Deuteronomy 10
The Book of Deuteronomy
܀ ܬܢܝܢ ܢܡܘܣܐ ܝ ܀
1 ܒܶܗ ܒܙܰܒܢܳܐ ܗܰܘ ܐܶܡܰܪ ܠܺܝ ܡܳܪܝܳܐ. ܦܣܽܘܠ ܠܳܟ ܬܰܪܬܶܝܢ ܠܽܘ̈ܚܶܐ ܕܟܺܐܦܳܐ ܐܰܝܟ ܩܰܕܡܳܝ̈ܬܳܐ. ܘܣܰܩ ܠܘܳܬܝ ܠܛܽܘܪܳܐ. ܘܰܥܒܶܕ ܠܳܟ ܩܺܐܒܽܘܬܳܐ ܕܩܰܝܣܳܐ.
2 ܘܰܟܬܽܘܒ ܥܰܠ ܠܽܘ̈ܚܶܐ ܦܶܬܓܳܡ̈ܶܐ ܕܺܐܝܬ ܗܘܰܘ ܥܰܠ ܠܽܘ̈ܚܶܐ ܩܰܕܡܳܝ̈ܳܬܳܐ ܕܬܰܒܰܪܬ. ܘܣܺܝܡ ܐܶܢܶܝܢ ܒܩܺܐܒܽܘܬܳܐ.
3 ܘܥܶܒܕܶܬ ܩܺܐܒܽܘܬܳܐ ܕܩܰܝܣܳܐ ܕܶܐܫܟܳܪܥܳܐ. ܘܦܶܣܠܶܬ ܬܰܪܬܶܝܢ ܠܽܘ̈ܚܶܐ ܕܟܺܐܦܳܐ ܐܰܝܟ ܩܰܕܡܳܝ̈ܳܬܳܐ. ܘܣܶܠܩܶܬ ܠܛܽܘܪܳܐ. ܘܬܰܖ̈ܬܰܝܗܶܝܢ ܠܽܘ̈ܚܶܐ ܒܺܐܝܕܰܝ̈.
4 ܘܰܟܬܰܒ ܥܰܠ ܠܽܘ̈ܚܶܐ ܐܰܝܟ ܟܬܳܒܳܐ ܩܰܕܡܳܝܳܐ. ܥܶܣܪܳܐ ܦܶܬܓܳܡܺܝ̈ܢ ܕܡܰܠܶܠ ܡܳܪܝܳܐ ܥܰܡܟܽܘܢ ܒܛܽܘܪܳܐ ܡܶܢ ܓܰܘ ܢܽܘܪܳܐ ܒܝܰܘܡܳܐ ܕܰܟܢܽܘܫܝܳܐ. ܘܝܰܗܒ ܐܶܢܶܝܢ ܠܺܝ ܡܳܪܝܳܐ.
5 ܘܶܐܬܦܢܺܝܬ ܘܢܶܚܬܶܬ ܡܶܢ ܛܽܘܪܳܐ. ܘܣܳܡܶܬ ܐܶܢܶܝܢ ܠܠܽܘ̈ܚܶܐ ܒܩܺܐܒܽܘܬܳܐ ܕܥܶܒܕܶܬ. ܘܫܶܒܩܶܬ ܐܶܢܶܝܢ ܒܳܗ̇ ܐܰܝܟ ܕܦܰܩܕܰܢܝ ܡܳܪܝܳܐ.
6 ܘܰܒܢܰܝ̈ ܝܺܣܪܳܐܶܝܠ ܫܩܰܠܘ ܡܶܢ ܒܪܳܐܽܘܬ ܕܰܒܢܰܝ̈ ܝܰܥܩܳܢ ܠܡܽܘܣܳܪܳܐ. ܬܰܡܳܢ ܡܺܝܬ ܐܰܗܪܽܘܢ ܘܶܐܬܩܒܰܪ ܬܰܡܳܢ. ܘܟܰܗܶܢ ܐܶܠܺܝܥܳܙܳܪ ܒܪܶܗ ܒܳܬܪܶܗ.
7 ܘܡܶܢ ܬܰܡܳܢ ܫܩܰܠܘ ܠܓܳܕܓܳܕ. ܘܡܶܢ ܓܳܕܓܳܪ ܠܝܳܛܒܰܬ. ܠܰܐܪܥܳܐ ܕܖ̈ܶܓܠܳܬܳܐ ܕܡܰܝ̈ܳܐ.
8 ܒܶܗ ܒܙܰܒܢܳܐ ܗܰܘ ܦܪܰܫ ܡܳܪܝܳܐ ܠܫܰܒܛܳܐ ܕܠܶܘܺܝ. ܕܢܶܫܩܽܘܠ ܩܺܐܒܽܘܬܳܐ ܕܰܩܝܳܡܶܗ ܕܡܳܪܝܳܐ. ܘܕܰܢܩܽܘܡ ܩܕܳܡ ܡܳܪܝܳܐ ܘܰܢܫܰܡܫܺܝܘܗܝ. ܘܰܢܒܰܪܶܟ ܫܡܶܗ ܕܡܳܪܝܳܐ ܥܕܰܡܳܐ ܠܝܰܘܡܳܢܳܐ.
9 ܡܶܛܽܠ ܗܳܢܳܐ ܠܰܝܬ ܠܠܶܘܺܝ ܦܳܠܓܽܘܬܳܐ ܘܝܳܪܬܽܘܬܳܐ ܥܰܡ ܐܰܚܰܘ̈ܗܝ. ܡܳܪܝܳܐ ܗܽܘ ܓܶܝܪ ܝܳܪܬܽܘܬܶܗ ܐܰܝܟ ܕܶܐܡܰܪ ܠܶܗ ܡܳܪܝܳܐ ܐܰܠܳܗܳܟ.
10 ܘܶܐܢܳܐ ܩܳܡܶܬ ܩܕܳܡ ܡܳܪܝܳܐ ܒܛܽܘܪܳܐ ܐܰܝܟ ܝܰܘ̈ܡܳܬܳܐ ܩܰܕܡܳܝ̈ܶܐ. ܐܰܪܒܥܺܝܢ ܐܺܝܡܳܡܺܝ̈ܢ ܘܰܐܪܒܥܺܝܢ ܠܰܝܠܰܘ̈ܳܢ. ܘܫܰܡܥܰܢܝ ܡܳܪܝܳܐ ܐܳܦ ܒܙܰܒܢܳܐ ܗܰܘ. ܘܠܳܐ ܨܒܳܐ ܡܳܪܝܳܐ ܐܰܠܳܗܳܟ ܕܰܢܚܰܒܠܳܟ.
11 ܘܶܐܡܰܪ ܠܺܝ ܡܳܪܝܳܐ. ܩܽܘܡ ܫܩܽܘܠ ܘܙܶܠ ܩܕܳܡ ܥܰܡܳܐ. ܘܢܶܥܠܽܘܢ ܘܢܺܐܪܬܽܘܢ ܐܰܪܥܳܐ ܕܺܝܡܺܝܬ ܠܰܐܒܳܗܰܝ̈ܗܽܘܢ ܠܡܶܬܰܠ ܠܗܽܘܢ.
12 ܡܶܟܺܝܠ ܝܺܣܪܳܐܶܝܠ. ܡܳܢܳܐ ܫܳܐܶܠ ܠܳܟ ܡܳܪܝܳܐ ܐܰܠܳܗܳܟ. ܐܶܠܳܐ ܕܬܶܕܚܰܠ ܡܶܢ ܡܳܪܝܳܐ ܐܰܠܳܗܳܟ. ܘܰܬܗܰܠܶܟ ܒܽܐܘܖ̈ܚܳܬܶܗ. ܘܬܶܪܚܡܺܝܘܗܝ. ܘܬܶܦܠܽܘܚ ܠܡܳܪܝܳܐ ܐܰܠܳܗܳܟ ܡܶܢ ܟܽܠܶܗ ܠܶܒܳܟ ܘܡܶܢ ܟܽܠܳܗ̇ ܢܰܦܫܳܟ.
13 ܘܬܶܛܰܪ ܦܽܘܩܕܳܢܰܘ̈ܗܝ ܕܡܳܪܝܳܐ ܐܰܠܳܗܳܟ. ܘܢܳܡܽܘܣܰܘ̈ܗܝ ܕܰܡܦܰܩܶܕ ܐ̱ܢܳܐ ܠܳܟ ܝܰܘܡܳܢܳܐ ܕܢܰܛܐܶܒ ܠܳܟ.
14 ܕܡܳܪܝܳܐ ܐܶܢܽܘܢ ܐܰܠܳܗܳܟ ܫܡܰܝܳܐ ܘܰܫܡܰܝ̈ ܫܡܰܝܳܐ. ܘܰܐܪܥܳܐ ܘܟܽܠ ܕܺܐܝܬ ܒܳܗ̇.
15 ܘܒܰܐܒܳܗܰܝ̈ܟܽܘܢ ܒܰܠܚܽܘܕ ܨܒܳܐ ܡܳܪܝܳܐ. ܘܰܪܚܶܡ ܐܶܢܽܘܢ ܘܰܓܒܳܐ ܠܙܰܪܥܗܽܘܢ ܒܳܬܰܪܗܽܘܢ. ܡܶܢ ܟܽܠܗܽܘܢ ܥܰܡ̈ܡܶܐ ܐܰܝܟ ܕܝܰܘܡܳܢܳܐ.
16 ܓܙܽܘܪܘ ܥܽܘܪܠܘܳܬܳܐ ܕܠܶܒܟܽܘܢ. ܘܰܩܕܳܠܟܽܘܢ ܬܽܘܒ ܠܳܐ ܬܩܰܫܽܘܢ.
17 ܡܶܛܽܠ ܕܡܳܪܝܳܐ ܐܰܠܳܗܟܽܘܢ ܗܽܘܝܽܘ ܐܰܠܳܗ ܐܰܠܳܗܺܝ̈ܢ. ܘܡܳܪܶܐ ܡܳܖ̈ܰܘܳܬܳܐ. ܐܰܠܳܗܳܐ ܪܰܒܳܐ. ܘܓܰܢ̱ܒܪܳܐ. ܘܰܕܚܺܝܠܳܐ. ܕܠܳܐ ܢܳܣܶܒ ܒܰܐܦ̈ܶܐ. ܘܠܳܐ ܡܩܰܒܶܠ ܫܽܘܚܕܳܐ.
18 ܘܥܳܒܶܕ ܕܺܝܢܳܐ ܕܝܰܬܡ̈ܶܐ. ܘܕܰܐܖ̈ܡܠܳܬܳܐ. ܘܪܳܚܶܡ ܠܰܐܝܢܳܐ ܕܡܶܬܦܢܶܐ ܠܘܳܬܶܗ. ܘܝܳܗܶܒ ܠܶܗ ܠܰܚܡܳܐ ܘܬܰܟܣܺܝܬܳܐ.
19 ܪܚܰܡܘ ܠܰܐܝܠܶܝܢ ܕܡܶܬܦܢܶܝܢ ܠܘܳܬܶܗ. ܡܶܛܽܠ ܕܬܰܘܬܳܒ̈ܶܐ ܗܘܰܝܬܽܘܢ ܒܰܐܪܥܳܐ ܕܡܶܨܪܶܝܢ.
20 ܡܶܢ ܡܳܪܝܳܐ ܐܰܠܳܗܳܟ ܕܚܰܠ. ܘܠܶܗ ܦܠܽܘܚ. ܘܠܶܗ ܐܶܬܢܰܩܦ. ܘܒܰܫܡܶܗ ܝܺܡܰܝ.
21 ܕܗܽܘܝܽܘ ܬܶܫܒܽܘܚܬܳܟ. ܘܗܽܘܝܽܘ ܐܰܠܳܗܳܟ. ܕܰܥܒܰܕ ܥܰܡܳܟ ܪܰܘܖ̈ܒܳܬܳܐ ܘܰܕܚܺܝ̈ܠܳܬܳܐ ܕܰܚܙܰܝ̈ ܥܰܝܢܰܝ̈ܟ.
22 ܒܫܰܒܥܺܝܢ ܢܰܦ̈ܫܳܢ ܢܚܶܬܘ ܐܰܒܳܗܰܝ̈ܟ ܠܡܶܨܪܶܝܢ. ܘܗܳܫܳܐ ܗܳܐ ܐܰܣܓܝܳܟ ܡܳܪܝܳܐ ܐܰܠܳܗܳܟ ܐܰܝܟ ܟܰܘܟ̈ܒܶܐ ܕܒܰܫܡܰܝܳܐ.