Deuteronomy 26
The Book of Deuteronomy
܀ ܬܢܝܢ ܢܡܘܣܐ ܟܘ ܀
1 ܘܡܳܐ ܕܥܰܠܬ ܠܰܐܪܥܳܐ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ ܝܽܘܪܬܳܢܳܐ. ܘܺܝܪܶܬܬܳܗ̇. ܘܺܝܬܶܒܬ ܒܳܗ̇.
2 ܣܰܒ. ܡܶܢ ܪܺܝܫ ܟܽܠܗܽܘܢ ܦܺܐܖ̈ܶܐ ܕܰܐܪܥܳܐ ܕܡܰܥܶܠ ܐܰܢ̱ܬ ܡܶܢ ܐܰܪܥܳܐ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ ܝܽܘܪܬܳܢܳܐ. ܘܣܺܝܡ ܒܰܡܣܰܢܬܳܐ. ܘܩܽܘܡ ܙܶܠ ܠܰܐܬܪܳܐ ܕܓܳܒܶܐ ܡܳܪܝܳܐ ܐܰܠܳܗܳܟ. ܕܢܰܫܪܶܐ ܫܡܶܗ ܬܰܡܳܢ.
3 ܘܬܳܐ ܠܘܳܬ ܟܳܗܢܳܐ ܕܢܶܗܘܶܐ ܒܝܰܘ̈ܡܳܬܳܐ ܗܳܢܽܘܢ. ܘܶܐܡܰܪ ܠܶܗ. ܚܰܘܺܝܬ ܝܰܘܡܳܢܳܐ ܠܡܳܪܝܳܐ ܐܰܠܳܗܳܟ. ܕܶܐܬܺܝܬ ܠܰܐܪܥܳܐ ܕܺܝܡܳܐ ܡܳܪܝܳܐ ܠܰܐܒܳܗܰܝ̈ܢ ܠܡܶܬܰܠ ܠܰܢ.
4 ܘܢܶܣܰܒ ܟܳܗܢܳܐ ܡܣܰܢܬܳܐ ܡܶܢ ܐܺܝܕܳܟ. ܘܰܢܣܺܝܡܺܝܗ̇ ܩܕܳܡ ܡܳܪܝܳܐ ܐܰܠܳܗܳܟ.
5 ܘܰܥܢܺܝ ܘܶܐܡܰܪ ܩܕܳܡ ܡܳܪܝܳܐ ܐܰܠܳܗܳܟ. ܠܳܐܪܳܡ ܐܶܬܕܒܰܪ ܐܳܒܝ. ܘܰܢܚܶܬ ܠܡܶܨܪܶܝܢ. ܘܰܥܡܰܪ ܬܰܡܳܢ ܙܰܒܢܳܐ ܙܥܽܘܪܳܐ. ܘܰܗܘܳܐ ܬܰܡܳܢ ܠܥܰܡܳܐ ܪܰܒܳܐ ܘܥܰܫܺܝܢܳܐ.
6 ܘܰܐܒܐܶܫܘ ܠܰܢ ܡܶܨܖ̈ܳܝܶܐ. ܘܡܰܟܟܽܘܢ ܘܣܳܡܘ ܥܠܰܝܢ ܦܽܘܠܚܳܢܳܐ ܩܰܫܝܳܐ.
7 ܘܰܓܥܰܝܢ ܠܘܳܬ ܡܳܪܝܳܐ ܐܰܠܳܗܳܐ ܕܰܐܒܳܗܰܝ̈ܢ. ܘܰܫܡܰܥ ܡܳܪܝܳܐ ܒܩܳܠܰܢ. ܘܰܚܙܳܐ ܡܽܘܟܳܟܰܢ. ܘܥܰܡܠܰܢ. ܐܘܠܨܳܢܰܢ.
8 ܘܰܐܦܩܰܢ ܡܳܪܝܳܐ ܡܶܢ ܡܶܨܪܶܝܢ. ܒܺܐܝܕܳܐ ܥܰܫܺܝܢܬܳܐ. ܘܒܰܕܪܳܥܳܐ ܪܳܡܳܐ. ܘܰܒܚܶܙܘܳܐ ܪܰܒܳܐ. ܘܒܳܐܬܘ̈ܳܬܳܐ. ܘܰܒܬܶܕܡܖ̈ܳܬܳܐ.
9 ܘܶܐܬܰܝܢ ܠܰܐܬܪܳܐ ܗܳܢܳܐ. ܘܝܰܗܒ ܠܰܢ ܡܳܪܝܳܐ ܐܰܪܥܳܐ ܗܳܕܶܐ. ܐܰܪܥܳܐ ܕܡܰܪܕܝܳܐ ܚܰܠܒܳܐ ܘܕܶܒܫܳܐ.
10 ܘܗܳܫܳܐ ܗܳܐ ܐܰܝܬܺܝܬ ܪܺܝܫܺܝܬܳܐ ܕܦܺܐܖ̈ܶܐ ܕܰܐܪܥܳܐ ܕܝܰܗܒ ܠܺܝ ܡܳܪܝܳܐ. ܘܣܺܝܡܶܝܗ̇ ܩܕܳܡ ܡܳܪܝܳܐ ܐܰܠܳܗܳܟ. ܘܰܣܓܽܘܕ ܬܰܡܳܢ ܩܕܳܡ ܡܳܪܝܳܐ ܐܰܠܳܗܳܟ.
11 ܘܰܚܕܺܝ ܒܟܽܠ ܛܳܒܬܳܐ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ. ܘܰܠܒܰܝܬܳܟ ܐܰܢ̱ܬ. ܘܠܶܘܳܝܳܐ. ܘܥܳܡܽܘܪܳܐ ܕܰܒܓܰܘܳܟ.
12 ܘܡܳܐ ܕܫܰܠܶܡܬ ܠܰܡܥܰܣܳܪܽܘ ܟܽܠܶܗ ܡܰܥܣܳܪܳܐ ܕܰܥܠܰܠܬܳܟ. ܒܫܰܢ̱ܬܳܐ ܕܰܬܠܳܬ ܕܗܺܝ ܗܺܝ ܫܢܰܬ ܡܰܥܣܳܖ̈ܶܐ. ܗܰܒ ܠܠܶܘܳܝܳܐ ܘܰܠܥܳܡܽܘܪܳܐ. ܘܰܠܝܰܬܡܳܐ. ܘܠܰܐܪܡܰܠܬܳܐ. ܘܢܶܐܟܠܽܘܢ ܒܩܽܘܖ̈ܝܳܟ ܘܢܶܣܒܥܽܘܢ.
13 ܘܶܐܡܰܪ ܩܕܳܡ ܡܳܪܝܳܐ ܐܰܠܳܗܳܟ. ܒܨܺܝܬ ܩܽܘܕܫܳܐ ܡܶܢ ܒܰܝܬܳܐ. ܘܝܶܗܒܶܬ ܠܠܶܘܳܝܳܐ. ܘܰܠܥܳܡܽܘܪܳܐ. ܘܰܠܝܰܬܡܳܐ. ܘܠܰܐܪܡܰܠܬܳܐ. ܐܰܝܟ ܟܽܠܗܽܘܢ ܦܽܘܩ̈ܕܳܢܶܐ ܕܦܰܩܶܕܬܳܢܝ. ܠܳܐ ܥܶܒܪܶܬ ܡܶܢ ܦܽܘܩܕܳܢܰܝ̈ܟ. ܘܠܳܐ ܛܥܺܝܬ.
14 ܘܠܳܐ ܐܶܟܠܶܬ ܒܶܐܒܠܝ ܡܶܢܶܗ. ܘܠܳܐ ܒܨܺܝܬܶܗ ܟܰܕ ܛܰܡܰܐ ܐ̱ܢܳܐ. ܘܠܳܐ ܣܡܶܬ ܡܶܢܶܗ ܠܡܺܝܬܳܐ. ܐܶܠܳܐ ܫܶܡܥܶܬ ܒܩܳܠܶܗ ܕܡܳܪܝܳܐ ܐܰܠܳܗܝ. ܘܥܶܒܕܶܬ ܐܰܝܟ ܕܦܰܩܶܕܬܳܢܝ.
15 ܚܙܺܝ ܡܶܢ ܡܰܥܡܪܳܐ ܕܩܽܘܕܫܳܟ ܡܶܢ ܫܡܰܝܳܐ. ܘܒܰܪܶܟ ܠܥܰܡܳܟ ܝܺܣܪܳܐܶܝܠ. ܘܠܰܐܪܥܳܐ ܕܝܰܗܒܬ ܠܰܢ. ܐܰܝܟ ܕܺܝܡܰܝܬ ܠܰܐܒܳܗܰܝ̈ܢ. ܐܰܪܥܳܐ ܕܡܰܪܕܝܳܐ ܚܰܠܒܳܐ ܘܕܶܒܫܳܐ.
16 ܝܰܘܡܳܢܳܐ ܡܳܪܝܳܐ ܐܰܠܳܗܳܟ ܡܦܰܩܶܕ ܠܳܟ. ܕܬܶܥܒܶܕ ܢܳܡܽܘܣ̈ܶܐ ܗܳܠܶܝܢ ܘܕܺܝܢ̈ܶܐ. ܛܰܪ ܘܰܥܒܶܕ ܐܶܢܽܘܢ. ܡܶܢ ܟܽܠܶܗ ܠܶܒܳܟ. ܘܡܶܢ ܟܽܠܳܗ̇ ܢܰܦܫܳܟ.
17 ܠܡܳܪܝܳܐ ܐܶܡܰܪܬ ܝܰܘܡܳܢܳܐ. ܕܢܶܗܘܶܐ ܠܳܟ ܐܰܠܳܗܳܐ. ܕܰܬܗܰܠܶܟ ܒܽܐܘܖ̈ܚܳܬܶܗ. ܘܬܶܛܰܪ ܢܳܡܽܘܣܰܘ̈ܗܝ. ܘܕܺܝܢܰܘ̈ܗܝ. ܘܦܽܘܩܕܳܢܰܘ̈ܗܝ. ܘܬܶܫܡܰܥ ܒܩܳܠܶܗ.
18 ܡܳܪܝܳܐ ܐܳܡܰܪ ܠܳܟ ܝܰܘܡܳܢܳܐ. ܕܬܶܗܘܶܐ ܠܶܗ ܥܰܡܳܐ ܚܰܒܺܝܒܳܐ. ܐܰܝܟ ܕܶܐܡܰܪ ܠܳܟ. ܘܬܶܛܰܪ ܘܬܶܥܒܶܕ ܟܽܠܗܽܘܢ ܦܽܘܩܕܳܢܰܘ̈ܗܝ.
19 ܘܢܶܥܒܕܳܟ ܠܥܶܠ ܡܶܢ ܟܽܠܗܽܘܢ ܥܰܡ̈ܡܶܐ ܕܰܥܒܰܕ. ܠܬܶܫܒܽܘܚܬܳܐ. ܘܠܰܫܡܳܐ. ܘܠܺܐܝܩܳܪܳܐ. ܘܬܶܗܘܶܐ ܥܰܡܳܐ ܩܰܕܺܝܫܳܐ. ܠܡܳܪܝܳܐ ܐܰܠܳܗܳܟ ܐܰܝܟ ܕܶܐܡܰܪ ܠܳܟ.