳܡ܆ ܟܡܳܐ ܕܚܰܬܢܳܐ ܥܰܡܗܽܘܢ؟ ܐܳܬܶܝܢ ܕܶܝܢ ܝܰܘ̈ܡܳܬܳܐ܇ ܟܰܕ ܢܶܫܬܩܶܠ ܡܶܢܗܽܘܢ ܚܰܬܢܳܐ: ܘܗܳܝܕܶܝܢ ܢܨܽܘܡܽܘܢ.
16- ܠܳܐ ܐ̱ܢܳܫ ܪܳܡܶܐ ܐܽܘܪܩܰܥܬܳܐ ܚܕܰܬܳܐ ܥܰܠ ܢܰܚܬܳܐ ܒܠܳܝܳܐ. ܕܠܳܐ ܬܶܬܽܘܦ ܡܰܠܝܽܘܬܳܗ̇ ܡܶܢ ܗܰܘ ܢܰܚܬܳܐ܆ ܘܢܶܗܘܶܐ ܒܶܙܥܳܐ ܝܰܬܺܝܪܳܐ.
17- ܘܠܳܐ ܪܳܡܶܝܢ ܚܰܡܪܳܐ ܚܰܕ̱ܬܳܐ ܒܙܶܩ̈ܶܐ ܒܠܳܝ̈ܳܬܳܐ. ܕܠܳܐ ܡܶܨܛܰܪ̈ܝܳܢ ܙܶܩ̈ܶܐ܆ ܘܚܰܡܪܳܐ ܡܶܬܶܐܫܶܕ: ܘܙܶܩ̈ܶܐ ܐܳܒ̈ܕܳܢ. ܐܶܠܳܐ ܪܳܡܶܝܢ ܚܰܡܪܳܐ ܚܰܕ̱ܬܳܐ ܒܙܶܩ̈ܶܐ ܚ̈ܰܕ̱ܬܳܬܳܐ܆ ܘܰܬܪ̈ܰܝܗܽܘܢ ܡܶܬܢܰܛܪܺܝܢ.“
18- ܟܰܕ ܕܶܝܢ ܗܳܠܶܝܢ ܡܡܰܠܶܠ ܗ̱ܘܳܐ ܥܰܡܗܽܘܢ܆ ܐܶܬܳܐ ܐܰܪܟܽܘܢܳܐ ܚܰܕ ܩܪܶܒ ܣܓܶܕ ܠܶܗ ܘܶܐܡܰܪ: ܒܪܰܬܝ ܗܳܫܳܐ ܡܺܝܬܰܬ܆ ܐܶܠܳܐ ܬܳܐ ܣܺܝܡ ܐܺܝܕܳܟ ܥܠܶܝܗ̇ ܘܬܺܚܶܐ.
19- ܘܩܳܡ ܝܶܫܽܘܥ ܘܬܰܠܡܺܝ̈ܕܰܘܗ̱ܝ ܘܶܐܙܰܠܘ ܒܳܬܪܶܗ.
20- ܘܗܳܐ ܐܰܢ̱ܬܬܳܐ ܕܪܳܕܶܐ ܗ̱ܘܳܐ ܕܡܳܗ̇ ܫܢܺܝ̈ܢ ܬܰܪܬܰܥܶܣܪ̈ܶܐ܆ ܐܶܬܳܬ ܡܶܢ ܒܶܣܬܪܶܗ܆ ܘܩܶܪܒܰܬ ܠܩܰܪܢܳܐ ܕܰܠܒܽܘܫܶܗ.
21- ܐܳܡܪܳܐ ܗ̱ܘܳܬ ܓܶܝܪ ܒܢܰܦܫܳܗ̇܆ ܐܳܦܶܢ ܒܰܠܚܽܘܕ ܠܡܳܐܢܶܗ ܩܳܪܒܳܐ ܐ̱ܢܳܐ ܡܶܬܰܐܣܝܳܐ ܐ̱ܢܳܐ.
22- ܝܶܫܽܘܥ ܕܶܝܢ ܐܶܬܦܢܺܝ ܚܙܳܗ̇ ܘܶܐܡܰܪ ܠܳܗ̇: ”ܐܶܬܠܰܒِܒܝ ܒܪܰܬܝ܅ ܗܰܝܡܳܢܽܘܬܶܟܝ ܐܰܚܝܰܬܶܟܝ.“ ܘܶܐܬܰܐܣܝܰܬ ܐܰܢ̱ܬܬܳܐ ܗܳܝ ܡܶܢ ܗܳܝ ܫܳܥܬܳܐ܀
23- ܘܶܐܬܳܐ ܝܶܫܽܘܥ ܠܒܰܝܬܶܗ ܕܰܐܪܟܽܘܢܳܐ܆ ܘܰܚܙܳܐ ܙܰܡܳܪ̈ܶܐ ܘܟܶܢ̈ܫܶܐ ܕܡܶܫܬܰܓܫܺܝܢ.
24- ܘܶܐܡܰܪ ܠܗܽܘܢ: ”ܦܪܽܘܩܘ ܠܟܽܘܢ! ܛܠܺܝܬܳܐ ܓܶܝܪ ܠܳܐ ܡܺܝܬܰܬ ܐܶܠܳܐ ܕܰܡܟܳܐ ܗ̱ܝ!“ ܘܓܳܚܟܺܝܢ ܗ̱ܘܰܘ ܥܠܰܘܗ̱ܝ.
25- ܘܟܰܕ ܐܰܦܶܩ ܠܟܶܢ̈ܫܶܐ܆ ܥܰܠ ܐܰܚܕܳܗ̇ ܒܺܐܝܕܳܗ̇܆ ܘܩܳܡܰܬ ܛܠܺܝܬܳܐ.
26- ܘܰܢܦܰܩ ܛܶܒܳܐ ܗܳܢܳܐ ܒܟܽܠܳܗ̇ ܐܰܪܥܳܐ ܗܳܝ܀
27- ܘܟܰܕ ܥܒܰܪ ܝܶܫܽܘܥ ܡܶܢ ܬܰܡܳܢ܆ ܕܰܒܩܽܘܗ̱ܝ ܣܡܰܝ̈ܳܐ ܬܪܶܝܢ. ܕܩܳܥܶܝܢ ܘܳܐܡܪܺܝܢ܆ ܐܶܬܪܰܚܰܡ ܥܠܰܝܢ ܒܪܶܗ܅ ܕܕܰܘܺܝܕ.
28- ܘܟܰܕ ܐܶܬܳܐ ܠܒܰܝܬܳܐ܆ ܩܪܶܒܘ ܠܶܗ ܗܳܢܽܘܢ ܣܡܰܝ̈ܳܐ. ܐܳܡܰܪ ܠܗܽܘܢ ܝܶܫܽܘܥ: ”ܡܗܰܝܡܢܺܝܢ ܐܢ̱ܬܽܘܢ ܕܡܶܫܟܰܚ ܐ̱ܢܳܐ ܗܳܕܶܐ ܠܡܶܥܒܰܕ؟“ ܐܳܡܪܺܝܢ ܠܶܗ. ܐܺܝܢ ܡܳܪܰܢ!
29- ܗܳܝܕܶܝܢ ܩܪܶܒ ܠܥܰܝ̈ܢܰܝܗܽܘܢ. ܘܶܐܡܰܪ: ”ܐܰܝܟܰܢܳܐ ܕܗܰܝܡܶܢܬܽܘܢ ܢܶܗܘܶܐ ܠܟܽܘܢ!“
30- ܘܡܶܚܕܳܐ ܐܶܬܦܰܬܰܚ̈ܝ ܥܰܝ̈ܢܰܝܗܽܘܢ. ܘܰܟܐܳܐ ܒܗܽܘܢ ܝܶܫܽܘܥ ܘܶܐܡܰܪ: ”ܚܙܰܘ ܠܳܐ ܐ̱ܢܳܫ ܢܶܕܰܥ.“
31- ܗܶܢܽܘܢ ܕܶܝܢ ܢܦܰܩܘ ܐܰܛܒܽܘܗ̱ܝ ܒܟܽܠܳܗ̇ ܐܰܪܥܳܐ ܗܳܝ܀
32- ܘܟܰܕ ܢܦܰܩ ܝܶܫܽܘܥ܆ ܩܰܪܶܒܘ ܠܶܗ ܚܰܪܫܳܐ ܕܺܐܝܬ ܥܠܰܘܗ̱ܝ ܕܰܝܘܳܐ.
33- ܘܡܶܢ ܕܰܢܦܰܩ ܕܰܝܘܳܐ. ܡܰܠܶܠ ܗܰܘ ܚܰܪܫܳܐ. ܘܶܐܬܕܰܡܰܪܘ ܟܶܢ̈ܫܶܐ. ܘܳܐܡܪܺܝܢ: ܠܳܐ ܡܬܽܘܡ ܐܶܬܚܙܺܝ ܗܳܟܰܢܳܐ ܒܺܐܝܣܪܳܐܶܝܠ!
34- ܦܪ̈ܺܝܫܶܐ ܕܶܝܢ ܐܳܡܪܺܝܢ ܗ̱ܘܰܘ܆ ܒܪܺܝܫܳܐ ܕܕܰܝ̈ܘܶܐ ܡܰܦܶܩ ܕܰܝ̈ܘܶܐ!܀
35- ܘܡܶܬܟܪܶܟ ܗ̱ܘܳܐ ܝܶܫܽܘܥ ܒܰܡܕܺܝ̈ܢܳܬܳܐ ܟܽܠܗܶܝܢ ܘܰܒܩܽܘܪ̈ܝܳܐ܆ ܘܡܰܠܶܦ ܗ̱ܘܳܐ ܒܰܟܢܽܘ̈ܫܳܬܗܽܘܢ܆ ܘܡܰܟܪܶܙ ܣܒܰܪܬܳܐ ܕܡܰܠܟܽܘܬܳܐ܆ ܘܡܰܐܣܶܐ ܟܽܠ ܟܽܘܪ̈ܗܳܢܺܝܢ ܘܟܽܠ ܟܺܐܒܺܝ̈ܢ.
36- ܟܰܕ ܚܙܳܐ ܕܶܝܢ ܝܶܫܽܘܥ ܠܟܶܢ̈ܫܶܐ܆ ܐܶܬܪܰܚܰܡ ܥܠܰܝܗܽܘܢ ܕܰܠܶܐܝܢ ܗ̱ܘܰܘ ܘܰܫܪܶܝܢ܇ ܐܰܝܟ ܥܶܪ̈ܒܶܐ ܕܠܰܝܬ ܠܗܽܘܢ ܪܳܥܝܳܐ.
37- ܘܶܐܡܰܪ ܠܬܰܠܡܺܝ̈ܕܰܘܗ̱ܝ܆ ܚܨܳܕܳܐ ܣܰܓܺܝ. ܘܦܳܥ̈ܠܶܐ ܙܥܽܘܪܺܝܢ.
38- ܒܥܰܘ ܗܳܟܺܝܠ ܡܶܢ ܡܳܪܶܐ ܚܨܳܕܳܐ܆ ܕܢܰܦܶܩ ܦܳܥ̈ܠܶܐ ܠܰܚܨܳܕܶܗ܀