Deuteronomy 8
The Book of Deuteronomy
܀ ܬܢܝܢ ܢܡܘܣܐ ܚ ܀
1 ܟܽܠܗܽܘܢ ܦܽܘܩ̈ܕܳܢܶܐ ܕܰܡܦܰܩܶܕ ܠܟܽܘܢ ܝܰܘܡܳܢܳܐ. ܛܰܪܘ ܘܰܥܒܶܕܘ ܐܶܢܽܘܢ. ܕܬܺܚܽܘܢ. ܘܬܶܣܓܽܘܢ. ܘܬܶܥܠܽܘܢ. ܘܬܺܐܪܬܽܘܢ ܐܰܪܥܳܐ ܕܺܝܡܳܐ ܡܳܪܝܳܐ ܠܰܐܒܳܗܰܝ̈ܟܽܘܢ.
2 ܘܬܶܬܕܰܟܪܽܘܢ ܟܽܠܳܗ̇ ܐܽܘܪܚܳܐ ܕܰܕܒܰܪܟܽܘܢ ܡܳܪܝܳܐ ܐܰܠܳܗܟܽܘܢ. ܗܳܐ ܐܰܪܒܥܺܝܢ ܫܢܺܝ̈ܢ ܒܡܰܕܒܪܳܐ. ܕܰܢܡܰܟܶܟܟܽܘܢ ܘܰܢܢܰܣܶܝܟܽܘܢ. ܘܰܕܢܶܕܰܥ ܡܳܐ ܕܺܐܝܬ ܒܠܶܒܟܽܘܢ. ܐܶܢ ܢܳܛܪܺܝܢ ܐ̱ܢܬܽܘܢ ܦܽܘܩܕܳܢܰܘ̈ܗܝ ܐܰܘ ܠܳܐ.
3 ܘܡܰܟܟܳܟ. ܘܰܐܟܦܢܳܟ. ܘܰܐܘܟܠܳܟ ܡܰܢܢܳܐ ܕܠܳܐ ܝܺܕܰܥܬ. ܘܠܳܐ ܝܰܕܥܽܘܗܝ ܐܰܒܳܗܰܝ̈ܟ. ܕܰܢܚܰܘܶܝܟ ܕܠܳܐ ܗܘܳܐ ܒܠܰܚܡܳܐ ܒܰܠܚܽܘܕ ܚܳܝܶܐ ܒܰܪܢܳܫܳܐ. ܐܶܠܳܐ ܒܟܽܠܡܶܕܶܡ ܕܡܰܦܶܩ ܦܽܘܡܶܗ ܕܡܳܪܝܳܐ ܚܳܝܶܐ ܐ̱ܢܳܫܳܐ.
4 ܢܰܚܬܰܝ̈ܟ ܠܳܐ ܒܠܺܝܘ ܡܶܢܳܟ. ܘܖ̈ܶܓܠܰܝܟ ܠܳܐ ܐܰܢܚܶܦܝ̈ ܗܳܐ ܐܰܪܒܥܺܝܢ ܫܢܺܝ̈ܢ.
5 ܘܰܕܬܶܕܰܥ ܒܠܶܒܳܟ ܕܰܐܝܟ ܕܪܳܕܶܐ ܓܰܒܪܳܐ ܠܰܒܪܶܗ. ܗܳܟܰܢܳܐ ܪܳܕܶܐ ܠܳܟ ܡܳܪܝܳܐ ܐܰܠܳܗܳܟ.
6 ܛܰܪ ܦܽܘܩܕܳܢܰܘ̈ܗܝ ܕܡܳܪܝܳܐ ܐܰܠܳܗܳܟ. ܘܗܰܠܶܟ ܒܽܐܘܖ̈ܚܳܬܶܗ. ܘܰܕܚܰܠ ܡܶܢܶܗ.
7 ܡܶܛܽܠ ܕܡܳܪܝܳܐ ܐܰܠܳܗܳܟ ܡܰܥܶܠ ܠܳܟ ܠܰܐܪܥܳܐ ܛܳܒܬܳܐ. ܐܰܪܥܳܐ ܕܖ̈ܶܓ̣ܠܳܬܳܐ ܕܡܰܝ̈ܳܐ. ܘܡܰܒܽܘܥ̈ܶܐ ܘܰܬܗܽܘ̈ܡܶܐ ܕܢܳܦܩܺܝܢ ܒܦܰܩ̈ܥܳܬܳܐ ܘܰܒܛܽܘܖ̈ܶܐ.
8 ܐܰܪܥܳܐ ܕܚܶܛ̈ܶܐ. ܘܕܰܣܥܳܖ̈ܶܐ. ܘܰܕܓܽܘܦܢ̈ܶܐ. ܘܰܕܬܺܐܢ̈ܶܐ. ܘܰܕܖ̈ܽܘܡܳܢܶܐ. ܐܰܪܥܳܐ ܕܙܰܝ̈ܬܶܐ. ܘܰܕܡܶܫܚܳܐ. ܘܰܕܕܶܒܫܳܐ.
9 ܐܰܪܥܳܐ ܕܠܳܐ ܒܡܶܣܟܺܢܽܘܬܳܐ ܬܶܐܟܽܘܠ ܒܳܗ̇ ܠܰܚܡܳܐ. ܘܠܳܐ ܢܶܚܣܰܪ ܠܳܟ ܒܳܗ̇ ܡܶܕܶܡ. ܐܰܪܥܳܐ ܕܟܺܐܦܶܝ̈ܗ̇ ܦܰܪܙܠܳܐ. ܘܡܶܢ ܛܽܘܖ̈ܶܝܗ̇ ܬܶܦܣܽܘܠ ܢܚܳܫܳܐ.
10 ܘܬܶܐܟܽܘܠ ܘܬܶܣܒܰܥ. ܘܰܬܒܰܪܶܟ ܠܡܳܪܝܳܐ ܐܰܠܳܗܳܟ. ܒܰܐܪܥܳܐ ܛܳܒܬܳܐ ܕܝܳܗܶܒ ܠܳܟ.
11 ܐܶܙܕܰܗܪ ܠܳܟ ܕܰܠܡܳܐ ܬܶܛܥܶܐ ܠܡܳܪܝܳܐ ܐܰܠܳܗܳܟ. ܐܶܠܳܐ ܛܰܪ ܦܽܘܩܕܳܢܰܘ̈ܗܝ. ܘܕܺܝܢܰܘ̈ܗܝ. ܘܢܳܡܽܘܣܰܘ̈ܗܝ ܕܰܡܦܰܩܶܕ ܐ̱ܢܳܐ ܠܳܟ ܝܰܘܡܳܢܳܐ.
12 ܕܠܳܐ ܟܰܕ ܬܶܐܟܽܘܠ ܘܬܶܣܒܰܥ. ܘܒ̈ܳܬܶܐ ܫܰܦܺܝܖ̈ܶܐ ܬܶܒܢܶܐ ܘܬܶܬܶܒ.
13 ܘܥܳܢ̈ܳܟ ܘܬܰܘܖ̈ܰܝܟ ܢܶܣܓܽܘܢ. ܘܣܺܐܡܳܐ ܘܕܰܗܒܳܐ ܢܶܣܓܶܐ ܠܳܟ. ܘܟܽܠ ܕܺܐܝܬ ܠܳܟ ܢܶܣܓܶܐ.
14 ܢܶܬܬܪܺܝܡ ܠܶܒܳܟ. ܘܬܶܛܥܶܐ ܠܡܳܪܝܳܐ ܐܰܠܳܗܳܟ. ܕܰܐܦܩܳܟ ܡܶܢ ܐܰܪܥܳܐ ܕܡܶܨܪܶܝܢ ܡܶܢ ܒܶܝܬ ܥܰܒܕܽܘܬܳܐ.
15 ܘܕܰܒܪܳܟ ܒܡܰܕܒܪܳܐ ܪܰܒܳܐ ܘܰܕܚܺܝܠܳܐ. ܐܰܬܰܪ ܕܰܚ̈ܘܰܘܳܬܳܐ ܚܰܖ̈ܡܳܢܶܐ ܘܥܶܩܰܖ̈ܒܶܐ. ܘܒܶܝܬ ܨܰܗܘܳܢ̈ܶܐ. ܐܰܬܰܪ ܕܠܰܝܬ ܡܰܝ̈ܳܐ. ܐܰܦܶܩ ܠܳܟ ܡܰܝ̈ܳܐ ܡܶܢ ܟܺܐܦܳܐ ܕܛܰܪܳܢܳܐ.
16 ܘܰܐܘܟܠܳܟ ܡܰܢܢܳܐ ܒܡܰܕܒܪܳܐ ܕܠܳܐ ܝܰܕܥܽܘܗܝ ܐܰܒܳܗܰܝ̈ܟ. ܕܰܢܡܰܟܟܳܟ ܘܰܢܢܰܣܶܝܟ. ܘܢܰܛܐܶܒ ܠܳܟ ܒܚܰܪܬܳܐ.
17 ܘܬܺܐܡܰܪ ܒܠܶܒܳܟ ܕܰܒܚܰܠܝ ܘܰܒܥܽܘܫܢܳܐ ܕܺܐܝܕܰܝ̈ ܩܢܺܝܬ ܠܺܝ ܗܳܠܶܝܢ ܢܶܟܣ̈ܶܐ.
18 ܐܶܬܕܰܟܪ ܠܡܳܪܝܳܐ ܐܰܠܳܗܳܟ ܕܗܽܘܝܽܘ ܝܰܗܒ ܠܳܟ ܚܰܝܠܳܐ ܕܬܶܩܢܶܐ ܢܶܟܣ̈ܶܐ. ܕܰܢܩܺܝܡ ܩܝܳܡܶܗ ܕܺܝܡܳܐ ܠܰܐܒܳܗܰܝ̈ܟ. ܐܰܝܟ ܕܝܰܘܡܳܢܳܐ.
19 ܘܶܐܢ ܬܶܛܥܶܐ ܠܡܳܪܝܳܐ ܐܰܠܳܗܳܟ. ܘܬܺܐܙܰܠ ܒܳܬܰܪ ܐܰܠܳܗ̈ܶܐ ܐ̱ܚܖ̈ܳܢܶܐ. ܘܬܶܦܠܽܘܚ ܐܶܢܽܘܢ. ܘܬܶܣܓܽܘܕ ܠܗܽܘܢ. ܣܰܗܕܶܬ ܒܟܽܘܢ ܝܰܘܡܳܢܳܐ. ܕܡܺܐܒܰܕ ܐܳܒܕܺܝܢ ܐ̱ܢܬܽܘܢ.
20 ܐܰܝܟ ܥܰܡ̈ܡܶܐ ܕܰܐܘܒܶܕ ܡܳܪܝܳܐ ܡܶܢ ܩܕܳܡܰܝܟܽܘܢ. ܗܳܟܰܢܳܐ ܐܳܒܕܺܝܢ ܐ̱ܢܬܽܘܢ. ܐܶܢ ܠܳܐ ܫܳܡܥܺܝܢ ܐ̱ܢܬܽܘܢ ܒܩܳܠܶܗ ܕܡܳܪܝܳܐ ܐܰܠܳܗܟܽܘܢ.