Deuteronomy 33
The Book of Deuteronomy
܀ ܬܢܝܢ ܢܡܘܣܐ ܠܓ ܀
1 ܘܗܳܕܶܐ ܒܽܘܪܟܬܳܐ ܕܒܰܪܶܟ ܡܽܘܫܶܐ ܥܰܒܕܶܗ ܕܰܐܠܳܗܳܐ ܠܰܒܢܰܝ̈ ܝܺܣܪܳܐܶܝܠ. ܩܕܳܡ ܕܰܢܡܽܘܬ.
2 ܘܶܐܡܰܪ. ܡܳܪܝܳܐ ܡܶܢ ܣܺܝܢܰܝ ܐܶܬܳܐ. ܘܰܕܢܰܚ ܠܰܢ ܡܶܢ ܣܳܥܺܝܪ. ܘܶܐܬܓܠܺܝ ܡܶܢ ܛܽܘܪܳܐ ܕܦܰܪܰܢ. ܘܥܰܡܶܗ ܡܶܢ ܖ̈ܶܒܘܳܬܳܐ ܕܩܰܕܺܝ̈ܫܶܐ ܡܶܢ ܝܰܡܺܝܢܶܗ.
3 ܝܰܗܒ ܠܗܽܘܢ ܘܳܐܦ ܐܰܪܚܶܡ ܐܶܢܽܘܢ ܠܥܰܡ̈ܡܶܐ. ܘܟܽܠܗܽܘܢ ܩܰܕܺܝܫܰܘ̈ܗܝ ܒܰܪܶܟ. ܘܗܶܢܽܘܢ ܡܰܕܪܟܺܝܢ ܠܪܶܓܠܳܟ. ܘܰܡܩܰܒܠܺܝܢ ܡܶܢ ܡܶܠܬܳܟ.
4 ܢܳܡܽܘܣܳܐ ܐܰܫܠܶܡ ܠܰܢ ܡܽܘܫܶܐ. ܘܝܰܗܒܶܗ ܝܽܘܪܬܳܢܳܐ ܠܰܟܢܽܘܫܬܶܗ ܕܝܰܥܩܽܘܒ.
5 ܘܢܶܗܘܶܐ ܒܺܝܣܪܳܐܶܝܠ ܡܰܠܟܳܐ. ܡܳܐ ܕܶܐܬܟܰܢܰܫܘ ܖ̈ܺܝܫܶܐ ܕܥܰܡܳܐ ܐܰܟܚܕܳܐ ܘܫܰܒ̈ܛܶܐ ܕܺܝܣܪܳܐܶܝܠ.
6 ܘܢܺܚܶܐ ܪܽܘܒܺܝܠ ܘܠܳܐ ܢܡܽܘܬ. ܘܢܶܗܘܶܐ ܒܡܶܢܝܳܢܳܐ.
7 ܘܗܳܕܶܐ ܐܶܡܰܪ ܠܺܝܗܽܘܕܳܐ. ܫܡܰܥ ܡܳܪܝܳܐ ܒܩܳܠܶܗ ܕܺܝܗܽܘܕܳܐ. ܘܰܠܥܰܡܶܗ ܐܰܝܬܳܝܗܝ. ܐܺܝܕܰܘ̈ܗܝ ܢܕܽܘ̈ܢܳܢ ܠܶܗ. ܘܥܳܕܽܘܪܳܐ ܡܶܢ ܐܳܠܽܘܨܰܘ̈ܗܝ ܗܘܰܝ̈ ܠܶܗ.
8 ܘܰܠܠܶܘܺܝ ܐܶܡܰܪ. ܫܽܘܡܠܳܝܳܟ ܘܢܽܘܗܪܳܟ ܠܓܰܒܪܳܐ ܚܰܣܝܳܐ. ܕܢܰܣܺܝܬܶܗ ܒܢܶܣܝܽܘܢ̈ܶܐ. ܘܰܒܚܰܪܬܶܗ ܒܡܰܝ̈ܳܐ ܕܡܰܨܽܘܬܳܐ.
9 ܕܶܐܡܰܪ ܥܰܠ ܐܰܒܽܘܗܝ. ܘܥܰܠ ܐܶܡܶܗ ܠܳܐ ܚܙܺܝܬܶܗ. ܘܠܰܐܚܰܘ̈ܗܝ ܠܳܐ ܐܶܫܬܰܘܕܰܥ. ܘܠܰܒܢܰܘ̈ܗܝ ܠܳܐ ܝܺܕܰܥ. ܕܰܢܛܰܪܘ ܡܺܐܡܪܳܟ ܘܰܩܝܳܡܳܟ ܢܛܰܪܘ.
10 ܢܰܠܦܽܘܢ ܕܺܝܢܰܝ̈ܟ ܠܝܰܥܩܽܘܒ. ܘܢܳܡܽܘܣܰܝ̈ܟ ܠܺܝܣܪܳܐܶܝܠ. ܢܣܺܝܡܽܘܢ ܥܶܛܪܳܐ ܒܪܽܘܓܙܳܟ. ܘܫܽܘܡܠܳܝܳܐ ܥܰܠ ܡܰܕܒܚܳܟ.
11 ܒܰܪܶܟ ܡܳܪܝܳܐ ܚܰܝܠܶܗ. ܘܶܐܨܛܒܺܝ ܒܰܥܒܳܕܳܐ ܕܺܐܝܕܰܘ̈ܗܝ. ܬܒܰܪ ܚܰܨܳܐ ܕܣܳܢܰܐܘ̈ܗܝ ܘܰܒܥܶܠܕܒܳܒܰܘ̈ܗܝ ܠܳܐ ܢܩܽܘܡܽܘܢ.
12 ܘܰܠܒܶܢܝܳܡܶܝܢ ܐܶܡܰܪ. ܚܰܒܺܝܒܶܗ ܕܡܳܪܝܳܐ ܢܶܫܪܶܐ ܒܫܶܠܝܳܐ. ܘܰܥܠܰܘܗܝ ܢܪܰܚܶܦ ܟܽܠܶܗ ܝܰܘܡܳܐ. ܘܒܶܝܬ ܟܰܬܦ̈ܳܬܶܗ ܢܶܫܪܶܐ.
13 ܘܰܠܝܰܘܣܶܦ ܐܶܡܰܪ. ܡܒܰܪܰܟܬܳܐ ܗ̱ܝ ܕܡܳܪܝܳܐ ܐܰܪܥܶܗ ܒܠܶܒܳܐ. ܡܶܢ ܛܰܠܳܐ ܕܰܫܡܰܝܳܐ ܡܶܢ ܠܥܶܠ. ܘܡܶܢ ܬܗܽܘܡܳܐ ܕܰܪܒܺܝܥܳܐ ܡܶܢ ܠܬܰܚܬ.
14 ܘܡܶܢ ܐܶܒܳܐ ܕܥܰܠ̈ܠܳܬܳܐ ܕܫܶܡܫܳܐ. ܘܡܶܢ ܐܶܒܳܐ ܕܡܰܘܥܶܐ ܣܰܗܪܳܐ.
15 ܘܡܶܢ ܪܺܝܫ ܛܽܘܖ̈ܰܝ ܡܰܕܢܚܳܐ. ܘܡܶܢ ܐܶܒܳܐ ܕܖ̈ܳܡܳܬܳܐ ܕܥܳܠܰܡ.
16 ܘܡܶܢ ܐܶܒܳܐ ܕܰܐܪܥܳܐ ܒܰܡܠܳܐܳܗ̇. ܘܨܶܒܝܳܢܶܗ ܕܡܰܢ ܕܰܫܪܳܐ ܒܣܰܢܝܳܐ. ܢܺܐܬܝ̈ܳܢ ܥܰܠ ܪܺܝܫܶܗ ܕܝܰܘܣܶܦ ܘܥܰܠ ܪܺܝܫ ܟܠܺܝܠܳܐ ܕܰܐܚܰܘ̈ܗܝ.
17 ܒܽܘܟܪܳܐ ܕܬܰܘܖ̈ܶܐ ܗܶܕܪܳܐ ܠܶܗ. ܘܩܰܖ̈ܢܳܬܳܐ ܕܪܰܝܡܳܐ ܩܰܖ̈ܢܳܬܶܗ. ܒܗܶܝܢ ܢܕܰܩܰܪ ܥܰܡ̈ܡܶܐ ܐܰܟܚܕܳܐ ܥܕܰܡܳܐ ܠܥܶܒܖ̈ܶܝܗ̇ ܕܰܐܪܥܳܐ. ܗܳܠܶܝܢ ܖ̈ܶܒܘܳܬܳܐ ܕܰܐܦܪܶܝܡ. ܘܗܳܠܶܝܢ ܐܰܠܦ̈ܶܐ ܕܰܡܢܰܫܶܐ.
18 ܘܠܰܙܒܽܘܠܽܘܢ ܐܶܡܰܪ. ܚܕܺܝ ܙܒܽܘܠܽܘܢ ܒܡܰܦܩܳܟ. ܘܺܐܝܣܳܟܳܪ ܒܡܰܫ̈ܟܢܰܝܟ.
19 ܥܰܡ̈ܡܶܐ ܠܛܽܘܪܳܐ ܢܶܩܪܽܘܢ. ܘܬܰܡܳܢ ܢܶܕܒܚܽܘܢ ܕܶܒܚ̈ܶܐ ܕܙܰܕܺܝܩܽܘܬܳܐ. ܡܶܛܽܠ ܕܫܶܦܥܳܐ ܕܝܰܡ̈ܡܶܐ ܢܶܐܢܩܽܘܢ. ܘܶܐܠܦ̈ܶܐ ܕܰܛܡܺܝܖ̈ܳܢ ܒܚܳܠܳܐ.
20 ܘܰܠܓܳܕ ܐܶܡܰܪ. ܒܪܺܝܟ ܡܰܢ ܕܰܐܪܘܰܚ ܠܓܳܕ. ܐܰܝܟ ܐܰܪܝܳܐ ܫܪܶܐ. ܘܰܬܒܰܪ ܕܪܳܥܳܐ ܥܰܡ ܪܺܝܫܳܐ.
21 ܘܰܚܙܳܐ ܩܰܕܡܳܝܰܬ ܠܶܗ. ܡܶܛܽܠ ܕܬܰܡܳܢ ܛܡܺܝܪܳܐ ܦܳܠܓܽܘܬܶܗ ܕܰܡܒܰܕܩܳܢܳܐ. ܕܢܳܦܶܩ ܗܘܳܐ ܒܪܺܝܫܶܗ ܕܥܰܡܳܐ. ܙܰܕܺܝܩܽܘܬܶܗ ܕܡܳܪܝܳܐ ܥܒܰܕ. ܘܕܺܝܢܰܘ̈ܗܝ ܥܰܡ ܝܺܣܪܳܐܶܝܠ.
22 ܘܰܠܕܳܢ ܐܶܡܰܪ. ܕܳܢ ܓܽܘܪܝܳܐ ܕܰܐܪܝܳܐ ܕܝܳܢܶܩ ܡܶܢ ܡܰܬܢܺܝܢ.
23 ܘܰܠܢܰܦܬܳܠܺܝ ܐܶܡܰܪ. ܢܰܦܬܳܠܺܝ ܣܒܰܥ ܨܶܒܝܳܢܳܐ. ܘܰܡܠܶܐ ܒܽܘܪܟܬܶܗ ܕܡܳܪܝܳܐ. ܠܡܰܥܪܒܳܐ ܘܰܠܬܰܝܡܢܳܐ ܢܺܐܪܰܬ.
24 ܘܠܳܐܫܺܝܪ ܐܶܡܰܪ. ܒܪܺܝܟ ܡܶܢ ܒܢܰܝ̈ܳܐ ܐܳܫܺܝܪ. ܢܶܗܘܶܐ ܨܶܒܝܳܢܳܐ ܠܰܐܚܰܘ̈ܗܝ. ܘܰܢܨܰܒܰܥ ܒܡܶܫܚܳܐ ܪܶܓܠܶܗ.
25 ܦܰܪܙܠܳܐ ܘܰܢܚܳܫܳܐ ܡܣܳܢܳܟ. ܘܰܐܝܟ ܝܰܘ̈ܡܳܬܳܟ ܥܽܘܫܢܳܟ.
26 ܠܰܝܬ ܐܰܝܟ ܐܰܠܳܗܳܐ ܕܺܝܣܪܳܐܶܝܠ. ܕܡܰܪܟܰܒܬܶܗ ܒܰܫܡܰܝܳܐ ܒܥܶܕܪܳܟ. ܘܰܒܓܰܐܝܽܘܬܶܗ.
27 ܒܰܫ̈ܡܰܝ ܫܡܰܝܳܐ ܡܰܥܡܪܶܗ ܕܰܐܠܳܗܰܢ ܡܶܢ ܩܕܺܝܡ. ܘܰܠܬܰܚܬ ܙܪܰܥ ܥܳܠܡܳܐ. ܘܢܰܘܒܶܕ ܡܶܢ ܩܕܳܡܰܝܟ ܒܥܶܠܕܒܳܒܳܐ ܕܶܐܡܰܪ ܐܰܘܒܶܕ.
28 ܘܢܶܫܪܶܐ ܝܺܣܪܳܐܶܝܠ ܒܫܶܠܝܳܐ ܒܰܠܚܽܘܕܰܘܗܝ. ܡܰܒܽܘܥܶܗ ܕܝܰܥܩܽܘܒ ܒܰܐܪܥܳܐ ܕܰܥܒܽܘܪܳܐ. ܘܰܕܚܰܡܪܳܐ. ܘܰܕܡܶܫܚܳܐ. ܘܳܐܦ ܫܡܰܝܳܐ ܢܶܪܣܽܘܢ ܛܰܠܳܐ.
29 ܛܽܘܒܰܝܟ ܝܺܣܪܳܐܶܝܠ ܡܰܢܽܘ ܐܰܟܘܳܬܳܟ. ܥܰܡܳܐ ܕܦܽܘܪܩܳܢܶܗ ܒܡܳܪܝܳܐ ܡܣܰܝܰܥ. ܥܶܕܪܳܟ ܐܰܠܳܗܳܐ ܘܠܳܐ ܗܘܳܐ ܒܣܰܦܣܺܪܳܐ ܫܽܘܒܗܳܪܳܟ. ܢܶܬܟܰܕܒܽܘܢ ܠܳܟ ܒܥܶܠܕܒܳܒܰܝ̈ܟ. ܘܰܐܢ̱ܬ ܥܰܠ ܩܕܳܠܗܽܘܢ ܬܶܕܪܽܘܟ.