Deuteronomy 12
The Book of Deuteronomy
܀ ܬܢܝܢ ܢܡܘܣܐ ܝܒ ܀
1 ܗܳܠܶܝܢ ܢܳܡܽܘܣ̈ܶܐ ܘܕܺܝܢ̈ܶܐ ܕܬܶܛܪܽܘܢ ܘܬܶܥܒܕܽܘܢ ܒܰܐܪܥܳܐ ܕܝܳܗܶܒ ܠܟܽܘܢ ܡܳܪܝܳܐ ܐܰܠܳܗܳܐ ܕܰܐܒܳܗܰܝ̈ܟܽܘܢ ܠܡܺܐܪܬܳܗ̇ ܟܽܠܗܽܘܢ ܝܰܘ̈ܡܳܬܳܐ ܕܚܰܝܺܝܢ ܐ̱ܢܬܽܘܢ ܒܰܐܪܥܳܐ.
2 ܐܰܘܒܶܕܘ ܟܽܠܗܽܘܢ ܐܰܬܖ̈ܰܘܳܬܳܐ. ܕܰܦܠܰܚܘ ܬܰܡܳܢ ܥܰܡ̈ܡܶܐ ܕܝܳܪܬܺܝܢ ܐ̱ܢܬܽܘܢ ܠܗܽܘܢ. ܘܠܰܐܠܳܗܰܝ̈ܗܽܘܢ. ܥܰܠ ܛܽܘܖ̈ܶܐ ܖ̈ܳܡܶܐ. ܘܥܰܠ ܖ̈ܳܡܳܬܳܐ. ܘܰܬܚܶܝܬ ܟܽܠ ܐܺܝܠܳܢ ܕܡܰܛܶܠ.
3 ܘܬܶܥܩܪܽܘܢ ܡܰܕܒܚܰܝ̈ܗܽܘܢ. ܘܬܶܬܒܪܽܘܢ ܩܳܝ̈ܡܳܬܗܽܘܢ. ܘܚܶܫ̈ܠܳܬܗܽܘܢ ܬܰܘܩܕܽܘܢ ܒܢܽܘܪܳܐ. ܘܰܐܠܳܗܰܝ̈ܗܽܘܢ ܓܠܺܝ̈ܦܶܐ ܬܶܬܒܪܽܘܢ. ܘܬܰܘܒܕܽܘܢ ܗܳܟܰܢܳܐ ܫܶܡܗܽܘܢ ܡܶܢ ܐܰܬܪܳܐ ܗܰܘ.
4 ܘܰܐܢ̱ܬܽܘܢ ܠܳܐ ܬܶܥܒܕܽܘܢ ܗܳܟܰܢܳܐ ܠܡܳܪܝܳܐ ܐܰܠܳܗܟܽܘܢ.
5 ܐܶܠܳܐ ܒܰܐܬܪܳܐ ܕܓܳܒܶܐ ܡܳܪܝܳܐ ܐܰܠܳܗܟܽܘܢ ܡܶܢ ܟܽܠ ܫܰܒܛܰܝ̈ܟܽܘܢ ܠܰܡܣܳܡ ܫܡܶܗ ܬܰܡܳܢ. ܠܒܶܝܬ ܡܰܫܪܝܶܗ ܗܘܰܝܬܽܘܢ ܡܥܰܩܒܺܝܢ. ܘܳܐܙܺܠܝܢ ܠܬܰܡܳܢ.
6 ܘܰܐܘܒܶܠܘ ܠܬܰܡܳܢ ܝܰܩܕܰܝ̈ܟܽܘܢ ܫܰܠ̈ܡܶܐ. ܘܕܶܒܚܰܝ̈ܟܽܘܢ. ܘܡܰܥܣܳܖ̈ܰܝܟܽܘܢ. ܘܦܽܘܖ̈ܫܳܢܶܐ ܕܺܐܝܕܰܝ̈ܟܽܘܢ. ܘܢܶܕܖ̈ܰܝܟܽܘܢ. ܘܩܽܘܖ̈ܒܢܰܝ̈ܟܽܘܢ. ܘܒܽܘܟܖ̈ܶܐ ܕܬܰܘܖ̈ܰܝܟܽܘܢ. ܘܰܕܥܳܢ̈ܟܽܘܢ.
7 ܘܰܐܟܽܘܠܘ ܬܰܡܳܢ ܩܕܳܡ ܡܳܪܝܳܐ ܐܰܠܳܗܟܽܘܢ. ܘܰܚܕܰܘ ܒܟܽܠܡܶܕܶܡ ܕܡܰܘܫܛܺܝܢ ܐ̱ܢܬܽܘܢ ܐܺܝܕܰܝ̈ܟܽܘܢ. ܐܰܢ̱ܬܽܘܢ ܘܐ̱ܢܳܫܰܝ̈ ܒܳܬܰܝ̈ܟܽܘܢ. ܕܰܢܒܰܪܶܟܟܽܘܢ ܡܳܪܝܳܐ ܐܰܠܳܗܟܽܘܢ.
8 ܠܳܐ ܬܶܥܒܕܽܘܢ ܐܰܝܟ ܕܥܳܒܕܺܝܢ ܚ̱ܢܰܢ ܗܳܪܟܳܐ ܝܰܘܡܳܢܳܐ. ܐ̱ܢܳܫ ܐܰܝܟ ܕܫܰܦܺܝܪ ܒܥܰܝܢܰܘ̈ܗܝ.
9 ܡܶܛܽܠ ܕܠܳܐ ܥܕܰܟܺܝܠ ܡܰܛܺܝܬܽܘܢ ܠܒܶܝܬ ܡܰܫܪܝܳܐ ܘܰܠܝܳܪܬܽܘܬܳܐ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ.
10 ܘܰܥܒܰܪܘ ܝܽܘܪܕܢܳܢ. ܘܬܶܒܘ ܒܰܐܪܥܳܐ ܕܡܰܘܪܶܬ ܠܟܽܘܢ ܡܳܪܝܳܐ ܐܰܠܳܗܟܽܘܢ. ܘܰܡܢܺܝܚ ܠܟܽܘܢ ܡܶܢ ܟܽܠܗܽܘܢ ܒܥܶܠܕܒܳܒܰܝ̈ܟܽܘܢ ܕܰܚܕܺܝܪܺܝܢ ܠܟܽܘܢ. ܘܬܶܒܘ ܒܣܰܒܪܳܐ.
11 ܘܰܐܬܪܳܐ ܕܢܶܓܒܶܐ ܡܳܪܝܳܐ ܐܰܠܳܗܟܽܘܢ ܕܢܰܫܪܶܐ ܒܶܗ ܫܡܶܗ. ܠܬܰܡܳܢ ܐܰܝܬܰܘ ܟܽܠܡܶܕܶܡ ܕܰܡܦܰܩܶܕ ܐ̱ܢܳܐ ܠܟܽܘܢ. ܝܰܩܕܰܝ̈ܟܽܘܢ ܫܰܠ̈ܡܶܐ. ܘܕܶܒܚܰܝ̈ܟܽܘܢ. ܘܡܰܥܣܳܖ̈ܰܝܟܽܘܢ. ܘܦܽܘܖ̈ܫܳܢܶܐ ܕܺܐܝܕܰܝ̈ܟܽܘܢ. ܘܟܽܠܶܗ ܓܶܒܝܳܐ ܕܢܶܕܖ̈ܰܝܟܽܘܢ ܕܢܳܕܪܺܝܢ ܐ̱ܢܬܽܘܢ ܠܡܳܪܝܳܐ.
12 ܘܰܚܕܰܘ ܩܕܳܡ ܡܳܪܝܳܐ ܐܰܠܳܗܟܽܘܢ. ܐܰܢ̱ܬܽܘܢ ܘܰܒܢܰܝ̈ܟܽܘܢ ܘܰܒ̈ܢܳܬܟܽܘܢ. ܘܥܰܒܕܰܝ̈ܟܽܘܢ ܘܰܐܡ̈ܗܳܬܟܽܘܢ. ܘܠܶܘ̈ܳܝܶܐ ܕܰܒܩܽܘܖ̈ܝܟܽܘܢ. ܡܶܛܽܠ ܕܠܰܝܬ ܠܗܽܘܢ ܝܳܪܬܽܘܬܳܐ ܘܦܳܠܓܽܘܬܳܐ ܥܰܡܟܽܘܢ.
13 ܐܶܙܕܰܗܪܘ ܕܠܳܐ ܬܰܣܶܩ ܝܰܩܕܰܝ̈ܟ ܫܰܠ̈ܡܶܐ ܒܟܽܠ ܐܰܬܰܪ ܕܨܳܒܶܐ ܐܰܢ̱ܬ.
14 ܐܶܠܳܐ ܐܶܢ ܒܰܐܬܪܳܐ ܕܢܶܓܒܶܐ ܡܳܪܝܳܐ ܒܚܰܕ ܡܶܢ ܫܰܒܛܰܝ̈ܟ. ܬܰܡܳܢ ܬܰܣܶܩ ܝܰܩ̈ܕܰܝܟ ܫܰܠ̈ܡܶܐ. ܘܬܰܡܳܢ ܬܶܥܒܶܕ ܟܽܠܡܶܕܶܡ ܕܰܡܦܰܩܶܕ ܐ̱ܢܳܐ ܠܳܟ.
15 ܒܰܠܚܽܘܕ ܒܟܽܠ ܪܶܓܬܳܐ ܕܢܰܦܫܳܟ ܟܽܘܣ ܘܰܐܟܽܘܠ ܒܶܣܪܳܐ. ܐܰܝܟ ܒܽܘܪܟܬܳܐ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ ܒܟܽܠܗܶܝܢ ܩܽܘܖ̈ܝܳܟ. ܕܰܛܡܰܐ ܘܕܰܕܟܶܐ ܢܶܐܟܠܽܘܢ. ܐܰܝܟ ܛܰܒܝܳܐ. ܘܰܐܝܟ ܐܰܝܠܳܐ.
16 ܒܰܠܚܽܘܕ ܕܡܳܐ ܠܳܐ ܬܶܐܟܠܽܘܢ. ܐܶܠܳܐ ܥܰܠ ܐܰܪܥܳܐ ܐܰܫܽܘܕܳܝܗܝ ܐܰܝܟ ܡܰܝ̈ܳܐ.
17 ܠܳܐ ܬܶܫܬܰܠܰܛ ܠܡܶܐܟܰܠ ܒܩܽܘܖ̈ܝܟܽܘܢ. ܡܰܥܣܳܖ̈ܶܐ ܕܰܥܒܽܘܪܟܽܘܢ. ܘܰܕܚܰܡܪܟܽܘܢ. ܘܰܕܡܶܫܚܟܽܘܢ. ܘܒܽܘܟܖ̈ܶܐ ܕܬܰܘܖ̈ܰܝܟܽܘܢ. ܘܰܕܥܳܢ̈ܟܽܘܢ. ܘܟܽܠ ܢܶܕܖ̈ܰܝܟܽܘܢ ܕܬܶܕܪܽܘܢ. ܘܩܽܘܖ̈ܒܳܢܰܝܟܽܘܢ. ܘܦܽܘܖ̈ܫܳܢܶܐ ܕܺܐܝܕܰܝ̈ܟܽܘܢ.
18 ܐܶܠܳܐ ܩܕܳܡ ܡܳܪܝܳܐ ܐܰܠܳܗܳܟ ܬܶܐܟܠܺܝܘܗܝ ܕܰܫܢܳܐ ܒܰܫܢܳܐ. ܒܰܐܬܪܳܐ ܕܢܶܓܒܶܐ ܠܶܗ ܡܳܪܝܳܐ ܐܰܠܳܗܳܟ. ܐܰܢ̱ܬ ܘܰܒܪܳܟ. ܘܒܰܪܬܳܟ. ܘܥܰܒܕܳܟ. ܘܰܐܡܬܳܟ. ܘܠܶܘܳܝܳܐ ܕܰܒܩܽܘܖ̈ܝܳܟ. ܘܬܶܚܕܶܐ ܩܕܳܡ ܡܳܪܝܳܐ ܐܰܠܳܗܳܟ. ܒܟܽܠܡܶܕܶܡ ܕܡܰܘܫܶܛ ܐܰܢ̱ܬ ܐܺܝܕܳܟ.
19 ܐܶܙܕܰܗܪ ܕܠܳܐ ܬܶܫܒܽܘܩ ܠܠܶܘܳܝܳܐ ܟܽܠܗܽܘܢ ܝܰܘ̈ܡܰܝܟ ܒܰܐܪܥܳܐ.
20 ܘܟܰܕ ܢܪܰܘܰܚ ܡܳܪܝܳܐ ܐܰܠܳܗܳܟ ܬܚܽܘܡܳܟ ܐܰܝܟ ܕܶܐܡܰܪ ܠܳܟ. ܘܬܺܐܡܰܪ ܐܶܟܽܘܠ ܒܶܣܪܳܐ. ܡܶܛܽܠ ܕܪܳܓܳܐ ܢܰܦܫܳܟ ܠܡܶܐܟܰܠ ܒܶܣܪܳܐ. ܒܟܽܠܗܶܝܢ ܖ̈ܓܺܝܓܳܬܳܐ ܕܢܰܦܫܳܟ ܬܶܐܟܽܘܠ ܒܶܣܪܳܐ.
21 ܘܶܐܢ ܪܰܚܺܝܩ ܗܽܘ ܡܶܢܳܟ ܐܰܬܪܳܐ ܕܢܶܓܒܶܐ ܡܳܪܝܳܐ ܐܰܠܳܗܳܟ ܕܰܢܣܺܝܡ ܫܡܶܗ ܬܰܡܳܢ. ܟܽܘܣ ܡܶܢ ܬܰܘܖ̈ܰܝܟ. ܘܡܶܢ ܥܳܢ̈ܳܟ. ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ ܐܰܝܟ ܕܦܰܩܕܳܟ. ܘܰܐܟܽܘܠ ܒܩܽܘܖ̈ܝܳܟ. ܒܟܽܠܗܶܝܢ ܖ̈ܓܺܝܓܳܬܳܐ ܕܢܰܦܫܳܟ.
22 ܒܪܰܡ ܕܶܝܢ ܐܰܝܟ ܕܡܶܬܐܟܶܠ ܛܰܒܝܳܐ ܘܰܐܝܠܳܐ. ܗܳܟܰܢܳܐ ܬܶܐܟܠܺܝܘܗܝ. ܕܰܛܡܰܐ ܘܕܰܕܟܶܐ ܐܰܟܚܕܳܐ ܬܶܐܟܠܽܘܢܶܗ.
23 ܒܰܠܚܽܘܕ ܐܶܬܚܰܝܰܠܘ ܕܠܳܐ ܬܶܐܟܠܽܘܢ ܕܡܳܐ. ܡܶܛܽܠ ܕܰܕܡܳܐ ܢܰܦܫܳܐ ܗܽܘ. ܠܳܐ ܬܶܐܟܽܘܠ ܢܰܦܫܳܐ ܥܰܡ ܒܶܣܪܳܐ.
24 ܠܳܐ ܬܶܐܟܠܺܝܘܗܝ. ܐܶܠܳܐ ܐܰܫܽܘܕܳܝܗܝ ܥܰܠ ܐܰܪܥܳܐ ܐܰܝܟ ܡܰܝ̈ܳܐ.
25 ܠܳܐ ܬܶܐܟܠܺܝܘܗܝ. ܕܢܰܛܐܶܒ ܠܳܟ ܘܠܰܒܢܰܝ̈ܟ ܡܶܢ ܒܳܬܪܳܟ. ܟܰܕ ܬܶܥܒܶܕ ܕܫܰܦܺܝܪ ܩܕܳܡ ܡܳܪܝܳܐ ܐܰܠܳܗܳܟ.
26 ܒܰܠܚܽܘܕ ܩܽܘܕܫܰܝ̈ܟ ܕܢܶܗܘܽܘܢ ܠܳܟ. ܘܢܶܕܖ̈ܰܝܟ. ܫܩܽܘܠ ܘܬܳܐ ܠܰܐܬܪܳܐ ܕܢܶܓܒܶܐ ܡܳܪܝܳܐ.
27 ܘܰܥܒܶܕ ܝܰܩܕܳܟ ܫܰܠܡܳܐ ܒܶܣܪܳܐ ܘܰܕܡܳܐ ܥܰܠ ܡܰܕܒܚܶܗ ܕܡܳܪܝܳܐ ܐܰܠܳܗܳܟ. ܘܰܕܡܳܐ ܕܕܶܒܚܰܝ̈ܟ ܢܶܬܐܫܶܕ ܥܰܠ ܡܰܕܒܚܶܗ ܕܡܳܪܝܳܐ ܐܰܠܳܗܳܟ. ܘܒܶܣܪܳܐ ܐܰܟܽܘܠ.
28 ܛܰܪ ܘܰܫܡܰܥ ܗܳܠܶܝܢ ܟܽܠܗܽܘܢ ܦܽܘܩ̈ܕܳܢܶܐ ܕܰܡܦܰܩܶܕ ܐ̱ܢܳܐ ܠܳܟ ܝܰܘܡܳܢܳܐ. ܕܢܰܛܐܶܒ ܠܳܟ ܘܠܰܒܢܰܝ̈ܟ ܡܶܢ ܒܳܬܪܳܟ ܠܥܳܠܰܡ. ܟܰܕ ܬܶܥܒܶܕ ܕܛܳܒ ܘܰܕܫܰܦܺܝܪ ܩܕܳܡ ܡܳܪܝܳܐ ܐܰܠܳܗܳܟ.
29 ܘܟܰܕ ܢܰܘܒܶܕ ܡܳܪܝܳܐ ܐܰܠܳܗܳܟ ܥܰܡ̈ܡܶܐ ܕܳܐܙܶܠ ܐܰܢ̱ܬ ܠܘܳܬܗܽܘܢ. ܘܢܰܘܒܶܕ ܐܶܢܽܘܢ ܡܶܢ ܩܕܳܡܰܝܟ. ܘܬܺܐܪܰܬ ܐܶܢܽܘܢ ܘܬܶܬܶܒ ܒܰܐܪܥܗܽܘܢ .
30 ܐܶܙܕܰܗܪ ܕܠܳܐ ܬܶܛܥܶܐ ܒܳܬܰܪܗܽܘܢ. ܡܶܢ ܒܳܬܰܪ ܕܡܰܘܒܶܕ ܠܗܽܘܢ ܡܳܪܝܳܐ ܡܶܢ ܩܕܳܡܰܝܟ. ܘܠܳܐ ܬܫܰܐܶܠ ܥܰܠ ܐܰܠܳܗܰܝ̈ܗܽܘܢ. ܘܬܺܐܡܰܪ ܐܰܝܟܰܢܳܐ ܦܳܠܚܺܝܢ ܗܘܰܘ ܥܰܡ̈ܡܶܐ ܗܳܠܶܝܢ ܠܰܐܠܳܗܰܝ̈ܗܽܘܢ. ܕܶܐܥܒܶܕ ܐܳܦ ܐܶܢܳܐ ܐܰܟܘܳܬܗܽܘܢ.
31 ܐܰܢ̱ܬ ܕܶܝܢ ܠܳܐ ܬܶܥܒܶܕ ܗܳܟܰܢܳܐ ܠܡܳܪܝܳܐ ܐܰܠܳܗܳܟ. ܡܶܛܽܠ ܕܟܽܠ ܕܰܣܢܳܐ ܘܰܐܣܠܺܝ ܡܳܪܝܳܐ ܥܒܰܕܘ ܠܰܐܠܳܗܰܝ̈ܗܽܘܢ. ܘܳܐܦ ܒܢܰܝ̈ܗܽܘܢ ܘܰܒ̈ܢܳܬܗܽܘܢ ܐܰܘܩܶܕܘ ܒܢܽܘܪܳܐ ܠܰܐܠܳܗܰܝ̈ܗܽܘܢ.
32 ܟܽܠ ܦܶܬܓܳܡܳܐ ܕܰܡܦܰܩܶܕ ܐ̱ܢܳܐ ܠܳܟ. ܠܶܗ ܛܰܪ ܘܰܥܒܶܕ. ܠܳܐ ܬܰܘܣܶܦ ܥܠܰܘܗܝ. ܘܠܳܐ ܬܒܰܨܰܪ ܡܶܢܶܗ.