Deuteronomy 2
The Book of Deuteronomy
܀ ܬܢܝܢ ܢܡܘܣܐ ܒ ܀
1 ܘܶܐܬܦܢܺܝܢ ܘܰܫܩܰܠܢ ܠܡܰܕܒܪܳܐ ܠܽܐܘܪܚܳܐ ܕܝܰܡܳܐ ܕܣܽܘܦ. ܐܰܝܟܰܢܳܐ ܕܶܐܡܰܪ ܠܺܝ ܡܳܪܝܳܐ. ܘܶܐܬܟܪܟܢܳܝܗܝ ܠܛܽܘܪܳܐ ܕܣܳܥܺܝܪ ܝܰܘ̈ܡܳܬܳܐ ܣܰܓܺܝ̈ܐܶܐ.
2 ܐܶܡܰܪ ܠܺܝ ܡܳܪܝܳܐ.
3 ܣܰܓܺܝ ܠܟܽܘܢ ܗܳܐ ܡܶܢ ܕܡܶܬܟܰܪܟܺܝܢ ܐ̱ܢܬܽܘܢ ܛܽܘܪܳܐ ܗܳܢܳܐ ܐܶܬܦܢܰܘ ܠܟܽܘܢ ܠܓܰܪܒܝܳܐ.
4 ܘܰܠܥܰܡܳܐ ܦܰܩܶܕ. ܘܶܐܡܰܪ ܠܗܽܘܢ. ܐܰܢ̱ܬܽܘܢ ܥܳܒܪܺܝܢ ܐ̱ܢܬܽܘܢ ܒܰܬܚܽܘܡܳܐ ܕܰܐܚܰܝ̈ܟܽܘܢ ܒܢܰܝ̈ ܥܺܣܽܘ ܕܝܳܬܒܺܝܢ ܒܣܳܥܺܝܪ. ܘܢܶܕܚܠܽܘܢ ܡܶܢܟܽܘܢ. ܐܶܙܕܰܗܪܘ ܛܳܒ.
5 ܘܠܳܐ ܬܶܬܓܰܪܽܘܢ ܒܗܽܘܢ. ܡܶܛܽܠ ܕܠܳܐ ܝܳܗܶܒ ܐ̱ܢܳܐ ܠܟܽܘܢ ܝܽܘܪܬܳܢܳܐ ܡܶܢ ܐܰܪܥܗܽܘܢ ܒܶܝܬ ܡܰܕܪܰܟ ܦܰܣܬܳܐ ܕܪܶܓܠܳܐ. ܡܶܛܽܠ ܕܝܽܘܪܬܳܢܳܐ ܠܥܺܣܽܘ ܝܶܗܒܶܬ ܛܽܘܪܳܐ ܕܣܳܥܺܝܪ.
6 ܥܒܽܘܪܳܐ ܙܒܶܢܘ ܡܶܢܗܽܘܢ ܒܟܶܣܦܳܐ. ܘܰܐܟܽܘܠܘ. ܘܳܐܦ ܡܰܝ̈ܳܐ ܙܒܶܢܘ ܡܶܢܗܽܘܢ ܒܟܶܣܦܳܐ ܘܶܐܫܬܰܘ.
7 ܡܶܛܽܠ ܕܡܳܪܝܳܐ ܐܰܠܳܗܟܽܘܢ ܒܰܪܶܟܟܽܘܢ. ܒܟܽܠܶܗ ܥܒܳܕܳܐ ܕܺܐܝܕܰܝ̈ܟܽܘܢ. ܘܺܝܕܰܥ ܠܰܡܕܰܒܳܪܽܘܬܟܽܘܢ ܒܡܰܕܒܪܳܐ ܗܳܢܳܐ ܗܳܐ ܐܰܪܒܥܺܝܢ ܫܢܺܝ̈ܢ. ܡܳܪܝܳܐ ܐܰܠܳܗܟܽܘܢ ܥܰܡܟܽܘܢ. ܘܠܳܐ ܚܣܰܪ ܠܟܽܘܢ ܡܶܕܶܡ.
8 ܘܰܥ̣ܒܰܪܢ ܡܶܢ ܠܘܳܬ ܐܰܚܰܝ̈ܢ ܒܢܰܝ̈ ܥܺܣܽܘ ܕܝܳܬܒܺܝܢ ܒܣܳܥܺܝܪ. ܘܡܶܢ ܐܽܘܪܚܳܐ ܕܥܳܪܳܒܳܐ. ܘܡܶܢ ܐܰܝܠܰܬ. ܘܡܶܢ ܥܺܨܺܝܢܽܘ ܓܒܰܪ. ܘܶܐܬܦܢܺܝܢ ܘܰܥܒܰܪܢ ܠܰܢ ܒܡܰܕܒܪܳܐ ܠܽܐܘܪܚܳܐ ܕܡܽܘܐܳܒ.
9 ܘܶܐܡܰܪ ܠܺܝ ܡܳܪܝܳܐ. ܠܳܐ ܬܶܐܠܽܘܨ ܠܡܽܘܐܳܒܳܝ̈ܶܐ. ܘܠܳܐ ܬܶܬܓܰܪܶܐ ܥܰܡܗܽܘܢ ܠܰܩܪܳܒܳܐ. ܡܶܛܽܠ ܕܠܳܐ ܝܳܗܶܒ ܐ̱ܢܳܐ ܠܳܟ ܡܶܢ ܐܰܪܥܗܽܘܢ ܝܽܘܪܬܳܢܳܐ. ܡܶܛܽܠ ܕܠܰܒܢܰܝ̈ ܠܽܘܛ ܝܰܗܒܬܳܗ̇ ܝܽܘܪܬܳܢܳܐ.
10 ܐܰܡ̈ܢܶܐ ܡܶܢ ܠܽܘܩܕܰܡ ܝܺܬܶܒܘ ܒܳܗ̇. ܥܰܡܳܐ ܕܪܰܒ ܘܣܰܓܺܝ. ܘܪܳܡ ܐܰܝܟ ܓܰܢ̱ܒܳܖ̈ܶܐ.
11 ܓܰܢ̱ܒܳܖ̈ܶܐ ܐܶܢܽܘܢ. ܘܡܶܬܚܰܫܒܺܝܢ ܐܳܦ ܗܶܢܽܘܢ ܐܰܝܟ ܓܰܢ̱ܒܳܖ̈ܶܐ. ܘܡܽܘܐܳܒܳܝ̈ܶܐ ܩܳܪܶܝܢ ܠܗܽܘܢ ܐܰܡ̈ܢܶܐ.
12 ܘܰܒܣܳܥܺܝܪ ܝܺܬܶܒܘ ܚܳܘܖ̈ܳܝܶܐ ܡܶܢ ܠܽܘܩܕܰܡ. ܘܰܒܢܰܝ̈ ܥܺܣܽܘ ܝܺܪܶܬܘ ܐܶܢܽܘܢ. ܘܶܐܘܒܰܕܘ ܐܶܢܽܘܢ ܡܶܢ ܩܕܳܡܝܗܽܘܢ. ܘܺܝܬܶܒܘ ܒܰܐܪܥܗܽܘܢ. ܐܰܝܟ ܕܰܥܒܰܕ ܝܺܣܪܳܐܶܝܠ ܠܰܐܪܥܳܐ ܕܝܳܪܬܽܘܬܶܗ ܕܝܰܗܒ ܠܗܽܘܢ ܡܳܪܝܳܐ.
13 ܡܶܟܺܝܠ ܩܽܘܡܘ ܥܒܰܪܘ ܢܰܚܠܳܐ ܕܙܳܪܳܕ. ܘܰܥܒܰܪܢ ܢܰܚܠܳܐ ܕܙܳܪܳܕ.
14 ܘܝܰܘ̈ܡܳܬܳܐ ܕܗܰܠܶܟܢ ܡܶܢ ܪܩܶܡ ܕܓܰܐܝܳܐ ܥܕܰܡܳܐ ܕܰܥܒܰܪܢ ܢܰܚܠܳܐ ܕܙܳܪܳܕ. ܬܠܳܬܺܝܢ ܘܰܬܡܳܢܶܐ ܫܢܺܝ̈ܢ. ܥܕܰܡܳܐ ܕܣܳܦܘ ܟܽܠܶܗ ܕܳܪܳܐ ܕܓܰܒܖ̈ܶܐ ܩܖ̈ܰܒܬܳܢܶܐ ܡܶܢ ܓܰܘ ܡܰܫܪܺܝܬܳܐ. ܐܰܝܟ ܕܺܝܡܳܐ ܠܗܽܘܢ ܡܳܪܝܳܐ.
15 ܐܳܦ ܐܺܝܕܶܗ ܕܡܳܪܝܳܐ ܗܘܳܬ ܒܗܽܘܢ ܕܬܰܘܒܶܕ ܐܶܢܽܘܢ ܡܶܢ ܓܰܘ ܡܰܫܪܺܝܬܳܐ ܥܕܰܡܳܐ ܕܰܓܡܰܪܘ.
16 ܘܟܰܕ ܓܡܰܪܘ ܟܽܠܗܽܘܢ ܓܰܒܖ̈ܶܐ ܥܳܒ̈ܕܰܝ ܩܪܳܒܳܐ ܠܰܡܡܳܬ ܡܶܢ ܓܰܘ ܥܰܡܳܐ.
17 ܡܰܠܶܠ ܥܰܡܝ ܡܳܪܝܳܐ ܘܶܐܡܰܪ ܠܺܝ.
18 ܐܰܢ̱ܬ ܥܳܒܰܪ ܐܰܢ̱ܬ ܝܰܘܡܳܢܳܐ ܠܰܬܚܽܘܡܳܐ ܕܡܽܘܐܳܒ. ܘܰܠܥܳܕ.
19 ܘܬܶܬܩܰܪܰܒ ܠܽܘܩܒܰܠ ܒܢܰܝ̈ ܥܰܡܽܘܢ. ܠܳܐ ܬܶܐܠܽܘܨ ܐܶܢܽܘܢ. ܘܠܳܐ ܬܶܬܓܰܪܶܐ ܒܗܽܘܢ. ܡܶܛܽܠ ܕܠܳܐ ܝܳܗܶܒ ܐ̱ܢܳܐ ܠܳܟ ܝܽܘܪܬܳܢܳܐ ܡܶܢ ܐܰܪܥܳܐ ܕܰܒܢܰܝ̈ ܥܰܡܽܘܢ. ܡܶܛܽܠ ܕܠܰܒܢܰܝ̈ ܠܽܘܛ ܝܰܗܒܬܳܗ̇ ܝܽܘܪܬܳܢܳܐ.
20 ܐܰܪܥܳܐ ܕܓܰܢ̱ܒܳܖ̈ܶܐ ܡܶܬܚܰܫܒܳܐ ܐܳܦ ܗܺܝ. ܓܰܢ̱ܒܳܖ̈ܶܐ ܝܺܬܶܒܘ ܒܳܗ̇ ܡܶܢ ܠܽܘܩܕܰܡ. ܘܥܰܡܽܘܢܳܝ̈ܶܐ ܩܳܪܶܝܢ ܠܗܽܘܢ ܙܰܡܙܡܺܝܢ.
21 ܥܰܡܳܐ ܕܪܰܒ ܣܰܓܺܝ. ܘܪܳܡ ܐܰܝܟ ܓܰܢ̱ܒܳܖ̈ܶܐ. ܘܰܐܘܒܶܕ ܐܶܢܽܘܢ ܡܳܪܝܳܐ ܡܶܢ ܩܕܳܡܰܝܗܽܘܢ. ܘܺܝܪܶܬܘ ܐܶܢܽܘܢ. ܘܺܝܬܶܒܘ ܒܰܐܪܥܗܽܘܢ.
22 ܐܰܝܟ ܕܰܥܒܰܕܘ ܒܢܰܝ̈ ܥܺܣܽܘ ܕܝܳܬܒܺܝܢ ܒܣܳܥܺܝܪ. ܕܰܐܘܒܶܕܘ ܠܚܳܘܖ̈ܳܝܶܐ ܡܶܢ ܩܕܳܡܝܗܽܘܢ. ܘܺܝܪܶܬܘ ܐܶܢܽܘܢ. ܘܺܝܬܶܒܘ ܒܰܐܪܥܗܽܘܢ ܥܕܰܡܳܐ ܠܝܰܘܡܳܢܳܐ.
23 ܘܥܰܘܳܝ̈ܶܐ ܕܝܳܬܒܺܝܢ ܒܚܰܨܪܺܝܡ. ܘܰܥܕܰܡܳܐ ܠܥܰܐܙܳܐ. ܘܩܰܦܽܘܕܩܳܝ̈ܶܐ ܕܰܢܦܰܩܘ ܡܶܢ ܩܰܦܰܕܽܘܩܺܝ ܐܰܘܒܶܕܘ ܐܶܢܽܘܢ. ܘܺܝܬܶܒܘ ܒܰܐܪܥܗܽܘܢ.
24 ܩܽܘܡܘ ܫܩܽܘܠܘ. ܘܰܥܒܰܪܘ ܢܰܚܠܳܐ ܕܰܐܪܢܽܘܢ. ܚܙܺܝ ܕܰܐܫܠܡܶܬ ܒܺܐܝܕܰܝ̈ܟ ܠܣܺܝܚܽܘܢ ܡܰܠܟܳܐ ܕܚܶܫܒܽܘܢ ܐܳܡܽܘܪܳܝܳܐ. ܘܠܰܐܪܥܶܗ. ܫܰܪܳܐ ܠܡܰܘܒܳܕܽܘܬܶܗ. ܘܶܐܬܓܰܪܳܐ ܥܰܡܶܗ ܠܰܩܪܳܒܳܐ.
25 ܝܰܘܡܳܢܳܐ ܐܶܫܰܪܶܐ ܠܡܶܬܰܠ ܕܶܚܠܬܳܟ. ܘܙܰܘܥܬܳܟ ܥܰܠ ܐܰܦܰܝ̈ ܥܰܡ̈ܡܶܐ ܕܰܬܚܶܝܬ ܫܡܰܝܳܐ. ܕܢܶܫܡܥܽܘܢ ܫܶܡܥܳܟ. ܘܰܢܙܽܘܥܽܘܢ. ܘܢܶܕܚܠܽܘܢ ܡܶܢ ܩܕܳܡܰܝܟ.
26 ܘܫܰܕܪܶܬ ܐܺܝܙܓܰܕ̈ܶܐ ܡܶܢ ܡܰܕܒܪܳܐ ܕܩܶܪܡܽܘܬ. ܠܘܳܬ ܣܺܝܚܽܘܢ ܡܰܠܟܳܐ ܕܚܶܫܒܽܘܢ. ܒܡ̈ܶܠܶܐ ܕܰܫܠܳܡܳܐ ܠܡܺܐܡܰܪ ܠܶܗ.
27 ܢܶܥܒܰܪ ܒܰܐܪܥܳܟ. ܒܽܐܘܪܚܳܐ ܐܽܘܪܚܳܐ ܢܺܐܙܰܠ. ܘܠܳܐ ܢܶܣܛܶܐ ܠܝܰܡܺܝܢܳܐ ܘܰܠܣܶܡܳܠܳܐ.
28 ܥܒܽܘܪܳܐ ܒܟܶܣܦܳܐ ܙܰܒܶܢܘ ܠܰܢ ܘܢܶܐܟܽܘܠ. ܘܡܰܝ̈ܳܐ ܒܟܶܣܦܳܐ ܙܰܒܶܢܘ ܠܰܢ ܘܢܶܫܬܶܐ. ܒܰܠܚܽܘܕ ܒܖ̈ܶܓ̣ܠܰܝܢ ܢܶܥܒܰܪ.
29 ܐܰܝܟ ܕܰܥܒܰܕܘ ܠܰܢ ܒܢܰܝ̈ ܥܺܣܽܘ ܕܝܳܬܒܺܝܢ ܒܣܳܥܺܝܪ. ܘܡܽܘܐܳܒܳܝ̈ܶܐ ܕܝܳܬܒܺܝܢ ܒܥܳܕ. ܥܕܰܡܳܐ ܕܢܶܥܒܰܪ ܝܽܘܪܕܢܳܢ ܠܰܐܪܥܳܐ ܕܝܳܗܶܒ ܠܰܢ ܡܳܪܝܳܐ ܐܰܠܳܗܰܢ.
30 ܘܠܳܐ ܨܒܳܐ ܣܺܝܚܽܘܢ ܡܰܠܟܳܐ ܕܚܶܫܒܽܘܢ ܕܢܰܥܒܪܰܢ ܒܰܬܚܽܘܡܶܗ. ܡܶܛܽܠ ܕܩܰܫܺܝ ܡܳܪܝܳܐ ܐܰܠܳܗܟܽܘܢ ܪܽܘܚܶܗ. ܘܰܐܥܫܶܢ ܠܶܒܶܗ. ܕܢܰܫܠܡܺܝܘܗܝ ܒܺܐܝ̈ܕܰܝܟܽܘܢ ܐܰܝܟ ܕܝܰܘܡܳܢܳܐ.
31 ܘܶܐܡܰܪ ܠܺܝ ܡܳܪܝܳܐ. ܚܙܺܝ ܕܫܰܪܺܝܬ ܠܡܰܫܠܳܡܽܘ ܒܺܐܝܕܰܝ̈ܟ ܠܣܺܝܚܽܘܢ ܘܠܰܐܪܥܶܗ. ܫܰܪܳܐ ܠܡܰܘܒܳܕܽܘܬܶܗ ܘܰܠܡܺܐܪܰܬ ܐܰܪܥܶܗ.
32 ܘܰܢܦܰܩ ܣܺܝܚܽܘܢ ܠܽܐܘܪܥܰܢ. ܗܽܘ ܘܟܽܠܶܗ ܥܰܡܶܗ ܠܰܩܪܳܒܳܐ ܠܝܳܗܳܨ.
33 ܘܰܐܫܠܡܶܗ ܡܳܪܝܳܐ ܐܰܠܳܗܰܢ ܩܕܳܡܰܝܢ. ܘܰܚܪܰܒܢܳܝܗܝ ܠܶܗ ܘܠܰܒܢܰܘ̈ܗܝ. ܘܰܠܟܽܠܶܗ ܥܰܡܶܗ.
34 ܘܰܟܒܰܫܢ ܟܽܠܗܶܝܢ ܩܽܘܖ̈ܝܶܗ ܒܙܰܒܢܳܐ ܗܰܘ. ܘܰܐܘܒܶܕܢ ܟܽܠܗܶܝܢ ܩܽܘܖ̈ܝܳܐ ܠܰܓܡܳܪ. ܘܢܶܫ̈ܶܐ ܘܺܝܩܰܪܬܳܐ. ܘܠܳܐ ܫܒܰܩܢ ܡܶܢܗܽܘܢ ܣܪܺܝܕܳܐ.
35 ܒܰܠܚܽܘܕ ܒܥܺܝܪܳܐ ܒܰܙܢ ܠܰܢ. ܘܒܶܙܬܳܐ ܕܩܽܘܖ̈ܝܳܐ ܕܰܟܒܰܫܢ.
36 ܡܶܢ ܥܰܕܽܘܥܺܝܪ ܕܥܰܠ ܣܶܦܬܳܐ ܕܢܰܚܠܳܐ ܕܰܐܪܢܽܘܢ. ܘܰܩܪܺܝܬܳܐ ܕܰܒܢܰܚܠܳܐ ܘܰܥܕܰܡܳܐ ܠܓܶܠܥܳܕ. ܠܳܐ ܗܘܳܬ ܩܪܺܝܬܳܐ ܕܥܶܫܢܰܬ ܡܶܢܰܢ. ܟܽܠܗܶܝܢ ܐܰܫܠܶܡ ܐܶܢܶܝܢ ܡܳܪܝܳܐ ܐܰܠܳܗܰܢ ܩܕܳܡܰܝܢ.
37 ܒܰܠܚܽܘܕ ܠܰܐܪܥܳܐ ܕܰܒܢܰܝ̈ ܥܰܡܽܘܢ ܠܳܐ ܐܶܬܩܰܪܰܒܢܰܢ. ܟܽܠ ܝܰܕ ܢܰܚܠܳܐ ܕܝܳܒܳܩ. ܘܩܽܘܖ̈ܝܳܐ ܕܛܽܘܪܳܐ. ܘܟܽܠ ܕܦܰܩܕܰܢ ܡܳܪܝܳܐ ܐܰܠܳܗܰܢ.