Deuteronomy 17
The Book of Deuteronomy
܀ ܬܢܝܢ ܢܡܘܣܐ ܝܙ ܀
1 ܠܳܐ ܬܶܟܽܘܣ ܠܡܳܪܝܳܐ ܐܰܠܳܗܳܟ. ܬܰܘܪܳܐ ܐܰܘ ܐܶܡܪܳܐ ܕܺܐܝܬ ܒܶܗ ܡܽܘܡܳܐ. ܟܽܠ ܡܶܕܶܡ ܕܰܣܢܶܐ. ܡܶܛܽܠ ܕܰܛܡܰܐ ܗܽܘ ܩܕܳܡ ܡܳܪܝܳܐ ܐܰܠܳܗܳܟ.
2 ܘܶܐܢ ܢܶܫܬܟܰܚ ܒܰܝܢܳܬܟܽܘܢ ܒܰܚܕܳܐ ܡܶܢ ܩܽܘܖ̈ܝܟܽܘܢ ܕܝܳܗܶܒ ܠܟܽܘܢ ܡܳܪܝܳܐ ܐܰܠܳܗܟܽܘܢ. ܓܰܒܪܳܐ ܐܰܘ ܐܰܢ̱ܬܬܳܐ. ܕܢܶܥܒܶܕ ܕܒܺܝܫ ܩܕܳܡ ܡܳܪܝܳܐ ܐܰܠܳܗܳܟ. ܘܢܶܥܒܰܪ ܥܰܠ ܩܝܳܡܶܗ.
3 ܘܢܺܐܙܰܠ ܘܢܶܦܠܽܘܚ ܠܰܐܠܳܗ̈ܶܐ ܐ̱ܚܖ̈ܳܢܶܐ. ܘܢܶܣܓܽܘܕ ܠܗܽܘܢ. ܐܰܘ ܠܫܶܡܫܳܐ. ܐܰܘ ܠܣܰܗܪܳܐ. ܐܰܘ ܠܟܽܠ ܚܰܝ̈ܠܰܘܳܬܳܐ ܕܰܫܡܰܝܳܐ ܕܠܳܐ ܦܰܩܕܶܬ.
4 ܘܰܢܚܰܘܢܳܟ. ܘܬܶܫܡܰܥ. ܘܰܬܥܰܩܶܒ ܫܰܦܺܝܪ ܐܶܢ ܫܰܪܺܝܪܳܐ ܗ̱ܝ ܡܶܠܬܳܐ. ܘܶܐܬܥܰܒܕܰܬ ܗܳܕܶܐ ܛܰܢܦܽܘܬܳܐ ܒܺܝܣܪܳܐܶܝܠ.
5 ܐܰܦܶܩܳܝܗܝ ܠܓܰܒܪܳܐ ܗܰܘ. ܐܰܘ ܠܰܐܢ̱ܬܬܳܐ ܗܳܝ. ܕܰܥܒܰܕܘ ܦܶܬܓܳܡܳܐ ܗܳܢܳܐ ܒܺܝܫܳܐ ܒܩܽܘܖ̈ܝܳܟ. ܐܶܢ ܓܰܒܪܰܐ ܗ̱ܘ ܐܰܘ ܐܰܢ̱ܬܬܳܐ. ܘܰܪܓܽܘܡܘ ܐܶܢܽܘܢ ܒܟܺܐܦ̈ܶܐ. ܘܰܢܡܽܘܬܽܘܢ.
6 ܥܰܠ ܦܽܘܡ ܬܪܶܝܢ ܣܳܗܕܺܝ̈ܢ. ܐܰܘ ܥܰܠ ܦܽܘܡ ܬܠܳܬܳܐ ܣܳܗ̈ܕܺܝܢ. ܢܶܬܩܛܶܠ ܡܰܢ ܕܚܰܝܳܒ ܡܰܘܬܳܐ. ܠܳܐ ܢܶܬܩܛܶܠ ܥܰܠ ܦܽܘܡܳܐ ܕܣܳܗܕܳܐ ܚܰܕ.
7 ܘܺܐܝܕܳܐ ܕܣܳܗ̈ܕܶܐ ܬܫܰܪܶܐ ܒܶܗ ܒܩܰܕܡܳܝܬܳܐ ܠܡܶܩܛܠܶܗ. ܘܺܐܝܕܳܐ ܕܟܽܠܶܗ ܥܰܡܳܐ ܒܰܐ̱ܚܪܳܝܬܳܐ. ܘܰܐܘܒܶܕܘ ܥܳܒܕܰܝ̈ ܒܺܝ̈ܫܳܬܳܐ ܡܶܢ ܒܰܝܢܳܬܟܽܘܢ.
8 ܘܟܰܕ ܢܶܬܟܰܣܶܐ ܡܶܢܟܽܘܢ ܦܶܬܓܳܡܳܐ ܕܕܺܝܢܳܐ. ܒܶܝܬ ܕܡܳܐ ܠܰܕܡܳܐ. ܘܒܶܝܬ ܕܺܝܢܳܐ ܠܕܺܝܢܳܐ. ܘܒܶܝܬ ܡܚܽܘܬܳܐ ܕܓܰܪܒܳܐ ܠܒܶܝܬ ܡܚܽܘܬܳܐ ܕܓܰܪܒܳܐ. ܦܶܬܓܳܡܳܐ ܕܚܶܪܝܳܢܳܐ ܒܩܽܘܖ̈ܝܟܽܘܢ. ܬܩܽܘܡ ܘܬܺܐܙܰܠ ܠܰܐܬܪܳܐ ܕܢܶܓܒܶܐ ܠܶܗ ܡܳܪܝܳܐ ܐܰܠܳܗܳܟ.
9 ܘܬܺܐܙܰܠ ܠܘܳܬ ܟܳܗܢܳܐ. ܐܰܘ ܠܘܳܬ ܠܶܘܳܝܳܐ. ܐܰܘ ܠܘܳܬ ܕܰܝܳܢܳܐ ܕܢܶܗܘܶܐ ܒܝܰܘ̈ܡܳܬܳܐ ܗܳܢܽܘܢ. ܘܰܬܫܰܐܶܠ. ܘܰܢܚܰܘܢܳܟ ܦܶܬܓܳܡܳܐ ܕܕܺܝܢܳܐ.
10 ܘܬܶܥܒܶܕ ܡܶܢ ܦܽܘܡ ܦܶܬܓܳܡܳܐ ܕܰܢܚܰܘܢܳܟ ܡܶܢ ܐܰܬܪܳܐ ܗܰܘ. ܐܰܝܟ ܕܶܐܡܰܪ ܡܳܪܝܳܐ. ܘܬܶܛܰܪ ܘܬܶܥܒܶܕ ܐܰܝܟ ܕܢܰܠܦܽܘܢܳܟ.
11 ܡܶܢ ܦܽܘܡ ܢܳܡܽܘܣܳܐ ܕܰܢܚܰܘܢܳܟ. ܘܡܶܢ ܦܽܘܡ ܕܺܝܢܳܐ ܕܢܺܐܡܪܽܘܢ ܠܳܟ ܬܶܥܒܶܕ. ܘܠܳܐ ܬܶܣܛܶܐ ܡܶܢ ܦܽܘܡ ܦܶܬܓܳܡܳܐ ܕܰܢܚܰܘܢܳܟ. ܠܳܐ ܠܝܰܡܺܝܢܳܐ ܘܠܳܐ ܠܣܶܡܳܠܳܐ.
12 ܘܓܰܒܪܳܐ ܕܢܶܥܒܶܕ ܒܡܰܪܳܚܽܘܬܳܐ. ܘܠܳܐ ܢܶܫܡܰܥ ܠܟܳܗܢܳܐ ܕܩܳܐܶܡ ܠܰܡܫܰܡܳܫܽܘ ܬܰܡܳܢ ܩܕܳܡ ܡܳܪܝܳܐ ܐܰܠܳܗܳܟ. ܐܰܘ ܠܕܰܝܳܢܳܐ. ܢܶܬܩܛܶܠ ܓܰܒܪܳܐ ܗܰܘ. ܘܰܐܘܒܶܕܘ ܥܳܒܕܰܝ̈ ܒܺܝ̈ܫܳܬܳܐ ܡܶܢ ܒܰܝܢܳܬܟܽܘܢ.
13 ܘܟܽܠܶܗ ܥܰܡܳܐ ܢܶܫܡܥܽܘܢ ܘܢܶܕܚܠܽܘܢ. ܘܬܽܘܒ ܠܳܐ ܢܰܡܪܚܽܘܢ.
14 ܘܟܰܕ ܬܶܥܽܘܠ ܠܰܐܪܥܳܐ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ. ܘܬܺܐܪܬܺܝܗ̇ ܘܬܶܬܶܒ ܒܳܗ̇. ܘܬܺܐܡܰܪ ܐܰܩܺܝܡ ܥܠܰܝ ܡܰܠܟܳܐ ܗܳܠܶܝܢ ܥܰܡ̈ܡܶܐ ܕܒܰܚܕܳܖ̈ܰܝ.
15 ܡܩܳܡܽܘ ܐܰܩܺܝܡ ܥܠܰܝܟ ܡܰܠܟܳܐ ܐܰܝܢܳܐ ܕܓܳܒܶܐ ܠܶܗ ܡܳܪܝܳܐ ܐܰܠܳܗܳܟ. ܡܶܢ ܒܰܝܢܳܬ ܐܰܚܰܝ̈ܟ ܐܰܩܺܝܡ ܥܠܰܝܟ ܡܰܠܟܳܐ. ܠܳܐ ܫܰܠܺܝܛ ܠܳܟ ܕܰܬܩܺܝܡ ܥܠܰܝܟ ܓܰܒܪܳܐ ܢܽܘܟܪܳܝܳܐ ܐܰܝܢܳܐ ܕܠܳܐ ܗܘܳܐ ܡܶܢ ܐܰܚܰܝ̈ܟ.
16 ܒܰܠܚܽܘܕ ܕܶܝܢ ܠܳܐ ܢܶܣܓܶܐ ܠܶܗ ܖ̈ܰܟܫܳܐ. ܕܠܳܐ ܢܰܗܦܟܺܝܘܗܝ ܠܥܰܡܳܐ ܠܡܶܨܪܶܝܢ ܟܰܕ ܢܶܣܓܽܘܢ ܠܶܗ ܖ̈ܰܟܫܳܐ. ܘܡܳܪܝܳܐ ܐܶܡܰܪ ܠܟܽܘܢ. ܠܳܐ ܬܰܘܣܦܽܘܢ ܬܽܘܒ ܠܡܶܗܦܰܟ ܒܽܐܘܪܚܳܐ ܗܳܕܶܐ.
17 ܘܠܳܐ ܢܰܣܓܶܐ ܠܶܗ ܢܶܫ̈ܶܐ ܕܠܳܐ ܢܰܣ̈ܛܝܳܢ ܠܶܒܶܗ. ܘܣܺܐܡܳܐ ܘܕܰܗܒܳܐ ܠܳܐ ܢܰܣܓܶܐ ܠܶܗ ܛܳܒ.
18 ܘܡܳܐ ܕܝܳܬܶܒ ܥܰܠ ܟܽܘܪܣܝܳܐ ܕܡܰܠܟܽܘܬܶܗ. ܢܶܟܬܽܘܒ ܠܶܗ ܦܰܪܫܰܓܢܶܗ ܕܢܳܡܽܘܣܳܐ ܗܳܢܳܐ ܒܣܶܦܪܳܐ. ܡܶܢ ܩܕܳܡ ܟܳܗܢܳܐ ܘܠܶܘܳܝܳܐ.
19 ܘܢܶܗܘܶܐ ܥܰܡܶܗ. ܘܢܶܗܘܶܐ ܩܳܪܶܐ ܒܶܗ ܟܽܠ ܝܰܘ̈ܡܰܝ ܚܰܝܰܘ̈ܗܝ. ܕܢܺܐܠܰܦ ܠܡܶܕܚܰܠ ܡܶܢ ܩܕܳܡ ܡܳܪܝܳܐ ܐܰܠܳܗܶܗ. ܘܢܶܛܰܪ ܟܽܠܗܽܘܢ ܦܶܬܓܳܡܰܘ̈ܗܝ ܕܢܳܡܽܘܣܳܐ ܗܳܢܳܐ ܘܦܽܘܩ̈ܕܳܢܶܐ ܗܳܠܶܝܢ. ܘܢܶܥܒܶܕ ܐܶܢܽܘܢ.
20 ܕܠܳܐ ܢܶܬܬܪܺܝܡ ܠܶܒܶܗ ܡܶܢ ܐܰܚܰܘ̈ܗܝ. ܘܠܳܐ ܢܶܣܛܶܐ ܡܶܢ ܦܽܘܩ̈ܕܳܢܶܐ ܠܳܐ ܠܝܰܡܺܝܢܳܐ ܘܠܳܐ ܠܣܶܡܳܠܳܐ. ܕܢܰܣܓܶܐ ܝܰܘ̈ܡܳܬܳܐ ܕܡܰܠܟܽܘܬܶܗ ܗܽܘ ܘܰܒܢܰܘ̈ܗܝ ܒܰܝܢܳܬ ܒܢܰܝ̈ ܝܺܣܪܳܐܶܝܠ.