Deuteronomy 18
The Book of Deuteronomy
܀ ܬܢܝܢ ܢܡܘܣܐ ܝܚ ܀
1 ܠܳܐ ܬܶܗܘܶܐ ܠܟܳܗܢܳܐ ܘܰܠܠܶܘܳܝܳܐ ܦܳܠܓܽܘܬܳܐ ܘܝܳܪܬܽܘܬܳܐ ܒܰܝܢܳܬ ܒܢܰܝ̈ ܝܺܣܪܳܐܶܝܠ. ܐܶܠܳܐ ܩܽܘܖ̈ܒܳܢܰܘܗܝ ܕܡܳܪܝܳܐ ܘܝܳܪܬܽܘܬܶܗ ܢܶܐܟܠܽܘܢ.
2 ܘܝܳܪܬܽܘܬܳܐ ܠܳܐ ܬܶܗܘܶܐ ܠܶܗ ܒܰܝܢܳܬ ܐܰܚܰܘ̈ܗܝ. ܡܳܪܝܳܐ ܗܽܘ ܓܶܝܪ ܝܳܪܬܽܘܬܶܗ ܐܰܝܟ ܕܶܐܡܰܪ ܠܶܗ.
3 ܘܗܳܢܳܐ ܢܶܗܘܶܐ ܙܶܕܩܶܗ ܕܟܳܗܢܳܐ ܡܶܢ ܥܰܡܳܐ ܡܶܢ ܢܳܟܣܰܝ̈ ܢܶܟܣܬܳܐ. ܐܶܢ ܬܰܘܪܳܐ ܗܽܘ ܐܰܘ ܐܶܡܪܳܐ. ܢܶܬܶܠ ܠܟܳܗܢܳܐ ܕܪܳܥܳܐ. ܘܦܰܟܳܐ. ܘܥܰܢܳܘܺܝܬܳܐ.
4 ܪܺܝܫ ܥܒܽܘܪܳܟ. ܘܚܰܡܪܳܟ. ܘܡܶܫܚܳܟ. ܘܪܺܝܫ ܓܶܙ̈ܶܐ ܕܥܳܢ̈ܳܟ ܗܰܒ ܠܶܗ.
5 ܡܶܛܽܠ ܕܠܶܗ ܓܒܳܐ ܡܳܪܝܳܐ ܐܰܠܳܗܳܟ ܡܶܢ ܟܽܠܗܽܘܢ ܫܰܒ̈ܛܰܝܟ. ܕܰܢܩܽܘܡ ܘܰܢܫܰܡܶܫ ܒܰܫܡܶܗ ܕܡܳܪܝܳܐ ܐܰܠܳܗܳܟ. ܗܽܘ ܘܰܒܢܰܘ̈ܗܝ. ܟܽܠܗܽܘܢ ܝܰܘ̈ܡܳܬܳܐ.
6 ܘܶܐܢ ܢܺܐܬܶܐ ܠܶܘܳܝܳܐ ܚܰܕ ܡܶܢ ܐܰܚܰܝ̈ܟ ܡܶܢ ܟܽܠܶܗ ܝܺܣܪܳܐܶܝܠ. ܡܶܢ ܐܰܬܰܪ ܕܥܳܡܰܪ. ܢܺܐܬܶܐ ܒܟܽܠ ܪܶܓܰܬ ܢܰܦܫܶܗ ܠܰܐܬܪܳܐ ܕܓܳܒܶܐ ܡܳܪܝܳܐ.
7 ܘܰܢܫܰܡܶܫ ܒܰܫܡܶܗ ܕܡܳܪܝܳܐ ܐܰܠܳܗܶܗ. ܐܰܝܟ ܟܽܠܗܽܘܢ ܐܰܚܰܘ̈ܗܝ ܠܶܘ̈ܳܝܶܐ ܕܩܳܝܡܺܝܢ ܬܰܡܳܢ ܩܕܳܡ ܡܳܪܝܳܐ.
8 ܡܢܳܬܳܐ ܫܰܘܝܳܐܺܝܬ ܢܶܐܟܠܽܘܢ ܣܛܰܪ ܡܶܢ ܙܶܒܢܳܐ ܕܰܐܒܳܗ̈ܶܐ.
9 ܘܡܳܐ ܕܥ̣ܰܠܬ ܠܰܐܪܥܳܐ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ. ܠܳܐ ܬܺܐܠܰܦ ܠܡܶܥܒܰܕ ܐܰܝܟ ܥܒܳܕܰܝ̈ܗܽܘܢ ܕܥܰܡ̈ܡܶܐ ܗܳܢܽܘܢ.
10 ܠܳܐ ܢܶܫܬܟܰܚ ܒܳܟ ܕܡܰܥܒܰܪ ܒܪܶܗ ܐܰܘ ܒܰܪܬܶܗ ܒܢܽܘܪܳܐ. ܐܰܘ ܕܩܳܨܶܡ ܩܶܨܡܳܐ. ܘܰܕܡܰܐܚܶܕ ܥܰܝ̈ܢܶܐ. ܘܕܰܡܢܰܚܶܫ. ܘܰܕܚܰܪܳܫ.
11 ܘܕܳܐܫܶܦ ܒܶܐܫܦܳܐ. ܘܰܕܫܳܐܶܠ ܡܶܢ ܙܰܟܽܘܖ̈ܶܐ. ܘܡܶܢ ܝܰܕܽܘ̈ܥܶܐ. ܘܫܳܐܶܠ ܠܡܺܝ̈ܬܶܐ.
12 ܡܶܛܽܠ ܕܰܛܡܰܐ ܗܽܘ ܩܕܳܡ ܡܳܪܝܳܐ ܐܰܠܳܗܳܟ ܟܽܠܡܰܢ ܕܥܳܒܶܕ ܗܳܠܶܝܢ. ܘܡܶܛܽܠ ܛܰܢ̈ܦܘܳܬܳܐ ܗܳܠܶܝܢ ܡܰܘܒܶܕ ܠܗܽܘܢ ܡܳܪܝܳܐ ܐܰܠܳܗܳܟ ܡܶܢ ܩܕܳܡܰܝܟ.
13 ܗܘܰܝܬ ܬܰܡܺܝܡ ܩܕܳܡ ܡܳܪܝܳܐ ܐܰܠܳܗܳܟ.
14 ܡܶܛܽܠ ܕܥܰܡ̈ܡܶܐ ܗܳܠܶܝܢ ܕܝܳܪܶܬ ܐܰܢ̱ܬ ܠܗܽܘܢ. ܠܙܰܟܽܘܖ̈ܶܐ ܘܰܠܩܳܨܽܘܡ̈ܶܐ ܫܳܡܥܺܝܢ. ܐܰܢ̱ܬ ܕܶܝܢ ܠܳܐ ܗܘܳܐ ܗܳܟܰܢܳܐ ܝܳܗܶܒ ܠܳܟ ܡܳܪܝܳܐ ܐܰܠܳܗܳܟ.
15 ܢܒܺܝܳܐ ܡܶܢ ܓܰܘܳܟ ܘܡܶܢ ܐܰܚܰܝ̈ܟ ܐܰܟܘܳܬܝ ܢܩܺܝܡ ܠܳܟ ܡܳܪܝܳܐ ܐܰܠܳܗܳܟ. ܠܶܗ ܗܘܰܝܬܽܘܢ ܫܳܡܥܺܝܢ.
16 ܐܰܝܟ ܕܰܫܐܶܠܬ ܡܶܢ ܩܕܳܡ ܡܳܪܝܳܐ ܐܰܠܳܗܳܟ ܒܚܽܘܪܺܝܒ ܒܝܰܘܡܳܐ ܕܰܟܢܽܘܫܝܳܐ. ܘܶܐܡܰܪܬ. ܠܳܐ ܐܰܘܣܶܦ ܠܡܶܫܡܰܥ ܩܳܠܶܗ ܕܡܳܪܝܳܐ ܐܰܠܳܗܝ. ܘܗܳܕܶܐ ܢܽܘܪܳܐ ܪܰܒܬܳܐ ܬܽܘܒ ܠܳܐ ܐܶܚܙܶܐ ܕܠܳܐ ܐܶܡܽܘܬ.
17 ܘܶܐܡܰܪ ܠܺܝ ܡܳܪܝܳܐ. ܫܰܦܺܝܪ ܟܽܠܡܶܕܶܡ ܕܡܰܠܶܠܘ.
18 ܢܒܺܝܳܐ ܐܰܩܺܝܡ ܠܗܽܘܢ ܡܶܢ ܓܰܘ ܐܰܚܰܝ̈ܗܽܘܢ ܐܰܟܘܳܬܳܟ ܘܶܐܬܶܠ ܦܶܬܓܳܡܰܝ̈ ܒܦܽܘܡܶܗ. ܘܢܺܐܡܰܪ ܠܗܽܘܢ ܟܽܠܡܶܕܶܡ ܕܶܐܦܰܩܕܺܝܘܗܝ.
19 ܘܓܰܒܪܳܐ ܕܠܳܐ ܢܶܫܡܰܥ ܠܦܶܬܓܳܡܰܝ̈ ܕܰܢܡܰܠܶܠ ܒܫܶܡܝ. ܐܶܢܳܐ ܐܶܬܒܰܥ ܡܶܢܶܗ.
20 ܒܪܰܡ ܕܶܝܢ ܢܒܺܝܳܐ ܕܢܰܡܪܰܚ ܠܰܡܡܰܠܳܠܽܘ ܡܶܠܬܳܐ ܒܫܶܡܝ. ܕܠܳܐ ܦܰܩܶܕܬܶܗ ܠܡܺܐܡܰܪ. ܘܕܰܢܡܰܠܶܠ ܒܫܶܡ ܐܰܠܳܗ̈ܶܐ ܐ̱ܚܖ̈ܳܢܶܐ. ܢܶܬܩܛܶܠ ܢܒܺܝܳܐ ܗܰܘ.
21 ܘܶܐܢ ܬܺܐܡܰܪ ܒܠܶܒܳܟ ܐܰܝܟܰܢܳܐ ܐܶܕܥܺܝܘܗܝ ܠܦܶܬܓܳܡܳܐ ܕܠܳܐ ܐܰܡܪܶܗ ܡܳܪܝܳܐ.
22 ܡܳܐ ܕܡܰܠܶܠ ܢܒܺܝܳܐ ܒܰܫܡܶܗ ܕܡܳܪܝܳܐ. ܘܠܳܐ ܗܘܳܐ ܦܶܬܓܳܡܳܐ ܗܰܘ. ܘܠܳܐ ܐܶܬܳܐ. ܗܽܘ ܗܰܘ ܦܶܬܓܳܡܳܐ ܠܳܐ ܡܰܠܶܠ ܡܳܪܝܳܐ. ܒܡܰܪܳܚܽܘܬܳܐ ܡܰܠܶܠܗ ܢܒܺܝܳܐ. ܠܳܐ ܬܶܕܚܠܽܘܢ ܡܶܢܶܗ.