Deuteronomy 1
The Book of Deuteronomy
܀ ܬܢܝܢ ܢܡܘܣܐ ܐ ܀
1 ܘܗܳܠܶܝܢ ܦܶܬܓܳܡ̈ܶܐ ܕܶܐܡܰܪ ܡܽܘܫܶܐ ܠܟܽܠܶܗ ܝܺܣܪܳܐܶܝܠ ܒܥܶܒܪܳܐ ܕܝܽܘܪܕܢܳܢ ܒܡܰܕܒܪܳܐ. ܒܥܰܪܳܒܳܐ ܠܽܘܩܒܰܠ ܣܽܘܦ. ܒܶܝܬ ܦܰܪܰܢ. ܘܒܶܝܬ ܬܳܦܶܠ ܘܠܶܒܢܳܢ. ܘܚܰܨܪܽܘܬ ܘܕܺܝܙܰܗܰܒ.
2 ܡܰܪܕܶܐ ܚܕܰܥܣܰܪ ܝܰܘܡܺܝ̈ܢ ܡܶܢ ܚܽܘܪܺܝܒ ܠܛܽܘܪܳܐ ܕܣܳܥܺܝܪ. ܘܰܥܕܰܡܳܐ ܠܰܪܩܶܡ ܕܓܰܐܝܳܐ.
3 ܘܰܗܘܳܐ ܒܰܫܢܰܬ ܐܰܪܒܥܺܝܢ. ܒܝܰܪܚܳܐ ܕܰܚܕܰܥܣܰܪ ܒܚܰܕ ܒܝܰܪܚܳܐ. ܡܰܠܶܠ ܡܽܘܫܶܐ ܥܰܡ ܒܢܰܝ̈ ܝܺܣܪܳܐܶܝܠ. ܟܽܠܡܶܕܶܡ ܕܦܰܩܕܶܗ ܡܳܪܝܳܐ ܥܠܰܝܗܽܘܢ.
4 ܡܶܢ ܒܳܬܰܪ ܕܰܩܛܰܠ ܠܣܺܝܚܽܘܢ ܡܰܠܟܳܐ ܕܳܐܡܽܘܖ̈ܳܝܶܐ. ܕܝܳܬܶܒ ܗܘܳܐ ܒܚܶܫܒܽܘܢ. ܘܰܠܥܽܘܓ ܡܰܠܟܳܐ ܕܡܰܬܢܺܝܢ. ܕܝܳܬܶܒ ܗܘܳܐ ܒܥܰܣܬܪܽܘܬ. ܘܒܰܐܪܕܥܺܝ.
5 ܒܥܶܒܪܳܐ ܕܝܽܘܪܕܢܳܢ. ܒܰܐܪܥܳܐ ܕܡܽܘܐܳܒ. ܫܰܪܺܝ ܡܽܘܫܶܐ ܡܦܰܫܶܩ ܢܳܡܽܘܣܳܐ ܗܳܢܳܐ. ܘܳܐܡܰܪ.
6 ܡܳܪܝܳܐ ܐܰܠܳܗܰܢ ܐܶܡܰܪ ܠܰܢ ܒܚܽܘܪܺܝܒ. ܣܰܓܺܝ ܠܟܽܘܢ ܕܺܝܬܶܒܬܽܘܢ ܒܛܽܘܪܳܐ ܗܳܢܳܐ.
7 ܐܶܬܦܢܰܘ ܘܰܫܩܽܘܠܘ ܠܟܽܘܢ. ܘܥܽܘܠܘ ܠܛܽܘܪܳܐ ܕܳܐܡܽܘܖ̈ܳܝܶܐ. ܘܰܠܟܽܠ ܚܕܳܖ̈ܰܘܗܝ. ܠܥܳܪܳܒܳܐ. ܘܰܠܛܽܘܪܳܐ. ܘܠܰܫܦܳܠܳܐ. ܘܰܠܬܰܝܡܢܳܐ. ܘܠܰܣܦܳܖ̈ܰܝ ܝܰܡܳܐ. ܐܰܪܥܳܐ ܕܰܟܢܰܥܢܳܝ̈ܶܐ. ܘܠܶܒܢܳܢ ܥܕܰܡܳܐ ܠܢܰܗܪܳܐ ܪܰܒܳܐ ܢܰܗܪܳܐ ܦܪܳܬ.
8 ܚܙܰܘ ܕܝܶܗܒܶܬ ܩܕܳܡܰܝܟܽܘܢ ܐܰܪܥܳܐ. ܥܽܘܠܘ ܘܺܝܪܰܬܘ ܐܰܪܥܳܐ ܕܺܝܡܳܐ ܡܳܪܝܳܐ ܠܰܐܒܳܗܰܝ̈ܟܽܘܢ. ܠܰܐܒܪܳܗܳܡ. ܘܠܺܐܝܣܚܳܩ. ܘܰܠܝܰܥܩܽܘܒ. ܠܡܶܬܰܠ ܠܗܽܘܢ ܘܰܠܙܰܪܥܗܽܘܢ ܒܳܬܰܪܗܽܘܢ.
9 ܘܶܐܡܪܶܬ ܠܟܽܘܢ ܒܶܗ ܒܙܰܒܢܳܐ ܗܰܘ. ܠܳܐ ܡܶܫܟܰܚ ܐ̱ܢܳܐ ܒܰܠܚܽܘܕܰܝ ܕܶܐܣܰܝܒܰܪܟܽܘܢ.
10 ܡܳܪܝܳܐ ܐܰܠܳܗܟܽܘܢ ܐܰܣܓܺܝܟܽܘܢ. ܘܺܐܝܬܰܝܟܽܘܢ ܝܰܘܡܳܢܳܐ ܣܽܘܓܳܐܐ ܐܰܝܟ ܟܰܘ̈ܟܒܶܐ ܕܰܫܡܰܝܳܐ.
11 ܡܳܪܝܳܐ ܐܰܠܳܗܳܐ ܕܰܐܒܳܗܰܝ̈ܟܽܘܢ. ܢܰܘܣܶܦ ܥܠܰܝܟܽܘܢ ܐܰܟܘܳܬܟܽܘܢ ܐܳܠܶܦ ܙܰܒܢܺܝ̈ܢ. ܘܰܢܒܰܪܶܟܟܽܘܢ ܐܰܝܟܰܢܳܐ ܕܶܐܡܰܪ ܠܟܽܘܢ.
12 ܐܰܝܟܰܢܳܐ ܗܳܟܺܝܠ ܡܶܫܟܰܚ ܐ̱ܢܳܐ ܕܶܐܣܰܝܒܰܪ ܒܰܠܚܽܘܕܰܝ ܝܺܩܰܪܬܟܽܘܢ. ܘܛܰܥܢܟܽܘܢ. ܘܕܺܝܢܰܝ̈ܟܽܘܢ.
13 ܓܒܰܘ ܠܟܽܘܢ ܓܰܒܖ̈ܶܐ ܕܚܰܟܺܝܡܺܝܢ. ܘܣܰܟܽܘܠܬܳܢܺܝܢ. ܘܺܝܕܺܝܥܺܝܢ ܠܫܰܒܛܰܝ̈ܟܽܘܢ. ܘܰܐܩܺܝܡ ܐܶܢܽܘܢ ܒܪܺܝܫܟܽܘܢ.
14 ܘܰܥܢܰܝܬܽܘܢ ܘܶܐܡܰܪܬܽܘܢ ܠܺܝ. ܫܰܦܺܝܪ ܦܶܬܓܳܡܳܐ ܕܶܐܡܰܪܬ ܠܡܶܥܒܰܕ.
15 ܘܕܶܒܪܶܬ ܖ̈ܺܝܫܶܐ ܕܫܰܒܛܰܝ̈ܟܽܘܢ ܓܰܒܖ̈ܶܐ ܚܰܟܺܝ̈ܡܶܐ ܘܺܝܕܺܝ̈ܥܶܐ. ܘܥܶܒܕܶܬ ܐܶܢܽܘܢ ܖ̈ܺܝܫܶܐ ܥܠܰܝܟܽܘܢ. ܖ̈ܺܝܫܰܝ ܐܰܠܦ̈ܶܐ. ܘܖ̈ܺܝܫܰܝ ܡܰܐܘ̈ܳܬܳܐ. ܘܖ̈ܺܝܫܰܝ ܚܰܡܫܺܝܢ. ܘܖ̈ܺܝܫܰܝ ܥܶܣܪܳܐ. ܘܣܳܦܖ̈ܶܐ ܠܫܰܒܛܰܝ̈ܟܽܘܢ.
16 ܘܦܰܩܕܶܬ ܠܕܰܝܳܢܰܝ̈ܟܽܘܢ ܒܙܰܒܢܳܐ ܗܰܘ. ܘܶܐܡܪܶܬ ܠܗܽܘܢ. ܗܘܰܝܬܽܘܢ ܫܳܡܥܺܝܢ ܒܶܝܬ ܐܰܚܰܝ̈ܟܽܘܢ. ܘܕܳܝܢܺܝܢ ܩܽܘܫܬܳܐ ܒܶܝܬ ܓܰܒܪܳܐ ܠܰܐܚܽܘܗܝ. ܘܰܠܬܰܘܬܳܒܶܗ.
17 ܠܳܐ ܬܶܣܒܽܘܢ ܒܰܐܦ̈ܶܐ ܒܕܺܝܢܳܐ. ܠܰܙܥܽܘܪܳܐ ܐܰܝܟ ܪܰܒܳܐ ܗܘܰܝܬܽܘܢ ܫܳܡܥܺܝܢ. ܠܳܐ ܬܕܚܠܽܘܢ ܡܶܢ ܩܕܳܡ ܓܰܒܪܳܐ. ܡܶܛܽܠ ܕܕܺܝܢܳܐ ܕܰܐܠܳܗܰܐ ܗ̱ܘ. ܘܦܶܬܓܳܡܳܐ ܕܗܳܘܶܐ ܩܫܶܐ ܡܶܢܟܽܘܢ. ܩܰܪܒܽܘܗܝ ܠܘܳܬܝ ܘܶܐܫܡܥܺܝܘܗܝ.
18 ܘܦܰܩܶܕܬܟܽܘܢ ܒܙܰܒܢܳܐ ܗܰܘ ܟܽܠ ܦܶܬܓܳܡ̈ܶܐ. ܕܬܶܥܒܕܽܘܢ.
19 ܘܰܫܩܠܰܢ ܡܶܢ ܚܽܘܪܺܝܒ ܘܗܰܠܶܟܢ ܒܟܽܠܶܗ ܗܰܘ ܡܰܕܒܪܳܐ ܪܰܒܳܐ ܘܰܕܚܺܝܠܳܐ. ܕܰܚܙܰܝܬܽܘܢ ܒܰܐܪܥܳܐ ܕܛܽܘܪܳܐ ܕܳܐܡܽܘܖ̈ܳܝܶܐ ܐܰܝܟ ܕܦܰܩܕܰܢ ܡܳܪܝܳܐ ܐܰܠܳܗܰܢ. ܘܶܐܬܰܝܢ ܥܕܰܡܳܐ ܠܰܪܩܶܡ ܕܓܰܐܝܳܐ.
20 ܘܶܐܡܪܶܬ ܠܟܽܘܢ. ܐܶܬܰܝܬܽܘܢ ܥܕܰܡܳܐ ܠܛܽܘܪܳܐ ܕܳܐܡܽܘܖ̈ܳܝܶܐ. ܕܡܳܪܝܳܐ ܐܰܠܳܗܰܢ ܝܰܗܒ ܠܰܢ.
21 ܚܙܰܘ ܕܝܰܗܒ ܡܳܪܝܳܐ ܐܰܠܳܗܟܽܘܢ ܩܕܳܡܰܝܟܽܘܢ ܐܰܪܥܳܐ. ܣܰܩܘ ܘܺܝܪܰܬܘ ܐܰܪܥܳܐ. ܐܰܝܟܰܢܳܐ ܕܶܐܡܰܪ ܠܟܽܘܢ ܡܳܪܝܳܐ ܐܰܠܳܗܳܐ ܕܰܐܒܳܗܰܝ̈ܟܽܘܢ. ܠܳܐ ܬܶܕܚܠܽܘܢ. ܘܠܳܐ ܬܶܬܪܰܗܒܽܘܢ.
22 ܘܰܩܪܶܒܬܽܘܢ ܠܘܳܬܝ ܟܽܠܟܽܘܢ. ܘܶܐܡܰܪܬܽܘܢ. ܢܫܰܕܰܪ ܓܰܒܖ̈ܶܐ ܩܕܳܡܰܝܢ ܘܢܶܓܫܽܘܢ ܠܰܢ ܐܰܪܥܳܐ. ܘܢܶܬܠܽܘܢ ܠܰܢ ܦܶܬܓܳܡܳܐ. ܘܰܢܚܰܘܢܳܢ ܐܽܘܪܚܳܐ ܕܢܺܐܙܰܠ ܒܳܗ̇. ܘܩܽܘܖ̈ܝܳܐ ܕܢܶܥܽܘܠ ܠܗܶܝܢ.
23 ܘܰܫܦܰܪ ܦܶܬܓܳܡܳܐ ܒܥܰܝܢܰܝ̈. ܘܕܶܒܪܶܬ ܡܶܢܟܽܘܢ ܬܪܶܥܣܰܪ ܓܰܒܖ̈ܺܝܢ. ܚܰܕ ܚܰܕ ܓܰܒܪܳܐ ܡܶܢ ܫܰܒܛܳܐ.
24 ܘܶܐܬܦܢܺܝܘ ܘܰܣܠܶܩܘ ܠܛܽܘܪܳܐ. ܘܰܣܠܶܩܘ ܥܕܰܡܳܐ ܠܢܰܚܠܳܐ ܕܰܣܓܽܘܠܳܐ. ܘܓܰܫܽܘܗ̇ ܠܰܐܪܥܳܐ.
25 ܘܰܢܣܰܒܘ ܒܺܐܝܕܰܝ̈ܗܽܘܢ ܡܶܢ ܦܺܐܖ̈ܶܐ ܕܰܐܪܥܳܐ. ܘܰܐܝܬܺܝܘ ܠܰܢ. ܘܰܐܬܺܝܒܽܘܢ ܦܶܬܓܳܡܳܐ. ܘܶܐܡܰܪܘ ܠܰܢ. ܛܳܒܳܐ ܗ̱ܝ ܐܰܪܥܳܐ ܕܝܳܗܶܒ ܠܰܢ ܡܳܪܝܳܐ ܐܰܠܳܗܰܢ.
26 ܘܠܳܐ ܨܒܰܝܬܽܘܢ ܠܡܶܣܰܩ. ܐܶܠܳܐ ܡܰܪܡܰܪܬܽܘܢ ܡܶܠܰܬ ܦܽܘܡܶܗ ܕܡܳܪܝܳܐ ܐܰܠܳܗܰܢ.
27 ܘܰܪܛܶܢܬܽܘܢ ܡܶܢ ܡܰܫܟܢܰܝ̈ܟܽܘܢ. ܘܶܐܡܰܪܬܽܘܢ. ܡܶܛܽܠ ܕܣܳܢܶܐ ܗܽܘ ܠܰܢ ܡܳܪܝܳܐ ܐܰܦܩܰܢ ܡܶܢ ܐܰܪܥܳܐ ܕܡܶܨܪܶܝܢ. ܕܢܰܫܠܡܰܢ ܒܺܐܝܕܳܐ ܕܳܐܡܽܘܖ̈ܳܝܶܐ ܕܢܰܘܒܕܰܢ.
28 ܠܰܐܝܟܳܐ ܣܳܠܩܺܝܢܰܢ. ܐܰܚܰܝ̈ܢ ܬܒܰܪܘ ܠܶܒܰܢ. ܘܶܐܡܰܪܘ ܠܰܢ. ܕܥܰܡܳܐ ܪܰܒ ܘܪܳܡ ܘܥܰܫܺܝܢ ܡܶܢܰܢ. ܘܩܽܘܖ̈ܝܳܐ ܪܰܘܖ̈ܒܳܢ ܘܰܟܖ̈ܺܝܟܳܢ ܥܕܰܡܳܐ ܠܰܫܡܰܝܳܐ. ܐܳܦ ܒܢܰܝ̈ ܓܰܢ̱ܒܳܖ̈ܶܐ. ܚܙܰܝܢ ܬܰܡܳܢ.
29 ܘܶܐܡܪܶܬ ܠܟܽܘܢ. ܠܳܐ ܬܶܕܚܠܽܘܢ ܘܠܳܐ ܬܙܽܘܥܽܘܢ ܡܶܢܗܽܘܢ.
30 ܡܳܪܝܳܐ ܐܰܠܳܗܟܽܘܢ ܐܳܙܶܠ ܩܕܳܡܰܝܟܽܘܢ. ܘܗܽܘ ܡܶܬܟܰܬܰܫ ܚܠܳܦܰܝܟܽܘܢ. ܐܰܝܟ ܟܽܠ ܕܰܥܒܰܕ ܥܰܡܟܽܘܢ ܒܡܶܨܪܶܝܢ ܠܥܺܢܰܝ̈ܟܽܘܢ.
31 ܘܰܒܡܰܕܒܪܳܐ ܕܰܚܙܰܝܬܽܘܢ. ܕܬܰܪܣܺܝܟܽܘܢ ܡܳܪܝܳܐ ܐܰܠܳܗܟܽܘܢ. ܐܰܝܟ ܕܰܡܬܰܪܣܶܐ ܓܰܒܪܳܐ ܠܰܒܪܶܗ. ܒܟܽܠܳܗ̇ ܐܰܪܥܳܐ ܕܶܐܙܰܠܬܽܘܢ. ܥܕܰܡܳܐ ܕܶܐܬܰܝܬܽܘܢ ܠܰܐܬܪܳܐ ܗܳܢܳܐ.
32 ܘܰܒܦܶܬܓܳܡܳܐ ܗܳܢܳܐ ܠܳܐ ܡܗܰܝܡܢܺܝܢ ܐ̱ܢܬܽܘܢ ܒܡܳܪܝܳܐ ܐܰܠܳܗܟܽܘܢ .
33 ܕܳܐܙܶܠ ܩܕܳܡܰܝܟܽܘܢ ܒܽܐܘܪܚܳܐ ܠܡܰܬܩܳܢܽܘ ܠܟܽܘܢ ܐܰܬܪܳܐ ܕܬܶܫܪܽܘܢ ܒܶܗ. ܒܢܽܘܪܳܐ ܒܠܺܠܝܳܐ ܚܰܘܺܝܟܽܘܢ ܐܽܘܪܚܳܐ ܕܬܺܐܙܽܠܘܢ ܒܳܗ̇. ܘܒܳܥܢܳܢܳܐ ܒܺܐܝܡܳܡܳܐ.
34 ܘܰܫܡܰܥ ܡܳܪܝܳܐ ܩܳܠܳܐ ܕܡܶܠܰܝ̈ܟܽܘܢ. ܘܰܪܓܶܙ ܘܺܝܡܳܐ ܘܶܐܡܰܪ.
35 ܕܠܳܐ ܢܶܚܙܽܘܢ ܚܰܕ ܡܶܢ ܓܰܒܖ̈ܶܐ ܗܳܠܶܝܢ ܕܳܪܳܐ ܗܳܢܳܐ ܒܺܝܫܳܐ. ܐܰܪܥܳܐ ܛܳܒܬܳܐ ܕܺܝܡܺܝܬ ܠܡܶܬܰܠ ܠܰܐܒܳܗܰܝ̈ܗܽܘܢ.
36 ܐܶܠܳܐ ܐܶܢ ܟܳܠܳܒ ܒܰܪ ܝܽܘܦܢܳܐ. ܗܽܘ ܢܶܚܙܶܝܗ̇ ܘܠܶܗ ܐܶܬܶܠ ܐܰܪܥܳܐ ܕܗܰܠܶܟ ܒܳܗ̇. ܘܠܰܒܢܰܘ̈ܗܝ. ܚܠܳܦ ܕܫܰܡܠܺܝ ܒܳܬܰܪ ܡܳܪܝܳܐ.
37 ܘܳܐܦ ܥܠܰܝ ܪܓܶܙ ܡܳܪܝܳܐ ܡܶܛܽܠܳܬ̣ܟܽܘܢ. ܘܶܐܡܰܪ ܠܺܝ: ܕܳܐܦ ܐܰܢ̱ܬ ܠܳܐ ܬܶܥܽܘܠ ܠܬܰܡܳܢ.
38 ܐܶܠܳܐ ܐܶܢ ܝܶܫܽܘܥ ܒܰܪܢܽܘܢ ܕܩܳܐܶܡ ܩܕܳܡܰܝܟ. ܗܽܘ ܢܶܥܽܘܠ ܠܬܰܡܳܢ. ܠܶܗ ܚܰܝܶܠ. ܡܶܛܽܠ ܕܗܽܘ ܢܰܘܪܬܺܝܗ̇ ܠܺܝܣܪܳܐܶܝܠ.
39 ܘܺܝܩܰܪܬܟܽܘܢ ܕܶܐܡܰܪܬܽܘܢ ܠܒܶܙܬܳܐ ܬܶܗܘܶܐ. ܘܰܒܢܰܝ̈ܟܽܘܢ ܕܠܳܐ ܝܺܕܰܥܘ ܝܰܘܡܳܢܳܐ ܛܳܒܬܳܐ ܘܒܺܝܫܬܳܐ. ܗܶܢܽܘܢ ܢܺܐܪܬܽܘܢܳܗ̇.
40 ܘܰܐܢ̱ܬܽܘܢ ܐܶܬܦܢܰܘ ܠܟܽܘܢ. ܘܰܫܩܽܘܠܘ ܠܡܰܕܒܪܳܐ ܠܽܐܘܪܚܳܐ ܕܝܰܡܳܐ ܕܣܽܘܦ.
41 ܘܰܥܢܰܝܬܽܘܢ ܘܶܐܡܰܪܬܽܘܢ ܠܺܝ. ܚܛܰܝܢ ܩܕܳܡ ܡܳܪܝܳܐ ܐܰܠܳܗܰܢ. ܚܢܰܢ ܢܶܣܰܩ ܘܢܶܬܟܰܬܰܫ ܐܰܝܟ ܕܦܰܩܕܰܢ ܡܳܪܝܳܐ ܐܰܠܳܗܰܢ. ܘܶܐܙܕܰܝܰܢܬܽܘܢ ܓܒܰܪ ܒܡܳܐܢܰܝ̈ ܩܪܳܒܶܗ. ܘܶܐܬܓܰܪܰܓܬܽܘܢ ܠܡܶܣܰܒ ܠܛܽܘܪܳܐ.
42 ܘܶܐܡܰܪ ܠܺܝ ܡܳܪܝܳܐ. ܐܶܡܰܪ ܠܗܽܘܢ. ܠܳܐ ܬܶܣܩܽܘܢ ܘܠܳܐ ܬܶܬܟܰܬܫܽܘܢ. ܡܶܛܽܠ ܕܠܳܐ ܗܘܺܝܬ ܒܰܝܢܳܬܟܽܘܢ. ܕܠܳܐ ܬܶܬܰܒܪܽܘܢ ܩܕܳܡ ܒܥܶܠܕܒܳܒܰܝ̈ܟܽܘܢ.
43 ܘܶܐܡܪܶܬ ܠܟܽܘܢ ܘܠܳܐ ܫܡܰܥܬܽܘܢ. ܘܡܰܪܡܰܪܬܽܘܢ ܡܶܠܰܬ ܦܽܘܡܶܗ ܕܡܳܪܝܳܐ. ܘܰܐܡܪܰܚܬܽܘܢ ܘܰܣܠܶܩܬܽܘܢ ܠܛܽܘܪܳܐ.
44 ܘܰܢܦܰܩܘ ܐܳܡܽܘܖ̈ܳܝܶܐ ܕܥܳܡܪܺܝܢ ܒܛܽܘܪܳܐ ܗܰܘ ܠܽܐܘܪܥܟܽܘܢ. ܘܪܰܕܦܽܘܟܽܘܢ ܐܰܝܟ ܕܶܒܽܘܖ̈ܶܐ ܡܬܰܢܢ̈ܶܐ. ܘܛܰܪܕܽܘܟܽܘܢ ܡܶܢ ܣܰܥܺܝܪ ܘܰܥܕܰܡܳܐ ܠܚܶܪܡܳܐ.
45 ܘܺܝܬܶܒܬܽܘܢ ܘܰܒܟܰܝܬܽܘܢ ܩܕܳܡ ܡܳܪܝܳܐ. ܘܠܳܐ ܫܡܰܥ ܡܳܪܝܳܐ ܒܩܳܠܟܽܘܢ ܘܠܳܐ ܨܳܬܟܽܘܢ.
46 ܘܺܝܬܶܒܬܽܘܢ ܒܰܪܩܶܡ ܝܰܘ̈ܡܳܬܳܐ ܣܰܓܺܝ̈ܐܶܐ. ܐܰܝܟ ܝܰܘ̈ܡܳܬܳܐ ܕܺܝܬܶܒܬܽܘܢ.