Deuteronomy 11
The Book of Deuteronomy
܀ ܬܢܝܢ ܢܡܘܣܐ ܝܐ ܀
1 ܪܚܰܡ ܠܡܳܪܝܳܐ ܐܰܠܳܗܳܟ. ܘܛܰܪ ܢܛܽܘܖ̈ܳܬܶܗ. ܘܢܳܡܽܘܣܰܘ̈ܗܝ. ܘܕܺܝܢܰܘ̈ܗܝ. ܘܦܽܘܩܕܳܢܰܘ̈ܗܝ. ܟܽܠܗܽܘܢ ܝܰܘ̈ܡܳܬܳܐ.
2 ܘܬܶܕܥܽܘܢ ܝܰܘܡܳܢܳܐ. ܕܠܳܐ ܗܘܳܐ ܠܰܒܢܰܝ̈ܟܽܘܢ ܕܠܳܐ ܝܺܕܰܥܘ. ܘܠܳܐ ܚܙܰܘ ܡܰܪܕܽܘܬܶܗ ܕܡܳܪܝܳܐ ܐܰܠܳܗܟܽܘܢ. ܘܪܰܒܽܘܬܶܗ. ܘܺܐܝܕܶܗ ܬܰܩܺܝܦܬܳܐ. ܘܰܕܪܳܥܶܗ ܪܳܡܳܐ.
3 ܘܳܐܬܘ̈ܳܬܶܗ. ܘܰܥܒܳܕܰܘ̈ܗܝ ܕܰܥܒܰܕ ܒܡܶܨܪܶܝܢ. ܠܦܶܪܥܽܘܢ ܡܰܠܟܳܐ ܕܡܶܨܪܶܝܢ. ܘܰܠܟܽܠܳܗ̇ ܐܰܪܥܶܗ.
4 ܘܕܰܥܒܰܕ ܠܚܰܝܠܳܐ ܕܡܶܨܖ̈ܳܝܶܐ. ܠܖ̈ܰܟܫܳܐ. ܘܰܠܡܰܖ̈ܟܒܳܬܳܐ. ܘܰܠܖ̈ܳܟܒܰܝܗܶܝܢ. ܕܰܐܛܺܝܦ ܡܰܝ̈ܳܐ ܕܝܰܡܳܐ ܕܣܽܘܦ ܥܰܠ ܐܰܦܰܝ̈ܗܽܘܢ ܟܰܕ ܪܕܰܦܘ ܒܳܬܰܪܟܽܘܢ. ܘܰܐܘܒܶܕ ܐܶܢܽܘܢ ܡܳܪܝܳܐ ܥܕܰܡܳܐ ܠܝܰܘܡܳܢܳܐ.
5 ܘܟܽܠ ܕܰܥܒܰܕ ܠܟܽܘܢ ܒܡܰܕܒܪܳܐ. ܥܕܰܡܳܐ ܕܶܐܬܰܝܬܽܘܢ ܠܰܐܬܪܳܐ ܗܳܢܳܐ.
6 ܘܡܶܕܶܡ ܕܰܥܒܰܕ ܠܕܳܬܳܢ ܘܠܰܐܒܺܝܪܰܡ ܒܢܰܝ̈ ܐܶܠܝܰܐܒ. ܒܪܶܗ ܕܪܽܘܒܺܝܠ. ܕܦܶܬܚܰܬ ܐܰܪܥܳܐ ܦܽܘܡܳܗ̇ ܘܒܶܠܥܰܬ ܐܶܢܽܘܢ. ܠܗܽܘܢ ܘܠܰܒܢܰܝ̈ܗܽܘܢ. ܘܰܠܡܰܫܟܰܢܝ̈ܗܽܘܢ. ܘܰܠܟܽܠܡܶܕܶܡ ܕܺܐܝܬ ܗܘܳܐ ܠܗܽܘܢ. ܕܩܳܝܡܺܝܢ ܗܘܰܘ ܥܰܠ ܖ̈ܶܓܠܰܝܗܽܘܢ ܒܰܝܢܳܬ ܟܽܠܶܗ ܝܺܣܪܳܐܶܝܠ.
7 ܐܶܠܳܐ ܥܰܝܢܰܝ̈ܟܽܘܢ ܗܽܘ ܚܙܰܝ̈ ܠܟܽܠܗܽܘܢ ܥܒܳܕܰܘ̈ܗܝ ܕܡܳܪܝܳܐ ܪܰܘܖ̈ܒܶܐ ܕܰܥܒܰܕ.
8 ܛܰܪܘ ܟܽܠܗܽܘܢ ܦܽܘܩ̈ܕܳܢܶܐ ܕܰܡܦܰܩܶܕ ܐ̱ܢܳܐ ܠܟܽܘܢ ܝܰܘܡܳܢܳܐ. ܕܬܶܬܚܰܝܠܽܘܢ. ܘܬܶܥܠܽܘܢ. ܘܺܬܐܪܬܽܘܢ ܐܰܪܥܳܐ ܕܥܳܒܪܺܝܢ ܐ̱ܢܬܽܘܢ ܠܳܗ̇ ܠܡܺܐܪܬܳܗ̇
9 ܘܬܰܣܓܽܘܢ ܝܰܘ̈ܡܳܬܳܐ ܒܰܐܪܥܳܐ ܕܺܝܡܳܐ ܡܳܪܝܳܐ ܠܰܐܒܳܗܰܝ̈ܟܽܘܢ. ܠܡܶܬܰܠ ܠܗܽܘܢ. ܘܰܠܙܰܪܥܗܽܘܢ. ܐܰܪܥܳܐ ܕܡܰܪܕܝܳܐ ܚܰܠܒܳܐ ܘܕܶܒܫܳܐ.
10 ܡܶܛܽܠ ܕܰܐܪܥܳܐ ܕܥܳܐܠܺܝܢ ܐ̱ܢܬܽܘܢ ܠܳܗ̇ ܠܡܺܐܪܬܳܗ̇ ܠܳܐ ܗܘܳܬ ܐܰܝܟ ܐܰܪܥܳܐ ܕܡܶܨܪܶܝܢ ܕܰܢܦܰܩܬܽܘܢ ܡܶܢܳܗ̇. ܕܙܳܪܥܺܝܢ ܐ̱ܢܬܽܘܢ ܙܰܪܥܟܽܘܢ ܘܡܰܫܩܶܝܢ ܐ̱ܢܬܽܘܢ ܒܖ̈ܶܓܠܰܝܟܽܘܢ ܐܰܝܟ ܦܰܪܕܰܝܣܳܐ ܕܫܶܩܝܳܐ.
11 ܐܰܪܥܳܐ ܕܶܝܢ ܕܥܳܒܪܺܝܢ ܐ̱ܢܬܽܘܢ ܠܳܗ̇ ܠܡܺܐܪܬܳܗ̇ ܐܰܪܥܳܐ ܗܺܝ ܕܛܽܘܖ̈ܶܐ. ܘܰܕܦܰܩ̈ܥܳܬܳܐ. ܘܡܶܢ ܡܶܛܪܳܐ ܗܽܘ ܕܰܫܡܰܝܳܐ ܫܳܬܝܳܐ ܡܰܝ̈ܳܐ.
12 ܐܰܪܥܳܐ ܕܡܳܪܝܳܐ ܐܰܠܳܗܳܟ ܬܳܒܰܥ ܠܳܗ̇ ܐܰܡܺܝܢܳܐܺܝܬ. ܘܥܰܝܢܰܘ̈ܗܝ ܕܡܳܪܝܳܐ ܐܰܠܳܗܳܟ ܒܳܗ̇. ܡܶܢ ܪܺܝܫܳܗ̇ ܕܫܰܢ̱ܬܳܐ ܘܰܥܕܰܡܳܐ ܠܚܰܪܬܳܗ̇ ܕܫܰܢ̱ܬܳܐ.
13 ܘܶܐܢ ܬܶܫܡܥܽܘܢ ܠܦܽܘܩ̈ܕܳܢܶܐ ܕܰܡܦܰܩܶܕ ܐ̱ܢܳܐ ܠܟܽܘܢ ܝܰܘܡܳܢܳܐ. ܘܬܶܪܚܡܽܘܢ ܠܡܳܪܝܳܐ ܐܰܠܳܗܟܽܘܢ ܘܬܶܦܠܚܽܘܢܶܗ. ܡܶܢ ܟܽܠܶܗ ܠܶܒܟܽܘܢ ܘܡܶܢ ܟܽܠܳܗ̇ ܢܰܦܫܟܽܘܢ.
14 ܐܶܬܶܠ ܡܶܛܪܳܐ ܕܰܐܪܥܟܽܘܢ ܒܙܰܒܢܶܗ. ܒܟܺܝܪܳܝܳܐ ܘܰܠܩܺܝܫܳܝܳܐ. ܘܬܶܚܡܽܘܠ ܥܒܽܘܪܳܟ. ܘܚܰܡܪܳܟ. ܘܡܶܫܚܳܟ.
15 ܘܶܐܬܶܠ ܥܶܣܒܳܐ ܒܚܰܩܠܳܟ ܠܰܒܥܺܝܪܳܟ. ܘܬܶܐܟܽܘܠ ܘܬܶܣܒܰܥ.
16 ܐܶܙܕܰܗܪܘ ܕܠܳܐ ܢܶܫܬܰܕܰܠ ܠܶܒܟܽܘܢ. ܘܬܶܣܛܽܘܢ ܘܬܶܦܠܚܽܘܢ ܠܰܐܠܳܗ̈ܶܐ ܐ̱ܚܖ̈ܳܢܶܐ. ܘܬܶܣܓܕܽܘܢ ܠܗܽܘܢ.
17 ܘܢܶܬܚܰܡܰܬ ܪܽܘܓܙܶܗ ܕܡܳܪܝܳܐ ܥܠܰܝܟܽܘܢ. ܘܢܶܟܠܶܐ ܫܡܰܝܳܐ ܕܠܳܐ ܢܶܗܘܶܐ ܡܶܛܪܳܐ. ܘܰܐܪܥܳܐ ܠܳܐ ܬܶܬܶܠ ܥܰܠ̈ܠܳܬܳܗ̇. ܘܬܺܐܒܕܽܘܢ ܒܰܥܓܰܠ ܡܶܢ ܐܰܪܥܳܐ ܛܳܒܬܳܐ ܕܝܳܗܶܒ ܠܟܽܘܢ ܡܳܪܝܳܐ ܐܰܠܳܗܟܽܘܢ.
18 ܘܰܬܣܺܝܡܽܘܢ ܗܳܠܶܝܢ ܦܽܘܩ̈ܕܳܢܶܐ ܒܠܶܒܟܽܘܢ. ܘܰܒܢܰܦܫܟܽܘܢ. ܘܰܩܛܽܘܪܘ ܐܶܢܽܘܢ ܐܳܬܳܐ ܥܰܠ ܐܺܝܕܰܝ̈ܟܽܘܢ. ܘܢܶܗܘܽܘܢ ܪܽܘܫܡܳܐ ܒܶܝܬ ܥܰܝܢܰܝ̈ܟܽܘܢ.
19 ܘܰܐܠܶܦܘ ܐܶܢܽܘܢ ܠܰܒܢܰܝ̈ܟܽܘܢ. ܕܰܢܡܰܠܠܽܘܢ ܒܗܽܘܢ. ܡܳܐ ܕܝܳܬܒܺܝܢ ܐ̱ܢܬܽܘܢ ܒܒܳܬܰܝ̈ܟܽܘܢ. ܘܡܳܐ ܕܳܐܙܺܠܝܢ ܐ̱ܢܬܽܘܢ ܒܽܐܘܪܚܳܐ. ܘܡܳܐ ܕܕܳܡܟܺܝܢ ܐ̱ܢܬܽܘܢ. ܘܡܳܐ ܕܩܳܝܡܺܝܢ ܐ̱ܢܬܽܘܢ.
20 ܘܰܟܬܽܘܒܘ ܐܶܢܽܘܢ ܥܰܠ ܐܶܣܟ̈ܦܳܬܳܐ ܕܒܳܬܰܝ̈ܟܽܘܢ. ܘܥܰܠ ܬܰܖ̈ܥܰܝܗܽܘܢ.
21 ܘܢܶܣܓܽܘܢ ܝܰܘ̈ܡܰܝܟܽܘܢ. ܘܝܰܘ̈ܡܰܝ ܒܢܰܝ̈ܟܽܘܢ. ܒܰܐܪܥܳܐ ܕܺܝܡܳܐ ܡܳܪܝܳܐ ܐܰܠܳܗܟܽܘܢ ܠܰܐܒܳܗܰܝ̈ܟܽܘܢ ܠܡܶܬܰܠ ܠܗܽܘܢ. ܐܰܝܟ ܝܰܘ̈ܡܰܝ ܫܡܰܝܳܐ ܥܰܠ ܐܰܪܥܳܐ.
22 ܘܶܐܢ ܬܶܛܪܽܘܢ ܗܳܠܶܝܢ ܟܽܠܗܽܘܢ ܦܽܘܩ̈ܕܳܢܶܐ ܕܰܡܦܰܩܶܕ ܐ̱ܢܳܐ ܠܟܽܘܢ ܝܰܘܡܳܢܳܐ. ܘܬܶܥܒܕܽܘܢ ܐܶܢܽܘܢ. ܘܬܶܪܚܡܽܘܢ ܠܡܳܪܝܳܐ ܐܰܠܳܗܟܽܘܢ. ܘܰܬܗܰܠܟܽܘܢ ܒܟܽܠܗܶܝܢ ܐܽܘܖ̈ܚܳܬܶܗ. ܘܬܶܬܢܰܩܦܽܘܢ ܠܶܗ.
23 ܢܰܘܒܶܕ ܡܳܪܝܳܐ ܗܳܠܶܝܢ ܟܽܠܗܽܘܢ ܥܰܡ̈ܡܶܐ ܡܶܢ ܩܕܳܡܰܝܟܽܘܢ. ܘܬܺܐܪܬܽܘܢ ܠܥܰܡ̈ܡܶܐ ܕܪܰܘܪܒܺܝܢ ܘܥܰܫܺܝܢܺܝܢ ܡܶܢܟܽܘܢ.
24 ܟܽܠ ܐܰܬܪܳܐ ܕܬܶܕܪܽܘܟ ܒܶܗ ܦܰܣܬܳܐ ܕܪܶܓܠܟܽܘܢ. ܠܟܽܘܢ ܢܶܗܘܶܐ. ܡܶܢ ܡܰܕܒܪܳܐ ܘܠܶܒܢܳܢ. ܘܡܶܢ ܢܰܗܪܳܐ ܠܢܰܗܪܳܐ ܦܪܳܬ. ܘܰܥܕܰܡܳܐ ܠܝܰܡܳܐ ܐ̱ܚܪܳܝܳܐ ܢܶܗܘܶܐ ܬܚܽܘܡܟܽܘܢ.
25 ܘܠܳܐ ܢܩܽܘܡ ܐ̱ܢܳܫ ܩܕܳܡܰܝܟܽܘܢ. ܘܕܶܚܠܰܬܟܽܘܢ ܘܙܰܘܥܰܬܟܽܘܢ ܢܶܬܶܠ ܡܳܪܝܳܐ ܐܰܠܳܗܟܽܘܢ ܥܰܠ ܐܰܦܰܝ̈ ܟܽܠܳܗ̇ ܐܰܪܥܳܐ ܕܬܶܕܪܟܽܘܢ ܒܳܗ̇. ܐܰܝܟ ܕܶܐܡܰܪ ܠܟܽܘܢ ܡܳܪܝܳܐ.
26 ܚܙܰܘ ܕܝܳܗܶܒ ܐ̱ܢܳܐ ܩܕܳܡܰܝܟܽܘܢ ܝܰܘܡܳܢܳܐ ܒܽܘܖ̈ܟܳܬܳܐ ܘܠܰܘ̈ܛܳܬܳܐ.
27 ܒܽܘܖ̈ܟܳܬܳܐ ܐܶܢ ܬܶܫܡܥܽܘܢ ܦܽܘܩܕܳܢܰܘ̈ܗܝ ܕܡܳܪܝܳܐ ܐܰܠܳܗܟܽܘܢ. ܕܰܡܦܰܩܶܕ ܐ̱ܢܳܐ ܠܟܽܘܢ ܝܰܘܡܳܢܳܐ.
28 ܘܠܰܘ̈ܛܳܬܳܐ ܐܶܢ ܠܳܐ ܬܶܫܡܥܽܘܢ ܦܽܘܩܕܳܢܰܘ̈ܗܝ ܕܡܳܪܝܳܐ ܐܰܠܳܗܟܽܘܢ. ܘܶܐܢ ܬܶܣܛܽܘܢ ܡܶܢ ܐܽܘܪܚܳܐ ܕܰܡܦܰܩܶܕ ܐ̱ܢܳܐ ܠܟܽܘܢ ܝܰܘܡܳܢܳܐ ܘܬܺܐܙܽܠܘܢ ܒܳܬܰܪ ܐܰܠܳܗ̈ܶܐ ܐ̱ܚܖ̈ܳܢܶܐ ܕܠܳܐ ܝܳܕܥܺܝܢ ܐ̱ܢܬܽܘܢ ܠܗܽܘܢ.
29 ܘܟܰܕ ܢܰܥܠܳܟ ܡܳܪܝܳܐ ܐܰܠܳܗܳܟ ܠܰܐܪܥܳܐ ܕܥܳܐܶܠ ܐܰܢ̱ܬ ܠܬܰܡܳܢ ܠܡܺܐܪܬܳܗ̇ ܗܰܒ ܒܽܘܖ̈ܟܳܬܳܐ ܥܰܠ ܛܽܘܪܳܐ ܕܓܰܪܙܺܝܡ. ܘܠܰܘ̈ܛܳܬܳܐ ܥܰܠ ܛܽܘܪܳܐ ܕܰܓܒܶܠ.
30 ܗܳܐ ܗܶܢܽܘܢ ܒܥܶܒܪܳܐ ܕܝܽܘܪܕܢܳܢ ܒܶܣܬܰܪ ܐܽܘܪܚܳܐ ܒܡܰܥܖ̈ܳܒܰܝ ܫܶܡܫܳܐ. ܒܰܐܪܥܳܐ ܕܰܟܢܰܥܢܳܝ̈ܶܐ ܕܝܳܬܒܺܝܢ ܒܥܳܪܳܒܳܐ ܠܽܘܩܒܰܠ ܓܰܠܓܳܠܳܐ. ܘܠܽܘܩܒܰܠ ܒܶܝܬ ܒܰܠܽܘܛܳܐ ܕܡܰܡܪܶܐ.
31 ܡܶܛܽܠ ܕܥܳܒܪܺܝܬܽܘܢ ܝܽܘܪܕܢܳܢ. ܠܡܶܥܰܠ ܠܡܺܐܪܰܬ ܐܰܪܥܳܐ ܕܝܳܗܶܒ ܠܟܽܘܢ ܡܳܪܝܳܐ ܐܰܠܳܗܟܽܘܢ. ܘܬܺܐܪܬܽܘܢܳܗ̇ ܘܬܶܬܒܽܘܢ ܒܳܗ̇.
32 ܘܬܶܛܪܽܘܢ ܘܬܶܥܒܕܽܘܢ ܟܽܠܗܽܘܢ ܢܳܡܽܘܣ̈ܶܐ ܘܕܺܝܢ̈ܶܐ ܕܝܳܗܶܒ ܐ̱ܢܳܐ ܩܕܳܡܰܝܟܽܘܢ ܝܰܘܡܳܢܳܐ.