Deuteronomy 14
The Book of Deuteronomy
܀ ܬܢܝܢ ܢܡܘܣܐ ܝܕ ܀
1 ܒܢܰܝ̈ܳܐ ܐܰܢ̱ܬܽܘܢ ܕܡܳܪܝܳܐ ܐܰܠܳܗܟܽܘܢ. ܠܳܐ ܬܶܬܥܰܪܕܽܘܢ ܘܠܳܐ ܬܶܥܒܕܽܘܢ ܩܽܘܕ̈ܚܳܬܳܐ ܒܶܝܬ ܥܰܝܢܰܝ̈ܟܽܘܢ ܥܰܠ ܡܺܝܬܳܐ.
2 ܡܶܛܽܠ ܕܥܰܡܳܐ ܐܰܢ̱ܬ ܩܰܕܺܝܫܳܐ ܠܡܳܪܝܳܐ ܐܰܠܳܗܳܟ. ܘܠܳܟ ܓܒܳܐ ܡܳܪܝܳܐ ܐܰܠܳܗܳܟ ܕܬܶܗܘܶܐ ܠܶܗ. ܥܰܡܳܐ ܚܰܒܺܝܒܳܐ. ܛܳܒ ܡܶܢ ܟܽܠܗܽܘܢ ܥܰܡ̈ܡܶܐ ܕܥܰܠ ܐܰܦܰܝ̈ ܐܰܪܥܳܐ. ܥܰܠ ܦܽܘܪܳܫ ܡܶܐܟ̈ܠܳܬܳܐ.
3 ܠܳܐ ܬܶܐܟܠܽܘܢ ܟܽܠ ܕܰܛܡܰܐ.
4 ܗܳܕܶܐ ܚܰܝܽܘܬܳܐ ܬܶܐܟܠܽܘܢ. ܬܰܘܪܳܐ. ܘܶܐܡܪܳܐ. ܘܢܶܩܝܳܐ. ܘܥܶܙܳܐ.
5 ܘܰܐܝܠܳܐ. ܘܛܰܒܝܳܐ. ܘܝܰܚܡܽܘܪܳܐ. ܘܝܰܥܠܳܐ. ܘܪܰܝܡܳܐ. ܘܕܰܝܨܳܐ. ܘܰܐܪܳܢܳܐ.
6 ܟܽܠ ܒܥܺܝܪܳܐ ܕܨܰܪܝܳܐ ܦܰܪܣܬܳܗ̇ ܘܰܦܠܺܝܓܳܐ ܠܰܬܪܶܝܢ ܘܡܶܬܓܰܘܪܪܳܐ. ܗܳܝ ܐܰܟܽܘܠܘ.
7 ܗܳܠܶܝܢ ܕܶܝܢ ܠܳܐ ܬܶܐܟܠܽܘܢ. ܡܶܢ ܐܰܝܠܶܝܢ ܕܡܶܬܓܰܘܪܪܺܝܢ. ܘܡܶܢ ܐܰܝܠܶܝܢ ܕܨܰܖ̈ܝܳܢ ܦܰܖ̈ܣܳܬܗܽܘܢ ܨ̈ܠܳܦܳܢ ܨ̈ܠܳܦܳܢ. ܓܰܡܠܳܐ. ܘܰܐܪܢܒܳܐ. ܘܰܚܓܳܣܳܐ. ܕܡܶܬܓܰܘܪܪܺܝܢ ܘܦܰܖ̈ܣܳܬܗܽܘܢ ܠܳܐ ܨܰܖ̈ܝܳܢ. ܛܰܡܐܺܝܢ ܐܶܢܽܘܢ ܠܟܽܘܢ.
8 ܘܰܚܙܺܝܪܳܐ ܕܨܰܪܝܳܐ ܦܰܪܣܬܶܗ ܘܠܳܐ ܡܶܬܓܰܘܪܰܪ. ܛܰܡܰܐ ܗܽܘ ܠܟܽܘܢ. ܡܶܢ ܒܶܣܪܗܽܘܢ ܠܳܐ ܬܶܐܟܠܽܘܢ. ܘܰܠܦܰܓܖ̈ܰܝܗܽܘܢ ܠܳܐ ܬܶܬܩܰܪܒܽܘܢ.
9 ܘܗܳܠܶܝܢ ܐܰܟܽܘܠܘ ܡܶܢ ܟܽܠ ܕܺܐܝܬ ܒܡܰܝ̈ܳܐ. ܟܽܠ ܕܺܐܝܬ ܠܶܗ ܓܶܦ̈ܶܐ ܘܰܩܠܳܦ̈ܶܐ ܐܰܟܽܘܠܘ.
10 ܘܟܽܠ ܕܠܰܝܬ ܠܶܗ ܓܶܦ̈ܶܐ ܘܰܩܠܳܦ̈ܶܐ ܠܳܐ ܬܶܐܟܠܽܘܢ. ܛܰܡܰܐ ܗܽܘ ܠܟܽܘܢ.
11 ܘܟܽܠ ܦܳܪܰܚܬܳܐ ܕܕܰܟܝܳܐ ܐܰܟܽܘܠܘ.
12 ܘܗܳܠܶܝܢ ܠܳܐ ܬܶܐܟܠܽܘܢ ܡܶܢܗܽܘܢ. ܢܶܫܪܳܐ ܘܕܰܝܬܳܐ ܘܢܰܥܒܳܐ ܒܓܶܢܣܰܝ̈ܗܽܘܢ.
13 ܘܢܰܥܳܡܳܐ. ܘܢܶܨܳܐ ܒܓܶܢܣܰܝ̈ܗܽܘܢ.
14 ܘܥܽܘܕܳܐ. ܘܫܳܠܶܐ ܢܽܘ̈ܢܶܐ. ܘܩܰܦܽܘܦܳܐ.
15 ܘܟܽܘܟܒܰܝ. ܘܩܳܩܳܐ. ܘܰܫܪܰܩܪܳܩܳܐ.
16 ܘܚܽܘܪܒܳܐ. ܘܰܐܢܦܳܐ ܒܓܶܢܣܰܝ̈ܗܽܘܢ.
17 ܘܬܰܪܢܳܓܽܘܠ ܒܰܪܳܐ. ܘܛܰܘܣܳܐ.
18 ܘܟܽܠܶܗ ܝܰܠܕܳܐ ܕܦܳܪܰܚܬܳܐ ܗܳܕܶܐ ܛܰܡܰܐ ܗܽܘ ܠܟܽܘܢ. ܠܳܐ ܢܶܬܰܐܟܠܽܘܢ.
19 ܘܟܽܠ ܦܳܪܰܚܬܳܐ ܕܕܰܟܝܳܐ ܐܰܟܽܘܠܘ.
20 ܘܠܳܐ ܬܶܐܟܠܽܘܢ ܟܽܠ ܕܰܛܡܰܐ. ܐܶܠܳܐ ܠܥܳܡܽܘܪܳܐ ܕܰܒܩܽܘܖ̈ܝܳܟ ܗܰܒܳܝܗܝ ܢܶܐܟܠܺܝܘܗܝ.
21 ܐܰܘ ܙܰܒܶܢܳܝܗܝ ܠܢܽܘܟܪܳܝܳܐ. ܡܶܛܽܠ ܕܥܰܡܳܐ ܐܰܢܬ ܩܰܕܺܝܫܳܐ ܠܡܳܪܝܳܐ ܐܰܠܳܗܳܟ. ܠܳܐ ܬܒܰܫܶܠ ܓܰܕܝܳܐ ܒܚܰܠܒܳܐ ܕܶܐܡܶܗ. ܕܥܰܠ ܡܰܥܣܳܖ̈ܶܐ.
22 ܡܥܰܣܳܪܽܘ ܥܰܣܰܪܘ ܟܽܠܳܗ̇ ܥܠܰܠܬܳܐ ܕܙܰܪܥܟܽܘܢ ܕܡܰܦܩܳܐ ܐܰܪܥܟܽܘܢ ܫܢܳܐ ܒܰܫܢܳܐ.
23 ܘܰܐܟܽܘܠ ܩܕܳܡ ܡܳܪܝܳܐ ܐܰܠܳܗܳܟ. ܒܰܐܬܪܳܐ ܕܓܳܒܶܐ ܠܡܰܫܪܳܝܽܘ ܫܡܶܗ ܬܰܡܳܢ. ܡܰܥܣܳܖ̈ܶܐ ܕܰܥܒܽܘܪܳܟ ܘܰܕܚܰܡܪܳܟ. ܘܰܕܡܶܫܚܳܟ. ܘܒܽܘܟܖ̈ܶܐ ܕܬܰܘܖ̈ܰܝܟ ܘܰܕܥܳܢ̈ܳܟ. ܘܬܺܐܠܰܦ ܠܡܶܕܚܰܠ ܩܕܳܡ ܡܳܪܝܳܐ ܐܰܠܳܗܳܟ ܟܽܠܗܽܘܢ ܝܰܘ̈ܡܳܬܳܐ.
24 ܘܶܐܢ ܣܰܓܺܝܐܳܐ ܗ̱ܝ ܡܶܢܳܟ ܐܽܘܪܚܳܐ. ܘܠܳܐ ܡܶܫܟܰܚ ܐܰܢ̱ܬ ܠܡܶܫܩܠܶܗ. ܡܶܛܽܠ ܕܪܰܚܺܝܩ ܗܽܘ ܡܶܢܳܟ ܐܰܬܪܳܐ ܕܓܳܒܶܐ ܡܳܪܝܳܐ ܐܰܠܳܗܳܟ ܠܡܰܫܪܳܝܽܘ ܫܡܶܗ ܬܰܡܳܢ. ܡܳܐ ܕܒܰܪܟܳܟ ܡܳܪܝܳܐ ܐܰܠܳܗܳܟ.
25 ܙܰܒܶܢܳܝܗܝ ܒܟܶܣܦܳܐ. ܘܨܽܘܪ ܟܶܣܦܳܐ ܒܺܐܝܕܳܟ. ܘܙܶܠ ܠܰܐܬܪܳܐ ܕܓܳܒܶܐ ܡܳܪܝܳܐ ܐܰܠܳܗܳܟ.
26 ܘܰܙܒܶܢ ܒܟܶܣܦܳܐ ܟܽܠ ܕܪܳܓܳܐ ܢܰܦܫܳܟ. ܡܶܢ ܬܰܘܖ̈ܶܐ. ܘܡܶܢ ܥܳܢ̈ܳܐ. ܘܡܶܢ ܚܰܡܪܳܐ ܘܡܶܢ ܫܰܟܪܳܐ. ܘܡܶܢ ܟܽܠ ܕܫܳܐܠܳܐ ܠܳܟ ܢܰܦܫܳܟ. ܘܰܐܟܽܘܠ ܬܰܡܳܢ ܩܕܳܡ ܡܳܪܝܳܐ ܐܰܠܳܗܳܟ. ܘܰܚܕܺܝ ܐܰܢ̱ܬ ܘܒܰܝܬܳܟ.
27 ܘܠܶܘܳܝܳܐ ܕܰܒܩܽܘܖ̈ܝܳܟ ܠܳܐ ܬܶܫܒܩܺܝܘܗܝ. ܡܶܛܽܠ ܕܠܰܝܬ ܠܶܗ ܝܳܪܬܽܘܬܳܐ ܘܦܳܠܓܽܘܬܳܐ ܥܰܡܳܟ.
28 ܘܡܶܢ ܒܳܬܰܪ ܬܠܳܬ ܫܢܺܝ̈ܢ. ܐܰܦܶܩ ܟܽܠܶܗ ܡܰܥܣܳܪܳܐ ܕܰܥܠܰܠܬܳܟ ܒܫܰܢ̱ܬܳܐ ܗܳܝ. ܫܒܽܘܩ ܒܩܽܘܖ̈ܝܳܟ.
29 ܘܢܺܐܬܶܐ ܠܶܘܳܝܳܐ ܕܠܰܝܬ ܠܶܗ ܝܳܪܬܽܘܬܳܐ ܘܦܳܠܓܽܘܬܳܐ ܥܰܡܳܟ. ܘܰܐܝܢܳܐ ܕܡܶܬܦܢܶܐ ܠܘܳܬܝ. ܘܝܰܬܡܳܐ. ܘܰܐܪܡܰܠܬܳܐ ܕܰܒܩܽܘܖ̈ܝܳܟ. ܘܢܶܐܟܠܽܘܢ ܘܢܶܣܒܥܽܘܢ. ܕܰܢܒܰܪܟܳܟ ܡܳܪܝܳܐ ܐܰܠܳܗܳܟ ܒܟܽܠܶܗ ܥܒܳܕܳܐ ܕܺܐܝܕܰܝ̈ܟ ܕܬܶܥܒܶܕ.