Deuteronomy 32
The Book of Deuteronomy
܀ ܬܢܝܢ ܢܡܘܣܐ ܠܒ ܀
1 ܨܽܘܬܘ ܫܡܰܝ̈ܳܐ ܘܶܐܡܰܠܶܠ. ܬܶܫܡܰܥ ܐܰܪܥܳܐ ܡܺܐܡܪܶܗ ܕܦܽܘܡܝ.
2 ܢܶܪܣܰܡ ܐܰܝܟ ܡܶܛܪܳܐ ܝܽܘܠܦܳܢܝ. ܘܢܶܚܽܘܬ ܐܰܝܟ ܛܰܠܳܐ ܡܺܐܡܰܪܝ. ܐܰܝܟ ܖ̈ܽܘܚܶܐ ܕܥܰܠ ܬܰܕܐܳܐ. ܘܰܐܝܟ ܖ̈ܣܺܝܣܶܐ ܕܥܰܠ ܥܶܣܒܳܐ.
3 ܡܶܛܽܠ ܕܒܰܫܡܶܗ ܕܡܳܪܝܳܐ ܐܶܩܪܶܐ. ܗܰܒܘ ܪܰܒܽܘܬܳܐ ܠܰܐܠܳܗܰܢ ܬܰܩܺܝܦܳܐ.
4 ܕܰܕܠܳܐ ܡܽܘܡ ܥܒܳܕܰܘ̈ܗܝ. ܘܟܽܠܗܶܝܢ ܐܽܘܖ̈ܚܳܬܶܗ ܕܺܝܢܳܐ. ܐܰܠܳܗܳܐ ܗܽܘ ܡܗܰܝܡܢܳܐ ܘܠܳܐ ܗܘܳܐ ܥܰܘܳܠܳܐ. ܙܰܕܺܝܩܳܐ ܘܰܬܪܺܝܨܳܐ.
5 ܚܰܒܶܠܘ ܘܠܳܐ ܠܶܗ ܒܢܰܝ̈ܳܐ ܕܡܽܘܡܳܐ. ܕܳܪܳܐ ܡܥܰܩܡܳܐ ܘܰܡܦܰܬܠܳܐ.
6 ܗܳܠܶܝܢ ܠܡܳܪܝܳܐ ܦܳܪܥܺܝܢ ܐܢ̱ܬܽܘܢ. ܥܰܡܳܐ ܣܰܟܠܳܐ ܘܠܳܐ ܗܘܳܐ ܚܰܟܺܝܡܳܐ. ܕܰܠܡܳܐ ܠܳܐ ܗܘܳܐ ܐܰܒܽܘܟ ܕܰܩܢܳܟ. ܘܗܽܘܝܽܘ ܥܰܒܕܳܟ ܘܰܐܬܩܢܳܟ.
7 ܐܶܬܕܰܟܪ ܝܰܘ̈ܡܳܬܳܐ ܕܡܶܢ ܥܳܠܰܡ. ܘܶܐܣܬܰܟܠ ܒܰܫܢܰܝ̈ܳܐ ܕܕܳܪܕܳܖ̈ܺܝܢ. ܫܰܐܶܠ ܠܰܐܒܽܘܟ. ܘܰܢܚܰܘܶܝܟ. ܘܰܠܣܳܒܰܝ̈ܟ. ܘܢܺܐܡܪܽܘܢ ܠܳܟ.
8 ܟܰܕ ܡܦܰܠܶܓ ܡܪܰܝܡܳܐ ܥܰܡ̈ܡܶܐ. ܘܟܰܕ ܡܦܰܪܶܫ ܒܢܰܝ̈ܢܳܫܳܐ. ܐܰܩܺܝܡ ܬܚܽܘܡܳܐ ܕܥܰܡ̈ܡܶܐ ܠܡܶܢܝܳܢܳܐ ܕܰܒܢܰܝ̈ ܝܺܣܪܳܐܶܝܠ.
9 ܡܶܛܽܠ ܕܦܳܠܓܽܘܬܶܗ ܕܡܳܪܝܳܐ ܥܰܡܶܗ. ܘܝܰܥܩܽܘܒ ܚܰܒܠܳܐ ܕܝܳܪܬܽܘܬܶܗ.
10 ܐܶܫܟܚܶܗ ܒܰܐܪܥܳܐ ܕܡܰܕܒܪܳܐ. ܘܰܒܚܽܘܪܒܳܐ ܕܰܐܫܺܝܡܽܘܢ. ܐܰܩܦܶܗ ܘܚܰܒܒܶܗ ܘܢܰܛܪܶܗ ܐܰܝܟ ܒܳܒܬܳܐ ܕܥܰܝܢܳܐ.
11 ܘܰܐܝܟ ܢܶܫܪܳܐ ܕܛܳܐܶܣ ܥܰܠ ܩܶܢܶܗ. ܘܥܰܠ ܦܰܖ̈ܽܘܓܰܘܗܝ ܡܪܰܚܶܦ. ܦܳܪܶܣ ܓܶܦܰܘ̈ܗܝ ܘܰܡܩܰܒܶܠ ܠܗܽܘܢ. ܘܫܳܩܶܠ ܠܗܽܘܢ ܥܰܠ ܥܽܘܫܢܳܐ ܕܶܐܒܖ̈ܰܘܗܝ.
12 ܡܳܪܝܳܐ ܒܰܠܚܽ̈ܘܕܘܗܝ ܕܰܒܪܶܗ. ܘܠܰܝܬ ܗܘܳܐ ܥܰܡܶܗ ܐܰܠܳܗ ܢܽܘܟܪܳܝ.
13 ܐܰܘܬܒܶܗ ܥܰܠ ܥܽܘܫܢܳܐ ܕܰܐܪܥܳܐ. ܘܰܐܘܟܠܶܗ ܥܰܠ̈ܠܳܬܳܐ ܕܚܰܩܠܳܐ. ܐܰܝܢܩܶܗ ܕܶܒܫܳܐ ܡܶܢ ܟܺܐܦܳܐ. ܘܡܶܫܚܳܐ ܡܶܢ ܟܺܐܦܳܐ ܕܛܰܪܳܢܳܐ.
14 ܚܶܐܘܬܳܐ ܕܬܰܘܖ̈ܶܐ ܘܚܰܠܒܳܐ ܕܥܳܢ̈ܳܐ. ܥܰܡ ܬܰܪܒܳܐ ܕܰܡܦܰܛܡ̈ܶܐ. ܕܶܟܖ̈ܶܐ ܒܢܰܝ̈ ܕܰܝ̈ܨܶܐ ܘܰܓܕܰܝ̈ܳܐ ܥܰܡ ܬܰܪܒܳܐ ܘܫܽܘܡܢܳܐ ܕܚܶܛ̈ܶܐ. ܘܰܕܡܳܐ ܕܥܶܢ̈ܒܶܐ ܐܰܫܩܝܶܗ ܚܰܡܪܳܐ.
15 ܘܰܫܡܶܢ ܝܺܣܪܳܐܶܝܠ ܘܰܒܥܰܛ. ܫܡܶܢ ܘܰܬܩܶܦ ܘܰܩܢܳܐ ܢܶܟܣ̈ܶܐ. ܘܰܛܥܳܐ ܠܰܐܠܳܗܳܐ ܕܰܥܒܕܶܗ. ܘܨܰܚܺܝ ܠܬܰܩܺܝܦܳܐ ܕܦܰܪܩܶܗ.
16 ܐܰܛܢܶܗ ܒܢܽܘܟܪܳܝܳܐ. ܘܰܒܕܶܚ̈ܠܳܬܳܐ ܐܰܪܓܙܶܗ.
17 ܕܰܒܰܚܘ ܠܫ̈ܺܐܕܶܐ ܕܠܳܐ ܗܘܰܘ ܐܰܠܳܗ̈ܶܐ. ܐܰܠܳܗ̈ܶܐ ܕܠܳܐ ܝܺܕܰܥܘ ܐܶܢܽܘܢ. ܚܰܕ̈ܬܶܐ ܐܶܢܽܘܢ ܕܗܳܟܺܝܠ ܐܶܬܥܒܶܕܘ. ܘܠܳܐ ܕܚܶܠܘ ܠܗܽܘܢ ܐܰܒܳܗܰܝ̈ܟܽܘܢ.
18 ܠܬܰܩܺܝܦܳܐ ܕܝܰܠܕܳܟ ܛܥܰܝܬ. ܘܶܐܬܢܫܺܝܬ ܠܰܐܠܳܗܳܐ ܕܫܰܒܚܳܟ.
19 ܘܰܚܙܳܐ ܡܳܪܝܳܐ ܘܰܪܓܶܙ. ܥܰܠ ܕܰܐܪܓܙܽܘܗܝ ܒܢܰܘ̈ܗܝ ܘܰܒ̈ܢܳܬܶܗ.
20 ܘܶܐܡܰܪ ܐܰܦܢܶܐ ܐܰܦܰܝ̈ ܡܶܢܗܽܘܢ. ܘܶܐܚܙܶܐ ܡܳܢܳܐ ܗܳܘܝܳܐ ܚܰܪܬܗܽܘܢ. ܡܶܛܽܠ ܕܕܳܪܳܐ ܐܶܢܽܘܢ ܗܦܺܝܟܳܐ. ܒܢܰܝ̈ܳܐ ܕܠܰܝܬ ܒܗܽܘܢ ܗܰܝܡܳܢܽܘܬܳܐ.
21 ܗܶܢܽܘܢ ܐܰܛܢܽܘܢܝ ܒܠܳܐ ܐܰܠܳܗ. ܘܰܐܪܓܙܽܘܢܝ ܒܕܶܚ̈ܠܳܬܗܽܘܢ. ܘܳܐܦ ܐܶܢܳܐ ܐܰܛܶܢ ܐܶܢܽܘܢ ܒܠܳܐ ܥܰܡܝ. ܘܰܒܥܰܡܳܐ ܣܰܟܠܳܐ ܐܰܪܓܶܙ ܐܶܢܽܘܢ.
22 ܡܶܛܽܠ ܕܢܽܘܪܳܐ ܩܳܕܚܳܐ ܒܪܽܙܓܙܝ. ܘܡܰܘܩܕܳܐ ܥܕܰܡܳܐ ܠܰܫܝܽܘܠ ܬܰܚܬܳܝܬܳܐ. ܬܶܐܟܽܘܠ ܐܰܪܥܳܐ ܘܥܰܠ̈ܠܳܬܳܗ̇. ܘܬܰܘܩܶܕ ܫܶܬܶܐܣ̈ܶܐ. ܕܛܽܘܖ̈ܶܐ.
23 ܐܶܟܰܢܶܫ ܥܠܰܝܗܽܘܢ ܒܺܝ̈ܫܳܬܳܐ. ܘܓܶܐܖ̈ܰܝ ܐܰܘܟܶܠ ܒܗܽܘܢ.
24 ܢܶܬܛܰܪܦܽܘܢ ܒܟܰܦܢܳܐ ܘܢܶܫ̈ܬܰܠܡܳܢ ܠܗܽܘܢ ܖ̈ܽܘܚܶܐ ܒܺܝ̈ܫܳܬܳܐ. ܘܰܠܛܰܝܪܳܐ ܐܰܫܠܶܡ ܐܶܢܽܘܢ. ܘܚܰܝܘܰܬ ܫܶܢܳܐ ܐܶܓܰܪܶܐ ܒܗܽܘܢ. ܥܰܡ ܚܶܡܬܳܐ ܕܰܚ̈ܘܰܘܳܬܳܐ ܕܚܳܠܕܺܝܢ ܒܥܰܦܪܳܐ.
25 ܡܶܢ ܠܒܰܪ ܬܓܰܝܶܙ ܚܰܪܒܳܐ. ܘܡܶܢ ܬܰܘܳܢ̈ܶܐ ܕܶܚܠܬܳܐ. ܐܳܦ ܓܰܕܽܘ̈ܕܶܐ ܘܰܒܬܽܘܠܳܬܳܐ. ܘܰܛܠܳܝ̈ܶܐ ܥܰܡ ܓܰܒܖ̈ܶܐ ܣܳܒ̈ܶܐ.
26 ܐܶܡܪܶܬ ܐܰܝܟܳܐ ܐܶܢܽܘܢ. ܐܶܒܰܛܶܠ ܡܶܢ ܒܢܰܝ̈ܢܳܫܳܐ ܕܽܘܟܪܳܢܗܽܘܢ.
27 ܐܶܠܽܘܠܳܐ ܪܽܘܓܙܳܐ ܕܰܒܥܶܠܕܒܳܒܳܐ ܕܰܥܫܶܢ. ܕܠܳܐ ܢܶܬܬܪܺܝܡܽܘܢ ܐܳܠܽܘܨܰܝ̈ܗܽܘܢ. ܘܢܺܐܡܪܽܘܢ ܕܺܐܝܕܰܢ ܗܽܘ ܐܶܬܬܪܺܝܡܰܬ. ܘܠܳܐ ܗܘܳܐ ܡܳܪܝܳܐ ܥܒܰܕ ܗܳܠܶܝܢ.
28 ܡܶܛܽܠ ܕܥܰܡܳܐ ܗܽܘ ܕܰܐܒܺܝܕܳܐ ܬܰܪܥܺܝܬܶܗ. ܘܠܰܝܬ ܒܗܽܘܢ ܣܽܘܟܳܠܳܐ.
29 ܐܶܠܽܘ ܚܟܰܡܘ ܘܶܐܣܬܰܟܰܠܘ ܒܗܳܕܶܐ. ܘܶܐܬܒܰܝܰܢܘ ܒܚܰܪܬܗܽܘܢ.
30 ܪܳܕܶܦ ܗܘܳܐ ܚܰܕ ܠܰܐܠܦܳܐ. ܘܰܬܪܶܝܢ ܡܰܥܪܩܺܝܢ ܗܘܰܘ ܪܶܒܽܘܬܳܐ. ܐܶܠܳܐ ܬܰܩܺܝܦܗܽܘܢ ܐܰܫܠܶܡ ܐܶܢܽܘܢ. ܘܡܳܪܝܳܐ ܚܒܰܫ ܐܶܢܽܘܢ.
31 ܡܶܛܽܠ ܕܠܳܐ ܗܘܳܐ ܐܰܝܟ ܬܽܘܩܦܳܢ ܬܽܘܩܳܦܗܽܘܢ. ܘܰܒܥܶܠܕܒܳܒܰܝ̈ܢ ܕܝܳܢܺܝܢ.
32 ܡܶܛܽܠ ܕܡܶܢ ܓܦܶܬܳܐ ܕܰܣܕܽܘܡ ܓܦܶܬܗܽܘܢ. ܘܡܶܢ ܫܬܶܠܬܳܐ ܕܥܳܡܽܘܪܳܐ. ܥܶܢܒܰܝ̈ܗܽܘܢ ܥܶܢ̈ܒܺܝܢ ܡܰܪܺܝܖ̈ܳܢ. ܘܰܣܓ̈ܽܘܠܰܝܗܽܘܢ ܡܪܳܖ̈ܶܐ ܠܗܽܘܢ.
33 ܚܶܡܬܳܐ ܕܬܰܢܺܝܢܳܐ ܚܶܡܬܗܽܘܢ. ܘܪܺܝܫܳܐ ܕܦܰܬܢܳܐ ܒܺܝܫܳܐ.
34 ܗܳܐ ܓܢܺܝܙ ܥܰܡܝ ܘܰܚܬܺܝܡ ܒܰܐܘܨܖ̈ܶܐ.
35 ܘܕܺܝܠܝ ܗܽܘ ܦܽܘܪܥܳܢܳܐ ܕܶܐܦܪܽܘܥ ܐܶܢܽܘܢ. ܒܙܰܒܢܳܐ ܕܰܬܡܽܘܛ ܪܶܓܠܗܽܘܢ. ܡܶܛܽܠ ܕܩܰܪܺܝܒ ܗܽܘ ܝܰܘܡܳܐ ܕܰܬܒܳܪܗܽܘܢ. ܘܰܡܣܰܪܗܰܒ ܡܶܕܶܡ ܕܰܥܬܺܝܕ ܠܗܽܘܢ.
36 ܡܶܛܽܠ ܕܕܳܐܶܢ ܡܳܪܝܳܐ ܠܥܰܡܶܗ. ܘܰܒܥܰܒܕܰܘ̈ܗܝ ܡܶܬܒܰܝܰܐ. ܡܶܛܽܠ ܕܰܚܙܳܐ ܕܫܶܠܛܰܬ ܐܺܝܕܳܐ. ܘܠܰܝܬ ܕܥܳܕܰܪ ܘܰܕܣܳܡܶܟ.
37 ܘܢܺܐܡܰܪ ܐܰܝܟܳܐ ܐܶܢܽܘܢ ܐܰܠܳܗܰܝ̈ܗܽܘܢ ܬܰܩܺܝܦ̈ܶܐ. ܗܳܢܽܘܢ ܕܰܬܟܺܝܠܺܝܢ ܗܘܰܘ ܥܠܰܝܗܽܘܢ.
38 ܕܬܰܪܒܳܐ ܕܕܶܒܚܰܝ̈ܗܽܘܢ ܐܳܟܠܺܝܢ ܗܘܰܘ. ܘܫܳܬܶܝܢ ܗܘܰܘ ܚܰܡܪܳܐ ܕܢܽܘܩܳܝܗܽܘܢ. ܢܩܽܘܡܽܘܢ ܗܳܫܳܐ ܘܰܢܥܰܕܪܽܘܢܳܟܽܘܢ. ܘܢܶܗܘܽܘܢ ܥܠܰܝܟܽܘܢ ܡܣܰܬܖ̈ܳܢܶܐ.
39 ܚܙܰܘ ܗܳܟܺܝܠ ܕܶܐܢܳܐ ܐ̱ܢܳܐ. ܘܠܰܝܬ ܐܰܠܳܗ ܠܒܰܪ ܡܶܢܝ. ܐܶܢܳܐ ܡܡܺܝܬ ܐ̱ܢܳܐ ܘܶܐܢܳܐ ܡܰܚܶܐ ܐ̱ܢܳܐ. ܐܶܢܳܐ ܡܰܚܶܐ ܐ̱ܢܳܐ ܘܶܐܢܳܐ ܡܰܐܣܶܐ ܐ̱ܢܳܐ. ܘܠܰܝܬ ܕܦܳܠܶܛ ܡܶܢ ܐܺܝܕܰܝ̈.
40 ܡܶܛܽܠ ܕܰܐܪܺܝܡܶܬ ܥܰܠ ܫܡܰܝ̈ܳܐ. ܐܺܝܕܝ. ܘܶܐܡܪܶܬ ܕܚܰܝ ܐ̱ܢܳܐ ܠܥܳܠܰܡ.
41 ܐܶܠܛܽܘܫ ܫܢܳܢܶܗ ܕܣܰܝܦܝ ܐܰܝܟ ܒܰܪܩܳܐ. ܘܬܶܐܚܽܘܕ ܒܕܺܝܢܳܐ ܐܺܝܕܝ. ܘܰܐܗܦܶܟ ܦܽܘܪܥܳܢܳܐ ܠܣܳܢܰܐܝ̈. ܘܠܰܒܥܶܠܕܒܳܒܰܝ̈ ܐܰܫܠܶܡ.
42 ܐܰܪܘܶܐ ܓܶܐܖ̈ܰܝ ܡܶܢ ܕܡܳܐ. ܘܣܰܝܦܝ ܢܶܐܟܽܘܠ ܒܶܣܪܳܐ. ܡܶܢ ܕܡܳܐ ܕܰܩܛܺܝ̈ܠܶܐ ܘܕܰܫ̈ܒܰܝܳܐ. ܘܡܶܢ ܪܺܝܫ ܬܳܓܳܐ ܕܰܒܥܶܠܕܒܳܒܳܐ.
43 ܡܶܟܺܝܠ ܫܰܒܰܚܘ ܥܰܡ̈ܡܶܐ ܥܰܡܶܗ. ܡܶܛܽܠ ܕܰܕܡܳܐ ܕܥܰܒܕܰܘ̈ܗܝ ܡܶܬܦܪܰܥ. ܘܦܽܘܪܥܳܢܳܐ ܡܰܗܦܶܟ ܠܣܳܢܰܐܘ̈ܗܝ. ܘܰܡܚܰܣܶܐ ܥܰܠ ܐܰܪܥܶܗ ܘܥܰܠ ܥܰܡܶܗ.
44 ܘܶܐܬܳܐ ܡܽܘܫܶܐ. ܘܶܐܡܰܪ ܟܽܠܗܽܘܢ ܦܶܬܓܳܡ̈ܶܐ ܕܬܶܫܒܽܘܚܬܳܐ ܗܳܕܶܐ ܩܕܳܡ ܟܽܠܶܗ ܥܰܡܳܐ. ܗܽܘ ܘܝܶܫܽܘܥ ܒܰܪܢܽܘܢ.
45 ܘܟܰܕ ܫܰܠܶܡ ܡܽܘܫܶܐ ܠܡܺܐܡܰܪ ܦܶܬܓܳܡ̈ܶܐ ܗܳܠܶܝܢ ܠܟܽܠܶܗ ܝܺܣܪܳܐܶܝܠ.
46 ܐܶܡܰܪ ܠܗܽܘܢ. ܣܺܝܡܘ ܠܶܒܟܽܘܢ ܒܟܽܠܗܽܘܢ ܦܶܬܓܳܡ̈ܶܐ ܗܳܠܶܝܢ. ܕܰܡܣܰܗܶܕ ܒܟܽܘܢ ܝܰܘܡܳܢܳܐ. ܕܰܬܦܰܩܕܽܘܢ ܠܰܒܢܰܝ̈ܟܽܘܢ. ܕܢܶܛܪܽܘܢ ܘܢܶܥܒܕܽܘܢ ܟܽܠܗܽܘܢ ܦܶܬܓܳܡܰܘ̈ܗܝ ܕܢܳܡܽܘܣܳܐ ܗܳܢܳܐ.
47 ܡܶܛܽܠ ܕܠܳܐ ܗܘܳܐ ܓܶܝܪ ܦܶܬܓܳܡܳܐ ܣܪܺܝܩܳܐ ܠܟܽܘܢ. ܡܶܛܽܠ ܕܗܽܘܝܽܘ ܚܰܝܰܝ̈ܟܽܘܢ. ܘܰܒܦܶܬܓܳܡܳܐ ܗܳܢܳܐ ܬܰܣܓܽܘܢ ܝܰܘ̈ܡܳܬܳܐ. ܒܰܐܪܥܳܐ ܕܥܳܒܪܺܝܢ ܐܰܢ̱ܬܽܘܢ ܝܽܘܪܕܢܳܢ ܠܬܰܡܳܢ ܠܡܺܐܪܬܳܗ̇
48 ܡܰܠܶܠ ܡܳܪܝܳܐ ܥܰܡ ܡܽܘܫܶܐ ܒܶܗ ܒܝܰܘܡܳܐ ܗܰܘ. ܘܶܐܡܰܪ ܠܶܗ.
49 ܣܰܩ ܠܛܽܘܪܳܐ ܗܳܢܳܐ ܕܥܶܒܖ̈ܳܝܶܐ. ܠܛܽܘܪܳܐ ܕܢܳܒܽܘ. ܕܒܰܐܪܥܳܐ ܕܡܽܘܐܳܒ ܩܕܳܡ ܐܺܝܪܺܝܚܽܘ. ܘܰܚܙܺܝܗ̇ ܠܰܐܪܥܳܐ ܕܰܟܢܰܥܢ ܕܝܳܗܶܒ ܐ̱ܢܳܐ ܠܰܒܢܰܝ̈ ܝܺܣܪܳܐܶܝܠ ܝܽܘܪܬܳܢܳܐ.
50 ܘܡܽܘܬ ܒܛܽܘܪܳܐ ܕܣܳܠܶܩ ܐܰܢ̱ܬ ܠܶܗ. ܘܶܐܬܟܰܢܰܫ ܠܘܳܬ ܥܰܡܳܟ. ܐܰܝܟܰܢܳܐ ܕܡܺܝܬ ܐܰܗܪܽܘܢ ܐܰܚܽܘܟ ܒܗܰܘ ܛܽܘܪܳܐ. ܘܶܐܬܟܰܢܶܫ ܠܘܳܬ ܥܰܡܶܗ.
51 ܥܰܠ ܕܰܐܥܠܺܝܬܽܘܢ ܒܺܝ ܒܓܰܘ ܒܢܰܝ̈ ܝܺܣܪܳܐܶܝܠ ܒܡܰܝ̈ܳܐ ܕܡܰܨܽܘܬܳܐ. ܒܰܪܩܶܡ ܒܡܰܕܒܪܳܐ ܕܨܺܝܢ. ܥܰܠ ܕܠܳܐ ܩܰܕܶܫܬܽܘܢܳܢܝ ܒܓܰܘ ܒܢܰܝ̈ ܝܺܣܪܳܐܶܝܠ.
52 ܡܶܢ ܩܒܽܘܠ ܚܙܺܝܗ̇ ܠܰܐܪܥܳܐ. ܕܝܳܗܶܒ ܐ̱ܢܳܐ ܠܰܒܢܰܝ̈ ܝܺܣܪܳܐܶܝܠ. ܘܰܠܬܰܡܳܢ ܠܳܐ ܬܶܥܽܘܠ.