Deuteronomy 31
The Book of Deuteronomy
܀ ܬܢܝܢ ܢܡܘܣܐ ܠܐ ܀
1 ܘܶܐܙܰܠ ܡܽܘܫܶܐ. ܘܡܰܠܶܠ ܗܳܠܶܝܢ ܟܽܠܗܽܘܢ ܦܶܬܓܳܡ̈ܶܐ ܥܰܡ ܟܽܠܶܗ ܝܺܣܪܳܐܶܝܠ.
2 ܘܶܐܡܰܪ ܠܗܽܘܢ. ܒܰܪ ܡܳܐܐ ܐ̱ܢܳܐ ܘܥܶܣܪܺܝܢ ܫܢܺܝ̈ܢ ܝܰܘܡܳܢܳܐ. ܘܠܳܐ ܡܶܫܟܰܚ ܐ̱ܢܳܐ ܬܽܘܒ ܠܡܶܦܰܩ ܘܰܠܡܶܥܰܠ. ܘܡܳܪܝܳܐ ܐܶܡܰܪ ܠܺܝ. ܕܠܳܐ ܬܶܥܒܰܪ ܝܽܘܪܕܢܳܢ ܗܳܢܳܐ.
3 ܡܳܪܝܳܐ ܐܰܠܳܗܳܟ ܗܽܘ ܥܳܒܰܪ ܩܕܳܡܰܝܟ. ܘܗܽܘ ܢܰܘܒܶܕ ܥܰܡ̈ܡܶܐ ܗܳܠܶܝܢ ܡܶܢ ܩܕܳܡܰܝܟ. ܘܬܺܐܪܰܬ ܐܶܢܽܘܢ. ܝܶܫܽܘܥ ܗܽܘ ܥܳܒܰܪ ܩܕܳܡܰܝܟ ܐܰܝܟ ܕܶܐܡܰܪ ܡܳܪܝܳܐ.
4 ܘܢܶܥܒܶܕ ܠܗܽܘܢ ܡܳܪܝܳܐ ܐܰܝܟ ܕܥܒܰܕ ܠܣܺܝܚܽܘܢ ܘܰܠܥܽܘܓ ܡܰܠܟ̈ܶܐ ܕܳܐܡܽܘܖ̈ܳܝܶܐ. ܘܠܰܐܪܥܗܽܘܢ. ܕܰܐܘܒܶܕ ܐܶܢܽܘܢ.
5 ܢܰܫܠܶܡ ܐܶܢܽܘܢ ܡܳܪܝܳܐ ܩܕܳܡܰܝܟܽܘܢ. ܘܰܥܒܶܕܘ ܠܗܽܘܢ ܐܰܝܟ ܟܽܠܶܗ ܦܽܘܩܕܳܢܳܐ ܕܦܰܩܶܕܬܟܽܘܢ.
6 ܐܶܬܚܰܝܰܠܘ ܘܶܐܬܥܰܫܰܢܘ. ܠܳܐ ܬܶܕܚܠܽܘܢ ܘܠܳܐ ܬܙܽܘܥܽܘܢ ܘܠܳܐ ܬܶܬܪܰܗܒܽܘܢ ܡܶܢ ܩܕܳܡܰܝܗܽܘܢ. ܡܶܛܽܠ ܕܡܳܪܝܳܐ ܐܰܠܳܗܳܟ ܗܽܘ ܐܳܙܶܠ ܩܕܳܡܰܝܟ. ܠܳܐ ܢܰܪܦܶܝܟ ܘܠܳܐ ܢܶܫܒܩܳܟ.
7 ܘܰܩܪܳܐ ܡܽܘܫܶܐ ܠܝܶܫܽܘܥ. ܘܶܐܡܰܪ ܠܶܗ ܠܥܺܝܢ ܟܽܠܶܗ ܝܺܣܪܳܐܶܝܠ. ܐܶܬܚܰܝܰܠ ܘܶܐܬܥܰܫܰܢ ܡܶܛܽܠ ܕܰܐܢ̱ܬ ܡܰܥܶܠ ܐܰܢ̱ܬ ܠܶܗ ܠܥܰܡܳܐ ܗܳܢܳܐ. ܠܰܐܪܥܳܐ ܕܺܝܡܳܐ ܡܳܪܝܳܐ ܠܰܐܒܳܗܰܝ̈ܗܽܘܢ ܠܡܶܬܰܠ ܠܗܽܘܢ. ܘܰܐܢ̱ܬ ܬܰܘܪܬܺܝܗ̇ ܠܗܽܘܢ.
8 ܘܡܳܪܝܳܐ ܗܽܘ ܐܳܙܶܠ ܩܕܳܡܰܝܟ. ܘܗܽܘ ܢܶܗܘܶܐ ܥܰܡܳܟ. ܘܠܳܐ ܢܰܪܦܶܝܟ ܘܠܳܐ ܢܶܫܒܩܳܟ. ܠܳܐ ܬܶܕܚܰܠ ܘܠܳܐ ܬܙܽܘܥ ܘܠܳܐ ܬܶܬܪܗܶܒ.
9 ܘܰܟܬܰܒ ܡܽܘܫܶܐ ܢܳܡܽܘܣܳܐ ܗܳܢܳܐ ܘܝܰܗܒܶܗ ܠܟܳܗ̈ܢܶܐ ܒܢܰܝ̈ ܠܶܘܺܝ. ܕܰܫܩܺܝܠܺܝܢ ܩܺܐܒܽܘܬܳܐ. ܕܰܩܝܳܡܶܗ ܕܡܳܪܝܳܐ. ܘܰܠܟܽܠܗܽܘܢ ܣܳܒ̈ܶܐ ܕܰܒܢܰܝ̈ ܝܺܣܪܳܐܶܝܠ.
10 ܘܦܰܩܶܕ ܐܶܢܽܘܢ ܡܽܘܫܶܐ. ܘܶܐܡܰܪ ܠܗܽܘܢ. ܡܶܢ ܒܳܬܰܪ ܫܒܰܥ ܫܢܺܝ̈ܢ. ܒܙܰܒܢܳܐ ܕܫܰܢ̱ܬܳܐ ܕܫܽܘܒܩܳܢܳܐ. ܒܥܰܕܥܺܐܕܳܐ ܕܰܡ̈ܛܰܠܠܶܐ.
11 ܡܳܐ ܕܳܐܬܶܐ ܟܽܠܶܗ ܝܺܣܪܳܐܶܝܠ ܠܡܶܬܚܙܳܝܽܘ ܩܕܳܡ ܡܳܪܝܳܐ ܐܰܠܳܗܳܟ. ܒܰܐܬܪܳܐ ܕܓܳܒܶܐ. ܩܪܺܝ ܢܳܡܽܘܣܳܐ ܗܳܢܳܐ ܩܕܳܡ ܟܽܠܶܗ ܝܺܣܪܳܐܶܝܠ ܒܶܐܕܢܰܝ̈ܗܽܘܢ.
12 ܟܰܢܶܫܳܝܗܝ ܠܥܰܡܳܐ ܓܰܒܖ̈ܶܐ ܘܢܶܫ̈ܶܐ. ܘܺܝܩܰܪܬܳܐ. ܘܥܳܡܽܘܪܳܐ ܕܰܒܩܽܘܖ̈ܝܳܟ. ܡܶܛܽܠ ܕܢܶܫܡܥܽܘܢ ܘܢܺܐܠܦܽܘܢ. ܘܢܶܕܚܠܽܘܢ ܡܶܢ ܡܳܪܝܳܐ ܐܰܠܳܗܟܽܘܢ. ܘܢܶܛܪܽܘܢ ܘܢܶܥܒܕܽܘܢ ܟܽܠܗܽܘܢ ܦܶܬܓܳܡܰܘ̈ܗܝ ܕܢܳܡܽܘܣܳܐ ܗܳܢܳܐ.
13 ܘܰܒܢܰܝ̈ܗܽܘܢ ܕܠܳܐ ܝܺܕܰܥܘ ܢܶܫܡܥܽܘܢ. ܘܢܺܐܠܦܽܘܢ ܠܡܶܕܚܰܠ ܡܶܢ ܡܳܪܝܳܐ ܐܰܠܳܗܗܽܘܢ. ܟܽܠܗܽܘܢ ܝܰܘ̈ܡܳܬܳܐ ܕܚܰܝܺܝܢ ܐܢ̱ܬܽܘܢ ܒܰܐܪܥܳܐ ܕܥܳܒܪܺܝܢ ܐܢ̱ܬܽܘܢ ܝܽܘܪܕܢܳܢ ܠܡܺܐܪܬܳܗ̇
14 ܘܶܐܡܰܪ ܡܳܪܝܳܐ ܠܡܽܘܫܶܐ. ܗܳܐ ܩܪܶܒܘ ܝܰܘܡܰܝ̈ܟ ܠܰܡܡܳܬ. ܩܪܺܝ ܠܝܶܫܽܘܥ. ܘܩܽܘܡ ܒܡܰܫܟܰܢܙܰܒܢܳܐ ܘܶܐܦܰܩܕܺܝܘܗܝ. ܘܶܐܙܰܠܘ ܡܽܘܫܶܐ ܘܝܶܫܽܘܥ. ܘܩܳܡܘ ܒܡܰܫܟܰܢ ܙܰܒܢܳܐ.
15 ܘܶܐܬܓܠܺܝ ܡܳܪܝܳܐ ܒܡܰܫܟܰܢܙܰܒܢܳܐ ܒܥܰܡܽܘܕܳܐ ܕܰܥܢܳܢܳܐ. ܘܩܳܡ ܥܰܡܽܘܕܳܐ ܕܰܥܢܳܢܳܐ ܒܬܰܪܥܳܐ ܕܡܰܫܟܰܢ ܙܰܒܢܳܐ.
16 ܘܶܐܡܰܪ ܡܳܪܝܳܐ ܠܡܽܘܫܶܐ. ܗܳܐ ܐܰܢ̱ܬ ܫܳܟܶܒ ܐܰܢ̱ܬ ܥܰܡ ܐܰܒܳܗܰܝ̈ܟ. ܘܩܳܐܶܡ ܥܰܡܳܐ ܗܳܢܳܐ. ܘܛܳܥܶܐ ܒܳܬܰܪ ܐܰܠܳܗ̈ܶܐ ܢܽܘܟܖ̈ܳܝܶܐ ܕܰܐܪܥܳܐ. ܕܗܽܘ ܥܳܐܶܠ ܠܬܰܡܳܢ ܒܰܝܢܳܬܟܽܘܢ. ܘܫܳܒܶܩ ܠܺܝ ܘܰܡܒܰܛܶܠ ܩܝܳܡܝ ܕܰܐܩܺܝܡܶܬ ܥܰܡܶܗ.
17 ܘܡܶܬܚܰܡܰܬ ܪܽܘܓܙܝ ܥܠܰܘܗܝ ܒܝܰܘܡܳܐ ܗܰܘ. ܘܶܐܫܒܽܘܩ ܐܶܢܽܘܢ ܘܰܐܗܦܶܟ ܐܰܦܰܝ̈ ܡܶܢܗܽܘܢ. ܘܢܶܗܘܽܘܢ ܠܡܶܐܟܽܘܠܬܳܐ. ܘܬܶܡܛܶܝܘܗܝ ܒܺܝܫܬܳܐ ܣܰܓܺܝܐܬܳܐ ܘܥܳܩܬܳܐ. ܘܢܺܐܡܰܪ ܒܝܰܘܡܳܐ ܗܰܘ. ܡܶܛܽܠ ܕܠܰܝܬ ܐܰܠܳܗܳܐ ܒܓܰܘܝ. ܐܰܖ̈ܥܳܢܝ ܗܳܠܶܝܢ ܟܽܠܗܶܝܢ ܒܺܝ̈ܫܳܬܳܐ.
18 ܘܶܐܢܳܐ ܐܰܗܦܶܟ ܐܰܦܰܝ̈ ܡܶܢܗܽܘܢ ܒܝܰܘܡܳܐ ܗܰܘ. ܡܶܛܽܠ ܟܽܠܳܗ̇ ܒܺܝܫܬܳܐ ܕܰܥܒܰܕܘ. ܥܰܠ ܕܰܣܛܰܘ ܒܳܬܰܪ ܐܰܠܳܗ̈ܶܐ ܐ̱ܚܖ̈ܳܢܶܐ.
19 ܡܶܟܺܝܠ ܟܬܽܘܒ ܠܗܽܘܢ ܬܶܫܒܽܘܚܬܳܐ ܗܳܕܶܐ. ܘܰܐܠܶܦܶܝܗ̇ ܠܰܒܢܰܝ̈ ܝܺܣܪܳܐܶܝܠ. ܘܣܺܝܡܶܝܗ̇ ܒܦܽܘܡܗܽܘܢ. ܡܶܛܽܠ ܕܬܶܗܘܶܐ ܠܺܝ ܬܶܫܒܽܘܚܬܳܐ ܗܳܕܶܐ ܠܣܳܗܕܽܘܬܳܐ ܒܰܒܢܰܝ̈ ܝܺܣܪܳܐܶܝܠ.
20 ܡܶܛܽܠ ܕܡܰܥܶܠ ܐ̱ܢܳܐ ܠܗܽܘܢ ܠܰܐܪܥܳܐ ܕܺܝܡܰܝܬ ܠܰܐܒܳܗܰܝ̈ܗܽܘܢ. ܕܡܰܪܕܝܳܐ ܚܰܠܒܳܐ ܘܕܶܒܫܳܐ. ܘܳܐܟܠܺܝܢ ܘܣܳܒܥܺܝܢ ܘܡܶܬܦܰܢܩܺܝܢ. ܘܣܳܛܶܝܢ ܒܳܬܰܪ ܐܰܠܳܗ̈ܶܐ ܐ̱ܚܖ̈ܳܢܶܐ. ܘܦܳܠܚܺܝܢ ܠܗܽܘܢ ܘܡܰܪܓܙܺܝܢ ܠܺܝ. ܘܰܡܒܰܛܠܺܝܢ ܩܝܳܡܝ.
21 ܘܡܳܐ ܕܡܰܛܺܝ̈ ܐܶܢܽܘܢ ܒܺܝ̈ܫܳܬܳܐ ܣܰܓܺܝ̈ܐܳܬܳܐ ܘܥܳܩ̈ܳܬܳܐ. ܬܶܩܪܶܐ ܬܶܫܒܽܘܚܬܳܐ ܗܳܕܶܐ ܩܕܳܡܰܝܗܽܘܢ ܠܣܳܗܕܽܘܬܳܐ. ܕܠܳܐ ܬܶܬܛܥܶܐ ܡܶܢ ܦܽܘܡܳܐ ܕܙܰܪܥܗܽܘܢ. ܡܶܛܽܠ ܕܝܳܕܰܥ ܐ̱ܢܳܐ ܝܰܨܪܗܽܘܢ ܘܟܽܠ ܕܥܳܒܕܺܝܢ ܗܳܪܟܳܐ ܝܰܘܡܳܢܳܐ. ܥܰܕܠܳܐ ܐܰܥܶܠ ܐܶܢܽܘܢ ܠܰܐܪܥܳܐ ܕܺܝܡܺܝܬ ܠܰܐܒܳܗܰܝ̈ܗܽܘܢ.
22 ܘܰܟܬܰܒ ܡܽܘܫܶܐ ܬܶܫܒܽܘܚܬܳܐ ܗܳܕܶܐ ܒܝܰܘܡܳܐ ܗܰܘ. ܘܰܐܠܦܳܗ̇ ܠܰܒܢܰܝ̈ ܝܺܣܪܳܐܶܝܠ.
23 ܘܦܰܩܶܕ ܠܝܶܫܽܘܥ ܒܰܪܢܽܘܢ. ܘܶܐܡܰܪ ܠܶܗ. ܐܶܬܚܰܝܰܠ ܘܶܐܬܥܰܫܰܢ. ܡܶܛܽܠ ܕܰܐܢ̱ܬ ܡܰܥܶܠ ܐܰܢ̱ܬ ܠܰܒܢܰܝ̈ ܝܺܣܪܳܐܶܝܠ ܠܰܐܪܥܳܐ ܕܺܝܡܺܝܬ ܠܗܽܘܢ. ܘܶܐܢܳܐ ܐܶܗܘܶܐ ܥܰܡܳܟ.
24 ܘܟܰܕ ܫܰܠܶܡ ܡܽܘܫܶܐ ܠܡܶܟܬܰܒ ܦܶܬܓܳܡܰܘ̈ܗܝ ܕܢܳܡܽܘܣܳܐ ܗܳܢܳܐ ܒܣܶܦܪܳܐ ܥܕܰܡܳܐ ܕܰܫܠܶܡܘ.
25 ܦܰܩܶܕ ܡܽܘܫܶܐ ܠܠܶܘ̈ܳܝܶܐ ܕܰܫܩܺܝܠܺܝܢ ܩܺܐܒܽܘܬܳܐ ܕܰܩܝܳܡܶܗ ܕܡܳܪܝܳܐ. ܘܶܐܡܰܪ ܠܗܽܘܢ.
26 ܣܰܒܘ ܣܶܦܪܳܐ ܗܳܢܳܐ ܕܢܳܡܽܘܣܳܐ. ܘܣܺܝܡܽܘܗܝ ܒܣܶܛܪܳܐ ܕܩܺܐܒܽܘܬܳܐ ܕܰܩܝܳܡܶܗ ܕܡܳܪܝܳܐ ܐܰܠܳܗܟܽܘܢ. ܘܢܶܗܘܶܐ ܠܟܽܘܢ ܬܰܡܳܢ ܣܳܗܕܳܐ.
27 ܡܶܛܽܠ ܕܶܐܢܳܐ ܝܳܕܰܥ ܐ̱ܢܳܐ ܡܡܰܪܡܪܳܢܽܘܬܟܽܘܢ. ܘܰܩܕܳܠܟܽܘܢ ܩܰܫܝܳܐ. ܘܗܳܐ ܥܰܕ ܐܶܢܳܐ ܚܰܝ ܥܰܡܟܽܘܢ ܝܰܘܡܳܢܳܐ ܡܰܪܡܰܪܬܽܘܢ ܠܡܳܪܝܳܐ. ܘܳܐܦ ܡܶܢ ܒܳܬܰܪ ܕܡܳܐܶܬ ܐ̱ܢܳܐ.
28 ܟܰܢܶܫܘ ܠܘܳܬܝ ܟܽܠܗܽܘܢ ܣܳܒ̈ܶܐ ܕܫܰܒܛܰܝ̈ܟܽܘܢ. ܘܣܳܦܖ̈ܰܝܟܽܘܢ. ܘܺܐܡܰܪ ܠܟܽܘܢ ܗܳܠܶܝܢ ܦܶܬܓܳܡ̈ܶܐ. ܘܶܐܣܰܗܶܕ ܒܟܽܘܢ ܫܡܰܝܳܐ ܘܰܐܪܥܳܐ.
29 ܡܶܛܽܠ ܕܝܳܕܰܥ ܐ̱ܢܳܐ ܕܡܶܢ ܒܳܬܰܪ ܡܰܘܬܝ ܡܚܰܒܳܠܽܘ ܡܚܰܒܠܺܝܢ ܐܢ̱ܬܽܘܢ. ܘܣܳܛܶܝܢ ܐܢ̱ܬܽܘܢ ܡܶܢ ܐܽܘܪܚܳܐ ܕܦܰܩܶܕܬܟܽܘܢ. ܘܰܐܪܥܳܐ ܠܟܽܘܢ ܒܺܝܫܬܳܐ ܒܚܰܪܬܳܐ ܕܝܰܘ̈ܡܳܬܳܐ. ܡܳܐ ܕܥܒܰܕܬܽܘܢ ܒܺܝܫܬܳܐ ܩܕܳܡ ܡܳܪܝܳܐ. ܘܰܐܪܓܶܙܬܽܘܢܳܝܗܝ ܒܰܥܒܳܕܳܐ ܕܺܐܝܕܰܝ̈ܟܽܘܢ.
30 ܘܶܐܡܰܪ ܡܽܘܫܶܐ ܩܕܳܡ ܟܽܠܳܗ̇ ܟܢܽܘܫܬܳܐ ܕܺܝܣܪܳܐܶܝܠ. ܦܶܬܓܳܡ̈ܶܐ ܕܬܶܫܒܽܘܚܬܳܐ ܗܳܕܶܐ ܥܕܰܡܳܐ ܕܰܫܠܶܡܘ.