Deuteronomy 4
The Book of Deuteronomy
܀ ܬܢܝܢ ܢܡܘܣܐ ܕ ܀
1 ܡܶܟܺܝܠ ܝܺܣܪܳܐܶܝܠ. ܫܡܰܥܘ ܢܳܡܽܘܣ̈ܶܐ ܘܕܺܝܢ̈ܶܐ ܕܡܰܠܶܦ ܐ̱ܢܳܐ ܠܟܽܘܢ ܝܰܘܡܳܢܳܐ ܠܡܶܥܒܰܕ. ܕܬܺܚܽܘܢ. ܘܬܶܥܠܽܘܢ ܘܬܺܐܪܬܽܘܢ ܐܰܪܥܳܐ ܕܝܳܗܶܒ ܠܟܽܘܢ ܡܳܪܝܳܐ ܐܰܠܳܗܳܐ ܕܰܐܒܳܗܰܝ̈ܟܽܘܢ.
2 ܠܳܐ ܬܰܘܣܦܽܘܢ ܥܰܠ ܦܽܘܩܕܳܢ̈ܶܐ ܕܰܡܦܰܩܶܕ ܐ̱ܢܳܐ ܠܟܽܘܢ. ܘܠܳܐ ܬܒܰܨܪܽܘܢ ܡܶܢܶܗ ܐܶܠܳܐ ܛܰܪܘ ܦܽܘܩܕܳܢܶܗ ܕܡܳܪܝܳܐ ܐܰܠܳܗܟܽܘܢ ܕܰܡܦܰܩܶܕ ܐ̱ܢܳܐ ܠܟܽܘܢ.
3 ܥܰܝܢܰܝ̈ܟܽܘܢ ܚܙܰܝ̈ ܟܽܠܡܶܕܶܡ ܕܰܥܒܰܕ ܡܳܪܝܳܐ ܠܰܒܥܶܠ ܦܥܽܘܪ ܡܶܛܽܠ ܕܟܽܠ ܓܰܒܪܳܐ ܕܶܐܙܰܠ ܒܳܬܰܪ ܒܥܶܠ ܦܥܽܘܪ. ܐܰܘܒܕܶܗ ܡܳܪܝܳܐ ܐܰܠܳܗܟܽܘܢ ܡܶܢ ܒܰܝܢܳܬܟܽܘܢ.
4 ܘܰܐܢ̱ܬܽܘܢ ܕܶܐܬܢܩܶܦܬܽܘܢ ܠܡܳܪܝܳܐ ܐܰܠܳܗܟܽܘܢ. ܗܳܐ ܚܰܝܝܺܢ ܐܢ̱ܬܽܘܢ ܟܽܠܟܽܘܢ ܥܕܰܡܳܐ ܠܝܰܘܡܳܢܳܐ.
5 ܚܙܰܘ ܕܰܐܠܶܦܬܟܽܘܢ ܢܳܡܽܘܣ̈ܶܐ ܘܕܺܝܢ̈ܶܐ. ܐܰܝܟܰܢܳܐ ܕܦܰܩܕܰܢܝ ܡܳܪܝܳܐ ܐܰܠܳܗܝ. ܕܬܶܥܒܕܽܘܢ ܐܶܢܽܘܢ ܒܰܐܪܥܳܐ ܕܥܳܐܠܺܝܢ ܐܢ̱ܬܽܘܢ ܠܳܗ̇ ܠܡܺܐܪܬܳܗ̇
6 ܘܬܶܛܪܽܘܢ ܘܬܶܥܒܕܽܘܢ ܐܶܢܽܘܢ. ܕܗܺܝ ܗܺܝ ܚܶܟܡܰܬܟܽܘܢ ܘܣܽܘܟܠܟܽܘܢ ܠܥܺܝܢ ܥܰܡ̈ܡܶܐ. ܕܢܶܫܡܥܽܘܢ ܗܳܠܶܝܢ ܟܽܠܗܽܘܢ ܢܳܡܽܘܣ̈ܶܐ. ܘܢܺܐܡܪܽܘܢ ܕܚܰܟܺܝܡ ܗܽܘ ܘܣܰܟܽܘܠܬܳܢ ܥܰܡܳܐ ܗܳܢܳܐ ܪܰܒܳܐ.
7 ܐܰܝܢܰܘ ܓܶܝܪ ܥܰܡܳܐ ܪܰܒܳܐ ܕܩܰܪܺܝܒ ܠܶܗ ܐܰܠܳܗܶܗ. ܐܰܝܟ ܡܳܪܝܳܐ ܐܰܠܳܗܰܢ ܒܟܽܠ ܕܩܳܪܶܝܢܰܢ ܠܶܗ.
8 ܘܰܐܝܢܰܘ ܥܰܡܳܐ ܪܰܒܳܐ ܕܺܐܝܬ ܠܶܗ ܢܳܡܽܘܣ̈ܶܐ. ܘܕܺܝܢ̈ܶܐ ܙܰܕܺܝܩ̈ܶܐ. ܐܰܝܟ ܟܽܠܶܗ ܢܳܡܽܘܣܳܐ ܗܳܢܳܐ ܕܝܳܗܶܒ ܐ̱ܢܳܐ ܩܕܳܡܰܝܟܽܘܢ ܝܰܘܡܳܢܳܐ.
9 ܒܰܠܚܽܘܕ ܐܶܙܕܰܗܪܘ ܛܳܒ. ܘܛܰܪܘ ܢܰܦ̈ܫܳܬܟܽܘܢ. ܕܠܳܐ ܬܶܛܥܽܘܢ ܟܽܠ ܦܶܬܓܳܡ̈ܶܐ ܕܰܚ̈ܙܰܝ ܥܰܝܢܰܝ̈ܟܽܘܢ. ܘܠܳܐ ܢܶܥܒܪܽܘܢ ܡܶܢ ܠܶܒܟܽܘܢ ܟܽܠܗܽܘܢ ܝܰܘ̈ܡܰܝ ܚܰܝܰܝ̈ܟܽܘܢ. ܘܰܐܘܕܰܥܘ ܐܶܢܽܘܢ ܠܰܒܢܰܝ̈ܟܽܘܢ. ܘܠܰܒܢܰܝ̈ ܒܢܰܝ̈ܟܽܘܢ.
10 ܝܰܘܡܳܐ ܕܩܳܡܬܽܘܢ ܩܕܳܡ ܡܳܪܝܳܐ ܐܰܠܳܗܟܽܘܢ ܒܚܽܘܪܺܝܒ. ܟܰܕ ܐܶܡܰܪ ܠܺܝ ܡܳܪܝܳܐ. ܟܰܢܶܫ ܩܕܳܡܰܝ ܠܥܰܡܳܐ ܘܰܐܫܡܰܥ ܐܶܢܽܘܢ ܦܶܬܓܳܡܰܝ̈. ܘܢܺܐܠܦܽܘܢ ܠܡܶܕܚܰܠ ܩܕܳܡܰܝ. ܟܽܠܗܽܘܢ ܝܰܘ̈ܡܳܬܳܐ ܕܚܰܝܺܝܢ ܒܰܐܪܥܳܐ. ܘܠܰܒܢܰܝ̈ܗܽܘܢ ܢܰܠܦܽܘܢ.
11 ܘܰܩܪܶܒܬܽܘܢ ܘܩܳܡܬܽܘܢ ܒܰܫ̈ܦܽܘܠܰܝ ܛܽܘܪܳܐ. ܘܛܽܘܪܳܐ ܡܶܬܓܰܘܙܰܠ ܗܘܳܐ ܒܢܽܘܪܳܐ. ܥܕܰܡܳܐ ܠܠܶܒܳܐ ܕܰܫܡܰܝܳܐ. ܘܚܶܫܽܘܟܳܐ. ܘܰܥܢܳܢܳܐ. ܘܥܰܪܦܠܳܐ.
12 ܘܡܰܠܶܠ ܡܳܪܝܳܐ ܥܰܡܟܽܘܢ ܒܛܽܘܪܳܐ ܡܶܢ ܓܰܘ ܢܽܘܪܳܐ. ܩܳܠܳܐ ܕܡܰܡܠܠܳܐ ܫܳܡܥܺܝܢ ܗܘܰܝܬܽܘܢ. ܘܰܕܡܽܘܬܳܐ ܠܳܐ ܚܳܙܶܝܢ ܗܘܰܝܬܽܘܢ. ܐܶܠܳܐ ܐܶܢ ܩܳܠܳܐ ܒܰܠܚܽܘܕ.
13 ܘܚܰܘܺܝܟܽܘܢ ܩܝܳܡܶܗ. ܘܦܰܩܶܕܟܽܘܢ ܕܬܶܥܒܕܽܘܢ ܥܶܣܪܳܐ ܦܶܬܓܳܡܺܝ̈ܢ. ܘܰܟܬܰܒ ܐܶܢܽܘܢ ܥܰܠ ܬܰܪܬܶܝܢ ܠܽܘ̈ܚܶܐ ܕܟܺܐܦܳܐ.
14 ܘܠܺܝ ܦܰܩܕܰܢܝ ܡܳܪܝܳܐ ܒܙܰܒܢܳܐ ܗܰܘ. ܕܰܐܠܶܦܟܽܘܢ ܢܳܡܽܘܣ̈ܶܐ ܘܕܺܝܢ̈ܶܐ. ܕܬܶܥܒܕܽܘܢ ܐܶܢܽܘܢ ܒܰܐܪܥܳܐ ܕܥܳܒܪܺܝܢ ܐ̱ܢܬܽܘܢ ܠܬܰܡܳܢ ܠܡܺܐܪܬܳܗ̇
15 ܐܶܙܕܰܗܪܘ ܛܳܒ ܒܢܰܦܫܟܽܘܢ ܡܶܛܽܠ ܕܠܳܐ ܚܙܰܝܬܽܘܢ ܕܡܽܘܬܳܐ. ܒܝܰܘܡܳܐ ܕܡܰܠܶܠ ܡܳܪܝܳܐ ܥܰܡܟܽܘܢ ܒܚܽܘܪܺܝܒ ܡܶܢ ܓܰܘ ܢܽܘܪܳܐ.
16 ܕܠܳܐ ܬܚܰܒܠܽܘܢ ܘܬܶܥܒܕܽܘܢ ܠܟܽܘܢ ܨܰܠܡܶܐ ܘܕܶܡ̈ܘܳܬܳܐ ܕܟܽܠ ܓܢܶܣ. ܕܡܽܘܬܳܐ ܕܕܶܟܪܳܐ. ܐܰܘ ܕܢܶܩܒܬܳܐ.
17 ܕܡܽܘܬܳܐ ܕܟܽܠ ܒܥܺܝܪܳܐ ܕܺܐܝܬ ܒܰܐܪܥܳܐ. ܕܡܽܘܬܳܐ ܕܟܽܠ ܦܳܪܰܚܬܳܐ ܕܓܶܦܳܐ ܕܦܳܪܚܳܐ ܒܰܫܡܰܝܳܐ.
18 ܕܡܽܘܬܳܐ ܕܟܽܠ ܖ̈ܰܚܫܳܐ ܕܰܐܪܥܳܐ. ܕܡܽܘܬܳܐ ܕܟܽܠ ܢܽܘ̈ܢܶܐ ܕܰܒܝܰܡܳܐ ܕܰܠܬܰܚܬ ܡܶܢ ܐܰܪܥܳܐ.
19 ܘܰܕܠܳܐ ܬܪܺܝܡܽܘܢ ܥܰܝܢܰܝ̈ܟܽܘܢ. ܠܰܫܡܰܝܳܐ. ܘܬܶܚܙܽܘܢ ܫܶܡܫܳܐ. ܘܣܰܗܪܳܐ. ܘܟܰܘܟ̈ܒܶܐ. ܘܟܽܠܗܽܘܢ ܚܰܝ̈ܠܘܳܬܳܐ ܕܰܫܡܰܝܳܐ. ܘܬܶܛܥܽܘܢ ܘܬܶܣܓܕܽܘܢ ܠܗܽܘܢ. ܘܬܶܦܠܚܽܘܢ ܐܶܢܽܘܢ. ܕܦܰܠܶܓ ܐܶܢܽܘܢ ܡܳܪܝܳܐ ܐܰܠܳܗܟܽܘܢ ܠܟܽܠܗܽܘܢ ܥܰܡ̈ܡܶܐ ܕܰܬܚܶܝܬ ܫܡܰܝܳܐ.
20 ܘܰܠܟܽܘܢ ܩܰܪܶܒ ܡܳܪܝܳܐ. ܘܰܐܦܶܩܟܽܘܢ ܡܶܢ ܟܽܘܪܳܐ ܕܦܰܪܙܠܳܐ ܡܶܢ ܡܶܨܪܶܝܢ. ܕܬܶܗܘܢ ܠܶܗ ܥܰܡܳܐ ܘܝܳܪܬܽܘܬܳܐ ܐܰܝܟ ܝܰܘܡܳܢܳܐ.
21 ܘܰܪܓܶܙ ܥܠܰܝ ܡܳܪܝܳܐ ܡܶܛܽܠ ܦܶܬܓܳܡܰܝ̈ܟܽܘܢ. ܘܺܝܡܳܐ ܕܠܳܐ ܐܶܥܒܰܪ ܝܽܘܪܕܢܳܢ ܗܳܢܳܐ. ܘܠܳܐ ܐܶܥܽܘܠ ܠܰܐܪܥܳܐ ܛܳܒܬܳܐ ܕܝܳܗܶܒ ܠܟܽܘܢ ܡܳܪܝܳܐ ܐܰܠܳܗܟܽܘܢ ܝܽܘܪܬܳܢܳܐ.
22 ܡܶܛܽܠ ܕܶܐܢܳܐ ܡܳܐܶܬ ܐ̱ܢܳܐ ܒܰܐܪܥܳܐ ܗܳܕܶܐ. ܘܠܳܐ ܥܳܒܰܪ ܐ̱ܢܳܐ ܝܽܘܪܕܢܳܢ ܗܳܢܳܐ. ܐܰܢ̱ܬܽܘܢ. ܕܶܝܢ ܥܳܒܪܺܝܢ ܐ̱ܢܬܽܘܢ. ܘܝܳܪܬܺܝܢ ܐ̱ܢܬܽܘܢ ܐܰܪܥܳܐ ܗܳܕܶܐ ܛܳܒܬܳܐ ܕܝܳܗܶܒ ܠܟܽܘܢ ܡܳܪܝܳܐ ܐܰܠܳܗܟܽܘܢ.
23 ܐܶܙܕܰܗܪܘ ܕܠܳܐ ܬܶܛܥܽܘܢ ܩܝܳܡܶܗ ܕܡܳܪܝܳܐ ܐܰܠܳܗܟܽܘܢ ܕܰܐܩܺܝܡ ܥܰܡܟܽܘܢ. ܘܰܬܚܰܒܠܽܘܢ ܘܬܶܥܒܕܽܘܢ ܠܟܽܘܢ ܨܰܠ̈ܡܶܐ ܘܕܶܡ̈ܘܳܬܳܐ. ܕܟܽܠܡܶܕܶܡ ܕܦܰܩܶܕܟܽܘܢ ܡܳܪܝܳܐ ܐܰܠܳܗܟܽܘܢ.
24 ܡܶܛܽܠ ܕܡܳܪܝܳܐ ܐܰܠܳܗܟܽܘܢ ܢܽܘܪܳܐ ܗܽܘ ܐܳܟܶܠܬܳܐ. ܘܰܐܠܳܗܳܐ ܗܽܘ ܛܰܢܳܢܳܐ.
25 ܘܟܰܕ ܬܰܘܠܕܽܘܢ ܒܢܰܝ̈ܳܐ. ܐܰܘ ܒܢܰܝ̈ ܒܢܰܝ̈ܳܐ. ܘܬܶܥܬܩܽܘܢ ܒܰܐܪܥܳܐ. ܘܰܬܚܰܒܠܽܘܢ ܘܬܶܥܒܕܽܘܢ ܨܰܠ̈ܡܶܐ ܘܕܶܡ̈ܘܳܬܳܐ ܕܟܽܠܡܶܕܶܡ. ܘܬܶܥܒܕܽܘܢ ܕܒܺܝܫ ܩܕܳܡ ܡܳܪܝܳܐ ܐܰܠܳܗܟܽܘܢ ܘܬܰܪܓܙܽܘܢܶܗ.
26 ܣܰܗܕܶܬ ܒܟܽܘܢ ܝܰܘܡܳܢܳܐ ܫܡܰܝܳܐ ܘܰܐܪܥܳܐ. ܕܡܶܐܒܰܕ ܐܳܒܕܺܝܢ ܐ̱ܢܬܽܘܢ ܒܰܥܓܰܠ ܡܶܢ ܐܰܪܥܳܐ ܕܥܳܒܪܺܝܢ ܐ̱ܢܬܽܘܢ ܝܽܘܪܕܢܳܢ ܝܰܘܡܳܢܳܐ ܠܡܺܐܪܬܳܗ̇ ܘܠܳܐ ܬܰܣܓܽܘܢ ܒܳܗ̇ ܝܰܘ̈ܡܳܬܳܐ. ܐܶܠܳܐ ܡܺܐܒܰܕ ܬܺܐܒܕܽܘܢ.
27 ܘܰܢܒܰܕܰܪܟܽܘܢ ܡܳܪܝܳܐ ܒܶܝܬ ܥܰܡ̈ܡܶܐ. ܘܬܶܫܬܰܚܪܽܘܢ ܩܰܠܺܝܠ ܒܡܶܢܝܳܢܳܐ. ܒܶܝܬ ܥܰܡ̈ܡܶܐ. ܕܰܢܒܰܕܰܪܟܽܘܢ ܡܳܪܝܳܐ ܠܬܰܡܳܢ.
28 ܘܬܶܦܠܚܽܘܢ ܬܰܡܳܢ ܠܰܐܠܳܗ̈ܳܐ ܥܒܳܕ ܐܺܝ̈ܕܰܝܳܐ ܕܰܒܢܰܝ̈ܢܳܫܳܐ. ܕܩܰܝܣܳܐ ܘܰܕܟܺܐܦܳܐ. ܕܠܳܐ ܚܳܙܶܝܢ ܘܠܳܐ ܫܳܡܥܺܝܢ. ܘܠܳܐ ܐܳܟܠܺܝܢ. ܘܠܳܐ ܡܪܺܝܚܺܝܢ.
29 ܘܬܶܒܥܽܘܢܶܗ ܬܰܡܳܢ ܠܡܳܪܝܳܐ ܐܰܠܳܗܟܽܘܢ. ܘܬܶܫܟܚܽܘܢܶܗ. ܟܰܕ ܬܥܰܩܒܽܘܢ ܥܠܰܘܗܝ ܡܶܢ ܟܽܠܶܗ ܠܶܒܟܽܘܢ ܘܡܶܢ ܟܽܠܳܗ̇ ܢܰܦܫܟܽܘܢ.
30 ܡܳܐ ܕܥܳܩܰܬ ܠܟܽܘܢ. ܘܡܰܛܺܝܟܽܘܢ ܗܳܠܶܝܢ ܟܽܠܗܽܘܢ ܦܶܬܓܳܡ̈ܶܐ ܒܚܰܪܬܳܐ ܕܝܰܘ̈ܡܳܬܳܐ. ܘܬܶܬܦܢܽܘܢ ܠܘܳܬ ܡܳܪܝܳܐ ܐܰܠܳܗܟܽܘܢ ܘܬܶܫܡܥܽܘܢ ܒܩܳܠܶܗ.
31 ܡܶܛܽܠ ܕܰܐܠܳܗܰܐ ܗ̱ܘ ܡܪܰܚܡܳܢܳܐ ܡܳܪܝܳܐ ܐܰܠܳܗܟܽܘܢ. ܠܳܐ ܢܚܰܒܶܠܟܽܘܢ. ܘܠܳܐ ܢܶܫܒܽܘܩܟܽܘܢ. ܘܠܳܐ ܢܶܛܥܶܐ ܩܝܳܡܳܐ ܕܺܝܡܳܐ ܠܰܐܒܳܗܰܝ̈ܟܽܘܢ.
32 ܐܶܠܳܐ ܫܰܐܶܠܘ ܥܰܠ ܝܰܘ̈ܡܳܬܳܐ ܩܰܕܡܳܝ̈ܶܐ ܕܰܗܘܰܘ ܩܕܳܡܰܝܟܽܘܢ. ܡܶܢ ܝܰܘܡܳܐ ܕܰܒܪܳܐ ܐܰܠܳܗܳܐ ܠܐ̱ܢܳܫܳܐ ܥܰܠ ܐܰܪܥܳܐ. ܡܶܢ ܣܰܘ̈ܦܰܝ ܫܡܰܝܳܐ ܘܰܥܕܰܡܳܐ ܠܣܰܘ̈ܦܰܝ ܫܡܰܝܳܐ. ܐܶܢ ܗܘܳܐ ܐܰܝܟ ܦܶܬܓܳܡܳܐ ܗܳܢܳܐ ܪܰܒܳܐ. ܐܰܘ ܐܶܫܬܡܰܥ ܐܰܟܘܳܬܶܗ.
33 ܐܶܢ ܫܡܰܥ ܥܰܡܳܐ ܐ̱ܚܪܺܢܳܐ ܩܳܠܶܗ ܕܰܐܠܳܗܳܐ ܕܰܡܡܰܠܶܠ ܡܶܢ ܓܰܘ ܢܽܘܪܳܐ. ܐܰܝܟ ܕܰܫܡܰܥܬܽܘܢ ܐ̱ܢܬܽܘܢ ܘܰܚܝܰܝܬܽܘܢ.
34 ܐܰܘ ܢܰܣܺܝܘ ܠܰܐܠܳܗܳܐ ܕܶܐܙܰܠ ܘܰܢܣܰܒ ܠܶܗ ܥܰܡܳܐ ܡܶܢ ܓܰܘ ܥܰܡܳܐ. ܒܢܶܣܝܽܘܢ̈ܶܐ. ܘܒܳܐܬܘ̈ܳܬܳܐ. ܘܰܒܬܶܕܡܖ̈ܳܬܳܐ. ܘܒܰܩܖ̈ܳܒܶܐ. ܘܒܺܐܝܕܳܐ ܬܰܩܺܝܦܬܳܐ. ܘܒܰܕܪܳܥܳܐ ܪܳܡܳܐ. ܘܰܒܚܶܙ̈ܘܳܢܶܐ ܪܰܘܖ̈ܒܶܐ. ܐܰܝܟ ܟܽܠ ܕܰܥܒܰܕ ܡܳܪܝܳܐ ܐܰܠܳܗܟܽܘܢ ܠܡܶܨܖ̈ܳܝܶܐ ܠܥܺܝܢܰܝ̈ܟܽܘܢ.
35 ܐܰܢ̱ܬܽܘܢ ܚܙܰܝܬܽܘܢ ܘܳܝܕܥܺܝܬܽܘܢ ܕܡܳܪܝܰܐ ܗ̱ܘ ܐܰܠܳܗܳܐ. ܘܠܰܝܬ ܬܽܘܒ ܠܒܰܪ ܡܶܢܶܗ.
36 ܡܶܢ ܫܡܰܝܳܐ ܐܰܫܡܰܥܟܽܘܢ ܩܳܠܶܗ ܠܡܰܠܳܦܽܘܬܟܽܘܢ. ܘܥܰܠ ܐܰܪܥܳܐ ܚܰܘܺܝܟܽܘܢ ܢܽܘܪܶܗ ܪܰܒܬܳܐ. ܘܦܶܬܓܳܡܰܘ̈ܗܝ ܫܡܰܥܬܽܘܢ ܡܶܢ ܓܰܘ ܢܽܘܪܳܐ.
37 ܘܰܒܕܰܪܚܶܡ ܠܰܐܒܳܗܰܝ̈ܟܽܘܢ ܓܒܳܐ ܠܙܰܪܥܗܽܘܢ ܒܳܬܰܪܗܽܘܢ. ܘܰܐܦܶܩܟܽܘܢ ܒܦܰܪܨܽܘܦܶܗ ܒܚܰܝܠܳܐ ܪܰܒܳܐ ܡܶܢ ܡܶܨܪܶܝܢ.
38 ܠܡܰܘܒܳܕܽܘ ܡܶܢ ܩܕܳܡܰܝܟܽܘܢ ܥܰܡ̈ܡܶܐ ܕܪܰܘܪܒܺܝܢ ܘܥܰܫܺܝܢܺܝܢ ܡܶܢܟܽܘܢ. ܕܢܰܥܶܠܟܽܘܢ ܘܢܶܬܶܠ ܠܟܽܘܢ ܐܰܪܥܗܽܘܢ ܝܽܘܪܬܳܢܳܐ ܐܰܝܟ ܝܰܘܡܳܢܳܐ.
39 ܘܬܶܕܥܽܘܢ ܝܰܘܡܳܢܳܐ ܘܬܰܦܢܽܘܢ ܠܶܒܟܽܘܢ. ܡܶܛܽܠ ܕܡܳܪܝܰܐ ܗ̱ܘ ܐܰܠܳܗܳܐ ܒܰܫܡܰܝܳܐ ܡܶܢ ܠܥܶܠ. ܘܥܰܠ ܐܰܪܥܳܐ ܡܶܢ ܠܬܰܚܬ. ܘܠܰܝܬ ܬܽܘܒ ܠܒܰܪ ܡܶܢܶܗ.
40 ܛܰܪܘ ܢܳܡܽܘܣܰܘ̈ܗܝ ܘܦܽܘܩܕܳܢܰܘ̈ܗܝ ܕܰܡܦܰܩܶܕ ܐ̱ܢܳܐ ܠܟܽܘܢ ܝܰܘܡܳܢܳܐ. ܕܢܰܛܐܶܒ ܠܟܽܘܢ. ܘܠܰܒܢܰܝ̈ܟܽܘܢ ܒܳܬܰܪܟܽܘܢ. ܘܬܰܣܓܽܘܢ ܝܰܘ̈ܡܳܬܳܐ ܒܰܐܪܥܳܐ ܕܝܳܗܶܒ ܠܟܽܘܢ ܡܳܪܝܳܐ ܐܰܠܳܗܟܽܘܢ ܟܽܠܗܽܘܢ ܝܰܘ̈ܡܳܬܳܐ.
41 ܗܳܝܕܶܝܢ ܦܪܰܫ ܡܽܘܫܶܐ ܬܠܳܬ ܩܽܘܖ̈ܝܳܐ ܒܥܶܒܪܳܐ ܕܝܽܘܪܕܢܳܢ. ܡܶܢ ܡܰܕܢܳܚܰܝ̈ ܫܶܡܫܳܐ.
42 ܕܢܶܥܪܽܘܩ ܠܬܰܡܳܢ ܩܳܛܽܘܠܳܐ ܕܢܶܩܛܽܘܠ ܠܚܰܒܪܶܗ ܕܠܳܐ ܒܨܶܒܝܳܢܶܗ. ܘܠܳܐ ܣܳܢܶܐ ܗܘܳܐ ܠܶܗ ܡܶܢ ܐܶܬܡܳܠܝ ܘܡܶܢ ܡܢܳܬܡܳܠܝ. ܘܢܶܥܪܽܘܩ ܠܰܚܕܳܐ ܡܶܢ ܗܳܠܶܝܢ ܩܽܘܖ̈ܝܳܐ. ܘܢܺܚܶܐ.
43 ܚܕܳܐ ܡܶܢܗܶܝܢ ܒܽܘܨܳܪ ܕܰܒܡܰܕܒܪܳܐ ܒܰܐܪܥܳܐ ܕܰܦܩܰܥܬܳܐ ܕܪܽܘܒܺܝܠ. ܘܰܐ̱ܚܪܺܬܳܐ ܪܳܡܰܬ ܓܶܠܥܳܕ ܕܓܳܕ. ܘܓܽܘܠܳܢ ܕܰܒܡܰܬܢܺܝܢ ܕܰܡܢܰܫܶܐ.
44 ܗܳܢܳܐ ܢܳܡܽܘܣܳܐ ܕܣܳܡ ܡܽܘܫܶܐ ܩܕܳܡ ܒܢܰܝ̈ ܝܺܣܪܳܐܶܝܠ.
45 ܗܳܠܶܝܢ ܣܳܗܕܘ̈ܳܬܳܐ. ܘܢܳܡܽܘܣ̈ܶܐ. ܘܕܺܝܢ̈ܶܐ. ܕܡܰܠܶܠ ܡܽܘܫܶܐ ܥܰܡ ܒܢܰܝ̈ ܝܺܣܪܳܐܶܝܠ. ܟܰܕ ܢܦܰܩܘ ܡܶܢ ܡܶܨܪܶܝܢ.
46 ܒܥܶܒܪܳܐ ܕܝܽܘܪܕܢܳܢ. ܒܢܰܚܠܳܐ ܠܽܘܩܒܰܠ ܒܶܝܬ ܦܥܽܘܪ. ܒܰܐܪܥܳܐ ܕܣܺܝܚܽܘܢ ܡܰܠܟܳܐ ܕܳܐܡܽܘܖ̈ܳܝܶܐ ܕܝܳܬܶܒ ܗܘܳܐ ܒܚܶܫܒܽܘܢ. ܕܩܰܛܠܶܗ ܡܽܘܫܶܐ ܘܰܒܢܰܝ̈ ܝܺܣܪܳܐܶܝܠ. ܟܰܕ ܢܦܰܩܘ ܡܶܢ ܡܶܨܪܶܝܢ.
47 ܘܺܝܪܶܬܘ ܐܰܪܥܶܗ. ܘܰܐܪܥܳܐ ܕܥܽܘܓ ܡܰܠܟܳܐ ܕܡܰܬܢܺܝܢ. ܬܪܶܝܢ ܡܰܠ̈ܟܶܐ ܕܳܐܡܽܘܖ̈ܳܝܶܐ ܕܰܒܥܶܒܪܳܐ ܕܝܽܘܪܕܢܳܢ. ܡܶܢ ܡܰܕܢܳܚܰܝ̈ ܫܶܡܫܳܐ.
48 ܡܶܢ ܥܰܕܽܘܥܺܝܪ ܕܥܰܠ ܣܶܦܬܳܐ ܕܢܰܚܠܳܐ ܕܰܐܪܢܽܘܢ. ܘܰܥܕܰܡܳܐ ܠܛܽܘܪܳܐ ܕܣܰܪܝܽܘܢ ܗܽܘܝܽܘ ܚܶܪܡܽܘܢ.
49 ܘܟܽܠܶܗ ܥܳܪܳܒܳܐ ܕܰܒܥܶܒܪܳܐ ܕܝܽܘܪܕܢܳܢ ܡܶܢ ܡܰܕܢܚܳܐ. ܘܰܥܕܰܡܳܐ ܠܝܰܡܳܐ ܕܥܳܪܳܒܳܐ ܕܰܬܚܶܝܬ ܐܰܫܕܽܘܕ ܘܦܰܣܓܳܐ.