Matthew 17
The Gospel according to Matthew
܀ ܡܬܝ ܝܙ ܀
1- ܘܒܳܬܰܪ ܫܬܳܐ ܝܰܘ̈ܡܺܝܢ܆ ܕܒܰܪ ܝܶܫܽܘܥ ܠܟܺܐܦܳܐ܁ ܘܰܠܝܰܥܩܽܘܒ܁ ܘܰܠܝܽܘܚܰܢܳܢ ܐܰܚܽܘܗ̱ܝ܆ ܘܰܐܣܶܩ ܐܶܢܽܘܢ ܠܛܽܘܪܳܐ ܪܳܡܳܐ ܒܰܠܚܽܘܕܰܝܗܽܘܢ.
2- ܘܶܐܫܬܰܚܠܰܦ ܝܶܫܽܘܥ ܩܕܳܡܰܝܗܽܘܢ. ܘܰܢܗܰܪ ܦܰܪܨܽܘܦܶܗ ܐܰܝܟ ܫܶܡܫܳܐ. ܢܰܚ̈ܬܰܘܗ̱ܝ ܕܶܝܢ ܚܘܰܪܘ ܐܰܝܟ ܢܽܘܗܪܳܐ.
3- ܘܶܐܬܚܙܺܝܘ ܠܗܽܘܢ ܡܽܘܫܶܐ ܘܶܐܠܺܝܳܐ ܟܰܕ ܡܡܰܠܠܺܝܢ ܥܰܡܶܗ.
4- ܥܢܳܐ ܕܶܝܢ ܟܺܐܦܳܐ ܘܶܐܡܰܪ ܠܝܶܫܽܘܥ: ”ܡܳܪܝ܆ ܫܰܦܺܝܪ ܗ̱ܘ ܠܰܢ ܕܰܬܢܳܢ ܢܶܗܘܶܐ. ܘܶܐܢ ܨܳܒܶܐ ܐܰܢ̱ܬ ܢܶܥܒܶܕ. ܬܢܳܢ. ܬܠܳܬ ܡܛܰܠܠܺܝ̈ܢ܁ ܚܕܳܐ ܠܳܟ ܘܰܚܕܳܐ ܠܡܽܘܫܶܐ ܘܰܚܕܳܐ ܠܶܐܠܺܝܳܐ.“
5- ܘܥܰܕ ܗܽܘ ܡܡܰܠܶܠ܆ ܗܳܐ ܥܢܳܢܳܐ ܢܰܗܺܝܪܬܳܐ ܐܰܛܠܰܬ ܥܠܰܝܗܽܘܢ ܘܩܳܠܳܐ ܗܘܳܐ ܡܶܢ ܥܢܳܢܳܐ ܕܳܐܡܰܪ: ”ܗܳܢܰܘ ܒܶܪܝ ܚܰܒܺܝܒܳܐ ܕܒܶܗ ܐܶܨܛܒܺܝܬ. ܠܶܗ ܫܡܰܥܘ.“
6- ܘܟܰܕ ܫܡܰܥܘ ܬܰܠܡܺܝ̈ܕܶܐ܆ ܢܦܰܠܘ ܥܰܠ ܐܰܦܰܝ̈ܗܽܘܢ. ܘܰܕܚܶܠܘ ܛܳܒ.
7- ܘܶܐܬܩܰܪܰܒ ܠܘܳܬܗܽܘܢ ܝܶܫܽܘܥ܆ ܘܰܩܪܶܒ ܠܗܽܘܢ. ܘܶܐܡܰܪ: ”ܩܽܘܡܘ ܠܳܐ ܬܶܕܚܠܽܘܢ“
8- ܘܰܐܪܺܝܡܘ ܥܰܝ̈ܢܰܝܗܽܘܢ ܘܰܠܐ̱ܢܳܫ ܠܳܐ ܚܙܰܘ܆ ܐܶܠܳܐ ܐܶܢ ܠܝܶܫܽܘܥ ܒܰܠܚܽܘܕܰܘܗ̱ܝ.
9- ܘܟܰܕ ܢܳܚܬܺܝܢ ܡܶܢ ܛܽܘܪܳܐ܆ ܦܰܩܶܕ ܐܶܢܽܘܢ ܝܶܫܽܘܥ. ܘܶܐܡܰܪ ܠܗܽܘܢ: ”ܠܥܺܝܢ ܐ̱ܢܳܫ ܠܳܐ ܬܺܐܡܪܽܘܢ ܚܶܙܘܳܐ ܗܳܢܳܐ܇ ܥܕܰܡܳܐ ܕܰܢܩܽܘܡ ܒܪܶܗ ܕܐ̱ܢܳܫܳܐ ܡܶܢ ܒܶܝܬ ܡܺܝ̈ܬܶܐ.“
10- ܘܫܰܐܠܽܘܗ̱ܝ ܬܰܠܡܺܝ̈ܕܰܘܗ̱ܝ ܘܳܐܡܪܺܝܢ ܠܶܗ: ”ܡܳܢܳܐ ܗܳܟܺܝܠ ܣܳܦܪ̈ܶܐ ܐܳܡܪܺܝܢ: ܕܶܐܠܺܝܳܐ ܘܳܠܶܐ ܕܢܺܐܬܶܐ ܠܽܘܩܕܰܡ؟“
11- ܥܢܳܐ ܝܶܫܽܘܥ ܘܶܐܡܰܪ: ”ܐܶܠܺܝܳܐ ܐܳܬܶܐ ܠܽܘܩܕܰܡ ܕܟܽܠ ܡܶܕܶܡ ܢܫܰܠܶܡ.
12- ܐܳܡܰܪ ܐ̱ܢܳܐ ܠܟܽܘܢ ܕܶܝܢ: ܕܗܳܐ ܐܶܠܺܝܳܐ ܐܶܬܳܐ܆ ܘܠܳܐ ܝܰܕܥܽܘܗ̱ܝ ܘܰܥܒܰܕܘ ܒܶܗ ܟܽܠ ܡܳܐ ܕܰܨܒܰܘ. ܗܳܟܰܢܳܐ ܐܳܦ ܒܪܶܗ ܕܐ̱ܢܳܫܳܐ ܥܬܺܝܕ ܗ̱ܘ ܕܢܶܚܰܫ ܡܶܢܗܽܘܢ.“
13- ܗܳܝܕܶܝܢ ܐܶܣܬܰܟܰܠܘ ܬܰܠܡܺܝ̈ܕܶܐ ܕܥܰܠ ܝܽܘܚܰܢܳܢ ܡܰܥܡܕܳܢܳܐ ܐܶܡܰܪ ܠܗܽܘܢ܀
14- ܘܟܰܕ ܐܶܬܰܘ ܠܘܳܬ ܟܶܢܫܳܐ܆ ܩܪܶܒ ܠܶܗ ܓܰܒܪܳܐ. ܘܰܒܪܶܟ ܥܰܠ ܒܽܘܪ̈ܟܰܘܗ̱ܝ.
15- ܘܶܐܡܰܪ ܠܶܗ: ܡܳܪܝ܅ ܐܶܬܪܰܚܰܡ ܥܠܰܝ. ܒܶܪܝ ܕܺܐܝܬ ܠܶܗ ܒܰܪ ܐܶܓܳܪܳܐ. ܘܒܺܝܫܳܐܺܝܬ ܥܒܺܝܕ. ܟܡܳܐ ܓܶܝܪ ܙܰܒܢܺܝ̈ܢ ܒܢܽܘܪܳܐ ܢܳܦܶܠ܆ ܘܰܟܡܳܐ ܙܰܒܢܺܝ̈ܢ ܒܡܰܝ̈ܳܐ.
16- ܘܩܰܪܶܒܬܶܗ ܠܬܰܠܡܺܝ̈ܕܰܝܟ. ܘܠܳܐ ܐܶܫܟܰܚܘ ܠܡܰܐܣܳܝܽܘܬܶܗ.
17- ܥܢܳܐ ܝܶܫܽܘܥ ܘܶܐܡܰܪ: ”ܐܽܘܢ ܫܰܪܒܬܳܐ ܕܠܳܐ ܡܗܰܝܡܢܳܐ ܘܰܡܥܰܩܰܠܬܳܐ! ܥܕܰܡܳܐ ܠܶܐܡܰܬܝ ܐܶܗܘܶܐ ܥܰܡܟܽܘܢ؟ ܘܰܥܕܰܡܳܐ ܠܶܐܡܰܬܝ ܐܶܣܰܝܒܰܪܟܽܘܢ؟ ܐܰܝܬܳܝܗ̱ܝ ܠܺܝ ܠܟܳܐ!“
18- ܘܰܟܐܳܐ ܒܶܗ ܝܶܫܽܘܥ܆ ܘܰܢܦܰܩ ܡܶܢܶܗ ܫܺܐܕܳܐ. ܘܶܐܬܰܐܣܺܝ ܛܰܠܝܳܐ ܡܶܢ ܗܳܝ ܫܳܥܬܳܐ܀
19- ܗܳܝܕܶܝܢ ܩܪܶܒܘ ܬܰܠܡܺܝ̈ܕܶܐ ܠܘܳܬ ܝܶܫܽܘܥ ܒܰܠܚܽܘܕܰܘܗ̱ܝ. ܘܶܐܡܰܪܘ ܠܶܗ. ܠܡܳܢܳܐ ܚܢܰܢ ܠܳܐ ܐܶܫܟܰܚܢ ܠܡܰܐܣܳܝܽܘܬܶܗ؟
20- ܐܳܡܰܪ ܠܗܽܘܢ ܝܶܫܽܘܥ. ”ܡܶܛܽܠ ܠܳܐ ܗܰܝܡܳܢܽܘܬܟܽܘܢ! ܐܰܡܺܝܢ ܓܶܝܪ ܐܳܡܰܪ ܐ̱ܢܳܐ ܠܟܽܘܢ܆ ܕܶܐܢ ܬܶܗܘܶܐ ܒܟܽܘܢ ܗܰܝܡܳܢܽܘܬܳܐ ܐܰܝܟ ܦܪܶܕܬܳܐ ܕܚܰܪܕܠܳܐ܆ ܬܺܐܡܪܽܘܢ ܠܛܽܘܪܳܐ ܗܳܢܳܐ܇ ܕܫܰܢܳܐ ܡܶܟܳܐ ܘܰܢܫܰܢܶܐ܆ ܘܡܶܕܶܡ ܠܳܐ ܢܶܚܣܰܢܟܽܘܢ.
21- ܗܳܢܳܐ ܕܶܝܢ ܓܶܢܣܳܐ ܠܳܐ ܢܳܦܶܩ܁ ܐܶܠܳܐ ܒܨܰܘܡܳܐ ܘܒܰܨܠܽܘܬܳܐ.“
22- ܟܰܕ ܡܶܬܗܰܦܟܺܝܢ ܕܶܝܢ ܒܰܓܠܺܝܠܳܐ܆ ܐܶܡܰܪ ܠܗܽܘܢ ܝܶܫܽܘܥ. ”ܥܬܺܝܕ ܗ̱ܘ ܒܪܶܗ ܕܐ̱ܢܳܫܳܐ ܕܢܶܫܬܠܶܡ ܒܺܐܝ̈ܕܰܝ ܒܢ̈ܰܝ ܐ̱ܢܳܫܳܐ.
23- ܘܢܶܩܛܠܽܘܢܳܝܗ̱ܝ܁ ܘܰܠܝܰܘܡܳܐ ܕܰܬܠܳܬܳܐ ܢܩܽܘܡ.“ ܘܟܶܪܝܰܬ ܠܗܽܘܢ ܛܳܒ܀
24- ܘܟܰܕ ܐܶܬܰܘ ܠܰܟܦܰܪܢܰܚܽܘܡ܆ ܩܪܶܒܘ ܗܳܢܽܘܢ ܕܢܳܣܒܺܝܢ ܬܪܶܝܢ ܬܪܶܝܢ ܙܽܘ̈ܙܺܝܢ ܕܰܟܣܶܦ ܪܺܝܫܳܐ. ܠܘܳܬ ܟܺܐܦܳܐ ܘܶܐܡܰܪܘ ܠܶܗ. ܪܰܒܟܽܘܢ܁ ܠܳܐ ܝܳܗܶܒ ܬܪܶܝܢ ܙܽܘܙܰܘ̈ܗ̱ܝ؟
25- ܐܳܡܰܪ ܠܗܽܘܢ ܐܺܝܢ. ܘܟܰܕ ܥܰܠ ܟܺܐܦܳܐ ܠܒܰܝܬܳܐ܆ ܩܰܕܡܶܗ ܝܶܫܽܘܥ. ܘܶܐܡܰܪ ܠܶܗ. ”ܡܳܢܳܐ ܡܶܬܚܙܶܐ ܠܳܟ ܫܶܡܥܽܘܢ؟ ܡܰܠܟܶܝ̈ܗ̇ ܕܰܐܪܥܳܐ܆ ܡܶܢ ܡܰܢ ܢܳܣܒܺܝܢ ܡܰܟܣܳܐ ܘܰܟܣܶܦ ܪܺܝܫܳܐ؟ ܡܶܢ ܒܢܰܝ̈ܗܽܘܢ ܐܰܘ ܡܶܢ ܢܽܘܟܪ̈ܳܝܶܐ؟“
26- ܐܳܡܰܪ ܠܶܗ ܫܶܡܥܽܘܢ ܡܶܢ ܢܽܘܟܪ̈ܳܝܶܐ. ܐܳܡܰܪ ܠܶܗ ܝܶܫܽܘܥ. ”ܡܳܕܶܝܢ ܒܢ̈ܰܝ ܚܺܐܪ̈ܶܐ ܐܶܢܽܘܢ ܒܢܰܝ̈ܳܐ.
27- ܕܠܳܐ ܕܶܝܢ ܢܰܟܫܶܠ ܐܶܢܽܘܢ ܙܶܠ ܠܝܰܡܳܐ. ܘܰܐܪܡܳܐ ܒܰܠܽܘܥܳܐ. ܘܢܽܘܢܳܐ ܩܰܕܡܳܝܳܐ ܕܣܳܠܶܩ܆ ܦܬܰܚ ܦܽܘܡܶܗ. ܘܬܶܫܟܰܚ ܐܶܣܬܺܪܳܐ. ܗܳܝ ܣܰܒ܆ ܘܗܰܒ ܚܠܳܦܰܝ. ܘܰܚܠܳܦܰܝܟ.“