Deuteronomy 3
The Book of Deuteronomy
܀ ܬܢܝܢ ܢܡܘܣܐ ܓ ܀
1 ܐܶܬܦܢܺܝܢ ܘܰܣܠܶܩܢ ܠܽܐܘܪܚܳܐ ܕܡܰܬܢܺܝܢ. ܘܰܢܦܰܩ ܥܽܘܓ ܡܰܠܟܳܐ ܕܡܰܬܢܺܝܢ ܠܽܐܘܪܥܰܢ. ܗܽܘ ܘܟܽܠܶܗ ܥܰܡܶܗ ܠܰܩܪܳܒܳܐ ܒܰܐܪܕܥܺܝ.
2 ܘܶܐܡܰܪ ܠܺܝ ܡܳܪܝܳܐ. ܠܳܐ ܬܶܕܚܰܠ ܡܶܢܶܗ. ܡܶܛܽܠ ܕܒܺܐܝܕܰܝ̈ܟ ܐܰܫܠܶܡܬܶܗ. ܘܰܠܟܽܠܶܗ ܥܰܡܶܗ. ܘܠܰܐܪܥܶܗ. ܘܰܥܒܶܕ ܠܶܗ ܐܰܝܟ ܕܰܥܒܰܕܬ ܠܣܺܝܚܽܘܢ ܡܰܠܟܳܐ ܕܳܐܡܽܘܖ̈ܳܝܶܐ ܕܝܳܬܶܒ ܗܘܳܐ ܒܚܶܫܒܽܘܢ.
3 ܘܰܐܫܠܶܡ ܡܳܪܝܳܐ ܐܰܠܳܗܰܢ ܒܺܐܝܕܰܢ ܐܳܦ ܠܥܽܘܓ ܡܰܠܟܳܐ ܕܡܰܬܢܺܝܢ. ܘܰܠܟܽܠܶܗ ܥܰܡܶܗ. ܘܰܚܪܰܒܢܳܝܗܝ ܘܠܳܐ ܫܒܰܩܢ ܠܶܗ ܣܪܺܝܕܳܐ.
4 ܘܰܟܒܰܫܢ ܟܽܠܗܶܝܢ ܩܽܘܖ̈ܶܝܗ ܒܙܰܒܢܳܐ ܗܰܘ. ܘܠܳܐ ܫܒܰܩܢ ܩܪܺܝܬܳܐ ܕܠܳܐ ܢܣܰܒܢܳܗ̇ ܡܶܢܗܽܘܢ. ܫܬܺܝܢ ܩܽܘܖ̈ܝܳܐ. ܟܽܠܶܗ ܚܒܶܠ ܐܰܪܓܽܘܒ. ܒܶܝܬ ܡܰܠܟܽܘܬܶܗ ܕܥܽܘܓ ܕܰܒܡܰܬܢܺܝܢ.
5 ܟܽܠܗܶܝܢ ܗܳܠܶܝܢ ܩܽܘܖ̈ܝܳܐ ܕܥܰܫܺܝܢܺܝܢ ܫܽܘܖ̈ܰܝܗܶܝܢ. ܘܖ̈ܳܡܺܝܢ ܬܰܖ̈ܥܰܝܗܶܝܢ ܘܡܽܘܟܽܠܝ̈ܗܶܝܢ. ܣܛܰܪ ܡܶܢ ܩܽܘܖ̈ܝܳܐ ܕܫܶܛܚ̈ܶܐ ܕܛܳܒ ܣܰܓܺܝ̈ܐܳܢ.
6 ܘܰܚܪܰܒܢ ܐܶܢܶܝܢ. ܐܰܝܟ ܕܰܥܒܰܕܢ ܠܣܺܝܚܽܘܢ ܡܰܠܟܳܐ ܕܚܶܫܒܽܘܢ. ܕܰܚܪܰܒܢ ܟܽܠܗܶܝܢ ܩܽܘܖ̈ܝܶܗ ܠܰܓܡܳܪ. ܘܢܶܫ̈ܶܐ ܘܺܝܩܰܪܬܳܐ.
7 ܘܟܽܠܳܗ̇ ܒܥܺܝܪܳܐ. ܘܒܶܙܬܳܐ ܕܩܽܘܖ̈ܝܳܐ ܒܰܙܢ ܠܰܢ.
8 ܘܰܢܣܰܒܢܳܗ̇ ܒܙܰܒܢܳܐ ܗܰܘ ܠܰܐܪܥܳܐ. ܡܶܢ ܐܺܝܕܳܐ ܕܰܬܖ̈ܰܝܗܽܘܢ ܡܰܠ̈ܟܶܐ ܕܳܐܡܽܘܖ̈ܳܝܶܐ ܕܰܒܥܶܒܪܳܐ ܕܝܽܘܪܕܢܳܢ. ܡܶܢ ܢܰܚܠܳܐ ܕܰܐܪܢܽܘܢ ܘܰܥܕܰܡܳܐ ܠܛܽܘܪܳܐ ܕܚܶܪܡܽܘܢ.
9 ܨܰܝܕܢܳܝ̈ܶܐ ܩܳܪܶܝܢ ܠܚܶܪܡܽܘܢ ܣܶܪܝܽܘܢ. ܘܳܐܡܽܘܖ̈ܳܝܶܐ ܩܳܪܶܝܢ ܠܶܗ ܣܳܢܺܝܪ.
10 ܟܽܠܗܶܝܢ ܩܽܘܖ̈ܝܳܐ ܕܰܦܩܰܥܬܳܐ. ܘܟܽܠܳܗ̇ ܓܶܠܥܳܕ ܘܟܽܠܳܗ̇ ܡܰܬܢܺܝܢ. ܥܕܰܡܳܐ ܠܣܶܠܟܳܐ ܘܠܰܐܪܕܥܺܝ. ܟܽܠܗܶܝܢ ܩܽܘܖ̈ܝܳܐ ܕܡܰܠܟܽܘܬܶܗ ܕܥܽܘܓ ܕܰܒܡܰܬܢܺܝܢ.
11 ܡܶܛܽܠ ܕܥܽܘܓ ܡܰܠܟܳܐ ܕܡܰܬܢܺܝܢ. ܒܰܠܚܽܘܕܰܘܗܝ ܐܶܫܬܚܰܪ ܡܶܢ ܫܰܪܟܳܐ ܕܓܰܢ̱ܒܳܖ̈ܶܐ ܥܰܪܣܶܗ ܥܰܪܣܳܐ ܗܺܝ ܕܦܰܪܙܠܳܐ. ܘܗܳܐ ܒܪܰܒܰܬ ܗܺܝ ܕܰܒܢܰܝ̈ ܥܰܡܽܘܢ. ܬܫܰܥ ܐܰܡܺܝ̈ܢ ܐܽܘܪܟܳܗ̇. ܘܰܐܪܒܰܥ ܐܰܡܺܝ̈ܢ ܦܬܳܝܳܗ̇. ܒܰܐܡܬܳܐ ܕܓܰܢ̱ܒܳܖ̈ܶܐ.
12 ܘܰܐܪܥܳܐ ܗܳܕܶܐ ܝܺܪܶܬܢ ܒܙܰܒܢܳܐ ܗܰܘ. ܡܶܢ ܥܰܕܽܘܥܺܝܪ ܕܥܰܠ ܣܶܦܬܳܐ ܕܢܰܚܠܳܐ ܕܰܐܪܢܽܘܢ. ܘܦܶܠܓܶܗ ܕܛܽܘܪܳܐ ܕܓܶܠܥܳܕ ܘܩܽܘܖ̈ܝܶܗ. ܝܶܗܒܶܬ ܠܪܽܘܒܺܝܠ. ܘܰܠܓܳܕ.
13 ܘܫܰܪܟܳܐ ܕܓܶܠܥܳܕ ܘܟܽܠܳܗ̇ ܡܰܬܢܺܝܢ. ܒܶܝܬ ܡܰܠܟܽܘܬܶܗ ܕܥܽܘܓ. ܝܶܗܒܶܬ ܠܦܶܠܓܶܗ ܕܫܰܒܛܳܐ ܕܰܡܢܰܫܶܐ. ܘܟܽܠܶܗ ܚܒܶܠ ܐܳܪܓܽܘܒ. ܘܟܽܠܳܗ̇ ܡܰܬܢܺܝܢ. ܗܺܝ ܗܺܝ ܡܶܬܩܰܪܝܳܐ ܐܰܪܰܥ ܓܰܢ̱ܒܳܖ̈ܶܐ.
14 ܘܝܳܐܺܝܪ ܒܰܪ ܡܢܰܫܶܐ. ܢܣܰܒ ܟܽܠܶܗ ܚܒܶܠ ܐܳܪܓܽܘܒ. ܥܕܰܡܳܐ ܠܰܬܚܽܘܡܳܐ ܕܰܓܫܽܘܪ. ܘܰܕܡܰܥܟܰܬ. ܘܰܩܪܳܐ ܐܶܢܶܝܢ ܥܰܠ ܫܡܶܗ. ܡܰܬܢܺܝܢ ܘܟܰܦܖ̈ܽܘܢܶܐ ܕܝܳܐܺܝܪ ܥܕܰܡܳܐ ܠܝܰܘܡܳܢܳܐ.
15 ܘܰܠܡܳܟܺܝܪ ܝܶܗܒܶܬ ܓܶܠܥܳܕ
16 ܘܰܠܪܽܘܒܺܝܠ ܘܰܠܓܳܕ ܝܶܗܒܶܬ ܡܶܢ ܓܶܠܥܳܕ ܘܰܥܕܰܡܳܐ ܠܢܰܚܠܳܐ ܕܰܐܪܢܽܘܢ. ܘܓܰܘܶܗ ܕܢܰܚܠܳܐ ܘܰܬܚܽܘܡܶܗ. ܘܰܥܕܰܡܳܐ ܠܝܳܒܳܩ ܢܰܚܠܳܐ ܬܚܽܘܡܳܐ ܕܰܒܢܰܝ̈ ܥܰܡܽܘܢ.
17 ܘܥܳܪܳܒܳܐ. ܘܝܽܘܪܕܢܳܢ. ܘܰܬܚܽܘܡܳܐ ܡܶܢ ܟܶܢܪܰܬ ܘܰܥܕܰܡܳܐ ܠܝܰܡܳܐ ܕܥܳܪܳܒܳܐ ܝܰܡܳܐ ܕܡܶܠܚܳܐ ܕܰܬܚܶܝܬ ܐܰܫܕܽܘܕ ܘܦܰܣܓܳܐ ܕܰܒܪܳܡܬܳܐ ܡܶܢ ܡܰܕܢܚܳܐ.
18 ܘܦܰܩܶܕܬܟܽܘܢ ܒܶܗ ܒܙܰܒܢܳܐ ܗܰܘ ܘܶܐܡܪܶܬ ܠܟܽܘܢ. ܡܳܪܝܳܐ ܐܰܠܳܗܟܽܘܢ ܝܳܗܶܒ ܠܟܽܘܢ ܐܰܪܥܳܐ ܗܳܕܶܐ ܠܡܺܐܪܬܳܗ̇. ܟܰܕ ܡܙܰܝܢܺܝܢ ܐ̱ܢܬܽܘܢ ܥܒܰܪܘ ܩܕܳܡ ܐܰܚܰܝ̈ܟܽܘܢ ܒܢܰܝ̈ ܝܺܣܪܳܐܶܝܠ ܟܽܠܟܽܘܢ ܓܰܢ̱ܒܳܖ̈ܰܝ ܚܰܝܠܳܐ.
19 ܒܰܠܚܽܘܕ ܢܶܫܰܝ̈ܟܽܘܢ. ܘܺܝܩܰܪܬܟܽܘܢ. ܘܰܒܥܺܝܪܟܽܘܢ ܫܒܽܘܩܘ. ܝܳܕܰܥ ܐ̱ܢܳܐ ܓܶܝܪ ܕܩܶܢܝܳܢܳܐ ܣܰܓܺܝܐܳܐ ܐܺܝܬ ܠܟܽܘܢ. ܢܶܬܒܽܘܢ ܒܩܽܘܖ̈ܝܟܽܘܢ ܕܝܶܗܒܶܬ ܠܟܽܘܢ.
20 ܥܕܰܡܳܐ ܕܰܢܢܺܝܚ ܡܳܪܝܳܐ ܠܰܐܚܰܝ̈ܟܽܘܢ ܐܰܟܘܳܬܟܽܘܢ. ܘܢܺܐܪܬܽܘܢ ܐܳܦ ܗܶܢܽܘܢ ܐܰܪܥܳܐ ܕܝܳܗܶܒ ܠܗܽܘܢ ܡܳܪܝܳܐ ܐܰܠܳܗܟܽܘܢ ܒܥܶܒܪܳܐ ܕܝܽܘܪܕܢܳܢ. ܘܗܳܝܕܶܝܢ ܬܶܗܦܟܽܘܢ ܐ̱ܢܳܫ ܠܝܳܪܬܽܘܬܶܗ ܕܝܶܗܒܶܬ ܠܟܽܘܢ.
21 ܘܠܝܶܫܽܘܥ ܦܰܩܕܶܬ ܒܙܰܒܢܳܐ ܗܰܘ. ܘܶܐܡܪܶܬ. ܥܰܝܢܰܝ̈ܟ ܚܙܰܝ̈ ܟܽܠ ܕܰܥܒܰܕ ܡܳܪܝܳܐ ܐܰܠܳܗܟܽܘܢ ܠܗܳܠܶܝܢ ܬܪܶܝܢ ܡܰܠܟܺܝ̈ܢ. ܗܳܟܰܢܳܐ ܢܶܥܒܶܕ ܡܳܪܝܳܐ ܠܗܳܠܶܝܢ ܟܽܠܗܶܝܢ ܡܰܠܟ̈ܘܳܬܳܐ. ܕܥܳܒܪܺܝܢ ܐ̱ܢܬܽܘܢ ܠܗܶܝܢ.
22 ܠܳܐ ܬܶܕܚܠܽܘܢ ܡܶܢܗܽܘܢ. ܡܶܛܽܠ ܕܡܳܪܝܳܐ ܐܰܠܳܗܟܽܘܢ ܗܽܘ ܡܶܬܟܰܬܰܫ ܥܰܠ ܐܰܦܰܝ̈ܟܽܘܢ.
23 ܘܶܐܬܟܰܫܦܶܬ ܩܕܳܡ ܡܳܪܝܳܐ ܒܙܰܒܢܳܐ ܗܰܘ. ܘܶܐܡܪܶܬ.
24 ܒܒܳܥܽܘ ܡܳܪܝܳܐ ܐܰܠܳܗܳܐ. ܐܰܢ̱ܬ ܫܰܪܺܝܬ ܠܰܡܚܰܘܳܝܽܘ ܠܥܰܒܕܳܟ ܪܰܒܽܘܬܳܟ. ܘܺܐܝܕܳܟ ܬܰܩܺܝܦܬܳܐ. ܘܰܕܪܳܥܳܟ ܪܳܡܳܐ. ܐܰܝܢܰܘ ܓܶܝܪ ܐܰܠܳܗܳܐ ܐܺܝܬ ܒܰܫܡܰܝܳܐ. ܐܰܘ ܒܰܐܪܥܳܐ. ܕܢܶܥܒܶܕ ܐܰܝܟ ܥܒܳܕܰܝ̈ܟ ܘܰܐܝܟ ܓܒܰܖ̈ܘܳܬܳܟ.
25 ܐܶܥܒܰܪ ܗܳܫܳܐ ܐܶܚܙܶܐ ܐܰܪܥܳܐ ܛܳܒܬܳܐ ܕܰܒܥܶܒܪܳܐ ܕܝܽܘܪܕܢܳܢ. ܛܽܘܪܳܐ ܗܳܢܳܐ ܛܳܒܳܐ. ܘܠܶܒܢܳܢ.
26 ܘܰܪܓܶܙ ܥܠܰܝ ܡܳܪܝܳܐ ܡܶܛܽܠܬܟܽܘܢ ܘܠܳܐ ܫܰܡܥܰܢܝ. ܘܶܐܡܰܪ ܠܺܝ ܡܳܪܝܳܐ. ܣܳܦܶܩ ܠܳܟ. ܠܳܐ ܬܰܘܣܶܦ ܬܽܘܒ ܠܰܡܡܰܠܳܠܽܘ ܩܕܳܡܰܝ ܦܶܬܓܳܡܳܐ ܗܳܢܳܐ.
27 ܣܰܩ ܠܪܺܝܫ ܪܳܡܬܳܐ. ܘܰܐܪܺܝܡ ܥܰܝܢܰܝ̈ܟ ܠܡܰܕܒܚܳܐ. ܘܰܠܡܰܥܪܒܳܐ. ܘܰܠܓܰܪܒܝܳܐ. ܘܰܠܬܰܝܡܢܳܐ. ܘܰܚܙܺܝܗ̇ ܒܥܰܝܢܰܝ̈ܟ. ܘܠܳܐ ܬܶܥܒܰܪ ܝܽܘܪܕܢܳܢ ܗܳܢܳܐ.
28 ܘܦܰܩܶܕ ܠܝܶܫܽܘܥ. ܘܚܰܝܶܠܳܝܗܝ. ܘܥܰܫܶܢܳܝܗܝ. ܡܶܛܽܠ ܕܗܽܘ ܢܶܥܒܰܪ ܩܕܳܡ ܥܰܡܳܐ ܗܳܢܳܐ. ܘܗܽܘ ܢܰܘܪܶܬ ܐܶܢܽܘܢ ܐܰܪܥܳܐ ܕܬܶܚܙܶܐ.
29 ܘܺܝܬܶܒܢ ܒܢܰܚܠܳܐ ܠܽܘܩܒܰܠ ܒܶܝܬ ܦܥܽܘܪ.