Deuteronomy 24
The Book of Deuteronomy
܀ ܬܢܝܢ ܢܡܘܣܐ ܟܕ ܀
1 ܘܶܐܢ ܢܶܣܰܒ ܓܰܒܪܳܐ ܐܰܢ̱ܬܬܳܐ. ܘܢܶܕܡܰܟ ܥܰܡܳܗ̇. ܐܶܢ ܠܳܐ ܐܶܫܟܚܰܬ ܖ̈ܰܚܡܶܐ ܩܕܳܡܰܘܗܝ ܥܰܠ ܕܶܐܫܟܰܚ ܒܳܗ̇ ܨܒܽܘܬܳܐ ܕܰܡܦܰܪܣܝܳܐ. ܢܶܟܬܽܘܒ ܠܳܗ̇ ܟܬܳܒܳܐ ܕܫܽܘܒܩܳܢܳܐ. ܘܢܶܬܶܠ ܠܳܗ̇ ܘܢܶܫܪܶܝܗ̇.
2 ܘܬܶܦܽܘܩ ܡܶܢ ܒܰܝܬܶܗ. ܘܶܐܢ ܬܺܐܙܰܠ ܘܬܶܗܘܶܐ ܠܓܰܒܪܳܐ ܐ̱ܚܪܺܢܳܐ. ܘܢܶܣܢܶܝܗ̇ ܓܰܒܪܳܐ ܐ̱ܚܪܺܢܳܐ.
3 ܘܢܶܟܬܽܘܒ ܠܳܗ̇ ܟܬܳܒܳܐ ܕܫܽܘܒܩܳܢܳܐ ܘܢܶܬܶܠ ܠܳܗ̇. ܘܢܶܫܪܶܝܗ̇ ܡܶܢ ܒܰܝܬܶܗ. ܐܰܘ ܐܶܢ ܢܡܽܘܬ ܓܰܒܪܳܐ ܐ̱ܚܪܺܢܳܐ ܕܢܰܣܒܳܗ̇.
4 ܠܳܐ ܫܰܠܺܝܛ ܠܶܗ ܠܒܰܥܠܳܗ̇ ܩܰܕܡܳܝܳܐ ܕܫܰܒܩܳܗ̇. ܕܢܶܚܕܰܪ ܢܶܣܒܺܝܗ̇ ܒܳܬܰܪ ܕܶܐܬܛܰܡܐܰܬ. ܡܶܛܽܠ ܕܛܰܡܐܳܐ ܗ̱ܝ ܩܕܳܡ ܡܳܪܝܳܐ. ܘܠܳܐ ܬܰܚܛܶܐ ܠܰܐܪܥܳܐ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ. ܝܽܘܪܬܳܢܳܐ.
5 ܘܟܰܕ ܢܶܣܰܒ ܓܰܒܪܳܐ ܐܰܢ̱ܬܬܳܐ ܚܕܰܬܳܐ. ܠܳܐ ܢܶܦܽܘܩ ܒܚܰܝܠܳܐ. ܘܠܳܐ ܢܺܐܙܰܠ ܠܟܽܠ ܨܒܽܘ. ܐܶܠܳܐ ܢܶܗܘܶܐ ܒܒܰܝܬܶܗ ܫܰܢ̱ܬܳܐ ܚܕܳܐ. ܘܢܶܚܕܶܐ ܥܰܡ ܐܰܢ̱ܬܬܳܐ ܕܰܢܣܰܒ.
6 ܠܳܐ ܬܶܣܰܒ ܪܰܚܝܳܐ ܘܪܰܟܒܳܗ̇ ܡܶܫܟܳܢܳܐ. ܢܰܦܫܳܐ ܗܽܘ ܓܶܝܪ ܡܥܺܝܩ ܐܰܢ̱ܬ.
7 ܘܶܐܢ ܢܶܫܬܟܰܚ ܓܰܒܪܳܐ ܡܶܢ ܒܢܰܝ̈ ܝܺܣܪܳܐܶܝܠ. ܕܢܶܓܢܽܘܒ ܢܰܦܫܳܐ ܡܶܢ ܐܰܚܰܘ̈ܗܝ ܒܢܰܝ̈ ܝܺܣܪܳܐܶܝܠ. ܘܢܶܬܬܰܓܰܪ ܒܳܗ̇ ܘܰܢܙܰܒܢܺܝܗ̇. ܡܶܬܩܛܳܠܽܘ ܢܶܬܩܛܶܠ ܓܰܒܪܳܐ ܗܰܘ. ܘܒܰܥܰܪܘ ܒܺܝܫܬܳܐ ܡܶܢ ܒܰܝܢܳܬܟܽܘܢ.
8 ܛܰܪܘ ܡܚܽܘܬܳܐ ܕܓܰܪܒܳܐ. ܘܶܐܙܕܰܗܪܘ ܛܳܒ. ܘܰܥܒܶܕܘ ܐܰܝܟܰܢܳܐ ܕܡܰܠܦܺܝܢ ܠܟܽܘܢ ܟܳܗ̈ܢܶܐ ܘܠܶܘ̈ܳܝܶܐ. ܐܰܝܟ ܕܦܰܩܕܶܬ ܐܶܢܽܘܢ ܢܶܛܪܽܘܢ ܘܢܶܥܒܕܽܘܢ.
9 ܘܶܐܬܕܰܟܪ ܡܶܕܶܡ ܕܰܥܒܰܕ ܡܳܪܝܳܐ ܐܰܠܳܗܳܟ ܠܡܰܪܝܰܡ ܒܽܐܘܪܚܳܐ. ܟܰܕ ܢܦܰܩܬܽܘܢ ܡܶܢ ܡܶܨܪܶܝܢ.
10 ܘܶܐܢ ܢܚܽܘܒ ܠܳܟ ܚܰܒܪܳܟ ܚܰܘܒܬܳܐ ܡܶܕܶܡ. ܠܳܐ ܬܶܥܽܘܠ ܠܒܰܝܬܶܗ ܠܡܶܣܰܒ ܡܶܫܟܳܢܶܗ.
11 ܐܶܠܳܐ ܩܽܘܡ ܒܫܽܘܩܳܐ. ܘܓܰܒܪܳܐ ܗܰܘ ܕܚܰܝܳܒ ܠܳܟ. ܗܽܘ ܢܰܦܩܺܝܘܗܝ ܠܳܟ ܡܶܫܟܳܢܳܐ ܠܫܽܘܩܳܐ.
12 ܘܶܐܢ ܓܰܒܪܳܐ ܗ̱ܘ ܡܶܣܟܺܢܳܐ. ܠܳܐ ܬܶܕܡܰܟ ܒܡܰܪܛܽܘܛܶܗ.
13 ܐܶܠܳܐ ܦܰܢܳܝܗܝ ܠܶܗ ܡܶܫܟܳܢܶܗ ܡܳܐ ܕܥܶܪܒܰܬ ܫܶܡܫܳܐ. ܘܢܶܕܡܰܟ ܒܡܰܪܛܽܘܛܶܗ ܘܰܢܒܰܪܟܳܟ. ܘܬܶܗܘܶܐ ܠܳܟ ܙܰܕܺܝܩܽܘܬܳܐ ܩܕܳܡ ܡܳܪܝܳܐ ܐܰܠܳܗܳܟ.
14 ܠܳܐ ܬܶܛܠܽܘܡ ܐܰܓܪܳܐ ܕܡܶܣܟܺܢܳܐ ܘܰܕܒܳܝܫܳܐ ܡܶܢ ܐܰܚܰܝ̈ܟ. ܐܰܘ ܡܶܢ ܥܳܡܽܘܪܳܐ ܕܰܒܩܽܘܖ̈ܝܳܟ.
15 ܐܶܠܳܐ ܒܰܪ ܝܰܘܡܶܗ ܗܰܒ ܠܶܗ ܐܰܓܪܶܗ. ܘܠܳܐ ܬܶܥܪܰܒ ܥܠܰܘܗܝ ܫܶܡܫܳܐ. ܡܶܛܽܠ ܕܡܶܣܟܺܢܳܐ ܗܽܘ. ܘܥܰܠ ܐܰܦܰܝ̈ ܐܰܓܪܶܗ ܗܽܘ ܡܰܫܠܶܡ ܠܳܟ ܢܰܦܫܶܗ. ܕܠܳܐ ܢܶܩܪܶܐ ܥܠܰܝܟ ܠܡܳܪܝܳܐ ܘܢܶܗܘܶܐ ܥܠܰܝܟ ܚܛܳܗܳܐ.
16 ܠܳܐ ܢܡܽܘܬܽܘܢ ܐܰܒܳܗ̈ܶܐ ܥܰܠ ܐܰܦܰܝ̈ ܒܢܰܝ̈ܗܽܘܢ. ܘܰܒܢܰܝ̈ܳܐ ܠܳܐ ܢܡܽܘܬܽܘܢ ܥܰܠ ܐܰܦܰܝ̈ ܐܰܒܳܗܰܝ̈ܗܽܘܢ. ܐܶܠܳܐ ܐ̱ܢܳܫ ܒܰܚܛܳܗܰܘ̈ܗܝ ܢܡܽܘܬ.
17 ܠܳܐ ܬܶܨܠܶܐ ܕܺܝܢܳܐ ܕܥܳܡܽܘܪܳܐ. ܘܰܕܝܰܬܡܳܐ. ܘܠܳܐ ܬܶܣܰܒ ܡܶܫܟܳܢܳܐ ܡܰܪܛܽܘܛܳܗ̇ ܕܰܐܪܡܰܠܬܳܐ.
18 ܘܶܐܬܕܰܟܪ ܕܥܰܒܕܳܐ ܗܘܰܝܬ ܒܡܶܨܪܶܝܢ. ܘܦܰܪܩܳܟ ܡܳܪܝܳܐ ܐܰܠܳܗܳܟ ܡܶܢ ܬܰܡܳܢ. ܡܶܛܽܠ ܗܳܢܳܐ ܡܦܰܩܶܕ ܐ̱ܢܳܐ ܠܳܟ. ܘܳܐܡܰܪ ܐ̱ܢܳܐ ܠܳܟ. ܥܒܶܕ ܦܶܬܓܳܡܳܐ ܗܳܢܳܐ.
19 ܘܡܳܐ ܕܚܳܨܶܕ ܐܰܢ̱ܬ ܚܨܳܕܳܐ ܕܚܰܩܠܳܟ ܘܛܳܥܶܐ ܐܰܢ̱ܬ ܟܰܦܳܐ. ܠܳܐ ܬܶܗܦܽܘܟ ܬܶܣܒܺܝܗ̇. ܐܶܠܳܐ ܬܶܗܘܶܐ ܠܥܳܡܽܘܪܳܐ. ܘܰܠܝܰܬܡܳܐ. ܘܠܰܐܪܡܰܠܬܳܐ. ܕܰܢܒܰܪܟܳܟ ܡܳܪܝܳܐ ܐܰܠܳܗܳܟ ܒܟܽܠܶܗ ܥܒܳܕܳܐ ܕܺܐܝܕܰܝ̈ܟ.
20 ܘܡܳܐ ܕܚܳܒܶܛ ܐܰܢ̱ܬ ܙܰܝ̈ܬܰܝܟ. ܠܳܐ ܬܶܦܠܶܐ ܒܶܣܬܪܳܟ. ܐܶܠܳܐ ܠܥܳܡܽܘܪܳܐ ܘܰܠܝܰܬܡܳܐ ܘܠܰܐܪܡܰܠܬܳܐ ܢܶܗܘܶܐ.
21 ܘܡܳܐ ܕܩܳܛܶܦ ܐܰܢ̱ܬ ܟܰܪܡܳܟ. ܠܳܐ ܬܒܰܥܰܪ ܒܶܣܬܪܳܟ. ܐܶܠܳܐ ܠܥܳܡܽܘܪܳܐ ܘܰܠܝܰܬܡܳܐ ܘܠܰܐܪܡܰܠܬܳܐ ܢܶܗܘܶܐ.
22 ܘܶܐܬܕܰܟܪ ܕܥܰܒܕܳܐ ܗܘܰܝܬ ܒܡܶܨܪܶܝܢ. ܡܶܛܽܠ ܗܳܢܳܐ ܡܦܰܩܶܕ ܐ̱ܢܳܐ ܠܳܟ ܕܬܶܥܒܶܕ ܦܶܬܓܳܡܳܐ ܗܳܢܳܐ.