Deuteronomy 9
The Book of Deuteronomy
܀ ܬܢܝܢ ܢܡܘܣܐ ܛ ܀
1 ܫܡܰܥ ܝܺܣܪܳܐܶܝܠ. ܐܰܢ̱ܬ ܥܳܒܰܪ ܐܰܢ̱ܬ ܝܰܘܡܳܢܳܐ ܝܽܘܪܕܢܳܢ. ܠܡܺܐܙܰܠ ܘܰܠܡܰܘܒܳܕܽܘ ܥܰܡ̈ܡܶܐ ܕܪܰܘܪܒܺܝܢ ܘܥܰܫܺܝܢܺܝܢ ܡܶܢܳܟ. ܘܩܽܘܖ̈ܝܳܐ ܕܪܰܘܖ̈ܒܳܢ ܘܥܰܫܺܝ̈ܢܳܢ ܘܰܟܖ̈ܺܝܟܳܢ ܥܕܰܡܳܐ ܠܰܫܡܰܝܳܐ.
2 ܥܰܡܳܐ ܕܪܰܒ ܘܪܳܡ. ܒܢܰܝ̈ ܓܰܢ̱ܒܳܖ̈ܶܐ. ܕܰܐܢ̱ܬ ܝܳܕܰܥ ܐܰܢ̱ܬ. ܘܰܐܢ̱ܬ ܫܡܰܥܬ ܕܠܳܐ ܐ̱ܢܳܫ ܡܶܫܟܰܚ ܠܰܡܩܳܡ ܩܕܳܡ ܓܰܢ̱ܒܳܖ̈ܶܐ.
3 ܘܰܕܬܶܕܰܥ ܝܰܘܡܳܢܳܐ. ܕܡܳܪܝܳܐ ܐܰܠܳܗܳܟ. ܗܽܘ ܥܳܒܰܪ ܩܕܳܡܰܝܟ. ܢܽܘܪܳܐ ܗܽܘ ܐܳܟܶܠܬܳܐ. ܘܗܽܘ ܢܰܘܒܶܕ ܐܶܢܽܘܢ. ܘܗܽܘ ܢܬܰܒܰܪ ܐܶܢܽܘܢ ܡܶܢ ܩܕܳܡܰܝܟ. ܘܬܶܚܪܽܘܒ ܐܶܢܽܘܢ. ܘܬܰܘܒܶܕ ܐܶܢܽܘܢ ܒܰܥܓܰܠ. ܐܰܝܟ ܕܶܐܡܰܪ ܠܳܟ ܡܳܪܝܳܐ.
4 ܠܳܐ ܬܺܐܡܰܪ ܒܠܶܒܳܟ ܡܳܐ ܕܰܬܒܰܪ ܐܶܢܽܘܢ ܡܳܪܝܳܐ ܐܰܠܳܗܳܟ ܡܶܢ ܩܕܳܡܰܝܟ. ܕܰܒܙܰܕܺܝܩܽܘܬܝ ܐܰܥܠܰܢܝ ܡܳܪܝܳܐ ܠܡܺܐܪܰܬ ܐܰܪܥܳܐ ܗܳܕܶܐ. ܡܶܛܽܠ ܕܒܰܚܛܰܗܰܝ̈ܗܽܘܢ ܗܽܘ ܕܥܰܡ̈ܡܶܐ ܗܳܠܶܝܢ. ܡܰܘܒܶܕ ܠܗܽܘܢ ܡܳܪܝܳܐ ܡܶܢ ܩܕܳܡܰܝܟ.
5 ܠܳܐ ܗܘܳܐ ܒܙܰܕܺܝܩܽܘܬܳܟ ܘܒܰܬܪܺܝܨܽܘܬܶܗ ܕܠܶܒܳܟ. ܥܳܐܶܠ ܐܰܢ̱ܬ ܠܡܺܐܪܰܬ ܐܰܪܥܗܽܘܢ. ܐܶܠܳܐ ܒܰܚܛܳܗܰܝ̈ܗܽܘܢ ܗܽܘ ܕܥܰܡ̈ܡܶܐ ܗܳܠܶܝܢ ܡܰܘܒܶܕ ܠܗܽܘܢ ܡܳܪܝܳܐ ܐܰܠܳܗܳܟ ܡܶܢ ܩܕܳܡܰܝܟ. ܘܕܰܢܩܺܝܡ ܦܶܬܓܳܡܳܐ ܕܺܝܡܳܐ ܠܰܐܒܳܗܰܝ̈ܟ. ܠܰܐܒܪܳܗܳܡ ܘܠܺܐܝܣܚܳܩ ܘܰܠܝܰܥܩܽܘܒ.
6 ܘܰܕܬܶܕܰܥ ܕܠܳܐ ܗܘܳܐ ܒܙܰܕܺܝܩܽܘܬܳܟ ܝܳܗܶܒ ܠܳܟ ܡܳܪܝܳܐ ܐܰܠܳܗܳܟ ܐܰܪܥܳܐ ܗܳܕܶܐ ܛܳܒܬܳܐ ܠܡܺܐܪܬܳܗ̇ ܡܶܛܽܠ ܕܥܰܡܳܐ ܐܰܢ̱ܬ ܩܫܶܐ ܩܕܳܠܳܐ.
7 ܐܶܬܕܰܟܪ ܘܠܳܐ ܬܶܛܥܶܐ ܕܰܐܪܓܶܙܬ ܠܡܳܪܝܳܐ ܐܰܠܳܗܳܟ ܒܡܰܕܒܪܳܐ. ܡܶܢ ܝܰܘܡܳܐ ܕܰܢܦܰܩܬܽܘܢ ܡܶܢ ܡܶܨܪܶܝܢ ܘܰܥܕܰܡܳܐ ܕܶܐܬܰܝܬܽܘܢ ܠܰܐܬܪܳܐ ܗܳܢܳܐ. ܡܡܰܖ̈ܡܪܳܢܶܐ ܗܽܘܝܬܽܘܢ ܩܕܳܡ ܡܳܪܝܳܐ.
8 ܘܰܒܚܽܘܪܺܝܒ ܐܰܪܓܶܙܬܽܘܢܳܝܗܝ ܠܡܳܪܝܳܐ. ܘܰܪܓܶܙ ܡܳܪܝܳܐ ܥܠܰܝܟܽܘܢ ܕܢܰܘܒܶܕܟܽܘܢ.
9 ܟܰܕ ܣܶܠܩܶܬ ܠܛܽܘܪܳܐ. ܘܢܶܣܒܶܬ ܠܽܘ̈ܚܶܐ ܕܟܺܐܦܳܐ. ܠܽܘ̈ܚܶܐ ܕܰܩܝܳܡܳܐ ܕܰܐܩܺܝܡ ܡܳܪܝܳܐ ܥܰܡܟܽܘܢ. ܘܶܝܬܒܶܬ ܒܛܽܘܪܳܐ ܐܰܪܒܥܺܝܢ ܐܺܝܡܳܡܺܝ̈ܢ. ܘܰܐܪܒܥܺܝܢ ܠܰܝ̈ܠܰܘܳܢ. ܠܰܚܡܳܐ ܠܳܐ ܐܶܟܠܶܬ. ܘܡܰܝ̈ܳܐ ܠܳܐ ܐܶܫܬܺܝܬ.
10 ܘܝܰܗܒ ܠܺܝ ܡܳܪܝܳܐ ܬܰܪܬܶܝܢ ܠܽܘ̈ܚܶܐ ܕܟܺܐܦܳܐ ܕܰܟܬܺܝ̈ܒܳܢ ܒܨܶܒܥܶܗ ܕܰܐܠܳܗܳܐ. ܘܰܥܠܰܝܗܶܝܢ ܐܺܝܬ ܗܘܰܘ ܟܽܠܗܽܘܢ ܦܶܬܓܳܡ̈ܶܐ ܕܡܰܠܶܠ ܡܳܪܝܳܐ ܥܰܡܟܽܘܢ ܒܛܽܘܪܳܐ. ܡܶܢ ܓܰܘ ܢܽܘܪܳܐ ܒܝܰܘܡܳܐ ܕܰܟܢܽܘܫܝܳܐ.
11 ܘܡܶܢ ܒܳܬܰܪ ܐܰܪܒܥܺܝܢ. ܐܺܝܡܳܡܺܝ̈ܢ ܘܰܐܪܒܥܺܝܢ ܠܰܝ̈ܠܰܘܳܢ. ܝܰܗܒ ܠܺܝ ܡܳܪܝܳܐ ܬܰܪܬܶܝܢ ܠܽܘ̈ܚܶܐ ܕܟܺܐܦܳܐ. ܠܽܘ̈ܚܶܐ ܕܰܩܝܳܡܳܐ.
12 ܘܶܐܡܰܪ ܠܺܝ ܡܳܪܝܳܐ. ܩܽܘܡ ܚܽܘܬ ܒܰܥܓܰܠ ܡܶܟܳܐ. ܡܶܛܽܠ ܕܚܰܒܶܠ ܥܰܡܳܟ ܕܰܐܦܶܩܬ ܡܶܢ ܡܶܨܪܶܝܢ. ܣܛܰܘ ܠܗܽܘܢ ܒܰܥܓܰܠ ܡܶܢ ܐܽܘܪܚܳܐ ܕܦܰܩܕܶܬ ܐܶܢܽܘܢ. ܘܰܥܒܰܕܘ ܠܗܽܘܢ ܢܣܺܝܟܳܐ.
13 ܘܶܐܡܰܪ ܠܺܝ ܡܳܪܝܳܐ. ܚܙܺܝܬܶܗ ܠܥܰܡܳܐ ܗܳܢܳܐ ܘܗܳܐ ܥܰܡܳܐ ܩܫܶܐ ܩܕܳܠܰܐ ܗ̱ܘ.
14 ܗܳܫܳܐ ܫܒܽܘܩܰܝܢܝ ܐܰܘܒܶܕ ܐܶܢܽܘܢ. ܘܶܐܥܛܶܐ ܫܶܡܗܽܘܢ ܡܶܢ ܬܚܶܝܬ ܫܡܰܝܳܐ. ܘܶܐܥܒܕܳܟ ܠܥܰܡܳܐ ܕܥܰܫܺܝܢ. ܣܰܓܺܝ ܡܶܢܗܽܘܢ.
15 ܘܶܐܬܦܢܺܝܬ ܘܢܶܚܬܶܬ ܡܶܢ ܛܽܘܪܳܐ. ܘܛܽܘܪܳܐ ܡܶܬܓܰܘܙܰܠ ܗܘܳܐ ܒܢܽܘܪܳܐ. ܘܬܰܪܬܶܝܢ ܠܽܘ̈ܚܶܐ ܕܰܩܝܳܡܳܐ ܒܬܰܖ̈ܬܰܝܗܶܝܢ ܐܺܝܕܰܝ̈.
16 ܘܰܚܙܺܝܬ ܕܰܚܛܰܝܬܽܘܢ ܠܡܳܪܝܳܐ ܐܰܠܳܗܟܽܘܢ. ܘܰܥܒܰܕܬܽܘܢ ܠܟܽܘܢ ܥܶܓܠܳܐ ܕܢܶܣܟܬܳܐ. ܘܰܣܛܰܝܬܽܘܢ ܒܰܥܓܰܠ ܡܶܢ ܐܽܘܪܚܳܐ ܕܦܰܩܶܕܟܽܘܢ ܡܳܪܝܳܐ ܐܰܠܳܗܟܽܘܢ.
17 ܘܶܐܚܕܶܬ ܠܬܰܖ̈ܬܰܝܗܶܝܢ ܠܽܘ̈ܚܶܐ. ܘܰܫܕܺܝܬ ܐܶܢܶܝܢ ܡܶܢ ܬܰܖ̈ܬܰܝܗܶܝܢ ܐܺܝܕܰܝ̈. ܘܬܰܒܪܶܬ ܐܶܢܶܝܢ ܠܥܺܝ̈ܢܰܝܟܽܘܢ.
18 ܘܨܰܠܺܝܬ ܩܕܳܡ ܡܳܪܝܳܐ ܐܰܝܟ ܕܡܶܢ ܠܽܘܩܕܰܡ. ܐܰܪܒܥܺܝܢ ܐܺܝܡܳܡܺܝ̈ܢ ܘܰܐܪܒܥܺܝܢ ܠܰܝ̈ܠܰܘܳܢ. ܠܰܚܡܳܐ ܠܳܐ ܐܶܟܠܶܬ. ܘܡܰܝ̈ܳܐ ܠܳܐ ܐܶܫܬܺܝܬ. ܥܰܠ ܟܽܠܗܽܘܢ ܚܛܳܗܰܝ̈ܟܽܘܢ ܕܰܚܛܰܝܬܽܘܢ. ܘܰܥܒܰܕܬܽܘܢ ܕܒܺܝܫ ܩܕܳܡ ܡܳܪܝܳܐ. ܘܰܐܪܓܶܙܬܽܘܢܳܝܗܝ.
19 ܡܶܛܽܠ ܕܕܶܚܠܶܬ ܡܶܢ ܩܕܳܡ ܚܶܡܬܳܐ ܘܪܽܘܓܙܳܐ ܕܰܪܓܶܙ ܡܳܪܝܳܐ ܥܠܰܝܟܽܘܢ ܕܢܰܘܒܶܕܟܽܘܢ. ܘܫܰܡܥܰܢܝ ܡܳܪܝܳܐ ܐܳܦ ܒܙܰܒܢܳܐ ܗܰܘ.
20 ܘܥܰܠ ܐܰܗܪܽܘܢ ܪܓܶܙ ܡܳܪܝܳܐ ܛܳܒ ܕܢܰܘܒܕܺܝܘܗܝ. ܘܨܰܠܺܝܬ ܐܳܦ ܥܰܠ ܐܰܗܪܽܘܢ ܒܙܰܒܢܳܐ ܗܰܘ.
21 ܘܥܶܓܠܳܐ ܕܰܚܛܳܗܰܝ̈ܟܽܘܢ ܕܰܥܒܰܕܬܽܘܢ. ܢܶܣܒܶܬ ܘܰܐܘܩܶܕܬܶܗ ܒܢܽܘܪܳܐ. ܘܕܰܩܶܩܬܶܗ ܘܰܛܚܶܢܬܶܗ ܛܳܒ. ܥܕܰܡܳܐ ܕܶܐܬܕܩܶܩ ܐܰܝܟ ܥܰܦܪܳܐ. ܘܰܫܕܺܝܬܶܗ ܥܰܦܪܶܗ ܒܢܰܚܠܳܐ ܕܢܳܚܶܬ ܡܶܢ ܛܽܘܪܳܐ.
22 ܘܰܒܝܰܩܕܳܢܳܐ. ܘܰܒܢܶܣܝܽܘܢ̈ܶܐ. ܘܰܒܩܰܒܖ̈ܶܐ ܕܖ̈ܳܓܰܝ ܪܶܓܬܳܐ ܡܰܪܓܙܺܝܢ ܗܘܰܝܬܽܘܢ ܠܡܳܪܝܳܐ.
23 ܘܟܰܕ ܫܰܕܰܪܟܽܘܢ ܡܳܪܝܳܐ ܡܶܢ ܪܩܶܡ ܕܓܰܐܝܳܐ ܘܶܐܡܰܪ ܠܟܽܘܢ. ܣܰܩܘ ܘܺܝܪܰܬܘ ܐܰܪܥܳܐ ܕܝܶܗܒܶܬ ܠܟܽܘܢ. ܡܰܪܡܰܪܬܽܘܢ ܡܶܠܰܬ ܦܽܘܡܶܗ ܕܡܳܪܝܳܐ. ܘܠܳܐ ܗܰܝܡܶܢܬܽܘܢܳܝܗܝ. ܘܠܳܐ ܫܡܰܥܬܽܘܢ ܒܩܳܠܶܗ.
24 ܡܡܰܪܡܖ̈ܳܢܶܐ ܗܘܰܝܬܽܘܢ ܩܕܳܡ ܡܳܪܝܳܐ ܡܶܢ ܝܰܘܡܳܐ ܕܺܝܕܰܥܬܟܽܘܢ.
25 ܘܨܰܠܺܝܬ ܩܕܳܡ ܡܳܪܝܳܐ ܐܰܪܒܥܺܝܢ ܐܺܝܡܳܡܺܝ̈ܢ ܘܰܐܪܒܥܺܝܢ ܠܰܝ̈ܠܰܘܳܢ. ܡܶܛܽܠ ܕܶܐܡܰܪ ܡܳܪܝܳܐ ܕܢܰܘܒܶܕܟܽܘܢ.
26 ܘܨܰܠܺܝܬ ܩܕܳܡ ܡܳܪܝܳܐ. ܘܶܐܡܪܶܬ. ܡܳܪܝܳܐ ܐܰܠܳܗܳܐ. ܠܳܐ ܬܚܰܒܶܠ ܥܰܡܳܟ ܘܝܳܪܬܽܘܬܳܟ ܕܰܦܪܰܩܬ ܒܪܰܒܽܘܬܳܟ. ܘܰܐܦܶܩܬ ܐܶܢܽܘܢ ܡܶܢ ܡܶܨܪܶܝܢ ܒܺܐܝܕܳܐ ܬܰܩܺܝܦܬܳܐ.
27 ܐܶܠܳܐ ܐܶܬܕܰܟܪ ܠܥܰܒ̈ܕܰܝܟ. ܠܰܐܒܪܳܗܳܡ. ܘܠܺܐܝܣܚܳܩ. ܘܰܠܝܰܥܩܽܘܒ. ܠܳܐ ܬܶܬܦܢܶܐ ܥܰܠ ܩܰܫܝܽܘܬܶܗ ܕܥܰܡܳܐ ܗܳܢܳܐ. ܘܰܒܥܰܘܠܶܗ ܘܒܰܚܛܳܗܰܘ̈ܗܝ.
28 ܘܠܳܐ ܢܺܐܡܪܽܘܢ ܥܳܡܽܘܖ̈ܶܝܗ̇ ܕܰܐܪܥܳܐ ܗܳܝ ܕܰܐܦܶܩܬ ܐܶܢܽܘܢ ܡܶܢܳܗ̇. ܡܶܛܽܠ ܕܠܳܐ ܐܶܬܡܨܺܝ ܚܰܝܠܳܐ ܡܳܪܝܳܐ. ܕܢܰܥܶܠ ܐܶܢܽܘܢ ܠܰܐܪܥܳܐ ܕܶܐܡܰܪ ܠܗܽܘܢ. ܘܡܶܛܽܠ ܕܣܳܢܶܐ ܠܗܽܘܢ ܐܰܦܶܩ ܐܶܢܽܘܢ. ܕܰܢܩܰܛܶܠ ܐܶܢܽܘܢ ܒܡܰܕܒܪܳܐ.
29 ܘܗܶܢܽܘܢ ܥܰܡܳܟ ܐܶܢܽܘܢ ܘܝܳܪܬܽܘܬܳܟ. ܕܰܐܦܶܩܬ ܒܚܰܝܠܳܟ ܪܰܒܳܐ. ܘܒܰܕܪܳܥܳܟ ܪܳܡܳܐ.