Matthew 28
The Gospel according to Matthew
܀ ܡܬܝ ܟܚ ܀
1- ܒܪܰܡܫܳܐ ܕܶܝܢ ܒܫܰܒܬܳܐ. ܕܢܳܓܰܗ ܚܰܕ ܒܫܰܒܳܐ܆ ܐܶܬܳܬ ܡܰܪܝܰܡ ܡܰܓܕܠܳܝܬܳܐ܁ ܘܡܰܪܝܰܡ ܐ̱ܚܪܺܬܳܐ. ܕܢܶܚ̈ܙܝܳܢ ܩܰܒܪܳܐ.
2- ܘܗܳܐ ܙܰܘܥܳܐ ܪܰܒܳܐ ܗܘܳܐ. ܡܰܠܰܐܟܳܐ ܓܶܝܪ ܕܡܳܪܝܳܐ܁ ܢܚܶܬ ܡܶܢ ܫܡܰܝܳܐ܆ ܘܰܩܪܶܒ ܥܰܓܶـܠ ܟܺܐܦܳܐ ܡܶܢ ܬܰܪܥܳܐ ܘܝܳܬܶܒ ܗ̱ܘܳܐ ܥܠܶܝܗ̇.
3- ܐܺܝܬܰܘܗ̱ܝ ܗ̱ܘܳܐ ܕܶܝܢ ܚܶܙܘܶܗ. ܐܰܝܟ ܒܰܪܩܳܐ. ܘܰܠܒܽܘܫܶܗ ܚܶܘܳܪ ܗ̱ܘܳܐ. ܐܰܝܟ ܬܰܠܓܳܐ.
4- ܘܡܶܢ ܕܶܚܠܬܶܗ. ܐܶܬܬܙܺܝܥܘ ܐܰܝܠܶܝܢ ܕܢܳܛܪܺܝܢ ܗ̱ܘܰܘ܁ ܘܰܗܘܰܘ ܐܰܝܟ ܡܺܝ̈ܬܶܐ܀
5- ܥܢܳܐ ܕܶܝܢ ܡܰܠܰܐܟܳܐ. ܘܶܐܡܰܪ ܠܢܶܫ̈ܶܐ. ܐܰܢ̱ܬܶܝܢ ܠܳܐ ܬܶܕܚ̈ܠܳܢ. ܝܳܕܰܥ ܐ̱ܢܳܐ ܓܶܝܪ. ܕܰܠܝܶܫܽܘܥ ܕܶܐܙܕܩܶܦ܁ ܒܳܥ̈ܝܳܢ ܐܢ̱ܬܶܝܢ.
6- ܠܳܐ ܗܘܳܐ ܬܢܳܢ. ܩܳܡ ܠܶܗ ܓܶܝܪ. ܐܰܝܟܰܢܳܐ ܕܶܐܡܰܪ. ܬܳܝܶܝ̈ܢ ܚܙܳܝܶܝ̈ܢ ܕܽܘܟܬܳܐ ܕܣܺܝܡ ܗ̱ܘܳܐ ܒܳܗ̇ ܡܳܪܰܢ:
7- ܘܙܶܠܶܝ̈ܢ ܒܰܥܓܰܠ ܐܶܡܰܪ̈ܶܝܢ ܠܬܰܠܡܺܝ̈ܕܰܘܗ̱ܝ܁ ܕܩܳܡ ܡܶܢ ܒܶܝܬ ܡܺܝ̈ܬܶܐ܆ ܘܗܳܐ ܩܳܕܶܡ ܠܟܽܘܢ ܠܰܓܠܺܝܠܳܐ܆ ܬܰܡܳܢ ܬܶܚܙܽܘܢܳܝܗ̱ܝ. ܗܳܐ ܐܶܡܪܶܬ ܠܟܶܝܢ܀
8- ܘܶܐܙܰܠܝ̈ ܥܓܰܠ ܡܶܢ ܩܰܒܪܳܐ. ܒܕܶܚܠܬܳܐ. ܘܰܒܚܰܕܽܘܬܳܐ ܪܰܒܬܳܐ. ܘܪ̈ܳܗܛܳܢ ܕܢܺܐܡܪ̈ܳܢ ܠܬܰܠܡܺܝ̈ܕܰܘܗ̱ܝ܀
9- ܘܗܳܐ ܝܶܫܽܘܥ ܦܓܰܥ ܒܗܶܝܢ. ܘܶܐܡܰܪ ܠܗܶܝܢ. ”ܫܠܳܡ ܠܟܶܝܢ!“ ܗܶܢܶܝܢ ܕܶܝܢ ܩܪ̈ܶܒܝ. ܐܶܚܰܕ̈ܝ ܪ̈ܶܓܠܰܘܗ̱ܝ. ܘܰܣܓܶܕܶܝ̈ܢ ܠܶܗ܀
10- ܗܳܝܕܶܝܢ ܐܶܡܰܪ ܠܗܶܝܢ ܝܶܫܽܘܥ. ”ܠܳܐ ܬܶܕܚ̈ܠܳܢ! ܐܶܠܳܐ ܙܶܠܶܝ̈ܢ ܐܶܡܰܪ̈ܶܝܢ ܠܰܐܚܰܝ̈܆ ܕܢܺܐܙܽܠ̱ܘܢ ܠܰܓܠܺܝܠܳܐ. ܘܬܰܡܳܢ ܢܶܚܙܽܘܢܳܢܝ.“
11- ܟܰܕ ܐܶܙܰܠܶܝ̈ܢ ܕܶܝܢ܆ ܐܶܬܰܘ ܐ̱ܢܳܫ̈ܳܐ ܡܶܢ ܩܶܣܛܽܘܢܳܪ̈ܶܐ ܗܳܢܽܘܢ ܠܰܡܕܺܝܢ̱ܬܳܐ܆ ܘܶܐܡܰܪܘ ܠܪ̈ܰܒܰܝ ܟܳܗ̈ܢܶܐ ܟܽܠ ܡܶܕܶܡ ܕܰܗܘܳܐ.
12- ܘܶܐܬܟܰܢܰܫܘ ܥܰܡ ܩܰܫܺܝ̈ܫܶܐ. ܘܰܢܣܰܒܘ ܡܶܠܟܳܐ. ܘܝܰܗ̱ܒܘ ܟܶܣܦܳܐ ܠܳܐ ܙܥܽܘܪ ܠܩܶܣܛܽܘܢܳܪ̈ܶܐ.
13- ܘܳܐܡܪܺܝܢ ܠܗܽܘܢ. ܐܶܡܰܪܘ܆ ܕܬܰܠܡܺܝ̈ܕܰܘܗ̱ܝ ܐܶܬܰܘ ܓܰܢܒܽܘܗ̱ܝ ܒܠܺܠܝܳܐ. ܟܰܕ ܕܰܡܟܺܝܢ ܚ̱ܢܰܢ.
14- ܘܶܐܢ ܐܶܫܬܰܡܥܰܬ ܗܳܕܶܐ ܩܕܳܡ ܗܺܓܡܽܘܢܳܐ܆ ܚܢܰܢ ܡܦܺܝܣܺܝܢܰܢ ܠܶܗ. ܘܰܠܟܽܘܢ. ܕܠܳܐ ܨܶܦܬܳܐ ܥܳܒܕܺܝܢܰܢ.
15- ܗܶܢܽܘܢ ܕܶܝܢ ܟܰܕ ܢܣܰܒܘ ܟܶܣܦܳܐ. ܥܒܰܕܘ ܐܰܝܟ ܕܰܐܠܶܦܘ ܐܶܢܽܘܢ. ܘܢܶܦܩܰܬ ܡܶܠܬܳܐ ܗܳܕܶܐ ܒܶܝܬ ܝܺܗܽܘ̈ܕܳܝܶܐ. ܥܕܰܡܳܐ ܠܝܰܘܡܳܢܳܐ܀
16- ܬܰܠܡܺܝ̈ܕܶܐ ܕܶܝܢ ܚܕܰܥܣܰܪ܁ ܐܶܙܰܠܘ ܠܰܓܠܺܝܠܳܐ ܠܛܽܘܪܳܐ. ܐܰܝܟܳܐ ܕܘܰܥܶܕ ܐܶܢܽܘܢ ܝܶܫܽܘܥ.
17- ܘܟܰܕ ܚܙܰܐܘܽܗ̱ܝ ܣܓܶܕܘ ܠܶܗ. ܡܶܢܗܽܘܢ ܕܶܝܢ ܐܶܬܦܰܠܰܓܘ ܗ̱ܘܰܘ.
18- ܘܰܩܪܶܒ ܝܶܫܽܘܥ ܡܰܠܶܠ ܥܰܡܗܽܘܢ. ܘܶܐܡܰܪ ܠܗܽܘܢ. ”ܐܶܬܺܝܗܶܒ ܠܺܝ ܟܽܠ ܫܽܘܠܛܳܢ ܒܰܫܡܰܝܳܐ ܘܒܰܐܪܥܳܐ. ܘܰܐܝܟܰܢܳܐ ܕܫܰܕܪܰܢܝ ܐܳܒܝ. ܡܫܰܕܰܪ ܐ̱ܢܳܐ ܠܟܽܘܢ܀
19- ”ܙܶܠܘ ܗܳܟܺܝܠ ܬܰܠܡܶܕܘ ܟܽܠܗܽܘܢ ܥܰܡ̱̈ܡܶܐ. ܘܰܐܥܡܶܕܘ ܐܶܢܽܘܢ܁ ܒܫܶܡ ܐܰܒܳܐ ܘܰܒܪܳܐ. ܘܪܽܘܚܳܐ ܕܩܽܘܕܫܳܐ.
20- ܘܰܐܠܶܦܘ ܐܶܢܽܘܢ ܕܢܶܛܪܽܘܢ ܟܽܠ ܡܳܐ ܕܦܰܩܶܕܬܟܽܘܢ. ܘܗܳܐ ܐܶܢܳܐ ܥܰܡܟܽܘܢ ܐ̱ܢܳܐ ܟܽܠܗܽܘܢ ܝܰܘ̈ܡܳܬܳܐ ܥܕܰܡܳܐ ܠܫܽܘܠܳܡܶܗ ܕܥܳܠܡܳܐ.“ ܐܰܡܺܝܢ܀