Deuteronomy 16
The Book of Deuteronomy
܀ ܬܢܝܢ ܢܡܘܣܐ ܝܘ ܀
1 ܛܰܪ ܝܰܪܚܳܐ ܕܗܰܒܳܒ̈ܶܐ ܘܰܥܒܶܕ ܦܶܨܚܳܐ ܠܡܳܪܝܳܐ ܐܰܠܳܗܳܟ. ܡܶܛܽܠ ܕܰܒܝܰܪܚܳܐ ܕܗܰܒܳܒ̈ܶܐ ܐܰܦܩܳܟ ܡܳܪܝܳܐ ܐܰܠܳܗܳܟ ܡܶܢ ܡܶܨܪܶܝܢ ܒܠܺܠܝܳܐ.
2 ܘܟܽܘܣ ܦܶܨܚܳܐ ܠܡܳܪܝܳܐ ܐܰܠܳܗܳܟ ܡܶܢ ܥܳܢ̈ܳܐ ܘܡܶܢ ܬܰܘܖ̈ܶܐ. ܒܰܐܬܪܳܐ ܕܓܳܒܶܐ ܡܳܪܝܳܐ ܐܰܠܳܗܳܟ ܠܡܰܫܪܳܝܽܘ ܫܡܶܗ ܬܰܡܳܢ.
3 ܠܳܐ ܬܶܐܟܽܘܠ ܥܠܰܘܗܝ ܚܰܡܺܝܥܳܐ. ܐܶܠܳܐ ܫܰܒܥܳܐ ܝܰܘܡܺܝ̈ܢ ܐܰܟܽܘܠ ܥܠܰܘܗܝ ܦܰܛܺܝܪܳܐ. ܠܰܚܡܳܐ ܡܡܰܟܟܳܐ. ܡܶܛܽܠ ܕܰܒܣܽܘܪܗܳܒܳܐ ܢܦܰܩܬܽܘܢ ܡܶܢ ܡܶܨܪܶܝܢ. ܕܬܶܗܘܶܐ ܡܶܬܕܟܰܪ ܝܰܘܡܳܐ ܕܰܢܦܰܩܬ ܒܶܗ ܡܶܢ ܡܶܨܪܶܝܢ ܟܽܠܗܽܘܢ ܝܰܘ̈ܡܰܝ ܚܰܝܰܝ̈ܟ.
4 ܘܠܳܐ ܢܶܬܚܙܶܐ ܚܰܡܺܝܥܳܐ ܒܟܽܠܶܗ ܬܚܽܘܡܳܟ ܫܰܒܥܳܐ ܝܰܘܡܺܝ̈ܢ. ܘܠܳܐ ܢܒܽܘܬ ܡܶܢ ܒܶܣܪܳܐ ܕܢܳܟܶܣ ܐܰܢ̱ܬ ܒܪܰܡܫܳܐ ܒܝܰܘܡܳܐ ܩܰܕܡܳܝܳܐ ܠܨܰܦܪܳܐ.
5 ܠܳܐ ܫܰܠܺܝܛ ܠܳܟ ܠܡܶܟܰܣ ܦܶܨܚܳܐ ܒܰܚܕܳܐ ܡܶܢ ܩܽܘܖ̈ܝܳܟ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ.
6 ܐܶܠܳܐ ܒܰܐܬܪܳܐ ܕܢܶܓܒܶܐ ܡܳܪܝܳܐ ܐܰܠܳܗܳܟ. ܠܡܰܫܪܳܝܽܘ ܫܡܶܗ ܬܰܡܳܢ ܟܽܘܣ ܦܶܨܚܳܐ. ܒܪܰܡܫܳܐ ܒܡܰܥܖ̈ܳܒܰܝ ܫܶܡܫܳܐ. ܐܰܝܟ ܙܰܒܢܳܐ ܕܰܢܦܰܩܬ ܡܶܢ ܡܶܨܪܶܝܢ.
7 ܘܒܰܫܶܠ ܘܰܐܟܽܘܠ ܒܰܐܬܪܳܐ ܕܓܳܒܶܐ ܠܶܗ ܡܳܪܝܳܐ ܐܰܠܳܗܳܟ. ܘܰܗܦܽܘܟ ܒܨܰܦܪܳܐ ܘܙܶܠ ܠܡܰܫܟܢܳܟ.
8 ܫܬܳܐ ܝܰܘܡܺܝ̈ܢ ܬܶܐܟܽܘܠ ܦܰܛܺܝܪܳܐ. ܘܝܰܘܡܳܐ ܕܫܰܒܥܳܐ ܟܢܽܘܫܝܳܐ ܗܽܘ ܠܡܳܪܝܳܐ ܐܰܠܳܗܟܽܘܢ. ܠܳܐ ܬܶܥܒܕܽܘܢ ܒܶܗ ܟܽܠ ܥܒܳܕܳܐ.
9 ܥܰܠ ܦܰܢܛܺܝܩܽܘܣܛܳܐ. ܫܰܒܥܳܐ ܫܳܒܽܘ̈ܥܺܝܢ ܬܶܡܢܶܐ ܠܳܟ. ܡܳܐ ܕܰܡܫܰܪܶܐ ܐܰܢ̱ܬ ܡܰܓܠܳܐ ܒܩܳܝܶܡܬܳܐ. ܫܰܪܳܐ ܠܡܶܡܢܳܐ ܫܰܒܥܳܐ ܫܳܒܽܘ̈ܥܺܝܢ.
10 ܘܰܥܒܶܕ ܥܰܕܥܺܐܕܳܐ ܕܫܳܒܽܘܥ̈ܶܐ ܠܡܳܪܝܳܐ ܐܰܠܳܗܳܟ. ܡܶܣܰܬ ܦܽܘܪܫܳܢܳܐ ܕܺܐܝܕܰܝ̈ܟ ܕܦܳܪܶܫ ܐܰܢ̱ܬ. ܐܰܝܟܰܢܳܐ ܕܒܰܪܟܳܟ ܡܳܪܝܳܐ ܐܰܠܳܗܳܟ.
11 ܘܰܚܕܺܝ ܩܕܳܡ ܡܳܪܝܳܐ ܐܰܠܳܗܳܟ. ܐܰܢ̱ܬ ܘܰܒܪܳܟ. ܘܒܰܪܬܳܟ. ܘܥܰܒܕܳܟ. ܘܰܐܡܬܳܟ. ܘܠܶܘܝܳܐ ܕܰܒܩܽܘܖ̈ܝܳܟ. ܘܥܳܡܽܘܪܳܐ. ܘܝܰܬܡܳܐ. ܘܰܐܪܡܰܠܬܳܐ ܕܰܒܓܰܘܳܟ. ܒܰܐܬܪܳܐ ܕܓܳܒܶܐ ܡܳܪܝܳܐ ܐܰܠܳܗܳܟ ܠܡܰܫܪܳܝܽܘ ܫܡܶܗ ܬܰܡܳܢ.
12 ܘܶܐܬܕܟܰܪ ܕܥܰܒܕܳܐ ܗܘܰܝܬ ܒܡܶܨܪܶܝܢ. ܛܰܪ ܘܰܥܒܶܕ ܗܳܠܶܝܢ ܟܽܠܗܽܘܢ ܢܳܡܽܘܣ̈ܶܐ. ܕܥܰܠ ܡܛܰܠ̈ܠܶܐ.
13 ܥܰܕܥܺܐܕܳܐ ܕܰܡ̈ܛܰܠܠܶܐ ܥܒܶܕ ܠܳܟ ܫܰܒܥܳܐ ܝܰܘܡܺܝ̈ܢ ܡܳܐ ܕܚܳܡܶܠ ܐܰܢ̱ܬ ܡܶܢ ܐܶܕܪܳܐ ܘܡܶܢ ܡܰܥܨܰܪܬܳܐ.
14 ܘܰܚܕܺܝ ܒܥܰܕܥܺܐܕܳܟ ܐܰܢ̱ܬ. ܘܰܒܪܳܟ. ܘܒܰܪܬܳܟ. ܘܥܰܒܕܳܟ. ܘܰܐܡܬܳܟ. ܘܠܶܘܳܝܳܐ. ܘܥܳܡܽܘܪܳܐ. ܘܝܰܬܡܳܐ. ܘܰܐܪܡܰܠܬܳܐ ܕܰܒܩܽܘܖ̈ܝܳܟ.
15 ܫܰܒܥܳܐ ܝܰܘܡܺܝ̈ܢ ܥܒܶܕ ܥܰܕܥܺܐܕܳܐ ܠܡܳܪܝܳܐ ܐܰܠܳܗܳܟ ܒܰܐܬܪܳܐ ܕܓܳܒܶܐ ܡܳܪܝܳܐ. ܕܰܢܒܰܪܟܳܟ ܡܳܪܝܳܐ ܐܰܠܳܗܳܟ ܒܟܽܠܳܗ̇ ܥܠܰܠܬܳܟ. ܘܰܒܟܽܠܶܗ ܥܒܳܕܳܐ ܕܺܐܝܕܰܝ̈ܟ. ܘܬܶܗܘܶܐ ܚܳܕܶܐ.
16 ܬܠܳܬ ܙܰܒܢܺܝ̈ܢ ܒܫܰܢ̱ܬܳܐ ܢܶܬܚܙܽܘܢ ܕܽܘܟܖ̈ܳܢܰܝܟ ܩܕܳܡ ܡܳܪܝܳܐ ܐܰܠܳܗܳܟ ܒܰܐܬܪܳܐ ܕܓܳܒܶܐ. ܒܥܰܕܥܺܐܕܳܐ ܕܦܰܛܺܝܖ̈ܶܐ. ܘܰܒܥܰܕܥܺܐܕܳܐ ܕܫܳܒܽܘܥ̈ܶܐ. ܘܰܒܥܰܕܥܺܐܕܳܐ ܕܰܡ̈ܛܰܠܠܶܐ. ܘܠܳܐ ܬܶܬܚܙܶܐ ܩܕܳܡ ܡܳܪܝܳܐ ܐܰܠܳܗܳܟ ܣܪܺܝܩܳܐܺܝܬ.
17 ܐܶܠܳܐ ܐ̱ܢܳܫ ܐܰܝܟ ܡܰܘܗܰܒܬܳܐ ܕܺܐܝܕܶܗ. ܐܰܝܟ ܒܽܘܪܟܬܳܐ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ. ܕܥܰܠ ܕܰܝܳܢ̈ܶܐ ܘܣܳܦܖ̈ܶܐ.
18 ܕܰܝܳܢ̈ܶܐ ܘܣܳܦܖ̈ܶܐ ܥܒܶܕ ܠܳܟ ܒܟܽܠܗܶܝܢ ܩܽܘܖ̈ܝܳܐ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ. ܠܫܰܒܛܰܝ̈ܟ. ܘܰܢܕܽܘܢܽܘܢ ܠܥܰܡܳܐ ܕܺܝܢ̈ܶܐ ܕܙܰܕܺܝܩܽܘܬܳܐ.
19 ܠܳܐ ܬܶܨܠܶܐ ܕܺܝܢܳܐ. ܘܠܳܐ ܬܶܣܰܒ ܒܰܐܦ̈ܶܐ. ܘܠܳܐ ܬܩܰܒܶܠ ܫܽܘܚܕܳܐ. ܡܶܛܽܠ ܕܫܽܘܚܕܳܐ ܡܥܰܘܰܪ ܥܰܝܢܰܝ̈ܗܽܘܢ ܕܚܰܟܺܝ̈ܡܶܐ ܒܕܺܝܢܳܐ. ܘܡܰܗܦܶܟ ܡܶܠܰܝ̈ܗܽܘܢ ܕܙܰܟܳܝ̈ܶܐ.
20 ܐܶܠܳܐ ܒܙܰܕܺܝܩܽܘܬܳܐ ܕܽܘܢ ܚܰܒܪܳܟ. ܕܬܺܚܶܐ. ܘܬܶܥܽܘܠ ܘܬܺܐܪܰܬ ܐܰܪܥܳܐ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ.
21 ܠܳܐ ܬܶܨܽܘܒ ܠܳܟ ܫܶܬܠ̈ܳܬܳܐ ܕܟܽܠ ܐܺܝܠܳܢ ܥܰܠ ܓܶܢ̱ܒ ܡܰܕܒܚܳܐ ܕܡܳܪܝܳܐ ܐܰܠܳܗܳܟ ܕܬܶܥܒܶܕ ܠܳܟ.
22 ܘܠܳܐ ܬܩܺܝܡ ܠܳܟ ܩܳܝܶܡܬܳܐ ܡܶܕܶܡ ܕܣܳܢܶܐ ܡܳܪܝܳܐ ܐܰܠܳܗܳܟ.