Deuteronomy 21
The Book of Deuteronomy
܀ ܬܢܝܢ ܢܡܘܣܐ ܟܐ ܀
1 ܘܟܰܕ ܢܶܫܬܟܰܚ ܩܛܺܝܠܳܐ ܒܰܐܪܥܳܐ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ ܠܡܺܐܪܬܳܗ̇ ܕܰܪܡܶܐ ܒܚܰܩܠܳܐ ܘܠܳܐ ܝܺܕܺܝܥ ܡܰܢܽܘ ܩܰܛܠܶܗ.
2 ܢܶܦܩܽܘܢ ܣܳܒܰܝ̈ܟ. ܘܕܰܝܳܢܰܝ̈ܟ. ܘܢܶܡܫܚܽܘܢ ܠܩܽܘܖ̈ܝܳܐ ܕܰܚܕܳܖ̈ܰܘܗܝ ܕܰܩܛܺܝܠܳܐ.
3 ܘܰܩܪܺܝܬܳܐ ܕܩܰܪܺܝܒܳܐ ܠܰܩܛܺܝܠܳܐ. ܢܶܕܒܪܽܘܢ ܣܳܒ̈ܶܐ ܕܰܩܪܺܝܬܳܐ ܗܳܝ ܥܓܶܠܬܳܐ ܕܬܰܘܖ̈ܶܐ. ܕܠܳܐ ܐܶܬܕܒܰܪ ܒܳܗ̇. ܘܠܳܐ ܢܶܓܕܰܬ ܒܢܺܝܪܳܐ.
4 ܘܢܰܚܬܽܘܢܳܗ̇ ܣܳܒ̈ܶܐ ܕܰܩܪܺܝܬܳܐ ܗܳܝ ܠܰܥܓܶܠܬܳܐ ܠܢܰܚܠܳܐ ܒܰܝܳܪܳܐ. ܕܠܳܐ ܐܶܬܦܠܰܚ ܒܶܗ ܘܠܳܐ ܐܶܙܕܪܰܥ. ܘܢܶܟܣܽܘܢܳܗ̇ ܬܰܡܳܢ ܠܰܥܓܶܠܬܳܐ ܒܢܰܚܠܳܐ.
5 ܘܢܶܩܪܒܽܘܢ ܟܳܗ̈ܢܶܐ ܒܢܰܝ̈ ܠܶܘܺܝ. ܕܰܠܗܽܘܢ ܓܒܳܐ ܡܳܪܝܳܐ ܐܰܠܳܗܳܟ ܠܰܡܫܰܡܳܫܽܘܬܶܗ. ܘܠܰܡܒܰܪܳܟܽܘ ܒܰܫܡܶܗ ܕܡܳܪܝܳܐ. ܘܥܰܠ ܡܶܠܰܬ ܦܽܘܡܶܗܘܢ ܢܶܗܘܶܐ ܟܽܠ ܕܺܝܢܳܐ ܘܟܽܠ ܡܚܽܘܬܳܐ.
6 ܘܟܽܠܗܽܘܢ ܣܳܒ̈ܶܐ ܕܰܩܪܺܝܬܳܐ ܗܳܝ ܕܰܩܪܺܝܒܺܝܢ ܠܰܩܛܺܝܠܳܐ. ܢܫܺܝܓܽܘܢ ܐܺܝܕܰܝ̈ܗܽܘܢ ܠܥܶܠ ܡܶܢ ܥܓܶܠܬܳܐ ܕܰܢܟܺܝܣܳܐ ܒܢܰܚܠܳܐ.
7 ܘܢܶܥܢܽܘܢ ܘܢܺܐܡܪܽܘܢ. ܐܺܝܕܰܢ ܠܳܐ ܐܶܫܕܰܬ ܕܡܳܐ ܗܳܢܳܐ. ܘܥܰܝܢܰܝ̈ܢ ܠܳܐ ܚܙܰܝ̈.
8 ܚܰܣܳܐ ܥܰܠ ܥܰܡܳܟ ܝܺܣܪܳܐܶܝܠ. ܕܰܦܪܰܩܬ ܡܳܪܝܳܐ. ܘܠܳܐ ܬܶܚܫܽܘܒ ܕܡܳܐ ܙܰܟܳܝܳܐ ܥܰܠ ܥܰܡܳܟ ܝܺܣܪܳܐܶܝܠ. ܘܢܶܬܚܰܣܶܐ ܠܗܽܘܢ ܥܰܠ ܕܡܳܐ.
9 ܘܰܐܢ̱ܬ ܥܰܩܶܒ ܕܡܳܐ ܙܰܟܳܝܳܐ ܡܶܢ ܓܰܘܳܟ. ܘܰܥܒܶܕ ܕܫܰܦܺܝܪ ܩܕܳܡ ܡܳܪܝܳܐ ܐܰܠܳܗܳܟ.
10 ܘܟܰܕ ܬܶܦܽܘܩ ܠܰܩܪܳܒܳܐ ܥܰܠ ܒܥܶܠܕܒܳܒܰܝ̈ܟ. ܘܢܰܫܠܶܡ ܐܶܢܽܘܢ ܡܳܪܝܳܐ ܐܰܠܳܗܳܟ ܒܺܐܝܕܰܝ̈ܟ. ܘܬܶܫܒܶܐ ܡܶܢܗܽܘܢ ܫܒܺܝܬܳܐ.
11 ܘܬܶܚܙܶܐ ܒܰܫܒܺܝܬܳܐ ܐܰܢ̱ܬܬܳܐ ܕܫܰܦܺܝܪܳܐ ܒܚܶܙܘܳܗ̇. ܘܬܶܨܛܒܶܐ ܒܳܗ̇. ܘܬܶܣܒܺܝܗ̇ ܠܳܟ ܐܰܢ̱ܬܬܳܐ.
12 ܘܬܰܥܠܺܝܗ̇ ܠܓܰܘ ܒܰܝܬܳܟ. ܘܬܶܓܪܽܘܥ ܪܺܝܫܳܗ̇. ܘܬܶܣܰܒ ܛܶܦܖ̈ܶܝܗ̇.
13 ܘܬܶܫܠܰܚ ܡܳܐܢ̈ܶܐ ܕܰܫܒܺܝܬܳܗ̇ ܡܶܢܳܗ̇. ܘܬܶܬܶܒ ܒܒܰܝܬܳܟ ܘܬܶܒܟܶܐ ܥܰܠ ܐܰܒܽܘܗ̇ ܘܥܰܠ ܐܶܡܳܗ̇ ܝܺܪܰܚ ܝܰܘܡܺܝ̈ܢ. ܘܒܳܬܰܪܟܶܢ ܬܶܥܽܘܠ ܠܘܳܬܳܗ̇ ܘܬܶܣܒܺܝܗ̇. ܘܬܶܗܘܶܐ ܠܳܟ ܐܰܢ̱ܬܬܳܐ.
14 ܘܶܐܢ ܠܳܐ ܨܳܒܶܐ ܐܰܢ̱ܬ ܒܳܗ̇. ܫܒܽܘܩܶܝܗ̇ ܠܢܰܦܫܳܗ̇. ܘܰܒܟܶܣܦܳܐ ܠܳܐ ܬܙܰܒܢܳܝܗ̇. ܘܠܳܐ ܬܶܬܰܓܰܪ ܒܳܗ̇. ܚܠܳܦ ܕܨܰܥܰܪܬܳܗ̇.
15 ܘܟܰܕ ܢܶܗܘ̈ܝܳܢ ܠܓܰܒܪܳܐ ܬܰܪܬܶܝܢ ܢܶܫܺܝ̈ܢ. ܚܕܳܐ ܪܚܽܘܡܬܳܐ ܘܰܚܕܳܐ ܣܶܢܽܘܐܬܳܐ. ܘܢܺܐܠ̈ܕܳܢ ܠܶܗ ܒܢܰܝ̈ܳܐ ܪܚܽܘܡܬܳܐ ܘܣܶܢܽܘܐܬܳܐ. ܘܢܶܗܘܶܐ ܒܪܳܐ ܒܽܘܟܪܳܐ ܠܣܶܢܽܘܐܬܳܐ.
16 ܒܝܰܘܡܳܐ ܕܡܰܘܪܶܬ ܠܰܒܢܰܘ̈ܗܝ ܡܶܕܶܡ ܕܺܐܝܬ ܠܶܗ. ܠܳܐ ܫܰܠܺܝܛ ܠܶܗ ܕܰܢܩܰܫܶܫ ܠܒܰܪ ܪܚܽܘܡܬܳܐ ܩܕܳܡ ܒܰܪ ܣܶܢܽܘܐܬܳܐ.
17 ܐܶܠܳܐ ܒܽܘܟܪܳܐ ܒܰܪ ܣܶܢܽܘܐܬܳܐ. ܘܳܠܶܐ ܠܶܗ ܕܢܶܣܰܒ ܬܰܪܬܶܝܢ ܡܢܰܘ̈ܳܢ ܒܟܽܠ ܡܶܕܶܡ ܕܡܶܫܬܟܰܚ ܠܶܗ. ܡܶܛܽܠ ܕܗܽܘܝܽܘ ܪܺܝܫ ܝܰܠܕܶܗ. ܘܠܶܗ ܗܽܘ ܙܳܕܩܳܐ ܒܽܘܟܪܽܘܬܳܐ.
18 ܘܟܰܕ ܢܶܗܘܶܐ ܠܓܰܒܪܳܐ ܒܪܳܐ ܡܳܪܽܘܕܳܐ. ܘܰܡܡܰܪܡܪܳܢܳܐ. ܘܠܳܐ ܫܳܡܰܥ ܠܩܳܠ ܐܰܒܽܘܗܝ. ܘܰܠܩܳܠ ܐܶܡܶܗ. ܘܪܳܕܶܝܢ ܠܶܗ ܘܠܳܐ ܫܳܡܰܥ ܠܗܽܘܢ.
19 ܢܶܐܚܕܽܘܢܶܗ ܐܰܒܽܘܗܝ ܘܶܐܡܶܗ. ܘܢܰܦܩܽܘܢܶܗ ܠܘܳܬ ܣܳܒ̈ܶܐ ܕܰܩܪܺܝܬܳܐ. ܘܰܠܬܰܪܥܳܐ ܕܰܐܬܪܶܗ.
20 ܘܢܺܐܡܪܽܘܢ ܠܣܳܒ̈ܶܐ ܕܰܩܪܺܝܬܶܗ. ܒܪܰܢ ܗܳܢܳܐ ܡܳܪܽܘܕ ܘܰܡܡܰܪܡܪܳܢ. ܘܠܳܐ ܫܳܡܰܥ ܠܩܳܠܰܢ. ܐܳܣܽܘܛ ܘܪܰܘܳܝ.
21 ܢܶܪܓܡܽܘܢܶܗ ܟܽܠܗܽܘܢ ܐ̱ܢܳܫ̈ܳܐ ܕܰܩܪܺܝܬܶܗ ܒܟܺܐܦ̈ܶܐ. ܘܰܢܡܽܘܬ. ܘܒܰܥܰܪܘ ܒܺܝܫܬܳܐ ܡܶܢ ܒܰܝܢܳܬܟܽܘܢ. ܘܟܽܠܶܗ ܝܺܣܪܳܐܶܝܠ ܢܶܫܡܥܽܘܢ ܘܢܶܕܚܠܽܘܢ.
22 ܘܶܐܢ ܚܰܝܳܒ ܓܰܒܪܳܐ ܚܠܳܦ ܚܛܳܗܳܐ ܕܺܝܢܳܐ ܕܡܰܘܬܳܐ. ܘܢܶܙܕܩܶܦ ܥܰܠ ܩܰܝܣܳܐ ܘܢܶܬܩܛܶܠ.
23 ܠܳܐ ܬܒܽܘܬ ܫܠܰܕܶܗ ܥܰܠ ܩܰܝܣܳܐ. ܐܶܠܳܐ ܩܽܘܒܪܽܘܗܝ ܒܝܰܘܡܳܐ ܗܰܘ. ܡܶܛܽܠ ܕܡܰܢ ܕܰܡܨܰܚܶܐ ܠܰܐܠܳܗܳܐ ܢܶܙܕܩܶܦ. ܘܠܳܐ ܬܛܰܡܰܐ ܐܰܪܥܳܟ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ ܝܽܘܪܬܳܢܳܐ.